ⵉⵥⴻⵀⵀⵉⴷⴻⵏ 142

1 ⴰⵅⴻⵎⵎⵉ ⵏ ⴷⴰⵡⵓⴷ.

ⵜⴰⵥⴰⴵⵉⵜ ⵓⵎⵉ ⵜ ⵜⵓⵖⴰ ⴷⴻⴳ ⵢⴻⴼⵔⵉ.

2 ⵙ ⵜⵎⵉⵊⵊⴰ ⵉⵏⵓ ⵙⵖⵓⵢⴻⵖ ⵖⴰⵔ ⵙⵉⴷⵉ,

ⵙ ⵜⵎⵉⵊⵊⴰ ⵉⵏⵓ ⵃⴻⵛⵛⵎⴻⵖ ⵙⵉⴷⵉ.

3 ⵏⴻⵛⵛ ⵜⵜⵣⴻⴵⴰⵄⴻⵖ ⵉⴼⴻⵇⵇⵓⵚⴻⵏ ⵉⵏⵓ

ⵣⵣⴰⵜ ⵉ ⵡⵓⴷⴻⵎ ⵏⵏⴻⵙ,

ⵙⵙⴰⵔⴳⴱⴻⵖ ⴰⵙ ⵍⴻⵃⵚⴰⵔⴻⵜ ⵉⵏⵓ

ⵣⵣⴰⵜ ⵉ ⵡⵓⴷⴻⵎ ⵏⵏⴻⵙ.

4 ⵎⴰⵍⴰ ⴱⵓⵃⴱⴻⵍ ⵉⵏⵓ ⵉⴷⵇⴻⵍ ⵅⴰⴼⵉ ⴰⵟⵟⴰⵙ,

ⵛⴻⴽ ⵜⴻⵙⵙⵏⴻⴷ ⴰⵎⴻⵙⵔⵓⵇ ⵉⵏⵓ.

ⵏⵉⵜⵏⵉ ⵙⵙⵏⵓⴼⴼⴰⵔⴻⵏ ⴰⵢⵉ ⵉⵊⵊ ⵏ ⵍⴼⴻⵅ

ⴷⴻⴳ ⵡⴻⴱⵔⵉⴷ ⵏⵏⵉ ⴷⵉ ⵖⴰ ⵓⵢⵓⵔⴻⵖ.   

5 ⵙⵡⴻⴹ ⵖⴰⵔ ⵓⴼⵓⵙⵉ, ⵓ ⵅⵣⴰⵔ,

ⵡⴰⵔ ⴷⵉⵏ ⵜⵓⵖⵉ ⵃⴻⴷ

ⵉ ⴷ ⴰⵢⵉ ⵖⴰ ⵉⵡⵛⴻⵏ ⵜⴰⵢⵏⵉⵜ,

ⵉⵜⵜⵡⴰⴽⴽⴻⵙ ⴰⵢⵉ ⵇⴰⵄ ⵎⴰⵏⵉ ⵖⴰ ⴰⵔⴻⵡⵍⴻⵖ,

ⵡⴰⵔ ⴷⵉⵏ ⵜⵓⵖⵉ ⵓⵍⴰ ⴷ ⵉⵊⵊ

ⵉ ⵖⴰ ⵉⵙⵙⴻⵇⵙⴰⵏ ⵅ ⵍⴻⵄⵎⴰⵔ ⵉⵏⵓ.

6 ⵏⴻⵛⵛ ⵙⵖⵓⵢⵢⵓⵖ-ⴷⴷ ⵖⴰⵔⴻⴽ, ⴰ ⵙⵉⴷⵉ. ⵇⵇⴰⵔⴻⵖ:

“ⵛⴻⴽ ⴷ ⴰⵎⵛⴰⵏ ⵉⵏⵓ ⵏ ⵜⴰⵔⴻⵡⵍⴰ,

ⵜⴰⵙⵖⴰⵔⵜ ⵉⵏⵓ ⴷⵉ ⵜⴻⵎⵎⵓⵔⵜ ⵏ ⵢⵉⵏⵏⵉ ⵉⴷⴷⴰⵔⴻⵏ.  

7 ⵃⴹⴰ ⵅ ⵓⵖⵓⵢⵢⵉ ⵉⵏⵓ, ⵎⴰⵖⴰⵔ ⴼⵏⵉⵖ ⵇⴰⵄ.

ⴼⴻⴽⴽ ⴰⵢⵉ ⵣⴻⴳ ⵉⵏⵏⵉ ⴷ ⴰⵢⵉ ⵉⴹⴻⴼⴼⴰⵔⴻⵏ,

ⵎⴰⵖⴰⵔ ⵏⵉⵜⵏⵉ ⵊⴻⵀⴷⴻⵏ ⵅⴰⴼⵉ.   

8 ⵙⵓⴼⴼⴻⵖ ⵍⴻⵄⵎⴰⵔ ⵉⵏⵓ ⵣⵉ ⵍⴻⵃⴱⴻⵙ

ⵎⴰⵃⴻⵏⴷ ⴰⴷ ⵇⴰⴷⵉⵖ ⵉⵙⴻⵎ ⵏⵏⴻⵛ.

ⵉⵎⵙⴻⴳⴳⴰⴷⴻⵏ ⴰⴷ ⴰⵢⵉ ⴷⴷ-ⵏⵏⴹⴻⵏ,

ⵎⴰⵖⴰⵔ ⵛⴻⴽ ⵜᵉⵜⵜⴻⴳⴳⴻⴷ ⴷⴰⵢⵉ ⵙ ⵜⵛⵓⵏⵉ.”