ⵛⵛⵉⵟⴰⵏ ⵢⴰⵔⵏⵉ ⴰⵛⴻⵜⵛⵉ ⵅ ⴰⵢⵓⴱ
2
1 ⴷⴻⴳ ⵉⵊⵊ ⵏ ⵡⴰⵙⵙ ⵓⵙⵉⵏ-ⴷⴷ ⴰⵔⵔⴰⵡ ⵏ ⴰⵔⴻⴱⴱⵉ, ⵃⵉⵎⴰ ⴰⴷ ⴱⴻⴷⴷⴻⵏ ⵣⵣⴰⵜ ⵉ ⵙⵉⴷⵉ, ⵓⵛⴰ ⵢⵓⵙⴰ-ⴷⴷ ⵓⵍⴰ ⴷ ⵛⵛⵉⵟⴰⵏ ⴷⵉ ⵍⵡⴻⵙⵟ ⵏⵙⴻⵏ ⵎⴰⵃⴻⵏⴷ ⴰⴷ ⵉⵙⵙⴱⴻⴷⴷ ⵉⵅⴻⴼ ⵏⵏⴻⵙ ⵣⵣⴰⵜ ⵉ ⵙⵉⴷⵉ. 2 ⵉⵏⵏⴰ ⵙⵉⴷⵉ ⵉ ⵛⵛⵉⵟⴰⵏ: “ⵎⴰⵏⵉⵙ ⵉ ⴷⴷ-ⵜⵓⵙⵉⴷ ⵛⴻⴽ? ⵛⵛⵉⵟⴰⵏ ⵢⴰⵔⵔⴰ-ⴷⴷ ⵅ ⵙⵉⴷⵉ, ⵉⵏⵏⴰ: “ⵓⵙⵉⵖ-ⴷⴷ ⵣⴻⴳ ⵡⴻⵜⵍⴰⵄ ⵅ ⵜⴻⵎⵎⵓⵔⵜ, ⴽⴽⵉⵖ ⵜⵜ ⵎⴰⵔⵔⴰ.” 3 ⵉⵏⵏⴰ ⵙⵉⴷⵉ ⵉ ⵛⵛⵉⵟⴰⵏ: “ⵎⴰ ⵜⴻⵃⴹⵉⴷ ⴰⵎⵙⴻⵅⵅⴰⵔ ⵉⵏⵓ ⴰⵢⵓⴱ? ⴰⵎ ⵏⴻⵜⵜⴰ ⵡⴰⵔ ⵉⴵⵉ ⵅ ⵜⴻⵎⵎⵓⵔⵜ: ⴷ ⴰⵔⵢⴰⵣ ⵉⴽⵎⴻⵍ, ⵉⴳⴳⵓⵔ ⵏⵉⵛⴰⵏ, ⵉⵜⵜⴻⴳⴳⵯⴻⴷ ⴰⵔⴻⴱⴱⵉ ⵓ ⵉⵜⵜⵃⴻⵢⵢⴰⴷ ⵅ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ! ⵄⴰⴷ ⵢⴰⵔⵏⵉ ⵉⵜⵜⴻⵟⵟⴻⴼ ⴷⵉ ⵍⴻⵚⴼⴰⵢⴻⵜ ⵏⵏⴻⵙ, ⵅ ⵎⵉⵏⵏⵉ ⵛⴻⴽ ⴷ ⴰⵢⵉ ⵜⵄⴰⵔⵔⵏⴻⴷ ⵃⵉⵎⴰ ⴰⴷ ⵜ ⵚⴰⵔⴹⴻⵖ ⵅ ⵡⴰⵍⵓ.” 4 ⵢⴰⵔⵔⴰ-ⴷⴷ ⵛⵛⵉⵟⴰⵏ ⵅ ⵙⵉⴷⵉ, ⵉⵏⵏⴰ: “ⵜⵉⵍⵎⴻⵛⵜ ⵙ ⵜⴻⵍⵎⴻⵛⵜ, ⵡⴰⵀ, ⵎⴰⵔⵔⴰ ⵎⵉⵏ ⵖⴰⵔⴻⵙ ⵖⴰⵔ ⴱⵏⴰⴷⴻⵎ, ⴰⴷ ⵜ ⵉⵡⵛ ⵉ ⵜⵓⴷⴰⵔⵜ ⵏⵏⴻⵙ. 5 ⵙⵡⵉⵥⵥⴻⴹ ⵎⵖⵉⵔ ⴰⴼⵓⵙ ⵏⵏⴻⵛ ⵖⴰⵔⴻⵙ ⵓⵛⴰ ⵃⴰⴷⴰ ⵉⵖⵙⴰⵏ ⵏⵏⴻⵙ ⴷ ⵡⴻⵢⵙⵓⵎ ⵏⵏⴻⵙ, ⵎⴰ ⵅⴻⵏⵏⵉ ⵏⴻⵜⵜⴰ ⵙ ⵜⵉⴷⴻⵜⵜ ⵡⴰⵔ ⴷⴰⵢⴻⴽ ⵉⵜⵜⵛⴻⵇⵇⴰⴼ ⴷⴻⴳ ⵡⵓⴷⴻⵎ ⵏⵏⴻⵛ?”
6 ⵅⴻⵏⵏⵉ ⵉⵏⵏⴰ ⵙⵉⴷⵉ ⵉ ⵛⵛⵉⵟⴰⵏ: “ⵅⵣⴰⵔ, ⵏⴻⵜⵜⴰ ⴷⴻⴳ ⵓⴼⵓⵙ ⵏⵏⴻⵛ, ⵎⴰⵛⴰ ⴻⵊⵊ ⵉ-ⵜ ⴰⴷ ⵉⴷⴷⴰⵔ!”
ⵜⵉⵃⴻⴱⴱⴰ ⵢⴻⵡⵄⴰⵔⴻⵏ ⵍⴻⵇⵇⴼⴻⵏⵜ ⴰⵢⵢⵓⴱ
7 ⵅⴰⵙ ⵓⵛⴰ ⵢⵓⵢⵓⵔ ⵛⵛⵉⵟⴰⵏ ⵣⵉ ⵣⵣⴰⵜ ⵏ ⵡⵓⴷⴻⵎ ⵏ ⵙⵉⴷⵉ ⵓⵛⴰ ⵉⵡⵜⴰ ⴰⵢⵓⴱ ⵙ ⵜⵃⴻⴱⴱⴰ ⵜⵉⵄⴻⴼⴼⴰⵏⵉⵏ, ⵣⵉ ⵜⵍⴻⵇⵇⴰ ⵏ ⵉⴹⴰⵔⴻⵏ ⵏⵏⴻⵙ ⴰⵍ ⵜⵇⵉⵛⵛⴻⵜ ⵏ ⵓⵛⴻⵇⵇⵓⴼ ⵏ ⵓⵣⴻⴵⵉⴼ ⵏⵏⴻⵙ. 8 ⵏⴻⵜⵜⴰ ⵉⴽⵙⵉ ⴰⵛⴻⴵⵉⵇ ⵏ ⵜⵇⴻⴷⴷⵓⵃⵜ, ⵃⵉⵎⴰ ⴰⴷ ⵣⵣⴰⵢⴻⵙ ⵉⵃⴻⴽⴽ ⵉⵅⴻⴼ ⵏⵏⴻⵙ, ⵓⵛⴰ ⵉⵇⵇⵉⵎ ⴷⵉ ⵍⵡⴻⵙⵟ ⵏ ⵢⵉⵖⵖⴻⴹ. 9 ⵜⴻⵏⵏⴰ ⴰⵙ ⵜⴻⵎⵖⴰⵔⵜ ⵏⵏⴻⵙ: “ⵎⴰ ⵄⴰⴷ ⵜᵉⵜⵜⴻⵟⵟⴼⴻⴷ ⴷⵉ ⵍⴻⵚⴼⴰⵢⴻⵜ ⵏⵏⴻⵛ? ⵉⵏⵉ ⴰⵙ ⵉ ⴰⵔⴻⴱⴱⵉ: ‘ⴷ ⵡⴻⵏⵏⵉ ⵏⴻⵜⵜⴰ!’, ⵓⵛⴰ ⵎⵎⴻⵜ!” 10 ⵏⴻⵜⵜⴰ ⵎⴰⵛⴰ ⵉⵏⵏⴰ ⴰⵙ: “ⴰⵎ ⵎⴰⵎⵎⴻⵛ ⵙⵙⴰⵡⴰⵍⴻⵏⵜ ⵜⴻⵎⵖⴰⵔⵉⵏ ⵜⵉⴱⵓⵀⴰⵍⵉⵢⵢⵉⵏ ⵜⴻⵙⵙⴰⵡⴰⵍⴻⴷ ⵓⵍⴰ ⴷ ⵛⴻⵎ ⴰⵎ ⵢⵉⵛⵜⴻⵏ ⵣⵣⴰⵢⵙⴻⵏⵜ. ⵎⴰ ⵏⴻⵛⵛⵉⵏ ⵏⴽⴻⵙⵙⵉ ⵍⵅⴰⵔ ⵣⵉ ⴰⵔⴻⴱⴱⵉ, ⵎⴰⵛⴰ ⵡⴰⵔ ⵏⴽⴻⵙⵙⵉ ⵅⴻⵏⵏⵉ ⵓⵍⴰ ⴷ ⵍⵖⴰⵔ?” ⵙ ⵎⴰⵔⵔⴰ ⵎⴰⵏ ⴰⵢⴰ ⴰⵢⵓⴱ ⵡⴰⵔ ⵉⵅⴹⵉ ⵛⴰ ⵙ ⵉⵢⴻⵏⵛⵉⵛⴻⵏ ⵏⵏⴻⵙ.
ⵜⴰⵔⵣⴻⴼⵜ ⵏ ⵉⵎⴻⴷⴷⵓⴽⴽⵯⴰⵍ ⵏ ⴰⵢⵓⴱ
11 ⵙⵍⵉⵏ ⵜⵍⴰⵜⴰ ⵏ ⵉⵎⴻⴷⴷⵓⴽⴽⴰⵍ ⵏ ⴰⵢⵓⴱ ⵎⴰⵔⵔⴰ ⵎⵉⵏ ⵅⴰⵙ ⵉⴽⴽⵉⵏ ⴷ ⵍⵖⴰⵔ ⵓ ⵏⵉⵜⵏⵉ ⵓⵙⵉⵏ-ⴷⴷ ⴽⵓⵍ ⵉⵊⵊ ⵣⵉ ⵜⴻⵎⵎⵓⵔⵜ ⵏⵏⴻⵙ: ⵉⵍⵉⴼⴰⵣ ⵣⵉ ⵜⴰⵢⵎⴰⵏ, ⴱⵉⵍⴷⴰⴷ ⵣⵉ ⵛⵓⵃⴰ ⵓ ⵚⵓⴼⴰⵔ ⵣⵉ ⵏⴰⵄⵎⴰⵜ. ⴳⴳⵉⵏ ⴰⴷ ⴷⵉⵏ ⵓⵢⵓⵔⴻⵏ, ⵃⵉⵎⴰ ⴰⴷ ⴽⵉⴷⴻⵙ ⵙⵙⵃⵉⵙⵙⴼⴻⵏ ⵓ ⵃⵉⵎⴰ ⴰⴷ ⴷⴰⵢⴻⵙ ⴳⴳⴻⵏ ⵓⵍ. 12 ⵣⵉ ⵍⴰⴳⴳⵯⴰⵊ ⵙⵙⴳⴻⵄⵄⴷⴻⵏ ⵜⴰⵎⵓⵖⵍⵉ ⵏⵙⴻⵏ, ⵎⴰⵛⴰ ⵡⴰⵔ ⵜⵜ ⵄⵇⵉⵍⴻⵏ ⵛⴰ. ⵏⵉⵜⵏⵉ ⵙⵙⴳⴻⵄⵄⴷⴻⵏ ⵜⵎⵉⵊⵊⴰ ⵏⵙⴻⵏ ⵓⵛⴰ ⵔⵓⵏ. ⴽⵓⵍ ⵉⵊⵊ ⵉⵛⴰⵔⵔⴻⴳ ⴰⵙⴻⵍⵀⴰⵎ ⵏⵏⴻⵙ ⵓⵛⴰ ⵙⵙⵓⵢⵙⴻⵏ ⵉⵖⵖⴻⴹ ⵖⴰⵔ ⵓⵊⴻⵏⵏⴰ ⵜⵉⵡⴰ ⵉ ⵉⵣⴻⴵⵉⴼⴻⵏ ⵏⵙⴻⵏ. 13 ⵇⵇⵉⵎⴻⵏ ⵖⴰⵔⴻⵙ ⵅ ⵜⴻⵎⵎⵓⵔⵜ, ⵙⴻⴱⵄⴰ ⵏ ⵡⵓⵙⵙⴰⵏ ⴷ ⵙⴻⴱⵄⴰ ⵏ ⴵⵉⵢⴰⵍⵉ. ⵓⵍⴰ ⴷ ⵉⵊⵊⴻⵏ ⵡⴰⵔ ⵉⵙⵙⵉⵡⴻⵍ ⵓⵍⴰ ⴷ ⵉⵊⵊ ⵏ ⵡⴰⵡⴰⵍ ⵖⴰⵔⴻⵙ, ⵎⴰⵖⴰⵔ ⵥⵔⵉⵏ, ⴰⵇⴰ ⵍⴻⵃⵔⵉⵇ ⵏⵏⴻⵙ ⵜⵓⵖⴰ ⴷ ⴰⵎⴻⵇⵇⵔⴰⵏ ⴰⵟⵟⴰⵙ.