ⵉⵥⴻⵀⵀⵉⴷⴻⵏ 145

1 ⵉⵣⵍⵉ ⵏ ⵓⵚⴻⴱⴱⴻⵃ ⵏ ⴷⴰⵡⵓⴷ.

ⴰⵍⵉⴼ. ⴰ, ⴰⵔⴻⴱⴱⵉ ⵉⵏⵓ, ⴰⵊⴻⴵⵉⴷ,

ⵏⴻⵛⵛ ⴰⴷ ⵛⴻⴽ ⵙⵙⵄⵓⴵⴻⵖ,

ⴰⴷ ⴱⴰⵔⴽⴻⵖ ⵉⵙⴻⵎ ⵏⵏⴻⵛ ⵉ ⵍⴻⴱⴷⴰ ⵇⴰⵄ.

2 ⴱⵉⵜ. ⴽⵓⵍ ⴰⵙⵙ ⴰⴷ ⵛⴻⴽ ⴱⴰⵔⴽⴻⵖ,

ⴰⴷ ⵙⵙⴻⵎⵖⴰⵔⴻⵖ ⵉⵙⴻⵎ ⵏⵏⴻⵛ ⵉ ⵍⴻⴱⴷⴰ ⵇⴰⵄ.

3 ⴳⵉⵎⴻⵍ. ⵙⵉⴷⵉ ⴷ ⴰⵎⴻⵇⵇⵔⴰⵏ,

ⵉⵙⵙⴷⵉⵀⴻⴵ ⴰⵙⴻⵎⵖⴰⵔ ⴰⵟⵟⴰⵙ,

ⵍⴻⵎⵖⴰⵔⴻⵜ ⵏⵏⴻⵙ ⵡⴰⵔ ⴷⴰⵢⴻⵙ ⴱⵓ ⵜⴰⵔⴻⵣⵣⵓⵜ.   

4 ⴷⴰⵍⵉⵜ. ⵊⵊⵉⵍ ⴰⵡⴰⵔⵏⵉ ⵊⵊⵉⵍ

ⴰⴷ ⵉⵙⵙⴻⵎⵖⴰⵔ ⵍⴻⵅⴷⴰⵢⴻⵎ ⵏⵏⴻⵛ,

ⴰⴷ ⴱⴰⵔⵔⵃⴻⵏ ⵙ ⵜⵎⴻⴳⴳⴰ ⵏⵏⴻⵛ ⵜⵉⵎⴻⵇⵇⵔⴰⵏⵉⵏ.   

5 ⵀⵉ. ⵏⴻⵛⵛ ⴰⴷ ⵙⵙⵉⵡⵍⴻⵖ

ⵅ ⵜⵉⵙⵙⵉⵇⵜ ⵏ ⵓⵄⵓⴵⵉ ⵏ ⵍⵄⴰⴹⴰⵎⴰ ⵏⵏⴻⵛ,

ⵅ ⵍⴻⵅⴱⴰⵔ ⵏ ⵍⵎⵓⵄⵊⵉⵣⴰⵜ ⵏⵏⴻⵛ.   

6 ⵡⴰⵡ. ⵏⵉⵜⵏⵉ ⴰⴷ ⵙⵙⵉⵡⵍⴻⵏ

ⵅ ⵊⵊⵀⴻⴷ ⵏ ⵜⵎⴻⴳⴳⴰ ⵏⵏⴻⵛ ⵉⵙⵙⴰⴳⴳⵯⴰⴷⴻⵏ,

ⵏⴻⵛⵛ ⴰⴷ ⴱⴰⵔⵔⵃⴻⵖ ⵙ ⵍⴻⵎⵖⴰⵔⴻⵜ ⵏⵏⴻⵛ.

7 ⵣⴰⵢⵉⵏ. ⵍⵉⴷⴰⵔⴻⵜ ⵏ ⵜⵛⵓⵏⵉ ⵏⵏⴻⵛ ⵉⴼⴻⵢⵢⴹⴻⵏ

ⴰⴷ ⵜⵜ ⴳⴳⴻⵏ ⴷ ⵉⵊⵊ ⵏ ⵍⵄⵓⵏⵚⴰⵔ ⵉⵜⵜⵛⵓⵔⵛⵓⵔ,

ⴰⴷ ⵙⵍⵉⵡⵍⵉⵡⴻⵏ ⵉ ⵜⵙⴻⴳⴷⴰ ⵏⵏⴻⵛ.   

8 ⵅⵉⵜ. ⵙⵉⴷⵉ ⴷ ⴰⵔⵃⵉⵎ ⴷ ⴰⵃⵏⵉⵏ,

ⵖⴰⵔⴻⵙ ⵜⵜⴰⵙⵉⵄ ⵏ ⵍⵅⴰⴹⴰⵔ

ⴷ ⵡⴰⵟⵟⴰⵙ ⵏ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ.   

9 ⵜⵉⵜ. ⵙⵉⴷⵉ ⴷ ⴰⵚⴻⴱⵃⴰⵏ ⵉ ⵎⴰⵔⵔⴰ,

ⴰⵔⵔⴻⵃⵎⴻⵜ ⵏⵏⴻⵙ ⴰⵇⴰ-ⵜⵜ ⵜⵉⵡⴰ

ⵎⴰⵔⵔⴰ ⵜⵉⵎⴻⴳⴳⴰ ⵏⵏⴻⵙ.

10 ⵢⵓⴷ. ⵎⴰⵔⵔⴰ ⵜⵉⵎⴻⴳⴳⴰ ⵏⵏⴻⵛ,

ⴰ ⵙⵉⴷⵉ, ⴰⴷ ⵛⴻⴽ ⵇⴰⴷⵉⵏⵜ,

ⵉⵎⵜⵉⵇⵇⴰⵏ ⵏⵏⴻⵛ ⴰⴷ ⵛⴻⴽ ⴱⴰⵔⴽⴻⵏ.

11 ⴽⴰⴼ. ⵏⵉⵜⵏⵉ ⴰⴷ ⵙⵙⵉⵡⵍⴻⵏ

ⵅ ⵓⵄⵓⴵⵉ ⵏ ⵜⴳⴻⵍⴷⵉⵜ ⵏⵏⴻⵛ, ⴰⴷ ⵙⵙⵉⵡⵍⴻⵏ

ⵅ ⵜⵉⵎⴻⴳⴳⴰ ⵏⵏⴻⵛ ⵜⵉⵎⴻⵇⵇⵔⴰⵏⵉⵏ,

12 ⵍⴰⵎⵉⴷ. ⵃⵉⵎⴰ ⴰⴷ ⴱⴰⵔⵔⵃⴻⵏ

ⵙ ⵜⵎⴻⴳⴳⴰ ⵏⵏⴻⵙ ⵜⵉⵎⴻⵇⵇⵔⴰⵏⵉⵏ

ⵉ ⵜⴰⵔⵡⴰ ⵏ ⴱⵏⴰⴷⴻⵎ,

ⵙ ⵓⵄⵓⴵⵉ ⵏ ⵍⵄⴰⴹⴰⵎⴰ ⵏ ⵜⴳⴻⵍⴷⵉⵜ ⵏⵏⴻⵙ.

13 ⵎⵉⵎ. ⵜⴰⴳⴻⵍⴷⵉⵜ ⵏⵏⴻⵛ

ⴷ ⵉⵛⵜ ⵏ ⵜⴳⴻⵍⴷⵉⵜ ⵉ ⵍⴻⴱⴷⴰ,

ⵍⴻⵃⴽⴰⵎⴻⵜ ⵏⵏⴻⵛ ⴰⴷ ⵜⵉⵍⵉ ⵅ ⴽⵓⵍ ⵊⵊⵉⵍ.

14 ⵙⴰⵎⵉⵅ. ⵙⵉⴷⵉ ⵉⵜⵜⵙⴻⵏⵏⴻⴷ

ⵎⴰⵔⵔⴰ ⵉⵏⵏⵉ ⵉⵡⴹⴰⵏ,

ⵉⵜⵜⵙⴻⴳⴳⴻⵎ ⵎⴰⵔⵔⴰ ⵉⵏⵏⵉ ⵉⵇⵡⵉⵙⴻⵏ.

15 ⵄⴰⵢⵉⵏ. ⵎⴰⵔⵔⴰ ⵜⵉⵟⵟⴰⵡⵉⵏ ⵜⵜⵔⴰⵊⴰⵏⵜ ⵛⴻⴽ,

ⵛⴻⴽ ⵜᵉⵜⵜⵉⵛⴻⴷ ⴰⵙⴻⵏ ⵎⴰⵛⵛⴰ

ⴷⵉ ⵍⵡⴻⵇⵜ ⵏⵏⴻⵙ ⵉⵜⵜⵡⴰⴳⴳⴻⵏ.   

16 ⴱⵉ. ⵛⴻⴽ ⵜⴰⵔⴻⵣⵣⵎⴻⴷ ⴰⴼⵓⵙ ⵏⵏⴻⵛ,

ⵜⴻⵙⵙⵢⴰⵡⴰⵏⴻⴷ ⵎⴰⵔⵔⴰ ⵎⵉⵏ ⵉⴷⴷⴰⵔⴻⵏ

ⴰⴽ-ⴷ ⵎⵉⵏ ⵉⵅⵙ ⵍⵅⴰⴹⴰⵔ ⵏⵙⴻⵏ.

17 ⵜⵙⴰⴷⵉ. ⵙⵉⴷⵉ ⴰⵇⴰ-ⵜ ⵏⵉⵛⴰⵏ

ⴷⵉ ⵎⴰⵔⵔⴰ ⵉⴱⵔⵉⴷⴻⵏ ⵏⵏⴻⵙ,

ⵉⵜⵜⴻⴳⴳ ⵙ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ

ⴷⵉ ⵎⴰⵔⵔⴰ ⵜⵉⵎⴻⴳⴳⴰ ⵏⵏⴻⵙ.

18 ⵇⵓⴼ. ⵙⵉⴷⵉ ⵢⵓⴷⴻⵙ ⵉ ⵎⴰⵔⵔⴰ

ⵉⵏⵏⵉ ⵅⴰⵙ ⵉⵜⵜⵍⴰⵖⴰⵏ,

ⵎⴰⵔⵔⴰ ⵉⵏⵏⵉ ⵅⴰⵙ ⵉⵜⵜⵍⴰⵖⴰⵏ ⴷⵉ ⵜⵉⴷⴻⵜⵜ.

19 ⵔⵉⵅ. ⵏⴻⵜⵜⴰ ⵉⴳⴳⴰ ⵙ ⵍⵅⴰⴹⴰⵔ

ⵉ ⵎⴰⵔⵔⴰ ⵉⵏⵏⵉ ⵜ ⵉⵜⵜⴻⴳⴳⵯⴷⴻⵏ,

ⵉⵜⵜⴻⵙⵍⴰ ⵉⵖⵓⵢⵢⴰⵏ ⵏⵙⴻⵏ ⵓ ⵉⵙⵙⴻⵏⵊⴰⵎ ⵉ-ⵜⴻⵏ.

20 ⵛⵉⵏ. ⵙⵉⴷⵉ ⵉⵃⴻⵟⵟⴰ ⵅ ⵎⴰⵔⵔⴰ ⵉⵏⵏⵉ ⵜ ⵉⵜⵜⴻⵅⵙⴻⵏ,

ⵎⴰⵛⴰ ⵎⴰⵔⵔⴰ ⵉⵄⴻⴼⴼⴰⵏⴻⵏ ⵉⵜⵜⴻⵃⵃⴰ ⵉ-ⵜⴻⵏ.

21 ⵜⴰⴼ. ⴰⵇⴻⵎⵎⵓⵎ ⵉⵏⵓ ⴰⴷ ⵉⵙⵙⵉⵡⴻⵍ

ⵅ ⵓⵚⴻⴱⴱⴻⵃ ⵏ ⵙⵉⴷⵉ,

ⵎⴰⵔⵔⴰ ⴷⴷⴰⵜ ⴰⴷ ⵉⴱⴰⵔⴻⴽ

ⵉⵙⴻⵎ ⵏⵏⴻⵙ ⵉⵇⴻⴷⴷⵙⴻⵏ, ⵉ ⵍⴻⴱⴷⴰ ⵇⴰⵄ.