ⴰⵢⵓⴱ
ⴰⵔⵢⴰⵣ ⴰⵢⵓⴱ
1
1 ⵜⵓⵖⴰ ⴷⵉⵏ ⵉⵊⵊ ⵏ ⵡⴻⵔⵢⴰⵣ ⴷⵉ ⵜⴻⵎⵎⵓⵔⵜ ⵏ ⵄⵓⵚ ⵇⵇⴰⵔⴻⵏ ⴰⵙ ⴰⵢⵓⴱ. ⴰⵔⵢⴰⵣ-ⴰ ⵜⵓⵖⴰ ⵉⴽⵎⴻⵍ ⴷ ⴰⵎⵙⴻⴳⴳⴻⴷ, ⵉⵜⵜⴻⴳⴳⵯⴻⴷ ⵣⵉ ⴰⵔⴻⴱⴱⵉ ⵓ ⵉⵜⵜⵃⴻⵢⵢⴰⴷ ⵅ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ. ■ 2 ⵜⵜⵡⴰⵔⵡⴻⵏ ⴰⵙ-ⴷⴷ ⵙⴻⴱⵄⴰ ⵏ ⵉⵃⴻⵏⵊⵉⵔⴻⵏ ⴷ ⵜⵍⴰⵜⴰ ⵏ ⵜⵃⴻⵏⵊⵉⵔⵉⵏ. ■ 3 ⵜⴰⵃⵉⵎⴰⵔⵜ ⵏ ⵍⵎⴰⵍ ⵏⵏⴻⵙ ⴷⴰⵢⴻⵙ ⵙⴻⴱⵄⴰ-ⴰⵍⴰⴼ ⵏ ⵡⵓⴵⵉ ⵓ ⵜⴻⵍⵜ-ⴰⵍⴰⴼ ⵏ ⵉⵍⴻⵖⵎⴰⵏ ⴷ ⵅⴻⵎⵙⴰ-ⵎⵢⴰ ⵏ ⵜⵢⵓⵢⴰⵡⵉⵏ ⵏ ⵉⵢⴻⵏⴷⵓⵣⴻⵏ ⴷ ⵅⴻⵎⵙⴰ-ⵎⵢⴰ ⵏ ⵜⴻⵖⵢⴰⵍ, ⴰⵔⵏⵉ ⵖⴰⵔⴻⵙ ⴰⴱⴰⵔⵔⵓ ⵏ ⵉⵙⴻⵎⵖⴰⵏ. ⴰⵔⵢⴰⵣ-ⴰ ⵜⵓⵖⴰ ⴷ ⴰⵎⴻⵇⵇⵔⴰⵏ ⵅ ⵎⴰⵔⵔⴰ ⴰⵔⵔⴰⵡ ⵏ ⵛⵛⴰⵔⵇ. 4 ⵉⵃⴻⵏⵊⵉⵔⴻⵏ ⵏⵏⴻⵙ ⵏⵏⵓⵎⴻⵏ ⵜⵜⴻⴳⴳⴻⵏ ⵉⵊⵊ ⵏ ⵓⵎⴻⵏⵙⵉ, ⴽⵓⵍ ⵉⵊⵊ ⵣⵣⴰⵢⵙⴻⵏ ⵙ ⵏⵏⵓⴱⴻⵜ ⵏⵏⴻⵙ ⴷⴻⴳ ⵡⴰⵙⵙ ⵏⵏⴻⵙ ⴷⵉ ⵜⴰⴷⴷⴰⵔⵜ ⵏⵏⴻⵙ. ⵙⵙⴻⴽⴽⴻⵏ, ⵄⴰⵔⴹⴻⵏ ⵓⵍⴰ ⵅ ⵜⵍⴰⵜⴰ ⵏ ⵙⵓⵢᵉⵜⵎⴰⵜⵙⴻⵏ ⴰⴷ ⴽⵉⴷⵙⴻⵏ ⵛⵛⴻⵏⵜ ⵓ ⴰⴷ ⴽⵉⴷⵙⴻⵏ ⵙⵡⴻⵏⵜ. 5 ⵍⴰⵎⵉ ⵄⴷⵓⵏ ⵡⵓⵙⵙⴰⵏ ⵏ ⵣⵣⴰⵔⴷⴻⵜ ⴰⵡⴰⵔⵏⵉ ⵏⵏⴹⴻⵏ ⵣⵉ ⵜⴰⴷⴷⴰⵔⵜ ⵖⴰⵔ ⵜⴰⴷⴷⴰⵔⵜ ⵏⵏⴻⵖⵏⵉ, ⵉⵙⵙⴻⴽⴽ ⴰⵢⵓⴱ ⵃⵉⵎⴰ ⴰⴷ ⵜⴻⵏ ⵉⵙⵙⵇⴻⴷⴷⴻⵙ. ⵣⵉⵛ ⵖⴰⵔ ⵜⵓⴼⴼⵓⵜ ⵉⴽⴽⴰⵔ ⵓⵛⴰ ⵢⵉⵡⵉ ⴷⵉⵏ ⵜⵉⵖⴰⵔⵚⵉ ⵏ ⵡⴻⵛⵎⴰⴹ ⴰⵏⴻⵛⵜ ⵍⵄⴰⴷⴰⴷ ⵏ ⵎⴰⵔⵔⴰ ⴰⵔⵔⴰⵡⴻⵏ ⵏⵏⴻⵙ. ⵎⴰⵖⴰⵔ ⴰⵢⵓⴱ ⵉⵏⵏⴰ: “ⴰⴷ ⵜⴰⵖ ⵅⴹⴰⵏ ⴰⵔⵔⴰⵡⴻⵏ ⵉⵏⵓ ⵓ ⵃⴻⵢⵢⴷⴻⵏ ⵅ ⴰⵔⴻⴱⴱⵉ ⴷⴻⴳ ⵡⵓⵍ ⵏⵙⴻⵏ.” ⴰⵎⵎⵓ ⵉ ⵉⴳⴳⴰ ⴰⵢⵓⴱ ⵍⴻⴱⴷⴰ. ■
ⵛⵛⵉⵟⴰⵏ ⵉⵜⵜⵛⴻⵜⵛⴰ ⵣⵉ ⴰⵢⵓⴱ
6 ⴷⴻⴳ ⵉⵊⵊ ⵏ ⵡⴰⵙⵙ ⵓⵙⵉⵏ-ⴷⴷ ⴰⵔⵔⴰⵡ ⵏ ⴰⵔⴻⴱⴱⵉ ⵃⵉⵎⴰ ⴰⴷ ⴱⴻⴷⴷⴻⵏ ⵣⵣⴰⵜ ⵉ ⵙⵉⴷⵉ, ⵓⵛⴰ ⵢⵓⵙⴰ-ⴷⴷ ⵓⵍⴰ ⴷ ⵛⵛⵉⵟⴰⵏ ⴷⵉ ⵍⵡⴻⵙⵟ ⵏⵙⴻⵏ. 7 ⵉⵏⵏⴰ ⵙⵉⴷⵉ ⵉ ⵛⵛⵉⵟⴰⵏ: “ⵎⴰⵏⵉⵙ ⵉ ⴷⴷ-ⵜⵓⵙⵉⴷ ⵛⴻⴽ?” ⵢⴰⵔⵔⴰ-ⴷⴷ ⵛⵛⵉⵟⴰⵏ ⵅ ⵙⵉⴷⵉ, ⵉⵏⵏⴰ: “ⵓⵙⵉⵖ-ⴷⴷ ⵣⴻⴳ ⵡⴻⵜⵍⴰⵄ ⵅ ⵜⴻⵎⵎⵓⵔⵜ, ⴽⴽⵉⵖ ⵜⵜ ⵎⴰⵔⵔⴰ.” ■ 8 ⵉⵏⵏⴰ ⵙⵉⴷⵉ ⵉ ⵛⵛⵉⵟⴰⵏ: “ⵎⴰ ⵜⴻⵃⴹⵉⴷ ⴰⵎⵙⴻⵅⵅⴰⵔ ⵉⵏⵓ ⴰⵢⵓⴱ? ⴰⵎ ⵏⴻⵜⵜⴰ ⵡⴰⵔ ⵉⴵⵉ ⵅ ⵜⴻⵎⵎⵓⵔⵜ: ⴷ ⴰⵔⵢⴰⵣ ⵉⴽⵎⴻⵍ, ⵉⴳⴳⵓⵔ ⵏⵉⵛⴰⵏ, ⵉⵜⵜⴻⴳⴳⵯⴻⴷ ⴰⵔⴻⴱⴱⵉ ⵓ ⵉⵜⵜⵃⴻⵢⵢⴰⴷ ⵅ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ!”
9 ⵢⴰⵔⵔⴰ-ⴷⴷ ⵛⵛⵉⵟⴰⵏ ⵅ ⵙⵉⴷⵉ, ⵉⵏⵏⴰ: “ⵎⴰ ⴰⵎⴻⵏⵏⵉ ⵡⴰⵀⴰ ⵉⵜⵜⴻⴳⴳⵯⴻⴷ ⴰⵢⵓⴱ ⴰⵔⴻⴱⴱⵉ? 10 ⵎⴰ ⵡⴰⵔ ⵉⴵⵉ ⴷ ⵛⴻⴽ, ⵡⴻⵏⵏⵉ ⵉⴳⴳⵉⵏ ⵉⵊⵊ ⵏ ⵓⵙⴻⵍⵇⵉ ⵉ ⵏⴻⵜⵜⴰ ⴷ ⵜⴰⴷⴷⴰⵔⵜ ⵏⵏⴻⵙ ⴷ ⵎⴰⵔⵔⴰ ⵎⵉⵏ ⵖⴰⵔⴻⵙ? ⴰⵇⴰ ⵜⴱⴰⵔⴽⴻⴷ ⵜⵉⵎⴻⴳⴳⴰ ⵏ ⵉⴼⴰⵙⵙⴻⵏ ⵏⵏⴻⵙ ⵓⵛⴰ ⵍⵎⴰⵍ ⵏⵏⴻⵙ ⵉⵎⵖⴰⵔ ⴰⵟⵟⴰⵙ ⴷⵉ ⵜⴻⵎⵎⵓⵔⵜ. 11 ⵙⵡⵉⵥⵥⴻⴹ ⵎⵖⵉⵔ ⴰⴼⵓⵙ ⵏⵏⴻⵛ ⵖⴰⵔⴻⵙ, ⵃⴰⴷⴰ ⵎⴰⵔⵔⴰ ⵎⵉⵏ ⵉⴵⴰⵏ ⵏⵏⴻⵙ, ⵎⴰ ⵅⴻⵏⵏⵉ ⵙ ⵜⵉⴷⴻⵜⵜ ⴰⴷ ⵉⴱⴻⵄⵄⴻⴷ ⵅ ⵡⵓⴷⴻⵎ ⵏⵏⴻⵛ?”
12 ⵅⴻⵏⵏⵉ ⵉⵏⵏⴰ ⵙⵉⴷⵉ ⵉ ⵛⵛⵉⵟⴰⵏ: “ⵅⵣⴰⵔ, ⵎⴰⵔⵔⴰ ⵎⵉⵏ ⵖⴰⵔⴻⵙ ⴰⵇⴰ-ⵜ ⴷⴻⴳ ⵓⴼⵓⵙ ⵏⵏⴻⵛ. ⵎⵖⵉⵔ ⵡⴰⵔ ⴷ ⴰⵙ ⵙⵡⵉⵥⵥⵉⴹ ⴰⴼⵓⵙ ⵏⵏⴻⵛ ⵡⴰⵀⴰ!” ⵅⴰⵙ ⵓⵛⴰ ⵢⵓⵢⵓⵔ ⵛⵛⵉⵟⴰⵏ ⵣⵉ ⵣⵣⴰⵜ ⵏ ⵡⵓⴷⴻⵎ ⵏ ⵙⵉⴷⵉ.
ⴰⵢⵓⴱ ⵉⵜⵜⴻⵎⵄⴰⵍⴰ ⴰⴽ-ⴷ ⵓⵊⴰⵔⵔⴻⴱ ⵏ ⵛⵛⵉⵟⴰⵏ
13 ⴷⴻⴳ ⵡⴰⵙⵙ ⵎⵉⵏ ⴷⵉ ⵜⵓⵖⴰ ⵉⵃⴻⵏⵊⵉⵔⴻⵏ ⵏⵏⴻⵙ ⴷ ⵢⴻⵙⵙⵉⵙ ⵜⵜᵉⵜⵜⴻⵏ ⵓ ⵙⴻⵙⵙⴻⵏ ⴱⵉⵏⵓ ⴷⵉ ⵜⴰⴷⴷⴰⵔⵜ ⵏ ⵓⵎⴰⵜⵙⴻⵏ ⴰⵎⴻⵏⵣⵓ, ⵉⵎⵙⴰⵔ, 14 ⴰⵇⴰ ⵢⵓⵙⴰ-ⴷⴷ ⵉⵊⵊ ⵏ ⵓⵔⴻⵇⵇⴰⵙ ⵖⴰⵔ ⴰⵢⵓⴱ, ⵉⵏⵏⴰ: “ⵉⴼⵓⵏⴰⵙⴻⵏ ⵜⵓⵖⴰ ⵛⴰⵔⵔⵣⴻⵏ ⵓ ⵜⵉⵖⵢⴰⵍ ⵀⴻⴷⴷⴰⵏⵜ ⵅ ⵓⵖⴻⵣⴷⵉⵙ ⵏⵙⴻⵏ. 15 ⵅⴻⵏⵏⵉ ⵀⴻⵊⵎⴻⵏ ⴰⵢⵜ ⵏ ⵛⴰⴱⴰ, ⴽⵙⵉⵏ ⵜⴻⵏ ⵓⵛⴰ ⵏⵖⵉⵏ ⵉⵃⵓⴷⵔⵉⵢⵢⴻⵏ ⵙ ⵍⴻⵇⴹⴻⵄ ⵏ ⵙⵙⵉⴼ. ⵎⵖⵉⵔ ⵏⴻⵛⵛ ⵡⴰⵀⴰ ⵉⵏⴻⵊⵎⴻⵏ, ⵃⵉⵎⴰ ⴰⴷ ⴰⵛ ⵜ ⵄⴰⵡⴷⴻⵖ.”
16 ⵓⵎⵉ ⵜⵓⵖⴰ ⵡⴰ ⵄⴰⴷ ⵉⵙⵙⴰⵡⴰⵍ, ⵢⵓⵙⴰ-ⴷⴷ ⵉⵊⵊ ⵏⵏⴻⵖⵏⵉ, ⵉⵏⵏⴰ: “ⵜⵉⵎⴻⵙⵙⵉ ⵏ ⴰⵔⴻⴱⴱⵉ ⵜⴻⵡⴹⴰ-ⴷⴷ ⵣⴻⴳ ⵓⵊⴻⵏⵏⴰ ⵓⵛⴰ ⵜⴰⵔⵖⴰ ⴷⴻⴳ ⵡⵓⴵⵉ ⴷ ⵉⵃⵓⴷⵔⵉⵢⵢⴻⵏ ⵓⵛⴰ ⵜⴻⵛⵛⴰ ⵉ-ⵜⴻⵏ. ⵎⵖⵉⵔ ⵏⴻⵛⵛ ⵡⴰⵀⴰ ⵉⵏⴻⵊⵎⴻⵏ, ⵃⵉⵎⴰ ⴰⴷ ⴰⵛ ⵜ ⵄⴰⵡⴷⴻⵖ.”
17 ⵓⵎⵉ ⵜⵓⵖⴰ ⵡⴰ ⵄⴰⴷ ⵉⵙⵙⴰⵡⴰⵍ, ⵢⵓⵙⴰ-ⴷⴷ ⵉⵊⵊ ⵏⵏⴻⵖⵏⵉ, ⵉⵏⵏⴰ: “ⴰⵢⵜ ⵏ ⵉⴽⴰⵍⴷⴰⵏⵉⵢⵢⴻⵏ ⵙⵙⴱⴻⴷⴷⴻⵏ ⵜⵍⴰⵜⴰ ⵏ ⴱⴰⵏⴷⵉⵢⵢⴰⵜ, ⵀⴻⵊⵎⴻⵏ ⵅ ⵉⵍⴻⵖⵎⴰⵏ, ⴽⵙⵉⵏ ⵜⴻⵏ ⵓⵛⴰ ⵏⵖⵉⵏ ⵉⵃⵓⴷⵔⵉⵢⵢⴻⵏ ⵙ ⵍⴻⵇⴹⴻⵄ ⵏ ⵙⵙⵉⴼ. ⵎⵖⵉⵔ ⵏⴻⵛⵛ ⵡⴰⵀⴰ ⵉⵏⴻⵊⵎⴻⵏ, ⵃⵉⵎⴰ ⴰⴷ ⴰⵛ ⵜ ⵄⴰⵡⴷⴻⵖ.”
18 ⵓⵎⵉ ⵜⵓⵖⴰ ⵡⴰ ⵄⴰⴷ ⵉⵙⵙⴰⵡⴰⵍ, ⵢⵓⵙⴰ-ⴷⴷ ⵉⵊⵊ ⵏⵏⴻⵖⵏⵉ, ⵉⵏⵏⴰ: “ⵉⵃⴻⵏⵊⵉⵔⴻⵏ ⵏⵏⴻⵛ ⴷ ⵢⴻⵙⵙⵉⵛ ⵛⵛⵉⵏ ⵓ ⵙⵡⵉⵏ ⴱⵉⵏⵓ ⴷⵉ ⵜⴰⴷⴷⴰⵔⵜ ⵏ ⵓⵎⴰⵜⵙⴻⵏ ⴰⵎⴻⵏⵣⵓ. 19 ⵓⵛⴰ ⵅⵣⴰⵔ, ⵢⵓⵙⴰ-ⴷⴷ ⵉⵊⵊ ⵏ ⵓⵙⴻⵎⵎⵉⴹ ⵉⵡⵄⴰⵔ ⵅ ⵜⵉⵡⴰ ⵏ ⵍⴻⵅⵍⴰ, ⵉⵍⵇⴻⴼ ⴰⵔⴻⴱⵄⴰ ⵏ ⵜⵖⴻⵎⵎⵓⵔⴰ ⵏ ⵜⴰⴷⴷⴰⵔⵜ ⵓⵛⴰ ⵜⴻⵡⴹⴰ ⵜⴰⴷⴷⴰⵔⵜ ⵅ ⵉⵃⵓⴷⵔⵉⵢⵢⴻⵏ ⴷ ⵜⵃⵓⴷⵔⵉⵢⵢⵉⵏ ⵓⵛⴰ ⵎⵎⵓⵜⴻⵏ ⵏⵉⵜⵏⵉ. ⵎⵖⵉⵔ ⵏⴻⵛⵛ ⵡⴰⵀⴰ ⵉⵏⴻⵊⵎⴻⵏ, ⵃⵉⵎⴰ ⴰⴷ ⴰⵛ ⵜ ⵄⴰⵡⴷⴻⵖ.”
20 ⵅⴻⵏⵏⵉ ⵉⴽⴽⴰⵔ ⴰⵢⵓⴱ, ⵉⵛⴰⵔⵔⴻⴳ ⴰⵙⴻⵍⵀⴰⵎ ⵏⵏⴻⵙ, ⵉⵃⴻⴼⴼ ⴰⵣⴻⴵⵉⴼ ⵏⵏⴻⵙ, ⵉⵡⴹⴰ ⵅ ⵜⴻⵎⵎⵓⵔⵜ ⵓⵛⴰ ⵉⴱⴻⵏⴷⴻⵇ, 21 ⵉⵏⵏⴰ: “ⴷ ⴰⵄⴰⵔⵢⴰⵏ ⵉ ⴷⴷ-ⵓⵙⵉⵖ ⵣⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰ ⵓ ⴷ ⴰⵄⴰⵔⵢⴰⵏ ⵉ ⴷⵉⵏ ⵉ ⵖⴰ ⴷⴻⵡⵍⴻⵖ. ⵙⵉⴷⵉ ⵉⵡⵛⴰ, ⵙⵉⴷⵉ ⵉⴽⴽⴻⵙ, ⴰⴷ ⵉⵜⵜⵡⴰⴱⴰⵔⴻⴽ ⵉⵙⴻⵎ ⵏ ⵙⵉⴷⵉ.” ■ 22 ⴷⵉ ⵎⴰⵏ ⴰⵢⴰ ⵎⴰⵔⵔⴰ ⵡⴰⵔ ⵉⵅⴹⵉ ⴰⵢⵓⴱ ⵛⴰ ⵓ ⵡⴰⵔ ⵉⵏⵏⵉ ⵎⵉⵏ ⵡⴰⵔ ⵉⵄⴻⴷⴷⵍⴻⵏ ⵅ ⴰⵔⴻⴱⴱⵉ.