ⴷⴰⵡⵓⴷ ⵉⴳⴳⴰ ⵅ ⵙⵓⵍⵉⵎⴰⵏ ⵎⴰⵃⴻⵏⴷ ⴰⴷ ⵉⴱⵏⴰ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ
28
1 ⴷⴰⵡⵓⴷ ⵉⵙⵙⵎⵓⵏ ⴷⵉ ⵓⵔⵛⴰⵍⵉⵎ ⵎⴰⵔⵔⴰ ⵉⵎⴻⵇⵇⵔⴰⵏⴻⵏ ⵏ ⵉⵙⵔⴰⵉⵍ: ⵉⵎⴻⵇⵇⵔⴰⵏⴻⵏ ⵏ ⵜⵇⴻⴱⴱⴰⵍ ⴷ ⵉⵎⴻⵇⵇⵔⴰⵏⴻⵏ ⵏ ⵜⴻⵔⴱⵉⵄⵉⵏ ⴷ ⵉⵎⵙⴻⵅⵅⴰⵔⴻⵏ ⵏ ⵓⵊⴻⴵⵉⴷ ⴷ ⵉⵎⴻⵇⵇⵔⴰⵏⴻⵏ ⵅ ⵡⴰⵍⴻⴼ ⴷ ⵉⵎⴻⵇⵇⵔⴰⵏⴻⵏ ⵅ ⵎⵢⴰ ⴷ ⵉⵎⴻⵇⵇⵔⴰⵏⴻⵏ ⵉ ⵉⴵⴰⵏ ⵅ ⵎⴰⵔⵔⴰ ⴰⴳⵍⴰ ⴷ ⵍⴽⴻⵙⴱⴻⵜ ⵏ ⵍⵎⴰⵍ ⵏ ⵓⵊⴻⴵⵉⴷ ⴷ ⵡⴰⵔⵔⴰⵡⴻⵏ ⵏⵏⴻⵙ, ⵊⵎⵉⵄ ⴰⴽ-ⴷ ⵉⵎⵙⴻⵅⵅⴰⵔⴻⵏ ⵉⵛⴻⵏⵏⵄⴻⵏ ⴷ ⴰⵢⵜ ⵏ ⴱⵓ-ⵜⴻⵖⵔⵓⴹⵜ, ⵡⴰⵀ, ⴽⵓⵍ ⴱⵓ-ⵜⴻⵖⵔⵓⴹⵜ ⵉⵎⴻⵃⴹⴻⵏ. 2 ⵉⴽⴽⴰⵔ ⵓⵊⴻⴵⵉⴷ ⴷⴰⵡⵓⴷ, ⵉⵏⵏⴰ: “ⵙⵍⴻⵎ-ⴷⴷ ⵖⴰⵔⵉ, ⴰⵢⵜⵎⴰ ⴷ ⵍⴳⴻⵏⵙ ⵉⵏⵓ! ⵏⴻⵛⵛ ⵙⵉⵎⴰⵏⵜ ⵉⵏⵓ ⵜⵓⵖⴰ-ⵜ ⵖⴰⵔⵉ ⴷⴻⴳ ⵡⵓⵍ ⵉⵏⵓ ⵃⵉⵎⴰ ⴰⴷ ⴱⵏⵉⵖ ⵉⵛⵜ ⵏ ⵜⴰⴷⴷⴰⵔⵜ ⵏ ⴰⵔⵔⴰⵃⴻⵜ ⵉ ⵜⵜⴰⴱⵓⵜ ⵏ ⵍⵄⴰⵀⴷ ⵏ ⵙⵉⴷⵉ ⵓ ⵉ ⵜⵏⴻⴱⴷⴰⵜ ⵏ ⵉⴹⴰⵔⴻⵏ ⵏ ⴰⵔⴻⴱⴱⵉ ⵏⵏⴻⵖ. ⵅ ⵓⵢⴻⵏⵏⵉ ⵙⵙⵡⴻⵊⴷⴻⵖ ⵉ ⵍⴻⴱⵏⵉ. 3 ⵎⴰⵛⴰ ⴰⵔⴻⴱⴱⵉ ⵉⵏⵏⴰ ⴰⵢⵉ: ‘ⵛⴻⴽ ⵡⴰⵔ ⵜⴱⴻⵏⵏⵉⴷ ⵉ ⵢⵉⵙⴻⵎ ⵉⵏⵓ ⵜⴰⴷⴷⴰⵔⵜ, ⵎⴰⵖⴰⵔ ⵛⴻⴽ ⴷ ⵉⵊⵊ ⵏ ⵡⴻⵔⵢⴰⵣ ⵏ ⵉⵎⴻⵏⵖⴰⵏ ⵓ ⵜⴻⵙⵙⵉⵣⵍⴻⴷ ⴰⵟⵟⴰⵙ ⵏ ⵉⴷⴰⵎⵎⴻⵏ.’ 4 ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ, ⵉⴼⴰⵔⵣ ⴰⵢⵉ ⵣⵉ ⵎⴰⵔⵔⴰ ⵜⴰⴷⴷⴰⵔⵜ ⵏ ⴱⴰⴱⴰ, ⵃⵉⵎⴰ ⴰⴷ ⴷⴻⵡⵍⴻⵖ ⴷ ⴰⵊⴻⴵⵉⴷ ⵅ ⵉⵙⵔⴰⵉⵍ ⵉ ⵍⴻⴱⴷⴰ, ⵎⵉⵏⵣⵉ ⵏⴻⵜⵜⴰ ⵉⴼⴰⵔⵣ ⵢⴰⵀⵓⴷⴰ ⵃⵉⵎⴰ ⴰⴷ ⵢⵉⵍⵉ ⴷ ⵍⵃⴰⴽⴻⵎ, ⵓⵛⴰ ⵅⴻⵏⵏⵉ ⵜⴰⴷⴷⴰⵔⵜ ⵏ ⴱⴰⴱⴰ ⵣⵉ ⵜⴰⴷⴷⴰⵔⵜ ⵏ ⵢⴰⵀⵓⴷⴰ, ⵓⵛⴰ ⵊⴰⵔ ⵡⴰⵔⵔⴰⵡⴻⵏ ⵏ ⴱⴰⴱⴰ ⵢⴰⵔⴹⴰ ⴷⴰⵢⵉ ⴰⵍⴰⵎⵉ ⵉⴳⴳⴰ ⴰⵢⵉ ⴷ ⴰⵊⴻⴵⵉⴷ ⵅ ⵎⴰⵔⵔⴰ ⵉⵙⵔⴰⵉⵍ. 5 ⵣⵉ ⵊⴰⵔ ⵎⴰⵔⵔⴰ ⴰⵔⵔⴰⵡⴻⵏ ⵉⵏⵓ - ⵎⴰⵖⴰⵔ ⵙⵉⴷⵉ ⵉⵡⵛⴰ ⴰⵢⵉ ⴰⵟⵟⴰⵙ ⵏ ⵡⴰⵔⵔⴰⵡⴻⵏ - ⵉⴼⴰⵔⵣ ⵏⴻⵜⵜⴰ ⵎⵎⵉ ⵙⵓⵍⵉⵎⴰⵏ, ⵃⵉⵎⴰ ⴰⴷ ⵉⵇⵇⵉⵎ ⵅ ⵍⵄⴰⵔⵛ ⵏ ⵜⴳⴻⵍⴷⴰ ⵏ ⵙⵉⴷⵉ ⵅ ⵉⵙⵔⴰⵉⵍ. 6 ⵏⴻⵜⵜⴰ ⵉⵏⵏⴰ ⴰⵢⵉ: ‘ⵎⵎⵉⵛ ⵙⵓⵍⵉⵎⴰⵏ ⴰⴷ ⵉⴱⵏⴰ ⵜⴰⴷⴷⴰⵔⵜ ⵉⵏⵓ ⴷ ⵍⴻⵎⵔⴰⵃⴰⵜ ⵉⵏⵓ, ⵎⴰⵖⴰⵔ ⵏⴻⵜⵜⴰ ⵉ ⴼⴰⵔⵣⴻⵖ ⴷ ⵎⵎⵉ ⵓ ⵏⴻⵛⵛ ⴰⴷ ⴰⵙ ⵉⵍⵉⵖ ⴷ ⴱⴰⴱⴰⵙ. 7 ⵏⴻⵛⵛ ⴰⴷ ⵙⵙⵎⴻⵜⵏⴻⵖ ⵜⴰⴳⴻⵍⴷⵉⵜ ⵏⵏⴻⵙ ⵉ ⵍⴻⴱⴷⴰ ⵎⴰⵍⴰ ⵏⴻⵜⵜⴰ ⴰⴷ ⵉⴹⴼⴰⵔ ⵜⵉⵡⴻⵚⵚⴰ ⴷ ⵍⴼⴰⵔⴰⵢⵉⴹ ⵉⵏⵓ ⵙ ⵊⵊⴻⵀⴷ, ⴰⵎ ⵎⴰⵎⵎⴻⵛ ⵜⴻⴵⴰ ⴰⵙⵙ-ⴰ.’ 8 ⵅⴻⵏⵏⵉ ⵍⴻⵅⵅⵓ, ⴰⴷ ⴰⵡⴻⵎ ⵄⴻⵍⵎⴻⵖ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏ ⵎⴰⵔⵔⴰ ⵉⵙⵔⴰⵉⵍ, ⴰⴳⵔⴰⵡ ⵏ ⵍⴳⴻⵏⵙ ⵏ ⵙⵉⴷⵉ, ⵓ ⴷⴻⴳ ⵉⵎⴻⵣⵣⵓⵖⴻⵏ ⵏ ⴰⵔⴻⴱⴱⵉ ⵏⵏⴻⵖ, ⵃⵉⵎⴰ ⴰⴷ ⵜⴻⵃⴹⴰⵎ ⵓ ⴰⴷ ⵜⴰⵔⵣⵓⵎ ⵎⴰⵔⵔⴰ ⵜⵉⵡⴻⵚⵚⴰ ⵏ ⵙⵉⴷⵉ, ⴰⵔⴻⴱⴱⵉ ⵏⵡⴻⵎ, ⵎⴰⵃⴻⵏⴷ ⴰⴷ ⵜⴻⵇⵇⵉⵎⴻⵎ ⵜᵉⵜⵜᵉⵟⵟⴼⴻⵎ ⵜⴰⵎⵎⵓⵔⵜ ⵜⴰⵚⴻⴱⵃⴰⵏⵜ ⵜⴰⵏⵉⵜⴰ ⴷ ⵍⵡⴰⵔⵜ, ⵓⵛⴰ ⴰⴷ ⵜⵜ ⵜⴻⵊⵊⴻⵎ ⴷ ⵍⵡⴰⵔⵜ ⵉ ⵍⴻⴱⴷⴰ ⵉ ⵡⴰⵔⵔⴰⵡⴻⵏ ⵏⵡⴻⵎ ⴰⵡⴰⵔⵏⵉ ⴰⵡⴻⵎ. 9 ⵓ ⵛⴻⴽ, ⵎⵎⵉ ⵙⵓⵍⵉⵎⴰⵏ, ⵙⵙⴻⵏ ⴰⵔⴻⴱⴱⵉ ⵏ ⴱⴰⴱⴰⵛ ⵓ ⵙⴻⵅⵅⴰⵔ ⴰⵙ ⵙ ⵡⵓⵍ ⵉⵎⵓⵏ ⴷ ⵙ ⵍⴻⵄⵎⴰⵔ ⵉⵡⴻⵊⴷⴻⵏ ⵎⵉⵏⵣⵉ ⵙⵉⴷⵉ ⵉⵜⵜⴱⴻⵇⵇⴻⵛ ⵎⴰⵔⵔⴰ ⵓⵍⴰⵡⴻⵏ ⵓⵛⴰ ⵉⴼⴻⵀⵀⴻⵎ ⵎⴰⵔⵔⴰ ⵎⵉⵏ ⴷⴷ-ⵉⵜⵜⴰⵙⴻⵏ ⵖⴰⵔ ⵉⵅⴰⵔⵔⵉⵚⴻⵏ ⵏ ⵓⵣⴻⴵⵉⴼ ⵏⵏⴻⵖ. ⵎⴰⵍⴰ ⵛⴻⴽ ⵜⴰⵔⵣⵓⴷ ⵅⴰⵙ, ⵏⴻⵜⵜⴰ ⴰⴷ ⵣⵣⴰⵢⴻⴽ ⵉⵜⵜⵡⴰⴼ, ⵎⴰⵛⴰ ⵎⴰⵍⴰ ⵜⵙⴻⵎⵃⴻⴷ ⴷⴰⵢⴻⵙ, ⴰⴷ ⵛⴻⴽ ⵉⵏⴹⴰⵔ ⵉ ⵍⴻⴱⴷⴰ. 10 ⵅⵣⴰⵔ ⵍⴻⵅⵅⵓ, ⵎⵉⵏⵣⵉ ⵙⵉⴷⵉ ⵉⴼⴰⵔⵣ ⵉ ⵛⴻⴽ ⵃⵉⵎⴰ ⴰⴷ ⴰⵙ ⵜⴻⴱⵏⵉⴷ ⵉⵛⵜ ⵏ ⵜⴰⴷⴷⴰⵔⵜ ⴷ ⵣⵣⴰⵡⴻⵛⵜ ⵉⵇⴻⴷⴷⵙⴻⵏ. ⵉⵍⵉ ⴷ ⴰⵔⵢⴰⵣ ⵓⵛⴰ ⴻⴳⴳ ⵉ-ⵜ!”
11 ⴷⴰⵡⵓⴷ ⵉⵡⵛⴰ ⵉ ⵎⵎⵉⵙ ⵙⵓⵍⵉⵎⴰⵏ ⴰⵎⴻⴷⵢⴰ ⵏ ⵡⴻⵙⵇⵉⴼ ⵏ ⵡⴰⴷⴰⴼ, ⵏ ⵍⴻⴱⵏⵉⵢⴰⵜ ⵏⵏⴻⵙ, ⴷ ⵉⵅⵅⴰⵎⴻⵏ ⵏ ⵜⵅⵓⴱⴰⵢ ⴷ ⵜⵖⵓⵔⴼⴰⵜⵉⵏ ⵏⵏⴻⵙ, ⴷ ⵉⵅⵅⴰⵎⴻⵏ ⵏⵏⴻⵙ ⵏ ⴷⴰⵅⴻⵍ, ⴷ ⵡⴻⵅⵅⴰⵎ ⵉ ⵜⵇⴻⴱⴱⴰⵔⵜ ⵏ ⵡⴻⵚⵍⴰⵃ, 12 ⵓⵍⴰ ⴷ ⵉⵊⵊ ⵏ ⵓⵎⴻⴷⵢⴰ ⵏ ⵎⴰⵔⵔⴰ ⵎⵉⵏ ⵖⴰⵔⴻⵙ-ⴷⴷ ⵢⵓⵙⴰ ⵙ ⴰⵔⵔⵓⵃ ⵅ ⵍⴻⵎⵔⴰⵃⴰⵜ ⵏ ⵜⴰⴷⴷⴰⵔⵜ ⵏ ⵙⵉⴷⵉ, ⵅ ⵎⴰⵔⵔⴰ ⵉⵅⵅⴰⵎⴻⵏ ⵉ ⴷ ⴰⵙ ⴷⴷ-ⵉⵏⵏⴹⴻⵏ, ⵅ ⵎⴰⵔⵔⴰ ⵉⵅⵅⴰⵎⴻⵏ ⵏ ⵜⵅⵓⴱⴰⵢ ⵏ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⵓ ⵅ ⵉⵅⵅⴰⵎⴻⵏ ⵏ ⵜⵅⵓⴱⴰⵢ ⵏ ⵜⴻⵡⵀⵉⴱⵉⵏ ⵉⵜⵜⵡⴰⵇⴻⴷⴷⵙⴻⵏ, 13 ⵅ ⵜⴻⵔⴱⵉⵄⵉⵏ ⵏ ⵉⴽⴻⵀⵀⴰⵏⴻⵏ ⴷ ⵉⵍⴰⵡⵉⵢⵢⴻⵏ, ⵅ ⵎⴰⵔⵔⴰ ⵍⵅⴻⴷⵎⴻⵜ ⵉ ⵜⵙⴻⵅⵅⴰⵔⵜ ⴷⵉ ⵜⴰⴷⴷⴰⵔⵜ ⵏ ⵙⵉⴷⵉ ⵓ ⵅ ⵎⴰⵔⵔⴰ ⵍⴻⵇⵛⵓⵄ ⵉ ⵜⵙⴻⵅⵅⴰⵔⵜ ⴷⵉ ⵜⴰⴷⴷⴰⵔⵜ ⵏ ⵙⵉⴷⵉ. 14 ⵅ ⵡⵓⵔⴻⵖ, ⴰⵇⴰ ⵉⵡⵛⴰ ⵍⴻⵡⵣⴻⵏ ⵏ ⵡⵓⵔⴻⵖ ⵉ ⵎⴰⵔⵔⴰ ⵍⴻⵇⵛⵓⵄ ⵏ ⵜⵙⴻⵅⵅⴰⵔⵜ, ⵓⵍⴰ ⵉ ⵍⴻⵇⵛⵓⵄ ⵏ ⵏⵏⵓⵇⴰⵔⵜ ⵉⵡⵛⴰ ⵍⴻⵡⵣⴻⵏ ⵏⵙⴻⵏ, ⵉ ⵎⴰⵔⵔⴰ ⵍⴻⵇⵛⵓⵄ ⵉ ⴽⵓⵍ ⵜⴰⵙⴻⵅⵅⴰⵔⵜ. 15 ⵉⵡⵛⴰ ⵓⵍⴰ ⵍⴻⵡⵣⴻⵏ ⵉ ⵍⴻⵇⵏⴰⴷⴻⵍ ⵏ ⵡⵓⵔⴻⵖ ⴷ ⵍⴻⴼⵏⴰⵔⴰⵜ ⵏⵙⴻⵏ ⵏ ⵡⵓⵔⴻⵖ, ⵍⴻⵡⵣⴻⵏ ⵏ ⴽⵓⵍ ⵍⵇⴻⵏⴷⵉⵍ ⴰⴽ-ⴷ ⵍⴻⴼⵏⴰⵔⴰⵜ ⵏⵏⴻⵙ ⵡⴻⵃⵃⴷⴻⵙ, ⵓⵍⴰ ⵍⴻⵡⵣⴻⵏ ⵉ ⵍⴻⵇⵏⴰⴷⴻⵍ ⵏ ⵏⵏⵓⵇⴰⵔⵜ, ⵍⴻⵡⵣⴻⵏ ⵉ ⵢⵉⵊⵊ ⵏ ⵍⵇⴻⵏⴷⵉⵍ ⴰⴽ-ⴷ ⵍⴻⴼⵏⴰⵔⴰⵜ ⵏⵏⴻⵙ ⵡⴻⵃⵃⴷⴻⵙ, ⴰⵎ ⵎⴰⵎⵎⴻⵛ ⴷⴷ-ⵢⵓⵙⴰ ⴰⴽ-ⴷ ⵜⵙⴻⵅⵅⴰⵔⵜ ⵏ ⴽⵓⵍ ⵍⵇⴻⵏⴷⵉⵍ. 16 ⵄⴰⵡⴻⴷ ⵍⴻⵡⵣⴻⵏ ⵏ ⵡⵓⵔⴻⵖ ⵉ ⵟⵟⴰⴱⵍⴰⵜ ⵉ ⵅ ⴱⴻⵣⵣⵄⴻⵏ ⴰⵖⵔⵓⵎ, ⵉ ⴽⵓⵍ ⵟⵟⴰⴱⵍⴰ ⵍⴻⵡⵣⴻⵏ ⵏⵏⴻⵙ ⵡⴻⵃⵃⴷⴻⵙ, ⵓⵍⴰ ⴷ ⵍⴻⵡⵣⴻⵏ ⵏ ⵏⵏⵓⵇⴰⵔⵜ ⵉ ⵟⵟⴰⴱⵍⴰⵜ ⵏ ⵏⵏⵓⵇⴰⵔⵜ, 17 ⵓⵍⴰ ⴷ ⵓⵔⴻⵖ ⵉⵚⴼⴰⵏ ⵉ ⴼⵓⵔⵛⴰⵢⴰⵜ, ⵉ ⵟⵟⴰⵡⵢⴰⵜ ⵉ ⵓⵔⵓⵛⵛⵉ, ⵉ ⵉⴼⴻⵏⵊⴰⵍⴻⵏ ⵏ ⵡⵓⵔⴻⵖ ⴰⴽ-ⴷ ⵍⴻⵡⵣⴻⵏ ⵏ ⴽⵓⵍ ⴰⴼⴻⵏⵊⴰⵍ ⵡⴻⵃⵃⴷⴻⵙ, ⵉ ⵉⴼⴻⵏⵊⴰⵍⴻⵏ ⵏ ⵏⵏⵓⵇⴰⵔⵜ ⴰⴽ-ⴷ ⵍⴻⵡⵣⴻⵏ ⵉ ⴽⵓⵍ ⴰⴼⴻⵏⵊⴰⵍ ⵡⴻⵃⵃⴷⴻⵙ, 18 ⵉ ⵓⵄⴰⵍⵟⴰⵔ ⵏ ⵍⴻⴱⵅⵓⵔ ⴰⴽ-ⴷ ⵍⴻⵡⵣⴻⵏ ⵏⵏⴻⵙ ⵙ ⵡⵓⵔⴻⵖ ⵉⵇⵇⵓⵔ, ⵓⵍⴰ ⴰⵎⵎⵓ ⵄⴰⵡⴻⴷ ⵍⴻⵡⵣⴻⵏ ⵏ ⵡⵓⵔⴻⵖ ⵉ ⵓⵎⴻⴷⵢⴰ ⵏ ⵓⴽⴰⵔⵔⵓ ⵏ ⵉⵊⴻⵏⵡⴰⵏ ⵏ ⵉⴽⵉⵔⵓⴱⴻⵏ ⵉⵏⵏⵉ ⵉⴱⴻⵣⵣⵄⴻⵏ ⵡⴰⴼⵔⵉⵡⴻⵏ ⵏⵙⴻⵏ ⵓⵛⴰ ⴷⵍⵉⵏ ⵜⵜⴰⴱⵓⵜ ⵏ ⵍⵄⴰⵀⴷ ⵏ ⵙⵉⴷⵉ. □
19 ⵎⴰⵏ ⴰⵢⴰ ⵎⴰⵔⵔⴰ, ⵉⵏⵏⴰ ⴷⴰⵡⵓⴷ, ⵉⵜⵜⵡⴰⵙⵙⴻⴼⵀⴻⵎ ⴰⵢⵉ ⵙ ⵜⵉⵔⴰ ⵣⴻⴳ ⵓⴼⵓⵙ ⵏ ⵙⵉⴷⵉ, ⵎⴰⵔⵔⴰ ⵍⴻⵅⴷⴰⵢⴻⵎ ⵉ ⴷⴷ ⵉⵜⵜⴰⵙⴻⵏ ⴰⴽ-ⴷ ⵓⵎⴻⴷⵢⴰ ⵏ ⵍⴻⴱⵏⵉ, ⴰⵇⴰ ⵢⵓⵔⴰⵏⵜ ⴷⵉ ⵜⵉⵔⴰ-ⵢⴰ.
20 ⵅⴻⵏⵏⵉ ⵉⵏⵏⴰ ⴷⴰⵡⵓⴷ ⵉ ⵎⵎⵉⵙ ⵙⵓⵍⵉⵎⴰⵏ: “ⵉⵍⵉ ⴷ ⴰⵔⵢⴰⵣ, ⵉⵍⵉ ⵜⵎⴻⵃⴹⴻⴷ ⵓ ⴻⴳⴳ ⵉ-ⵜ! ⵡⴰⵔ ⵜⵜⴻⴳⴳⵯⴻⴷ ⵛⴰ ⵓ ⵡⴰⵔ ⴰⵔⴻⵅⵅⵓ, ⵎⴰⵖⴰⵔ ⵙⵉⴷⵉ ⴰⵔⴻⴱⴱⵉ, ⴰⵔⴻⴱⴱⵉ ⵉⵏⵓ, ⴰⴷ ⵢⵉⵍⵉ ⴰⴽⵉⴷⴻⴽ. ⵏⴻⵜⵜⴰ ⵡⴰⵔ ⴷⴰⵢⴻⴽ ⵉⵙⴻⵎⵎⴻⵃ ⵏⵉⵖ ⵛⴻⴽ ⵉⵜⵜⴻⵊⵊⵉ ⴰⵍ ⴰⴽⴻⵎⵎⴻⵍ ⵏ ⵎⴰⵔⵔⴰ ⵍⵅⴻⴷⵎⴻⵜ ⵉ ⵜⵙⴻⵅⵅⴰⵔⵜ ⴷⵉ ⵜⴰⴷⴷⴰⵔⵜ ⵏ ⵙⵉⴷⵉ. 21 ⵅⵣⴰⵔ, ⴰⵇⴰ ⴷⵉⵏ ⵜⵉⵔⴱⵉⵄⵉⵏ ⵏ ⵉⴽⴻⵀⵀⴰⵏⴻⵏ ⴷ ⵉⵍⴰⵡⵉⵢⵢⴻⵏ ⵉ ⵎⴰⵔⵔⴰ ⵜⴰⵙⴻⵅⵅⴰⵔⵜ ⴷⵉ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⵓ ⵉ ⵎⴰⵔⵔⴰ ⵍⵅⴻⴷⵎⴻⵜ ⴰⵇⴰ ⴷⵉⵏ ⵖⴰⵔⴻⴽ ⵎⴰⵔⵔⴰ ⵉⵏⵏⵉ ⵉ ⵖⴰⵔ ⵜⴻⴵⴰ ⴷⵉ ⵍⵅⴰⴷⴰⵔ ⵏⵙⴻⵏ ⵃⵉⵎⴰ ⴰⴷ ⵜⵜ ⴳⴳⴻⵏ ⵙ ⵜⵉⵖⵉⵜ ⵉ ⴽⵓⵍ ⵍⵅⴻⴷⵎⴻⵜ. ⵓⵍⴰ ⴷ ⵍⵃⵓⴽⴽⴰⵎ ⴷ ⵎⴰⵔⵔⴰ ⵍⴳⴻⵏⵙ ⴱⴻⴷⴷⴻⵏ ⴰⴽⵉⴷⴻⴽ, ⵃⵉⵎⴰ ⴰⴷ ⴳⴳⴻⵏ ⵎⴰⵔⵔⴰ ⴰⵡⴰⵍⴻⵏ ⵏⵏⴻⵛ.”