ⵉⵥⴻⵀⵀⵉⴷⴻⵏ 144

1 ⵏ ⴷⴰⵡⵓⴷ.

ⴰⴷ ⵉⵜⵜⵡⴰⴱⴰⵔⴻⴽ ⵙⵉⴷⵉ, ⵜⴰⵚⴹⴰⵔⵜ ⵉⵏⵓ,

ⵡⴻⵏⵏⵉ ⵉⵙⵙⴻⵍⵎⴰⴷⴻⵏ ⵉⴼⴰⵙⵙⴻⵏ ⵉⵏⵓ ⵉ ⵓⵎⴻⵏⵖⵉ,

ⵉⴹⴻⵡⴹⴰⵏ ⵉⵏⵓ ⵉ ⵍⵃⴰⵔⴱ.   

2 ⵛⴻⴽ ⵉ ⴷ ⴰⵢⵉ ⵜⴻⴵⵉⴷ ⴷ ⴰⵎⴻⴷⴷⵓⴽⴽⴻⵍ ⵉⵏⵓ

ⵉ ⴷⴰⵢⴻⵙ ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ,

ⵓⵍⴰ ⴷ ⵍⴱⵓⵔⵊ ⵉⵏⵓ, ⵍⴱⵓⵔⵊ ⵉⵏⵓ ⵢⵓⵄⵍⴰⵏ

ⴷ ⴰⵎⵙⴻⵏⵊⴻⵎ ⵉⵏⵓ,

ⵜⴰⵙⴻⴷⴷⴰⵔⵜ ⵉⵏⵓ ⵉ ⵓⵙⴻⵍⵇⵉ,

ⴷ ⵡⴻⵏⵏⵉ ⵖⴰⵔ ⴰⵔⴻⴽⴽⵡⴰⵍⴻⵖ,

ⴷ ⵡⴻⵏⵏⵉ ⴷ ⴰⵢⵉ ⵉⵙⵙⵡⴰⴹⴹⵄⴻⵏ ⵍⴳⴻⵏⵙ ⵉⵏⵓ.   

3 ⴰ ⵙⵉⴷⵉ, ⵎⵉⵏ ⵉⵄⵏⴰ ⴱⵏⴰⴷⴻⵎ,

ⴰⵇⴰ ⵛⴻⴽ ⵜⴻⵅⵙⴻⴷ ⴰⴷ ⵜ ⵜⴻⵙⵙⵏⴻⴷ?

ⵎⵎⵉⵙ ⵏ ⴱⵏⴰⴷⴻⵎ,

ⴰⵇⴰ ⵛⴻⴽ ⵜᵉⵜⵜⵅⴰⵔⵔⵉⵚⴻⴷ ⴷⴰⵢⴻⵙ?   

4 ⴱⵏⴰⴷⴻⵎ ⴰⵎⴻⵛⵏⴰⵡ ⵍⴻⴼⵡⴰⵔ,

ⵓⵙⵙⴰⵏ ⵏⵏⴻⵙ ⴰⴷ ⵄⴷⵓⵏ ⴰⵎ ⵜⵉⵍⵉ.   

5 ⵎⴻⵢⵢⴻⵍ ⵉⵊⴻⵏⵡⴰⵏ ⵏⵏⴻⵛ, ⴰ ⵙⵉⴷⵉ, ⵀⵡⴰ-ⴷⴷ.

ⵃⴰⴷⴰ ⵉⴷⵓⵔⴰⵔ, ⵅⴻⵏⵏⵉ ⴰⴷ ⴳⴳⴻⵏ ⴷⴷⴻⵅⵅⴰⵏ.   

6 ⵥⴰⵔⵢⴻⴹ ⴰⵙⵙⴰⵎⴻⵏ ⵓ ⵣⴻⴵⴻⵄ ⵉ-ⵜⴻⵏ,

ⵙⴻⴽⴽ ⴼⵍⵉⵜⵛⴰⵜ ⵏⵏⴻⵛ ⵓ ⵙⵅⴰⵔⵡⴻⴹ ⵉ-ⵜⴻⵏ.   

7 ⵙⵡⵉⵥⵥⴻⴹ ⵉⴼⴰⵙⵙⴻⵏ ⵏⵏⴻⵛ ⵣⵉ ⵙⴻⵏⵏⴻⵊ,

ⵙⵓⴼⴼⴻⵖ ⴰⵢⵉ-ⴷⴷ ⵓ ⴼⴻⴽⴽ ⴰⵢⵉ

ⵣⵉ ⵍⵃⴻⵎⵍⴰⵜ ⵏ ⵡⴰⵎⴰⵏ ⵜⵉⵎⴻⵇⵇⵔⴰⵏⵉⵏ,

ⵣⴻⴳ ⵓⴼⵓⵙ ⵏ ⵉⴱⴰⵔⵔⴰⵏⵉⵢⵢⴻⵏ,

8 ⵎⴰⵖⴰⵔ ⴰⵇⴻⵎⵎⵓⵎ ⵏⵙⴻⵏ ⵉⵇⵇⴰⵔ ⵉⵅⴰⵔⵔⵉⵇⴻⵏ,

ⴰⴼⵓⵙ ⵏⵙⴻⵏ ⴰⴼⵓⵙⵉ ⴷ ⵉⵊⵊ ⵏ ⵓⴼⵓⵙ ⵉⵛⵛⵓⵔ ⵙ ⵍⵖⴻⵛⵛ.

9 ⴰ ⴰⵔⴻⴱⴱⵉ, ⴰⴷ ⴰⵛ ⵖⴻⵏⵏⵊⴻⵖ

ⵉⵊⵊ ⵏ ⵢⴻⵣⵍⵉ ⴷ ⵏ ⵊⴷⵉⴷ ⵉ ⵛⴻⴽ,

ⵙ ⵍⵀⴰⵔⴱⴰ ⵓ ⵙ ⵍⵄⵓⴷ ⵙ ⵄⴻⵛⵔⴰ ⵏ ⵉⴼⵉⵍⴰⵏ

ⴰⴷ ⴰⵛ ⵣⴻⵀⵀⴷⴻⵖ.

10 ⵛⴻⴽ ⴷ ⵡⴻⵏⵏⵉ ⵉⵙⵙⴰⵡⴰⴹⴻⵏ

ⴰⵙⴻⵏⵊⴻⵎ ⵉ ⵉⵊⴻⵊⴵⵉⴷⴻⵏ,

ⴷ ⵡⴻⵏⵏⵉ ⵉⴼⴻⴽⴽⴻⵏ ⴰⵎⵙⴻⵅⵅⴰⵔ ⵏⵏⴻⵙ ⴷⴰⵡⵓⴷ

ⵣⵉ ⵙⵙⵉⴼ ⴰⵄⴻⴼⴼⴰⵏ,

11 ⵙⵓⴼⴼⴻⵖ ⴰⵢⵉ-ⴷⴷ ⵓ ⴼⴻⴽⴽ ⴰⵢⵉ

ⵣⴻⴳ ⵓⴼⵓⵙ ⵏ ⵜⴰⵔⵡⴰ ⵏ ⵓⴱⴰⵔⵔⴰⵏⵉ,

ⵣⴻⴳ ⵡⴻⵏⵏⵉ ⵖⴰⵔ ⵉⴵⴰ ⵓⵇⴻⵎⵎⵓⵎ

ⵉ ⵉⵇⵇⴰⵔⴻⵏ ⵎⵖⵉⵔ ⵉⵅⴰⵔⵔⵉⵇⴻⵏ,

ⵓ ⵣⴻⴳ ⵡⴻⵏⵏⵉ ⵖⴰⵔ ⵉⴵⴰ ⵓⴼⵓⵙ ⴰⴼⵓⵙⵉ

ⵉⵛⵛⵓⵔ ⵙ ⵍⵖⴻⵛⵛ.

12 ⵎⴻⵄⵍⵉⴽ ⵉⵃⴻⵏⵊⵉⵔⴻⵏ ⵏⵏⴻⵖ

ⴰⴷ ⵉⵍⵉⵏ ⴰⵎ ⵢⵉⵖⴻⴷⴷⵉⵡⴻⵏ,

ⵉⵏⵏⵉ ⵉⵎⵖⴰⵔⴻⵏ ⵄⴰⴷ ⴷⵉ ⵜⴻⵎⵥⵉ ⵏⵙⴻⵏ,

ⵢⴻⵙⵙⵉⵜⵏⴻⵖ ⴰⵎ ⵜⵖⴻⵎⵎⴰⵔ

ⵉ ⴳⴳⵉⵏ ⵙ ⵓⴽⴻⵛⵛⵓⴹ

ⵙ ⵄⵍⴰⵎ ⴽⵓⵍ ⴰⵔⵛⴰⵎⴻⵏ,

ⴳⴳⵉⵏ ⵜⴻⵏⵜ ⵉ ⵢⵉⵛⵜ ⵏ ⵣⵣⴰⵡⴻⵛⵜ ⵉⵇⴻⴷⴷⵙⴻⵏ.

13 ⴰⴷ ⵛⵛⵓⵔⴻⵏ ⵍⴻⵀⵔⵉⵜ ⵏⵏⴻⵖ,

ⴰⴷ ⵡⵛⴻⵏ ⵣⵣⴰⴷ ⴰⵡⴰⵔⵏⵉ ⵣⵣⴰⴷ,

ⴰⴷ ⵢⴰⵔⵏⵉ ⵡⵓⴵⵉ ⵏⵏⴻⵖ ⵙ ⵍⵓⵍⵓⴼ ⵏ ⵜⵙⴻⵇⵇⴰⵔ,

ⵙ ⵄⴻⵛⵔⴰ ⵏ ⵍⵓⵍⵓⴼ ⵏ ⵜⵙⴻⵇⵇⴰⵔ

ⴷⵉ ⴷⴷⵎⴰⵏⵉ ⵏ ⵜⴰⵔⴻⵡⵙⴰ ⵏⵏⴻⵖ.

14 ⴰⴷ ⵃⴻⵎⵍⴻⵏ ⵉⵎⵡⴰⵏ ⵏⵏⴻⵖ ⵎⵍⵉⵃ,

ⵡⴰⵔ ⵉⵜⵜⵉⵍⵉ ⵄⴰⴷ ⵓⵀⵊⴰⵎ

ⵏⵉⵖ ⴷ ⵓⴼⴼⵓⵖ ⵉ ⵓⵎⴻⵏⵖⵉ

ⵓⵍⴰ ⴷ ⵉⵖⵓⵢⵢⴰⵏ ⴷⴻⴳ ⵡⴰⵣⵣⴰⵢⴻⵏ ⵏⵏⴻⵖ.

15 ⵙⵙⴻⵄⴷ ⵏ ⵍⴳⴻⵏⵙ ⵏⵏⵉ ⵉⴵⴰⵏ ⴰⵎⵢⴰ.

ⵙⵙⴻⵄⴷ ⵏ ⵍⴳⴻⵏⵙ ⵏⵏⵉ ⵣⵉ ⴰⵔⴻⴱⴱⵉ ⵏⵙⴻⵏ ⴷ ⵙⵉⴷⵉ.