ⵉⵥⴻⵀⵀⵉⴷⴻⵏ 143

1 ⴰⵥⴻⵀⵀⴻⴷ ⵏ ⴷⴰⵡⵓⴷ.

ⴰ ⵙⵉⴷⵉ, ⵙⴻⵍ ⵉ ⵜⵥⴰⴵⵉⵜ ⵉⵏⵓ, ⵙⵃⴻⵙⵙ ⵉ ⵓⵥⴰⵡⴻⴳ ⵉⵏⵓ.

ⴰⵔⵔ-ⴷⴷ ⵅⴰⴼⵉ ⵄⵍⴰⵃⵙⴰⴱ ⵜⵉⴷⴻⵜⵜ ⵏⵏⴻⴽ, ⵄⵍⴰⵃⵙⴰⴱ ⵜⴰⵙⴻⴳⴷⴰ ⵏⵏⴻⴽ.

2 ⵡⴰⵔ ⵜⵜⴻⴳⴳ ⵛⵛⵔⴻⵄ ⴰⴽ-ⴷ ⵓⵎⵙⴻⵅⵅⴰⵔ ⵏⵏⴻⴽ,

ⵎⴰⵖⴰⵔ ⵓⵍⴰ ⴷ ⵉⵊⵊ ⵥⴻⴳ ⵉⵏⵏⵉ ⵉⴷⴷⴰⵔⴻⵏ ⴰⴷ ⵢⵉⵍⵉ ⴷ ⴰⵎⵙⴻⴳⴳⴻⴷ ⵥⵥⴰⵜ ⵉ ⵡⵓⴷⴻⵎ ⵏⵏⴻⴽ.   

3 ⵎⵉⵏⵥⵉ ⵍⴻⵄⴷⵓ ⵉⴹⴻⴼⴼⴰⵔ ⵍⴻⵄⵎⴰⵔ ⵉⵏⵓ,

ⵉⵄⴻⴼⴼⴻⵙ ⵅ ⵜⵓⴷⴰⵔⵜ ⵉⵏⵓ ⵖⴰⵔ ⵜⴻⵎⵎⵓⵔⵜ,

ⵉⵙⵙⵔⵓⵙⴰ ⴰⵢⵉ ⴷⴻⴳ ⵉⵎⵓⵛⴰⵏ ⵏ ⵜⴰⴵⴻⵙⵜ,

ⴰⵎ ⵢⴻⵏⵏⵉ ⵉⵎⵎⵓⵜⴻⵏ ⵥⵉ ⵎⴻⵛⵃⴰⵍ ⵓⵢⴰ.

4 ⴱⵓⵃⴱⴻⵍ ⵉⵏⵓ ⵉⵜⵜⴻⴼⵛⵉⵍ ⵅⴰⴼⵉ,

ⵓⵍ ⵉⵏⵓ ⵢⴰⵔⴻⵡⵡⴻⵄ ⴷⵉ ⴷⴰⵅⴻⵍ ⵉⵏⵓ.

5 ⵏⴻⵛⵛ ⵜⵜⵄⴻⵇⵍⴻⵖ ⵅ ⵡⵓⵙⵙⴰⵏ ⵉⵄⴷⵓⵏ,

ⵜⵜⵅⴻⵎⵎⴰⵎⴻⵖ ⴷⵉ ⵎⴰⵔⵔⴰ ⵜⵉⵎⴻⴳⴳⴰ ⵏⵏⴻⴽ,

ⵜⵜⵅⴰⵔⵔⵚⴻⵖ ⴷⵉ ⵍⴻⴼⵄⴰⵢⴻⵍ ⵏ ⵉⴼⴰⵙⵙⴻⵏ ⵏⵏⴻⴽ.   

6 ⵏⴻⵛⵛ ⵜⵜⴱⴻⵥⵥⵄⴻⵖ ⵉⴼⴰⵙⵙⴻⵏ ⵉⵏⵓ ⵖⴰⵔⴻⴽ,

ⵍⴻⵄⵎⴰⵔ ⵉⵏⵓ ⴰⵇⴰ-ⵜ ⵥⵥⴰⵜⴻⴽ ⴰⵎ ⵉⵛⵜ ⵏ ⵜⴻⵎⵎⵓⵔⵜ ⵉⴼⴼⵓⴷⴻⵏ. ⵙⵉⵍⴰⵀ.

7 ⴰⵔⵔ-ⴷⴷ ⵅⴰⴼⵉ ⴷⴻⵖⵢⴰ, ⴰ ⵙⵉⴷⵉ, ⴱⵓⵃⴱⴻⵍ ⵉⵏⵓ ⵉⵜⵜⴻⴼⵛⵉⵍ,

ⵡⴰⵔ ⵙⵙⵏⵓⴼⴼⴰⵔⴰ ⵓⴷⴻⵎ ⵏⵏⴻⴽ ⵥⵥⴰⵢⵉ,

ⵎⴰⵃⴻⵏⴷ ⵡⴰⵔ ⴷⴷⵉⴽⴽⵡⵉⵍⴻⵖ ⴰⵎ ⵢⴻⵏⵏⵉ ⴷⴷ-ⵉⵀⴻⴽⴽⵡⴰⵏ ⴷⴻⴳ ⵡⴻⵃⴼⵓⵔ ⵏ ⵡⴻⵏⴹⴻⵍ.

8 ⴻⵊⵊ ⴰⵢⵉ ⴰⴷ ⵙⵍⴻⵖ ⵉ ⵜⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ ⵖⴰⵔ ⵜⴻⴼⴼⵓⵜ,

ⵎⴰⵖⴰⵔ ⵜⵜⴻⵛⵍⴻⵖ ⵅⴰⴽ.

ⵙⵛⴻⵏ ⴰⵢⵉ ⴰⴱⵔⵉⴷ ⵉ ⵖⴰ ⵓⵢⵓⵔⴻⵖ,

ⵎⴰⵖⴰⵔ ⵙⵙⴳⴻⵄⵄⴷⴻⵖ ⵍⴻⵄⵎⴰⵔ ⵉⵏⵓ ⵖⴰⵔⴻⴽ.   

9 ⴰ ⵙⵉⴷⵉ, ⴽⴽⴻⵙ ⴰⵢⵉ-ⴷⴷ ⵉ ⵍⵄⴻⴷⵢⴰⵏ ⵉⵏⵓ,

ⵖⴰⵔⴻⴽ ⵉ ⴷⴷ-ⴰⵔⴻⵡⵍⴻⵖ.

10 ⵙⴻⵍⵎⴻⴷ ⴰⵢⵉ ⴰⴷ ⴳⴳⴻⵖ ⵎⵉⵏ ⵉⴵⴰⵏ ⵉ ⴰⵔⴹⴰ ⵏⵏⴻⴽ, ⵎⴰⵖⴰⵔ ⵛⴻⴽ ⴷ ⴰⵔⴻⴱⴱⵉ ⵉⵏⵓ.

ⴻⵊⵊ ⴰⵔⵔⵓⵃ ⵏⵏⴻⴽ ⵉⵚⴻⴱⵃⴻⵏ ⴰⴷ ⴰⵢⵉ ⵉⵏⴷⴻⵀ ⴷⴻⴳ ⵉⵛⵜ ⵏ ⵜⴻⵎⵎⵓⵔⵜ ⵉⵡⴰⵟⴰⵏ.

11 ⴰ ⵙⵉⴷⵉ, ⴰⵔⵔ-ⴷⴷ ⴷⴰⵢⵉ ⵜⵓⴷⴰⵔⵜ ⴷⵉ ⵟⵟⵡⴻⵄ ⵏ ⵢⵉⵙⴻⵎ ⵏⵏⴻⴽ.

ⵙ ⵜⵙⴻⴳⴷⴰ ⵏⵏⴻⴽ, ⵙⵓⴼⴼⴻⵖ ⵍⴻⵄⵎⴰⵔ ⵉⵏⵓ ⵥⵉ ⵍⴻⵃⵚⴰⵔⴻⵜ,

12 ⴰⵔⴻⴷⴷⴻⴵ ⵍⵄⴻⴷⵢⴰⵏ ⵉⵏⵓ ⴷⵉ ⵜⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ,

ⵇⴹⴰ ⵅ ⵎⴰⵔⵔⴰ ⵉⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ,

ⵎⴰⵖⴰⵔ ⵏⴻⵛⵛ ⴷ ⵓⵎⵙⴻⵅⵅⴰⵔ ⵏⵏⴻⴽ.