ⴷⴰⵡⵓⴷ ⵉⵙⴻⵍⵍⴻⵎ ⵍⴻⴱⵏⵉ ⵏ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⴷ ⵍⵄⴰⵔⵛ ⵉ ⵎⵎⵉⵙ ⵙⵓⵍⵉⵎⴰⵏ
29
1 ⵓⵛⴰ ⵉⵏⵏⴰ ⵓⵊⴻⴵⵉⴷ ⴷⴰⵡⵓⴷ ⵉ ⵎⴰⵔⵔⴰ ⴰⴳⵔⴰⵡ ⵏ ⵍⴳⴻⵏⵙ: “ⵎⵎⵉ ⵙⵓⵍⵉⵎⴰⵏ ⴷ ⴰⵢⴻⵏⵏⵉ ⵡⴻⵏⵏⵉ ⵉⴼⴰⵔⵣ ⵉ-ⵜ ⴰⵔⴻⴱⴱⵉ. ⵏⴻⵜⵜⴰ ⵄⴰⴷ ⴷ ⴰⵃⵓⴷⵔⵉ ⴷ ⴰⵔⴻⵅⴼⴻⵏ ⵓⵛⴰ ⵍⵅⴻⴷⵎⴻⵜ ⴷ ⵜⴰⵎⴻⵇⵇⵔⴰⵏⵜ, ⵎⴰⵖⴰⵔ ⵡⴰⵔ ⵉⴵⵉ ⵍⴻⵇⵚⴰⵔ ⵉ ⵢⵉⵊⵊ ⵏ ⴱⵏⴰⴷⴻⵎ, ⵎⴰⵛⴰ ⵉ ⵙⵉⴷⵉ ⴰⵔⴻⴱⴱⵉ. 2 ⵙ ⵎⴰⵔⵔⴰ ⵜⵉⵣⴻⵎⵎⴰⵔ ⵉⵏⵓ ⵙⵙⵡⴻⵊⴷⴻⵖ ⵉ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⵉⵏⵓ ⵓⵔⴻⵖ ⵉ ⵍⴻⵇⵛⵓⵄ ⵏ ⵡⵓⵔⴻⵖ, ⵏⵏⵓⵇⴰⵔⵜ ⵉ ⵍⴻⵇⵛⵓⵄ ⵏ ⵏⵏⵓⵇⴰⵔⵜ, ⵏⵏⵃⴰⵙ ⵉ ⵍⴻⵇⵛⵓⵄ ⵏ ⵏⵏⵃⴰⵙ, ⵓⵣⵣⴰⵍ ⵉ ⵍⴻⵇⵛⵓⵄ ⵏ ⵡⵓⵣⵣⴰⵍ, ⴰⴽⴻⵛⵛⵓⴹ ⵉ ⵍⴻⵇⵛⵓⵄ ⵏ ⵓⴽⴻⵛⵛⵓⴹ, ⴷ ⵉⵥⵔⴰ ⵏ ⵓⵏⵉⴽⵙ ⴷ ⵉⵥⵔⴰ ⵉⴱⴰⵔⵛⴰⵏⴻⵏ ⵢⴰⵔⴻⵇⵇⴻⵏ ⵓⵍⴰ ⴷ ⵉⵥⵔⴰ ⵉⵜⵜⵡⴰⵙⵙⵇⴰⵔⴻⵇⵛⴻⵏ ⵎⴰⵃⴻⵏⴷ ⴰⴷ ⵜⵜⵡⴰⴳⴳⴻⵏ ⴷⵉ ⵜⵛⵓⵢⴰⵔ, ⵓⵍⴰ ⵄⴰⴷ ⵄⵍⴰⵎ ⴽⵓⵍ ⵉⵥⵔⴰ ⵉⵖⵍⴰⵏ ⵏⵏⴻⵖⵏⵉ, ⵓⵛⴰ ⵅⴻⵏⵏⵉ ⴰⵟⵟⴰⵙ ⵏ ⵉⵥⵔⴰ ⵏ ⵍⵎⴰⵔⵎⵓⵔ ⴷ ⴰⵛⴻⵎⵍⴰⵍ. 3 ⵣⵉ ⵜⴰⵢⵔⵉ ⵉⵏⵓ ⵉ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⵉⵏⵓ, ⴰⴷ ⴰⵔⵣⴼⴻⵖ ⵣⴻⴳ ⵡⴰⴳⵍⴰ ⵉⵏⵓ ⵄⴰⴷ ⵓⵔⴻⵖ ⴷ ⵏⵏⵓⵇⴰⵔⵜ ⵜⵉⵡⴰ ⵉ ⵎⵉⵏ ⵙⵙⵡⴻⵊⴷⴻⵖ ⵉ ⵜⴰⴷⴷⴰⵔⵜ ⵏ ⵣⵣⴰⵡⴻⵛⵜ ⵉⵇⴻⴷⴷⵙⴻⵏ, 4 ⵄⴰⴷ ⵜⴻⵍⵜ-ⴰⵍⴰⴼ ⵜⴰⵍⵉⵏⵜ ⵏ ⵡⵓⵔⴻⵖ ⵣⴻⴳ ⵡⵓⵔⴻⵖ ⵏ ⵓⴼⵉⵔ ⴷ ⵙⴻⴱⵄⴰ-ⴰⵍⴰⴼ ⵜⴰⵍⵉⵏⵜ ⵏ ⵏⵏⵓⵇⴰⵔⵜ ⵉⵚⴼⴰⵏ ⵎⴰⵃⴻⵏⴷ ⴰⴷ ⵣⵣⴰⵢⵙⴻⵏ ⵃⴻⵏⵏⵛⴻⵏ ⵍⴻⵃⵢⵓⴹ ⵏ ⵉⵅⵅⴰⵎⴻⵏ. 5 ⵓⵔⴻⵖ ⵉ ⵍⴻⵇⵛⵓⵄ ⵏ ⵡⵓⵔⴻⵖ, ⵏⵏⵓⵇⴰⵔⵜ ⵉ ⵍⴻⵇⵛⵓⵄ ⵏ ⵏⵏⵓⵇⴰⵔⵜ, ⵉ ⵎⴰⵔⵔⴰ ⵍⵅⴻⴷⵎⴻⵜ ⵉ ⵖⴰ ⵜᵉⵜⵜⵡⴰⴳⴳ ⵙ ⵓⴼⵓⵙ ⵏ ⵉⵃⵔⴰⵢⴼⵉⵢⵢⴻⵏ. ⵎⴰⵏ ⵡⴻⵏ ⵅⴻⵏⵏⵉ ⵉⵟⵟⴻⵡⵡⵄⴻⵏ ⴰⵙⵙ-ⴰ ⵎⴰⵃⴻⵏⴷ ⴰⴷ ⵉⵡⵛ ⵉ ⵙⵉⴷⵉ?” 6 ⵅⴰⵙ ⵓⵛⴰ ⵉⵡⵢⴻⵏ ⵉⵎⴻⵇⵇⵔⴰⵏⴻⵏ ⵅ ⵉⴱⴰⴱⴰⵜⴻⵏ ⵏ ⵍⴰⴵⴰⵜ ⴷ ⵉⵎⴻⵇⵇⵔⴰⵏⴻⵏ ⵏ ⵜⵇⴻⴱⴱⴰⵍ ⵏ ⵉⵙⵔⴰⵉⵍ ⴷ ⵉⵎⴻⵇⵇⵔⴰⵏⴻⵏ ⵅ ⵡⴰⵍⴻⴼ ⵓ ⵅ ⵎⵢⴰ ⵜⵉⵡⵀⵉⴱⵉⵏ ⵏⵙⴻⵏ ⵙ ⵍⵅⴰⴹⴰⵔ, ⵊⵎⵉⵄ ⴰⴽ-ⴷ ⵉⵎⴻⵇⵇⵔⴰⵏⴻⵏ ⵅ ⵍⵅⴻⴷⵎⴻⵜ ⵏ ⵓⵊⴻⴵⵉⴷ. 7 ⵏⵉⵜⵏⵉ ⴰⵔⵣⴼⴻⵏ ⵉ ⵜⵙⴻⵅⵅⴰⵔⵜ ⵏ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⵅⴻⵎⵙⴰ-ⴰⵍⴰⴼ ⵜⴰⵍⵉⵏⵜ ⵏ ⵡⵓⵔⴻⵖ ⴷ ⵄⴻⵛⵔⴰ-ⴰⵍⴰⴼ ⵏ ⴷⵔⴰⵅⵎⴰⵜ ⴷ ⵄⴻⵛⵔⴰ-ⴰⵍⴰⴼ ⵜⴰⵍⵉⵏⵜ ⵏ ⵏⵏⵓⵇⴰⵔⵜ ⴷ ⵜⵎⴻⵏⵟⴰⵛ-ⴰⵍⴻⴼ ⵜⴰⵍⵉⵏⵜ ⵏ ⵏⵏⵃⴰⵙ ⴷ ⵎⵢⴰⵜ-ⴰⵍⴻⴼ ⵜⴰⵍⵉⵏⵜ ⵏ ⵡⵓⵣⵣⴰⵍ. 8 ⵡⴻⵏⵏⵉ ⵖⴰⵔ ⵓⴼⵉⵏ ⵉⵥⵔⴰ ⵉⵖⵍⴰⵏ, ⵉⵡⵛⴰ ⵉ-ⵜⴻⵏ ⵉ ⵡⴻⵅⵅⴰⵎ ⵏ ⵜⵅⵓⴱⴰⵢ ⵏ ⵜⴰⴷⴷⴰⵔⵜ ⵏ ⵙⵉⴷⵉ ⵡⴻⵏⵏⵉ ⵜⵓⵖⴰ ⵙⴰⴷⵓ ⵓⴼⵓⵙ ⵏ ⵢⴰⵃⵉⵢⵉⵍ, ⴰⵊⴰⵔⵛⵓⵏⵉ. 9 ⵉⴼⴰⵔⵃ ⵍⴳⴻⵏⵙ ⵙ ⵜⴻⵡⵀⵉⴱⵉⵏ ⵏⵙⴻⵏ ⵉ ⵉⵎⵎⴻⵡⵛⴻⵏ ⵙ ⵍⵅⴰⴹⴰⵔ, ⵎⴰⵖⴰⵔ ⵏⵉⵜⵏⵉ ⵡⵛⵉⵏ ⵣⴻⴳ ⵡⵓⵍ ⵉⵎⵓⵏ ⵇⴰⵄ ⵙ ⵍⵅⴰⴹⴰⵔ ⵉ ⵙⵉⴷⵉ, ⵓⵛⴰ ⵉⴼⴰⵔⵃ ⵓⵊⴻⴵⵉⴷ ⴷⴰⵡⵓⴷ ⵍⴻⴼⵔⴰⵃⴻⵜ ⴷ ⵜⴰⵎⴻⵇⵇⵔⴰⵏⵜ ⴰⵟⵟⴰⵙ. 10 ⴷⴰⵡⵓⴷ ⵉⴱⴰⵔⴻⴽ ⵙⵉⴷⵉ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏ ⵎⴰⵔⵔⴰ ⴰⴳⵔⴰⵡ ⵏ ⵍⴳⴻⵏⵙ, ⵉⵏⵏⴰ:
“ⴰⴷ ⵜᵉⵜⵜⵡⴰⴱⴰⵔⴽⴻⴷ ⵛⴻⴽ, ⴰ ⵙⵉⴷⵉ, ⴰⵔⴻⴱⴱⵉ ⵏ ⴱⴰⴱⴰⵜⵏⴻⵖ ⵉⵙⵔⴰⵉⵍ, ⵣⵉ ⵍⴻⴱⴷⴰ ⴰⵍ ⵍⴻⴱⴷⴰ!
11 ⵉ ⵛⴻⴽ, ⴰ ⵙⵉⴷⵉ, ⵍⴻⵎⵖⴰⵔⴻⵜ ⴷ ⵚⵚⵓⵍⵟⴰ ⴷ ⵍⵄⴻⵣⵣ ⴷ ⵎⵉⵏ ⵉⵜⵜⴷⵓⵎⴰⵏ ⵉ ⵍⴻⴱⴷⴰ ⴷ ⵍⵄⴰⴹⴰⵎⴰ, ⵎⵉⵏⵣⵉ ⵎⴰⵔⵔⴰ ⵎⵉⵏ ⵉⴵⴰⵏ ⴷⴻⴳ ⵓⵊⴻⵏⵏⴰ ⵓ ⵅ ⵜⴻⵎⵎⵓⵔⵜ ⴰⵇⴰ-ⵜ ⵏⵏⴻⵛ. ⵣⵣⴰⵢⴻⴽ, ⴰ ⵙⵉⴷⵉ, ⵉ ⵜⴻⴵⴰ ⵜⴰⴳⴻⵍⴷⵉⵜ, ⵣⵣⴰⵢⴻⴽ ⵛⴻⴽ, ⵡⴻⵏⵏⵉ ⵉⵙⵙⴳⴻⵄⵄⴷⴻⵏ ⵉⵅⴻⴼ ⵏⵏⴻⵛ ⴷ ⴰⵣⴻⴵⵉⴼ ⵜⵉⵡⴰ ⵎⴰⵔⵔⴰ. 12 ⴰⴳⵍⴰ ⴷ ⵛⵛⴰⵏ ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ ⵓ ⵛⴻⴽ ⵜⵚⴻⴵⴹⴻⴷ ⵅ ⵎⴰⵔⵔⴰ ⵎⵉⵏ ⵉⴵⴰⵏ. ⴰⵇⴰ-ⵜ ⵊⵊⴻⵀⴷ ⴷ ⵚⵚⵓⵍⵟⴰ ⴷⴻⴳ ⵓⴼⵓⵙ ⵏⵏⴻⵛ, ⴰⵇⴰ-ⵜ ⴷⴻⴳ ⵓⴼⵓⵙ ⵏⵏⴻⵛ ⵃⵉⵎⴰ ⴰⴷ ⵜⴻⵡⵛⴻⴷ ⵍⴻⵎⵖⴰⵔⴻⵜ ⴷ ⵊⵊⴻⵀⴷ ⵉ ⵎⴰⵔⵔⴰ.
13 ⵅⴻⵏⵏⵉ ⵍⴻⵅⵅⵓ, ⴰⵔⴻⴱⴱⵉ ⵏⵏⴻⵖ, ⵏⴻⵛⵛⵉⵏ ⵏⴻⵜⵜⵇⴰⴷⴰ ⵛⴻⴽ ⵓ ⵏⴻⵜⵜⵚⴻⴱⴱⴻⵃ ⴷⴻⴳ ⵢⵉⵙⴻⵎ ⵏ ⵍⵄⴻⵣⵣ ⵏⵏⴻⵛ. 14 ⵎⴰⵖⴰⵔ ⵎⵉⵏ ⵄⵏⵉⵖ ⵏⴻⵛⵛ ⴷ ⵎⵉⵏ ⵉⵄⵏⴰ ⵍⴳⴻⵏⵙ ⵉⵏⵓ, ⴰⵇⴰ ⵏⴻⵛⵛⵉⵏ ⵖⴰⵔⵏⴻⵖ ⵜⵉⵣⴻⵎⵎⴰⵔ ⴰⴷ ⵏⴻⵡⵛ ⴰⵎⵎⵓ ⵙ ⵍⵅⴰⴹⴰⵔ? ⵎⴰⵖⴰⵔ ⵣⵣⴰⵢⴻⴽ ⴷⴷ-ⵉⵜⵜⴰⵙ ⵎⴰⵔⵔⴰ ⵓ ⵎⵉⵏ ⵉ ⴷ ⴰⵛ ⵏⴻⵡⵛⴰ, ⵏⴻⵡⵛⴰ ⵉ-ⵜ ⵣⴻⴳ ⵓⴼⵓⵙ ⵏⵏⴻⵛ. 15 ⵎⴰⵖⴰⵔ ⵏⴻⵛⵛⵉⵏ ⵎⵖⵉⵔ ⴷ ⵉⴱⴰⵔⵔⴰⵏⵉⵢⵢⴻⵏ ⴷ ⵉⵎⴻⵄⵣⴰⴱ ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ, ⴰⵎ ⵍⴻⵊⴷⵓⴷ ⵏⵏⴻⵖ. ⵓⵙⵙⴰⵏ ⵏⵏⴻⵖ ⵅ ⵜⴻⵎⵎⵓⵔⵜ ⴰⵎ ⵜⵉⵍⵉ ⵓ ⵍⴰⵢⴰⵙ ⵡⴰⵔ ⴷⵉⵏ ⵉⴵⵉ.
16 ⴰ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⵣⴻⴳ ⵓⴼⵓⵙ ⵏⵏⴻⵛ ⵢⵓⵙⴰ-ⴷⴷ ⵎⴰⵔⵔⴰ ⴰⴼⴻⵢⵢⴻⴹ-ⴰ ⵉ ⵏⴻⵙⵙⴻⵡⵊⴻⴷ, ⵃⵉⵎⴰ ⴰⴷ ⵏⴻⴱⵏⴰ ⵉⵛⵜ ⵏ ⵜⴰⴷⴷⴰⵔⵜ ⵉ ⵛⴻⴽ, ⵉ ⵢⵉⵙⴻⵎ ⵏⵏⴻⵛ ⵉⵇⴻⴷⴷⵙⴻⵏ. ⵎⴰⵔⵔⴰ ⴰⵢⴰ ⴷ ⵏⵏⴻⵛ. 17 ⵏⴻⵛⵛ ⵙⵙⵏⴻⵖ, ⴰ ⴰⵔⴻⴱⴱⵉ ⵉⵏⵓ, ⴰⵇⴰ ⵛⴻⴽ ⵜⵇⴻⴵⴱⴻⴷ ⵓⵍ ⵓ ⴰⵇⴰ ⵉⵜⵜⴻⵄⵊⵉⴱ ⴰⵛ ⵓⵙⴻⴳⴳⴻⵎ. ⵏⴻⵛⵛ, ⴷⵉ ⵍⴻⵚⴼⴰⵢⴻⵜ ⵏ ⵡⵓⵍ ⵉⵏⵓ, ⵡⵛⵉⵖ ⵎⴰⵔⵔⴰ ⴰⵢⴰ ⵙ ⵍⵅⴰⴹⴰⵔ, ⵓ ⵍⴻⵅⵅⵓ ⴰⵇⴰ ⵓⵍⴰ ⴷ ⵍⴳⴻⵏⵙ ⵏⵏⴻⵛ ⵉ ⴷⴰ ⵉⴵⴰⵏ - ⵉⵡⴰ ⵥⵔⵉⵖ ⵜ ⵙ ⵍⴻⴼⵔⴰⵃⴻⵜ - ⵉⵡⵛⴰ ⴰⵛ ⵜⵉⵡⵀⵉⴱⵉⵏ ⵙ ⵍⵅⴰⴹⴰⵔ.
18 ⴰ ⵙⵉⴷⵉ, ⴰⵔⴻⴱⴱⵉ ⵏ ⵍⴻⵊⴷⵓⴷ ⵏⵏⴻⵖ, ⵏ ⵉⴱⵔⴰⵀⵉⵎ ⴷ ⵉⵙⵃⴰⵇ ⴷ ⵉⵙⵔⴰⵉⵍ, ⵃⴹⴰ ⵅⴻⵏⵏⵉ ⵉ ⵍⴻⴱⴷⴰ ⴰⵇⴰ ⴰⵢⴰ ⴰⴷ ⵢⴻⵊⵊ ⵟⵟⴰⴱⴻⵄ ⵅ ⵉⵅⴰⵔⵉⵚⵚⴻⵏ ⴷⴻⴳ ⵡⵓⵍ ⵏ ⵍⴳⴻⵏⵙ ⵏⵏⴻⵛ ⵓ ⵏⴷⴻⵀ ⵓⵍ ⵏⵙⴻⵏ ⵖⴰⵔⴻⴽ! 19 ⴻⵡⵛ ⵓⵍⴰ ⵉ ⵎⵎⵉ ⵙⵓⵍⵉⵎⴰⵏ ⵉⵊⵊ ⵏ ⵡⵓⵍ ⵉⵎⵓⵏ ⵇⴰⵄ, ⵎⴰⵃⴻⵏⴷ ⴰⴷ ⵉⵃⴹⴰ ⵍⵓⵎⵓⵔⴰⵜ ⵏⵏⴻⵛ ⴷ ⵛⵛⵀⴰⴷⴻⵜ ⵏⵏⴻⵛ ⴷ ⵜⵉⵡⴻⵚⵚⴰ ⵏⵏⴻⵛ, ⵎⴰⵃⴻⵏⴷ ⴰⴷ ⵢⴻⴳⴳ ⵎⴰⵔⵔⴰ ⵓ ⵎⴰⵃⴻⵏⴷ ⴰⴷ ⵉⴱⵏⴰ ⵍⴻⵇⵚⴰⵔ-ⴰ ⵏ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵉ ⵅ ⵙⵙⵡⴻⵊⴷⴻⵖ ⵏⴻⵛⵛ.”
20 ⵅⴻⵏⵏⵉ ⵉⵏⵏⴰ ⴷⴰⵡⵓⴷ ⵉ ⵎⴰⵔⵔⴰ ⴰⴳⵔⴰⵡ ⵏ ⵍⴳⴻⵏⵙ: “ⴱⴰⵔⴽⴻⵎ, ⵙⵉⴷⵉ, ⴰⵔⴻⴱⴱⵉ ⵏⵡⴻⵎ!” ⵅⴻⵏⵏⵉ ⵉⴱⴰⵔⴻⴽ ⵎⴰⵔⵔⴰ ⴰⴳⵔⴰⵡ ⵏ ⵍⴳⴻⵏⵙ ⵙⵉⴷⵉ, ⴰⵔⴻⴱⴱⵉ ⵏ ⵍⴻⵊⴷⵓⴷ ⵏⵙⴻⵏ. ⵏⵉⵜⵏⵉ ⵓⴹⴰⵔⴻⵏ, ⴱⴻⵏⴷⵇⴻⵏ ⵉ ⵙⵉⴷⵉ ⵓ ⵉ ⵓⵊⴻⴵⵉⴷ. 21 ⵜⵉⵡⴻⵛⵛⴰ ⵏⵏⴻⵙ ⵉⵡⵢⴻⵏ ⵏⵉⵜⵏⵉ ⵜⵉⵖⴰⵔⵚⴰ ⵉ ⵙⵉⴷⵉ. ⵏⵉⵜⵏⵉ ⵉⵡⵢⴻⵏ ⴰⵍⴻⴼ ⵏ ⵉⴼⵓⵏⴰⵙⴻⵏ ⵉⵎⴻⵥⵢⴰⵏⴻⵏ ⴷ ⴰⵍⴻⴼ ⵏ ⵉⵛⴰⵔⵔⵉⵢⵢⴻⵏ ⴷ ⴰⵍⴻⴼ ⵏ ⵉⵣⵎⴰⵔⴻⵏ ⴰⴽ-ⴷ ⵎⴰⵔⵔⴰ ⵜⵉⵡⵀⵉⴱⵉⵏ ⵏⵙⴻⵏ ⵏ ⵓⵙⴻⵢⵢⴻⴱ ⴷ ⵜⵖⴰⵔⵚⴰ ⵏ ⵡⴻⵛⵎⴰⴹ ⵉ ⵙⵉⴷⵉ ⵓ ⵅⴻⵏⵏⵉ ⴰⵟⵟⴰⵙ ⵏ ⵜⵖⴰⵔⵚⴰ ⵉ ⵎⴰⵔⵔⴰ ⵉⵙⵔⴰⵉⵍ. 22 ⴷⴻⴳ ⵡⴰⵙⵙ ⵏⵏⵉ ⵛⵛⵉⵏ ⵓ ⵙⵡⵉⵏ ⵏⵉⵜⵏⵉ ⵙ ⵍⴻⴼⵔⴰⵃⴻⵜ ⵜⴰⵎⴻⵇⵇⵔⴰⵏⵜ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ ⵓ ⴳⴳⵉⵏ ⵙⵓⵍⵉⵎⴰⵏ, ⵎⵎⵉⵙ ⵏ ⴷⴰⵡⵓⴷ, ⴷ ⴰⵊⴻⴵⵉⴷ ⵉ ⵜⵡⴰⵍⴰ ⵡⵉⵙⵙ ⵜⵏⴰⵢⴻⵏ ⵓ ⴷⴻⵀⵏⴻⵏ ⵜ ⴷ ⵍⵃⴰⴽⴻⵎ ⵣⵣⴰⵜ ⵉ ⵙⵉⴷⵉ, ⵓ ⵚⴰⴷⵓⵇ ⴷⴻⵀⵏⴻⵏ ⵜ ⴷ ⴰⴽⴻⵀⵀⴰⵏ. 23 ⵙⵓⵍⵉⵎⴰⵏ ⵉⵇⵇⵉⵎ ⵅ ⵍⵄⴰⵔⵛ ⵏ ⵙⵉⴷⵉ ⴰⵎ ⵓⵊⴻⴵⵉⴷ ⴷⴻⴳ ⵡⴻⵎⵛⴰⵏ ⵏ ⴱⴰⴱⴰⵙ ⴷⴰⵡⵓⴷ. ⵏⴻⵜⵜⴰ ⵉⴼⵍⴻⵃ ⵓ ⵎⴰⵔⵔⴰ ⵉⵙⵔⴰⵉⵍ ⵉⵙⵍⴰ ⴰⵙ. 24 ⵎⴰⵔⵔⴰ ⵍⵃⵓⴽⴽⴰⵎ ⴷ ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵓⵍⴰ ⴷ ⵎⴰⵔⵔⴰ ⴰⵔⵔⴰⵡⴻⵏ ⵏ ⵓⵊⴻⴵⵉⴷ ⴷⴰⵡⵓⴷ, ⵡⵜⵉⵏ ⴷⴻⴳ ⵓⴼⵓⵙ ⴰⴷ ⵇⵇⵉⵎⴻⵏ ⵙⴰⴷⵓ ⴰⴼⵓⵙ ⵏ ⵓⵊⴻⴵⵉⴷ ⵙⵓⵍⵉⵎⴰⵏ. 25 ⵢⴰⵔⵔⴰ ⵙⵉⴷⵉ ⵙⵓⵍⵉⵎⴰⵏ ⴰⴷ ⵉⴷⵡⴻⵍ ⴷ ⴰⵎⴻⵇⵇⵔⴰⵏ ⴰⵍ ⵟⵟⴰⵔⴼ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏ ⵉⵙⵔⴰⵉⵍ. ⵏⴻⵜⵜⴰ ⵉⵡⵛⴰ ⴰⵙ ⴰⵡⴻⵇⵇⴰⵔ ⵉⴳⴻⵍⵍⴷⴻⵏ ⵉ ⵜⵓⵖⴰ ⵡⴰⵔ ⵉⴵⵉ ⵓⵍⴰ ⵖⴰⵔ ⵉⵊⵊ ⵏ ⵓⵊⴻⴵⵉⴷ ⵅ ⵉⵙⵔⴰⵉⵍ ⵇⴱⴻⵍ ⵏⵏⴻⵙ.
26 ⴰⵎⵎⵓ ⵉ ⵉⵃⴽⴻⵎ ⴷⴰⵡⵓⴷ, ⵎⵎⵉⵙ ⵏ ⵢⴰⵙⵙⴰ, ⵅ ⵎⴰⵔⵔⴰ ⵉⵙⵔⴰⵉⵍ. 27 ⵓⵙⵙⴰⵏ ⵏⵏⵉ ⵜⵓⵖⴰ ⵉⵃⴽⴻⵎ ⵅ ⵉⵙⵔⴰⵉⵍ, ⴰⵇⴰ ⴰⵜⴻⵏ ⴰⵔⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ. ⵏⴻⵜⵜⴰ ⵉⵃⴽⴻⵎ ⴷⵉ ⵃⴰⴱⵔⵓⵏ ⵙⴻⴱⵄⴰ ⵏ ⵉⵙⴻⴳⴳⵯⵓⵙⴰ ⵓ ⴷⵉ ⵓⵔⵛⴰⵍⵉⵎ ⵜⵍⴰⵜⴰ ⵓ-ⵜⵍⴰⵜⵉⵏ ⵏ ⵉⵙⴻⴳⴳⵯⵓⵙⴰ.
28 ⵏⴻⵜⵜⴰ ⵉⵎⵎⵓⵜ ⵓⵎⵉ ⵉⵛⴰⴱ ⵎⵍⵉⵃ, ⵉⵊⵊⵉⵡⴻⵏ ⵓⵙⵙⴰⵏ, ⴰⴳⵍⴰ ⴷ ⵓⵄⵓⴵⵉ. ⵎⵎⵉⵙ ⵙⵓⵍⵉⵎⴰⵏ ⵉⴷⵡⴻⵍ ⴷ ⴰⵊⴻⴵⵉⴷ ⴷⴻⴳ ⵡⴻⵎⵛⴰⵏ ⵏⵏⴻⵙ.
29 ⵉⵎⴻⵣⵔⵓⵢⴻⵏ ⵏ ⵓⵊⴻⴵⵉⴷ ⴷⴰⵡⵓⴷ, ⵉⵎⴻⵣⵡⵓⵔⴰ ⴷ ⵉⵏⴻⴳⴳⵓⵔⴰ, ⴰⵇⴰ ⵜⵜⵡⴰⵣⴻⵎⵎⴻⵎⴻⵏ ⴷⴻⴳ ⵡⴻⴷⵍⵉⵙ ⵏ ⵉⵎⴻⵣⵔⵓⵢⴻⵏ ⵏ ⵓⵎⵡⴰⵍⴰⵡ ⵛⴰⵎⵡⵉⵍ ⵓ ⴷⴻⴳ ⵡⴻⴷⵍⵉⵙ ⵏ ⵉⵎⴻⵣⵔⵓⵢⴻⵏ ⵏ ⵓⵏⴰⴱⵉ ⵏⴰⵜⴰⵏ ⵓ ⴷⴻⴳ ⵡⴻⴷⵍⵉⵙ ⵏ ⵉⵎⴻⵣⵔⵓⵢⴻⵏ ⵏ ⵓⵎⵡⴰⵍⴰⵡ ⵊⴰⴷ, 30 ⵙ ⵎⴰⵔⵔⴰ ⵎⵉⵏ ⵢⵓⵔⴰⵏ ⵅ ⵜⴳⴻⵍⴷⵉⵜ ⵏⵏⴻⵙ ⵓ ⵅ ⵚⵚⵓⵍⵟⴰ ⵏⵏⴻⵙ ⵓ ⵅ ⵍⵎⵉⵊⴰⵍⴰⵜ ⵏ ⵍⵡⴻⵇⵜ ⵉ ⵅⴰⵙ ⴷⴷ-ⵉⴽⴽⵉⵏ ⵓⵍⴰ ⵅ ⵉⵙⵔⴰⵉⵍ ⵓ ⵅ ⵎⴰⵔⵔⴰ ⵜⵉⴳⴻⵍⴷⵉⵡⵉⵏ ⵏ ⵜⴻⵎⵎⵓⵔⴰ.