ⵉⵥⴻⵀⵀⵉⴷⴻⵏ 141

1 ⴰⵣⴻⵀⵀⴻⴷ ⵏ ⴷⴰⵡⵓⴷ.

ⴰ ⵙⵉⴷⵉ, ⵏⴻⵛⵛ ⵜⵜⵍⴰⵖⵉⵖ ⵖⴰⵔⴻⴽ,

ⴷⴻⵖⵢⴰⵜ ⵖⴰⵔⵉ,

ⵙⴻⵍ ⵖⴰⵔ ⵜⵎⵉⵊⵊⴰ ⵉⵏⵓ

ⵅⵎⵉ ⴷⴷ ⵅⴰⴽ ⵉ ⵖⴰ ⵜⵜⵍⴰⵖⵉⵖ.

2 ⵉⵍⵉ ⴰⴷ ⵜⴱⴻⴷⴷ ⵜⵥⴰⴵⵉⵜ ⵉⵏⵓ

ⴰⵎ ⵍⴻⴱⵅⵓⵔ ⵉⵜⵜⴼⵓⵃⴻⵏ ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ,

ⵓⵍⴰ ⴷ ⴰⵙⴳⴻⵄⵄⴻⴷ ⵏ ⵉⴼⴰⵙⵙⴻⵏ ⵉⵏⵓ

ⴰⵎ ⵜⴻⵡⵀⵉⴱⵜ ⵏ ⵜⵎⴻⴷⴷⵉⵜ.   

3 ⴰ ⵙⵉⴷⵉ, ⴻⴳⴳ ⵉⵊⵊ ⵏ ⵓⵄⴻⵙⵙⴰⵙ

ⵖⴰⵔ ⵓⵇⴻⵎⵎⵓⵎ ⵉⵏⵓ,

ⵃⴹⴰ ⵜⴰⵡⵡⴰⵔⵜ ⵏ ⵉⵢⴻⵏⵛⵉⵛⴻⵏ ⵉⵏⵓ.

4 ⴻⴳⴳ ⴰⵇⴰ ⵓⵍ ⵉⵏⵓ ⵡⴰⵔ ⵉⵜⵜⵏⴻⵊⴱⵉⴷ

ⵖⴰⵔ ⵉⵛⵜ ⵏ ⵜⵎⴻⵙⵍⴰⵛⵜ ⴷ ⵜⴰⵄⴻⴼⴼⴰⵏⵜ,

ⵎⴰⵃⴻⵏⴷ ⴰⴷ ⴳⴳⴻⵖ ⵜⵉⵎⴻⴳⴳⴰ ⵙ ⵍⵖⴻⵛⵛ

ⴰⴽ-ⴷ ⵉⵔⵢⴰⵣⴻⵏ ⵏⵏⵉ ⵉⵜⵜⴻⴳⴳⴻⵏ ⵍⵎⵓⵄⵚⵉⵢⵢⴻⵜ,

ⴻⴳⴳ ⴰⵇⴰ ⵏⴻⵛⵛ ⵡⴰⵔ ⵜⵜᵉⵜⵜⴻⵖ

ⵣⵉ ⵜⴰⵣⵢⵓⴹⵉ ⵏⵙⴻⵏ.

5 ⴻⵊⵊ ⴰⵎⵙⴻⴳⴳⴻⴷ ⴰⴷ ⴰⵢⵉ ⵉⵡⵡⴻⵜ,

ⵎⴰⵖⴰⵔ ⴰⵢⴰ ⴷ ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ,

ⵎⴰⵍⴰ ⵏⴻⵜⵜⴰ ⵉⵜⵜⵙⴻⴳⴳⴻⴷ ⴰⵢⵉ,

ⴰⵢⴰ ⴷ ⵣⵣⴻⵛⵜ ⵅ ⵓⵣⴻⴵⵉⴼ ⵉⵏⵓ,

ⴰⴷ ⵜⵜ ⵉⵇⴱⴻⵍ ⵓⵣⴻⴵⵉⴼ ⵉⵏⵓ.

ⵡⴰⵀ, ⵓⵍⴰ ⴰⵎⵎⵓ ⴰⴷ ⵜⵉⵍⵉ ⵜⵥⴰⴵⵉⵜ ⵉⵏⵓ ⵄⴰⴷ

ⴹⵉⴷⴷ ⵉ ⵜⵎⴻⴳⴳⴰ ⵏⵙⴻⵏ ⵉⵄⴻⴼⴼⵏⴻⵏ.   

6 ⵍⵇⵓⴹⴰⵜ ⵏⵙⴻⵏ ⵎⵎⴻⵏⴹⴰⵔⴻⵏ ⵙⵡⴰⴷⴷⴰⵢ

ⵅ ⵓⵖⴻⵣⴷⵉⵙ ⵏ ⵊⵊⴰⵔⴼ,

ⴰⵇⴰ ⵙⵍⵉⵏ ⴱⴻⵍⵍⵉ ⴰⵡⴰⵍⴻⵏ ⵉⵏⵓ ⴹⴰⵔⴼⴻⵏ.

7 ⴰⵅⵎⵉ ⵜᵉⵜⵜⵡⴰⵛⴰⵔⵣ

ⵓ ⵜⴻⵏⵏⵓⵔⵣⴻⵎ ⵜⴻⵎⵎⵓⵔⵜ,

ⴰⵎⵎⵓ ⵉ ⵜⵜⵡⴰⵣⴻⴵⵄⴻⵏ ⵉⵖⵙⴰⵏ ⵏⵏⴻⵖ

ⵖⴰⵔ ⵓⵇⴻⵎⵎⵓⵎ ⵏ ⵍⴰⵅⴰⵔⵜ.   

8 ⵎⴰⵛⴰ ⵜⵉⵟⵟⴰⵡⵉⵏ ⵉⵏⵓ

ⵅⴻⵣⵣⴰⵔⴻⵏⵜ-ⵉ-ⴷⴷ ⵖⴰⵔⴻⴽ,

ⴰ ⵙⵉⴷⵉ, ⵙⵉⴷⵉ ⵉⵏⵓ,

ⵏⴻⵛⵛ ⴰⵔⴻⴽⴽⵡⴰⵍⴻⵖ ⵖⴰⵔⴻⴽ,

ⵡⴰⵔ ⵜⵜⴻⵊⵊⵉ ⵍⴻⵄⵎⴰⵔ ⵉⵏⵓ ⵢⴰⵔⵅⴻⴼ.

9 ⵙⵉⴳⴳⵯⴻⵊ ⴰⵢⵉ ⵉ ⵡⴻⵎⵏⴰⵄ ⵏ ⵍⴼⴻⵅ

ⵉ ⴷ ⴰⵢⵉ ⵎⴻⴷⵢⴻⵏ,

ⵣⵉ ⵜⴻⵅⵛⵉⴼⵉⵏ ⵏ ⵢⵉⵏⵏⵉ ⵉⵜⵜⴻⴳⴳⴻⵏ ⵍⵎⵓⵄⵚⵉⵢⵢⴻⵜ.

10 ⵉⵍⵉ ⵉⵄⴻⴼⴼⴰⵏⴻⵏ ⴰⴷ ⵡⴹⴰⵏ ⵎⴰⵔⵔⴰ

ⴷⵉ ⵜⵔⴰⵛⵛⴰⵡⵉⵏ ⵏⵙⴻⵏ,

ⵎⵉⵏ ⵖⴰ ⴽⴽⴻⵖ ⵄⴻⴷⴷⵓⵖ.