2 ⵉⵎⴻⵥⵔⵓⵢⴻⵏ
ⵜⵓⵜⵔⴰ ⵏ ⵙⵓⵍⵉⵎⴰⵏ - ⴰⴹⵀⴰⵔ ⴰⵎⴻⵣⵡⴰⵔⵓ ⵏ ⵙⵉⴷⵉ ⵉ ⵙⵓⵍⵉⵎⴰⵏ
1
1 ⵙⵓⵍⵉⵎⴰⵏ, ⵎⵎⵉⵙ ⵏ ⴷⴰⵡⵓⴷ, ⵉⵜⵜⵡⴰⴹⵎⴻⵏ ⴷⵉ ⵜⴳⴻⵍⴷⴰ ⵏⵏⴻⵙ, ⵎⵉⵏⵣⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⵙ, ⵜⵓⵖⴰ-ⵜ ⴰⴽⵉⴷⴻⵙ ⵓⵛⴰ ⵢⴰⵔⵏⵉ ⴷⵉ ⵍⴻⵎⵖⴰⵔⴻⵜ ⵏⵏⴻⵙ ⴰⵍ ⵟⵟⴰⵔⴼ. ■ 2 ⵙⵓⵍⵉⵎⴰⵏ ⵉⵙⵙⵉⵡⴻⵍ ⴰⴽ-ⴷ ⵎⴰⵔⵔⴰ ⵉⵙⵔⴰⵉⵍ, ⴰⴽ-ⴷ ⵉⵎⴻⵇⵇⵔⴰⵏⴻⵏ ⵅ ⵡⴰⵍⴻⴼ ⵓ ⵅ ⵎⵢⴰ, ⴰⴽ-ⴷ ⵍⵇⵓⴹⴰⵜ ⵓ ⴰⴽ-ⴷ ⵎⴰⵔⵔⴰ ⵍⵃⵓⴽⴽⴰⵎ ⵏ ⵎⴰⵔⵔⴰ ⵉⵙⵔⴰⵉⵍ, ⵉⵣⴻⴵⵉⴼⴻⵏ ⵅ ⵉⴱⴰⴱⴰⵜⴻⵏ ⵏ ⵍⴰⴵⴰⵜ. 3 ⵏⵉⵜⵏⵉ ⵟⵟⴼⴻⵏ ⴰⴱⵔⵉⴷ, ⵙⵓⵍⵉⵎⴰⵏ ⴷ ⵎⴰⵔⵔⴰ ⴰⴳⵔⴰⵡ ⵏ ⵍⴳⴻⵏⵙ ⴰⴽⵉⴷⴻⵙ, ⵖⴰⵔ ⵍⴳⴻⵄⵄⴷⴻⵜ ⵏⵏⵉ ⵉⴵⴰⵏ ⵖⴰⵔ ⵊⵉⴱⵄⵓⵏ, ⵎⵉⵏⵣⵉ ⴷⵉⵏⵏⵉ ⵉ ⵜⵓⵖⴰ ⴰⵇⵉⴹⵓⵏ ⵏ ⵓⵎⵙⴰⴳⴰⵔ ⵏ ⴰⵔⴻⴱⴱⵉ ⵉ ⵉⴳⴳⴰ ⵎⵓⵙⴰ, ⴰⵎⵙⴻⵅⵅⴰⵔ ⵏ ⵙⵉⴷⵉ, ⴷⵉ ⵍⴻⵅⵍⴰ. 4 ⵎⴰⵛⴰ ⴷⴰⵡⵓⴷ ⵢⵉⵡⵉ ⵜⵜⴰⴱⵓⵜ ⵏ ⴰⵔⴻⴱⴱⵉ ⵣⵉ ⵇⴰⵔⵢⴰⵜ-ⵢⴰⵄⴰⵔⵉⵎ ⵖⴰⵔ ⵡⴻⵎⵛⴰⵏ ⵉ ⴷⴷ ⴰⵙ ⵉⵙⵙⴻⵡⵊⴻⴷ ⴷⴰⵡⵓⴷ, ⵎⵉⵏⵣⵉ ⵏⴻⵜⵜⴰ ⵉⵡⵜⴰ ⵉⵊⵊ ⵏ ⵓⵇⵉⴹⵓⵏ ⵉ ⵜⵜⴰⴱⵓⵜ ⴷⵉ ⵓⵔⵛⴰⵍⵉⵎ. 5 ⴰⵄⴰⵍⵟⴰⵔ ⵏ ⵏⵏⵃⴰⵙ ⵏⵏⵉ ⵉⴳⴳⴰ ⴱⴰⵚⴰⵍⵉⵢⵉⵍ, ⵎⵎⵉⵙ ⵏ ⵓⵔⵉ, ⵎⵎⵉⵙ ⵏ ⵃⵓⵔ, ⵜⵓⵖⴰ ⴷⵉⵏ ⴷⵉ ⵊⵉⴱⵄⵓⵏ ⵣⵣⴰⵜ ⵉ ⵓⵇⵉⴹⵓⵏ ⵏ ⵓⵎⵙⴰⴳⴰⵔ ⵏ ⵙⵉⴷⵉ. ⵙⵓⵍⵉⵎⴰⵏ ⵢⵓⵢⵓⵔ ⴷⵉⵏ ⵊⵎⵉⵄ ⴰⴽ-ⴷ ⵎⴰⵔⵔⴰ ⴰⴳⵔⴰⵡ ⵏ ⵍⴳⴻⵏⵙ 6 ⵓⵛⴰ ⵉⵇⴻⴷⴷⴻⵎ ⴷⵉⵏ ⵙⵓⵍⵉⵎⴰⵏ, ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⵉⵛⵜ ⵏ ⵜⵖⴰⵔⵚⵜ ⵅ ⵓⵄⴰⵍⵟⴰⵔ ⵏ ⵏⵏⵃⴰⵙ ⵏⵏⵉ ⵉⴵⴰⵏ ⵖⴰⵔ ⵓⵇⵉⴹⵓⵏ ⵏ ⵓⵎⵙⴰⴳⴰⵔ. ⵏⴻⵜⵜⴰ ⵉⵇⴻⴷⴷⴻⵎ ⵅⴰⵙ ⴰⵍⴻⴼ ⵏ ⵜⵖⴰⵔⵚⴰ ⵏ ⵡⴻⵛⵎⴰⴹ. 7 ⴷⵉ ⴵⵉⵍⴻⵜ ⵏⵏⵉ, ⵉⴱⴰⵏ-ⴷⴷ ⴰⵔⴻⴱⴱⵉ ⵉ ⵙⵓⵍⵉⵎⴰⵏ, ⵉⵏⵏⴰ ⴰⵙ: “ⵜⵜⴰⵔ ⵎⵉⵏ ⵜⴻⵅⵙⴻⴷ ⴰⴷ ⴰⵛ ⵜ ⵡⵛⴻⵖ!” 8 ⵙⵓⵍⵉⵎⴰⵏ ⵉⵏⵏⴰ ⵉ ⴰⵔⴻⴱⴱⵉ: “ⵛⴻⴽ ⵜⴻⵙⵙⴻⵛⵏⴻⴷ ⵉ ⴱⴰⴱⴰ ⴷⴰⵡⵓⴷ ⵜⴰⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ ⵓ ⵜⴻⴳⴳⵉⴷ ⴰⵢⵉ ⴷ ⴰⵊⴻⴵⵉⴷ ⴷⴻⴳ ⵡⴻⵎⵛⴰⵏ ⵏⵏⴻⵙ. 9 ⵅⴻⵏⵏⵉ ⵍⴻⵅⵅⵓ, ⴰ ⵙⵉⴷⵉ ⴰⵔⴻⴱⴱⵉ, ⴻⵊⵊ ⴰⴷ ⵉⴼⴼⴻⵖ ⵡⴰⵡⴰⵍ ⵏⵏⴻⵛ ⵉ ⵜⴻⵙⵙⵉⵡⵍⴻⴷ ⴰⴽ-ⴷ ⴱⴰⴱⴰ ⴷⴰⵡⵓⴷ ⵙ ⵜⵉⴷⴻⵜⵜ, ⵎⵉⵏⵣⵉ ⵜⴻⴳⴳⵉⴷ ⴰⵢⵉ ⴷ ⴰⵊⴻⴵⵉⴷ ⵅ ⵉⵊⵊ ⵏ ⵍⴳⴻⵏⵙ ⵉⵡⵙⴻⵄ ⴰⵎ ⵜⵄⴻⵊⵊⴰⵊⵜ ⵏ ⵜⴻⵎⵎⵓⵔⵜ. 10 ⴻⵡⵛ ⴰⵢⵉ ⵍⴻⵅⵅⵓ ⵜⵉⵖⵉⵜ ⴷ ⵜⵓⵙⵙⵏⴰ, ⵃⵉⵎⴰ ⴰⴷ ⴼⴼⵖⴻⵖ ⵓ ⴰⴷ ⴷⴷ-ⴷⴻⵡⵍⴻⵖ ⵣⵣⴰⵜ ⵉ ⵡⵓⴷⴻⵎ ⵏ ⵍⴳⴻⵏⵙ-ⴰ ⴰⵎ ⵍⵃⴰⴽⴻⵎ ⵏⵙⴻⵏ, ⵎⵉⵏⵣⵉ ⵡⵉ ⵉⵣⴻⵎⵎⴰⵔⴻⵏ ⴰⴷ ⵉⵃⴽⴻⵎ ⵅ ⵍⴳⴻⵏⵙ-ⴰ ⴰⵎⴻⵇⵇⵔⴰⵏ ⵙ ⵍⵃⴻⵇⵇ?”
11 ⵅⴻⵏⵏⵉ ⵉⵏⵏⴰ ⴰⵔⴻⴱⴱⵉ ⵉ ⵙⵓⵍⵉⵎⴰⵏ: “ⵎⵉⵏⵣⵉ ⴰⵢⴰ ⵖⴰⵔⴻⴽ ⴷⴻⴳ ⵡⵓⵍ ⵓ ⵎⵉⵏⵣⵉ ⵛⴻⴽ ⵡⴰⵔ ⵜᵉⵜⵜⴰⵔⴻⴷ ⴰⴳⵍⴰ, ⵍⴻⴽⵙⵉⴱⴻⵜ ⵏⵉⵖ ⵛⵛⴰⵏ ⵏⵉⵖ ⵜⵓⴷⴰⵔⵜ ⵏ ⵢⵉⵏⵏⵉ ⵉ ⵛⴻⴽ ⵉⵛⴰⵔⵔⵀⴻⵏ, ⵓ ⵡⴰⵔ ⵜᵉⵜⵜⴰⵔⴻⴷ ⵜⵓⴷⴰⵔⵜ ⵜⴰⵣⵉⵔⴰⵔⵜ, ⵎⴰⵛⴰ ⵎⵉⵏⵣⵉ ⵜᵉⵜⵜⴰⵔⴻⴷ ⵜⵉⵖⵉⵜ ⴷ ⵜⵓⵙⵙⵏⴰ ⵃⵉⵎⴰ ⴰⴷ ⵜⴳⴻⵡⵡⴷⴻⴷ ⵍⴳⴻⵏⵙ ⵉⵏⵓ ⵙ ⵍⵃⴻⵇⵇ, ⵉ ⵡⴻⵏⵏⵉ ⵓⵎⵉ ⵅⴻⴼ ⴳⴳⵉⵖ ⵛⴻⴽ ⴷ ⴰⵊⴻⴵⵉⴷ, 12 ⴰⵇⴰ ⵜⴻⵎⵎⴻⵡⵛ ⴰⵛ ⵍⴻⵅⵅⵓ ⵜⵉⵖⵉⵜ ⴷ ⵜⵓⵙⵙⵏⴰ, ⵓ ⴰⴷ ⴰⵛ ⵡⵛⴻⵖ ⵄⴰⵡⴻⴷ ⴰⴳⵍⴰ ⴷ ⵍⴻⴽⵙⵉⴱⴻⵜ ⴷ ⵛⵛⴰⵏ ⴰⵎ ⵎⴰⵎⵎⴻⵛ ⵡⴰⵔ ⵜⴻⵏ ⵉⵟⵟⵉⴼ ⵓⵍⴰ ⴷ ⵉⵊⵊ ⵏ ⵓⵊⴻⴵⵉⴷ ⵇⴱⴻⵍ ⵏⵏⴻⵛ ⵓ ⵡⴰⵔ ⵜⴻⵏ ⵜⵜᵉⵟⵟⵉⴼⴻⵏ ⵄⴰⴷ ⴰⵎⵎⵓ ⴰⵡⴰⵔⵏⵉ ⴰⵛ.
ⴰⴼⴻⵢⵢⴻⴹ ⵏ ⵡⴰⴳⵍⴰ ⵏ ⵙⵓⵍⵉⵎⴰⵏ
13 ⵣⵉ ⵍⴳⴻⵄⵄⴷⴻⵜ ⵉ ⵅ ⵜⵜⵏⵓⵎⴰⵏ ⵜⵜⵡⴻⵀⵀⴱⴻⵏ ⵜⵉⵖⴰⵔⵚⴰ, ⵍⴳⴻⵄⵄⴷⴻⵜ ⵏⵏⵉ ⵉⴵⴰⵏ ⴷⵉ ⵊⵉⴱⵄⵓⵏ ⴰⵔⴻⵏⴷⴰⴷ ⵏ ⵓⵇⵉⴹⵓⵏ ⵏ ⵓⵎⵙⴰⴳⴰⵔ, ⵢⵉⵡⴻⴹ-ⴷⴷ ⵙⵓⵍⵉⵎⴰⵏ ⵖⴰⵔ ⵓⵔⵛⴰⵍⵉⵎ ⵓⵛⴰ ⵉⵃⴽⴻⵎ ⵅ ⵉⵙⵔⴰⵉⵍ. ■ 14 ⵙⵓⵍⵉⵎⴰⵏ ⵉⵙⵙⵎⵓⵏ ⵉⴽⴰⵔⵔⵓⵜⴻⵏ ⴷ ⵉⵎⵏⴰⵢⴻⵏ. ⵏⴻⵜⵜⴰ ⵜⵓⵖⴰ ⵖⴰⵔⴻⵙ ⴰⵍⴻⴼ ⵓ-ⴰⵔⴻⴱⵄⴰ-ⵎⵢⴰ ⵏ ⵉⴽⴰⵔⵔⵓⵜⴻⵏ ⴷ ⵜⴻⵏⵄⴰⵛ-ⴰⵍⴻⴼ ⵏ ⵉⵎⵏⴰⵢⴻⵏ ⵓⵛⴰ ⵢⵉⵡⵢⵉ ⵜⴻⵏ ⵖⴰⵔ ⵜⵏⴻⴷⴷⴰⵎ ⵏ ⵉⴽⴰⵔⵔⵓⵜⴻⵏ ⵓ ⵖⴰⵔ ⵓⵊⴻⴵⵉⴷ ⴷⵉ ⵓⵔⵛⴰⵍⵉⵎ. 15 ⴰⵊⴻⴵⵉⴷ ⵉⴳⴳⴰ ⵏⵏⵓⵇⴰⵔⵜ ⴷⵉ ⵓⵔⵛⴰⵍⵉⵎ ⴰⵏⴻⵛⵜ ⵏ ⵢⴻⵥⵔⴰ ⵏⵏⵉ ⵜⵓⵖⴰ ⴷⵉⵏ ⵉⴵⴰⵏ ⵓⵛⴰ ⵉⴳⴳⴰ ⵜⵉⵛⴻⵊⵊⵓⵔⴰ ⵏ ⵜⴻⵏⴳⴻⵍⵜ ⴰⵏⴻⵛⵜ ⵉⵣⴻⵎⵎⵓⵔⴻⵏ ⵏⵏⵉ ⵜⵓⵖⴰ ⴷⵉⵏ ⵉⴵⴰⵏ ⴷⵉ ⵜⴻⵎⵎⵓⵔⵜ ⵉⵡⴰⵟⴰⵏ ⵙ ⵡⴰⵟⵟⴰⵙ. 16 ⵉⵡⵢⴻⵏ-ⴷⴷ ⵉⵢⵙⴰⵏ ⵉ ⵙⵓⵍⵉⵎⴰⵏ ⵣⵉ ⵎⵉⵚⵔⴰ, ⵣⵉ ⵇⵉⵡⵉ. ⵉⵙⴻⴱⴱⴰⴱⴻⵏ ⵏ ⵓⵊⴻⴵⵉⴷ ⵉⵡⵢⴻⵏ ⵜⴻⵏ ⵙ ⵢⵉⵊⵊ ⵏ ⵜⵜⴰⵎⴰⵏ ⵉⵎⴻⵜⵏⴻⵏ ⵣⵉ ⵇⵉⵡⵉ. 17 ⵉⵡⵢⴻⵏ-ⴷⴷ ⵉⵊⵊ ⵏ ⵓⴽⴰⵔⵔⵓ ⵓⵛⴰ ⵙⵙⵓⴼⴼⵖⴻⵏ ⵜ-ⵉ-ⴷⴷ ⵣⵉ ⵎⵉⵚⵔⴰ ⵙ ⵉⵊⵊ ⵏ ⵜⵜⴰⵎⴰⵏ ⵏ ⵙⴻⵜⵜⴰ-ⵎⵢⴰ ⵛⵉⵇⵍⵓ ⵏ ⵏⵏⵓⵇⴰⵔⵜ ⵓ ⵉⵊⵊ ⵏ ⵓⵢⵉⵙ ⵙ ⵎⵢⴰ ⵓ-ⵅⴻⵎⵙⵉⵏ ⵛⵉⵇⵍⵓ. ⴰⵎⵎⵓ ⵉ ⵙⵙⵓⴼⴼⵖⴻⵏ ⵜⴻⵏ ⵙ ⵓⴼⵓⵙ ⵏⵙⴻⵏ ⵉ ⵎⴰⵔⵔⴰ ⵉⵊⴻⴵⵉⴷⴻⵏ ⵏ ⵉⵃⵉⵜⵜⵉⵢⵢⴻⵏ ⵓ ⵉ ⵉⵊⴻⴵⵉⴷⴻⵏ ⵏ ⴰⵔⴰⵎ. 18 ⵙⵓⵍⵉⵎⴰⵏ ⵢⵓⵎⵓⵔ, ⵃⵉⵎⴰ ⴰⴷ ⵜᵉⵜⵜⵡⴰⴱⵏⴰ ⵉⵛⵜ ⵏ ⵜⴰⴷⴷⴰⵔⵜ ⵉ ⵢⵉⵙⴻⵎ ⵏ ⵙⵉⴷⵉ ⴷ ⵉⵛⵜ ⵏ ⵜⴰⴷⴷⴰⵔⵜ ⵉ ⵜⴳⴻⵍⴷⴰ ⵏⵏⴻⵙ.