16
Kol bare diwessa, hoi kharenn Passa
1 Denn jak, te bistrenn gar kol bare diwessa, kai kharenn Passa! Rikrenn len an o tchon Abib, te sharenn tumaro baro Debles! O tchon Abib his, kai anas lo tumen rati dran o them Egiptia win. 2 Djan ap koi platsa, hoi tumaro baro Dewel peske win rodell, te well job kote an-mangedo. Un kote marenn leske i viecho, nai well i bakro, i busni oder i grumni, hoi chan pash o chapen, hoi well Passa kharedo. 3 Te chan tumer ko chapen, ma chan maro koi pashel, kai shutlo jarro dren hi. Har djan tumenge dran o them Egiptia win, hunte chan efta diwessa maro, an koleste kek shutlo jarro dren his, jaake sik hunte nashenn tumenge. Kanna chan ninna efta diwessa maro, kai kek shutlo jarro dren hi, te bistrenn gar ko diwes, kai djan dran o them Egiptia win, kai anan le jaake bud duka ap tumende. Doleske kharah mer kau maro ‘dukengro maro’. 4 Un efta diwessa well kek shutlo jarro pash tumende diklo an tumaro tselo them. Un ko mass ko viechestar, hoi tumer an koi rat maran, hunte chan tumer an koi emligi rat. Tchi te atchell pral ap i tsalla.
5 Tumer nai marenn gar kol viechen o chapaske Passa an tumare gaba un forja, kolen tumaro baro Dewel tumen dell, te djiwenn kote. 6 Na-a, ap koi platsa, hoi tumaro baro Dewel peske win rodell, kote marenn kol viechen o chapaske Passa. Krenn kowa ap i rat, te djal o kham tele. Kowa hi ko tsiro, har tumer dran o them Egiptia win djan. 7 Kerenn ko mass, un chan les ap koi platsa, hoi tumaro baro Dewel peske win rodell. Un o wawar diwes taissarlakro djan pale khere! 8 Palle chan shob diwessa sawo maro, an koleste kek shutlo jarro hi! Un ap o eftato diwes awenn khetne, te sharenn tumaro baro Debles! Ap ko diwes krenn kek budi!
Ko baro diwes, kai anenn i Israelitarja o Debleske lengro newo djobestar
9 Efta kurkea pal ko diwes, kai djan win ap tumari phub te tchinenn o djob tele, 10-11 awenn khetne glan tumaro baro Debleste, ap koi platsa, kai job peske win rodell, te well lo kote an-mangedo. Anenn leske kolestar, hoi dren anan, kowa, hoi kamenn tumendar win dran tumaro wast te dell, jaake har tumaro baro Dewel tumende peskri bacht das. Un awenn bachteles glan leste, tumer un tumare tchawe, un tumare budepangre un i Levitarja un i wi-themarja, kai pash tumende djiwenn, ninna kol tchawe kek dadeha un kol djuwjen kolengro rom meras. 12 Un ma bistrenn, te hans tumer pandle budepangre an o them Egiptia. Un denn jak ap kal laba, te rikrenn tumen ap lende!
Kol bare diwessa, kai djiwenn tumer an patjengre khera
13 Un pal i nijal, te dan tumaro tselo djob win un anan i drake dren, rikrenn kol bare diwessa dren, kai djiwenn an patjengre khera. Efta diwessa djiwenn an lende, 14 chan un awenn bachtelo, tumer un tumare tchawe un tcha, tumare budepangre un i Levitarja un wi-themarja, kai pash tumende djiwenn, ninna i tchawe, kolen kek dad buder hi, un kol djuwja, kolengro rom meras. 15 Efta diwessa chan un awenn bachteles glan tumaro baro Debleste ap koi platsa, hoi job peske win rodell. Job tchiwas peskri bacht ap halauter, hoi ap tumari phub bares was un ap tumari tseli budi. Doleske awenn bachtelo!
16 Triin kope an o bersh hunte wenn tumare tsele mursha glan tumaro baro Debleste ap koi platsa, hoi job peske win rodell: ap kol bare diwessa, kai chan kek maro dran shutlo jarro, un ap ko baro diwes, kai anenn o baro Debleske o newo djobestar, hoi tumer dren anan, un ap kol diwessa, kai djiwenn an patjengre khera. Un kek well, koles tchi pash peste hi, hoi job o baro Debleske anella. 17 Hakeno della pal kowa, hoi leskro wast nai pre anella, jaake har tumaro baro Dewel leste peskri bacht das.
Tchatchepangre mursha un pralstune
18 Tchiwenn tchatchepangre murshen un wawar pralstunen dren an tumare forja, hoi tumen tumaro baro Dewel della! Jaake te hi an hako them kol deesh-te-dui bare familjendar tchatchepangre, kai rakrenn o tchatchepen jaake win pral pengre menshende, te lell hakeno peskro tchatchepen. 19 Te hal tu i tchatchepaskro, hunte dess tu koles peskro tchatchepen, koon an o tchatchepen hi. Tu dikess gar koi pre, koon glan tute tardo hi. Te dell jek tut kutch koowa, te dess tu les tchatchepen, ma le kowa an! Koon sawo shukar kutch koowa an-lell, well korelo o tchatchepaske, un dikell buder gar, koon an o tchatchepen hi. 20 Rike tut ap kowa hoi tchatches hi, te djiwess an o them, hoi tiro baro Dewel tut dell.
Ma mangenn o baro Debles un ninna i wawar debles an!