ⵉⴽⵓⵎⴰⵏⴷⴰⵔⴻⵏ ⵏ ⵍⵄⴻⵙⴽⴰⵔ
27
1 ⵉⵏⴰ ⴷ ⴰⵢⵜ ⵏ ⵉⵙⵔⴰⵉⵍ ⴰⴽ-ⴷ ⵍⵇⴻⴷⴷ ⵏⵙⴻⵏ, ⵉⵣⴻⴵⵉⴼⴻⵏ ⵅ ⵉⴱⴰⴱⴰⵜⴻⵏ ⵏ ⵍⴰⴵⴰⵜ, ⵓⵍⴰ ⴷ ⵉⵎⴻⵇⵇⵔⴰⵏⴻⵏ ⵅ ⵡⴰⵍⴻⴼ ⵓ ⵅ ⵎⵢⴰ ⴰⴽ-ⴷ ⵉⵎⴻⵃⴹⴰⵢⴻⵏ ⵏⵙⴻⵏ, ⵉⵏⵏⵉ ⵜⵓⵖⴰ ⵉⵜⵜⵙⴻⵅⵅⴰⵔⴻⵏ ⵉ ⵓⵊⴻⴵⵉⴷ ⴷⵉ ⵎⴰⵔⵔⴰ ⵜⵉⵎⴻⵙⵍⴰⵢⵉⵏ ⵏ ⵜⴻⵔⴱⵉⵄⵉⵏ, ⴰⵎ ⵣⵉ ⵊⵊⵉⵀⴻⵜ ⵏ ⵎⴰⵏ ⵡⴻⵏ ⵉ ⴷⴷ-ⵉⵜⵜⴰⵙⴻⵏ, ⴰⵎ ⵣⵉ ⵊⵊⵉⵀⴻⵜ ⵏ ⵎⴰⵏ ⵡⴻⵏ ⵉⵜⵜⵔⴰⵃⴻⵏ, ⵓ ⵎⴰⵏ ⴰⵢⴰ ⵣⴻⴳ ⵓⵢⵓⵔ ⴰⵍ ⵓⵢⵓⵔ ⵏⵏⴻⵖⵏⵉ ⴷⵉ ⵎⴰⵔⵔⴰ ⵉⵢⵓⵔⴻⵏ ⵏ ⵓⵙⴻⴳⴳⵯⴰⵙ. ⵉⵛⵜ ⵏ ⵜⴻⵔⴱⵉⵄⵜ ⴷⴰⵢⴻⵙ ⴰⵔⴻⴱⵄⴰ ⵓ-ⵄⵉⵛⵔⵉⵏ-ⴰⵍⴻⴼ ⵏ ⵢⴻⵔⵢⴰⵣⴻⵏ. 2 ⵢⴰⵙⵓⴱⵄⴰⵎ, ⵎⵎⵉⵙ ⵏ ⵣⴰⴱⴷⵉⵢⵉⵍ, ⵜⵓⵖⴰ ⵅ ⵜⴻⵔⴱⵉⵄⵜ ⵜⴰⵎⴻⵣⵡⴰⵔⵓⵜ ⵉ ⵓⵢⵓⵔ ⵡⵉⵙⵙ ⴰⵎⴻⵣⵡⴰⵔⵓ. ⵜⴰⵔⴱⵉⵄⵜ ⵏⵏⴻⵙ ⴷⴰⵢⴻⵙ ⴰⵔⴻⴱⵄⴰ ⵓ-ⵄⵉⵛⵔⵉⵏ-ⴰⵍⴻⴼ ⵏ ⵢⴻⵔⵢⴰⵣⴻⵏ.
3 ⵏⴻⵜⵜⴰ ⵜⵓⵖⴰ ⵣⴻⴳ ⵡⴰⵔⵔⴰⵡⴻⵏ ⵏ ⴼⴰⵔⵉⵚ. ⵏⴻⵜⵜⴰ ⴷ ⴰⴽⵓⵎⴰⵏⴷⴰⵔ ⴰⵎⴻⵇⵇⵔⴰⵏ ⵅ ⵎⴰⵔⵔⴰ ⵉⴽⵓⵎⴰⵏⴷⴰⵔⴻⵏ ⵏ ⵍⵄⴻⵙⴽⴰⵔⴰⵜ ⴷⴻⴳ ⵓⵢⵓⵔ ⴰⵎⴻⵣⵡⴰⵔⵓ.
4 ⴷⵓⴷⴰⵢ, ⴰⵅⵓⵅⵉ, ⵜⵓⵖⴰ ⵅ ⵜⴻⵔⴱⵉⵄⵜ ⵏ ⵓⵢⵓⵔ ⵡⵉⵙⵙ ⵜⵏⴰⵢⴻⵏ. ⵎⵉⵇⵍⵓⵜ ⴷ ⴰⵎⴻⵃⴹⴰⵢ ⵏ ⵜⴻⵔⴱⵉⵄⵜ ⵏⵏⴻⵙ. ⵜⴰⵔⴱⵉⵄⵜ ⵏⵏⴻⵙ ⴷⴰⵢⴻⵙ ⴰⵔⴻⴱⵄⴰ ⵓ-ⵄⵉⵛⵔⵉⵏ-ⴰⵍⴻⴼ ⵏ ⵢⴻⵔⵢⴰⵣⴻⵏ.
5 ⴱⴰⵏⴰⵢⴰ, ⵎⵎⵉⵙ ⵏ ⵢⴰⵀⵓⵢⴰⴷⴰⵄ, ⴰⴽⴻⵀⵀⴰⵏ ⴰⵎⴻⵇⵇⵔⴰⵏ ⵜⵓⵖⴰ ⴷ ⴰⴽⵓⵎⴰⵏⴷⴰⵔ ⵡⵉⵙⵙ ⵜⵍⴰⵜⴰ ⵏ ⵍⵄⴻⵙⴽⴰⵔ ⵉ ⵓⵢⵓⵔ ⵡⵉⵙⵙ ⵜⵍⴰⵜⴰ. ⵜⴰⵔⴱⵉⵄⵜ ⵏⵏⴻⵙ ⴷⴰⵢⴻⵙ ⴰⵔⴻⴱⵄⴰ ⵓ-ⵄⵉⵛⵔⵉⵏ-ⴰⵍⴻⴼ ⵏ ⵢⴻⵔⵢⴰⵣⴻⵏ.
6 ⴱⴰⵏⴰⵢⴰ ⵡⴰ ⵜⵓⵖⴰ ⴷ ⴱⵓ-ⵜⴻⵖⵔⵓⴹⵜ ⵏ ⵜⵍⴰⵜⵉⵏ ⵓ ⵏⴻⵜⵜⴰ ⵜⵓⵖⴰ ⵅ ⵜⵍⴰⵜⵉⵏ. ⵎⵎⵉⵙ ⵄⴰⵎⵎⵉⵣⴰⴱⴰⴷ ⵜⵓⵖⴰ ⵅ ⵜⴻⵔⴱⵉⵄⵜ ⵏⵏⴻⵙ.
7 ⵄⴰⵙⴰ’ⵉⵍ, ⵎⵎⵉⵙ ⵏ ⵢⵓⵡⴰⴱ, ⴷ ⵡⵉⵙⵙ ⴰⵔⴻⴱⵄⴰ ⵉ ⵓⵢⵓⵔ ⵡⵉⵙⵙ ⴰⵔⴻⴱⵄⴰ ⵓ ⵎⵎⵉⵙ ⵣⴰⴱⴰⴷⵢⴰ ⵜⵓⵖⴰ ⴰⵡⴰⵔⵏⵉ ⴰⵙ. ⵜⴰⵔⴱⵉⵄⵜ ⵏⵏⴻⵙ ⴷⴰⵢⴻⵙ ⴰⵔⴻⴱⵄⴰ ⵓ-ⵄⵉⵛⵔⵉⵏ-ⴰⵍⴻⴼ ⵏ ⵢⴻⵔⵢⴰⵣⴻⵏ.
8 ⵛⴰⵎⵃⵓⵜ, ⴰⵢⴰⵣⵔⴰⵃⵉ, ⴰⴽⵓⵎⴰⵏⴷⴰⵔ, ⵜⵓⵖⴰ ⵅ ⵜⴻⵔⴱⵉⵄⵜ ⵡⵉⵙⵙ ⵅⴻⵎⵙⴰ ⵉ ⵓⵢⵓⵔ ⵡⵉⵙⵙ ⵅⴻⵎⵙⴰ. ⵜⴰⵔⴱⵉⵄⵜ ⵏⵏⴻⵙ ⴷⴰⵢⴻⵙ ⴰⵔⴻⴱⵄⴰ ⵓ-ⵄⵉⵛⵔⵉⵏ-ⴰⵍⴻⴼ ⵏ ⵢⴻⵔⵢⴰⵣⴻⵏ.
9 ⵄⵉⵔⴰ, ⵎⵎⵉⵙ ⵏ ⵄⵉⵇⵇⵉⵙ, ⴰⵜⵉⵇⵇⵓⵄⵉ, ⵜⵓⵖⴰ ⴷ ⵡⵉⵙⵙ ⵙⴻⵜⵜⴰ ⵉ ⵓⵢⵓⵔ ⵡⵉⵙⵙ ⵙⴻⵜⵜⴰ. ⵜⴰⵔⴱⵉⵄⵜ ⵏⵏⴻⵙ ⴷⴰⵢⴻⵙ ⴰⵔⴻⴱⵄⴰ ⵓ-ⵄⵉⵛⵔⵉⵏ-ⴰⵍⴻⴼ ⵏ ⵢⴻⵔⵢⴰⵣⴻⵏ.
10 ⵃⴰⵍⵉⵚ, ⴰⴼⴰⵍⵉⵜⵓⵏⵉ, ⵣⴻⴳ ⵡⴰⵔⵔⴰⵡⴻⵏ ⵏ ⵉⴼⵔⴰⵢⵉⵎ, ⵜⵓⵖⴰ ⴷ ⵡⵉⵙⵙ ⵙⴻⴱⵄⴰ ⵉ ⵓⵢⵓⵔ ⵡⵉⵙⵙ ⵙⴻⴱⵄⴰ. ⵜⴰⵔⴱⵉⵄⵜ ⵏⵏⴻⵙ ⴷⴰⵢⴻⵙ ⴰⵔⴻⴱⵄⴰ ⵓ-ⵄⵉⵛⵔⵉⵏ-ⴰⵍⴻⴼ ⵏ ⵢⴻⵔⵢⴰⵣⴻⵏ.
11 ⵙⵉⴱⴽⴰⵢ, ⴰⵃⵓⵛⴰⵜⵉ, ⵏ ⵉⵣⴰⵔⴰⵃⵉⵢⵢⴻⵏ, ⵜⵓⵖⴰ ⴷ ⵡⵉⵙⵙ ⵜⵎⴻⵏⵢⴰ ⵉ ⵓⵢⵓⵔ ⵡⵉⵙⵙ ⵜⵎⴻⵏⵢⴰ. ⵜⴰⵔⴱⵉⵄⵜ ⵏⵏⴻⵙ ⴷⴰⵢⴻⵙ ⴰⵔⴻⴱⵄⴰ ⵓ-ⵄⵉⵛⵔⵉⵏ-ⴰⵍⴻⴼ ⵏ ⵢⴻⵔⵢⴰⵣⴻⵏ.
12 ⴰⴱⵉⵄⴰⵣⴰⵔ, ⴰⵄⴰⵏⴰⵜⵓⵜⵉ, ⵏ ⴰⵢⵜ ⵏ ⴱⵉⵏⵢⴰⵎⵉⵏ, ⵜⵓⵖⴰ ⴷ ⵡⵉⵙⵙ ⵜⴻⵙⵄⴰ ⵉ ⵓⵢⵓⵔ ⵡⵉⵙⵙ ⵜⴻⵙⵄⴰ. ⵜⴰⵔⴱⵉⵄⵜ ⵏⵏⴻⵙ ⴷⴰⵢⴻⵙ ⴰⵔⴻⴱⵄⴰ ⵓ-ⵄⵉⵛⵔⵉⵏ-ⴰⵍⴻⴼ ⵏ ⵢⴻⵔⵢⴰⵣⴻⵏ.
13 ⵎⴰⵀⴰⵔⴰⵢ, ⴰⵏⴰⵟⵓⴼⴰⵜⵉ, ⵉ ⵉⵣⴰⵔⴰⵃⵉⵢⵢⴻⵏ, ⵜⵓⵖⴰ ⴷ ⵡⵉⵙⵙ ⵄⴻⵛⵔⴰ ⵉ ⵓⵢⵓⵔ ⵡⵉⵙⵙ ⵄⴻⵛⵔⴰ. ⵜⴰⵔⴱⵉⵄⵜ ⵏⵏⴻⵙ ⴷⴰⵢⴻⵙ ⴰⵔⴻⴱⵄⴰ ⵓ-ⵄⵉⵛⵔⵉⵏ-ⴰⵍⴻⴼ ⵏ ⵢⴻⵔⵢⴰⵣⴻⵏ.
14 ⴱⴰⵏⴰⵢⴰ, ⴰⴼⴰⵔⵄⴰⵜⵓⵏⵉ, ⵣⴻⴳ ⵡⴰⵔⵔⴰⵡⴻⵏ ⵏ ⵉⴼⵔⴰⵢⵉⵎ, ⵜⵓⵖⴰ ⴷ ⵡⵉⵙⵙ ⵃⵉⵟⴰⵛ ⵉ ⵓⵢⵓⵔ ⵡⵉⵙⵙ ⵃⵉⵟⴰⵛ. ⵜⴰⵔⴱⵉⵄⵜ ⵏⵏⴻⵙ ⴷⴰⵢⴻⵙ ⴰⵔⴻⴱⵄⴰ ⵓ-ⵄⵉⵛⵔⵉⵏ-ⴰⵍⴻⴼ ⵏ ⵢⴻⵔⵢⴰⵣⴻⵏ.
15 ⵅⴰⵍⴷⴰⵢ, ⴰⵏⴰⵟⵓⴼⴰⵜⵉ, ⵉ ⴷⴷ-ⵉⵇⵇⴰⵔⵚⴻⵏ ⵣⵉ ⵄⵓⵜⵏⵉⵢⵉⵍ, ⵜⵓⵖⴰ ⴷ ⵡⵉⵙⵙ ⵜⴻⵏⵄⴰⵛ ⵉ ⵓⵢⵓⵔ ⵜⴻⵏⵄⴰⵛ. ⵜⴰⵔⴱⵉⵄⵜ ⵏⵏⴻⵙ ⴷⴰⵢⴻⵙ ⴰⵔⴻⴱⵄⴰ ⵓ-ⵄⵉⵛⵔⵉⵏ-ⴰⵍⴻⴼ ⵏ ⵢⴻⵔⵢⴰⵣⴻⵏ.
ⵉⵎⴻⵇⵇⵔⴰⵏⴻⵏ ⵏ ⵜⵇⴻⴱⴱⴰⵍ
16 ⵉⵏⴰ ⴱⴻⴷⴷⴻⵏ ⵅ ⵜⵇⴻⴱⴱⴰⵍ ⵏ ⵉⵙⵔⴰⵉⵍ:
ⵉ ⵉⵔⵓⴱⵉⵏⵉⵢⵢⴻⵏ ⵜⵓⵖⴰ ⵉⵍⵉⵄⴰⵣⴰⵔ, ⵎⵎⵉⵙ ⵏ ⵣⵉⴽⵔⵉ, ⴷ ⵍⵃⴰⴽⴻⵎ.
ⵉ ⵉⵛⴰⵎⵄⵓⵏⵉⵢⵢⴻⵏ: ⵛⴰⴼⴰⵟⵢⴰ, ⵎⵎⵉⵙ ⵏ ⵎⴰⵄⴽⴰ.
17 ⵉ ⵍⴰⵡⵉ: ⵃⴰⵛⴰⴱⵢⴰ, ⵎⵎⵉⵙ ⵏ ⵇⴰⵎⵓⵡⵉⵍ.
ⵉ ⵀⴰⵔⵓⵏ: ⵚⴰⴷⵓⵇ.
18 ⵉ ⵢⴰⵀⵓⴷⴰ: ⵉⵍⵉⵀⵓ, ⵣⴻⴳ ⴰⵢⵜⵎⴰⵙ ⵏ ⴷⴰⵡⵓⴷ.
ⵉ ⵉⵙⵙⴰⴽⴰⵔ: ⵄⵓⵎⵔⵉ, ⵎⵎⵉⵙ ⵏ ⵎⵉⵅⴰⵢⵉⵍ.
19 ⵉ ⵣⴰⴱⵓⵍⵓⵏ: ⵢⵉⵛⵎⴰⵄⵢⴰ, ⵎⵎⵉⵙ ⵏ ⵄⵓⴱⴰⴷⵢⴰ.
ⵉ ⵏⴰⴼⵜⴰⵍⵉ: ⵢⴰⵔⵉⵎⵓⵜ, ⵎⵎⵉⵙ ⵏ ⵄⴰⵣⴰⵔⵢⵉⵍ.
20 ⵉ ⵡⴰⵔⵔⴰⵡⴻⵏ ⵏ ⵉⴼⵔⴰⵢⵉⵎ: ⵃⵓⵛⵉⵄⴰ, ⵎⵎⵉⵙ ⵏ ⵄⴰⵣⴰⵔⵢⴰ.
ⵉ ⵡⴻⵣⵢⴻⵏ ⵏ ⵜⴻⵇⴱⵉⵍⵜ ⵏ ⵎⴰⵏⴰⵙⵙⴰ: ⵢⵓⵡⵉⵍ, ⵎⵎⵉⵙ ⵏ ⴼⴰⴷⴰⵢⴰ.
21 ⵉ ⵡⴻⵣⵢⴻⵏ ⵏ ⵜⴻⵇⴱⵉⵍⵜ ⵏ ⵎⴰⵏⴰⵙⵙⴰ ⴷⵉ ⵊⵉⵍⵄⴰⴷ: ⵊⴰⴷⴷⵓ, ⵎⵎⵉⵙ ⵏ ⵣⴰⴽⴰⵔⵉⵢⵢⴰ.
ⵉ ⴱⵉⵏⵢⴰⵎⵉⵏ: ⵢⴰⵄⵉⵙⵉⵢⵉⵍ, ⵎⵎⵉⵙ ⵏ ⴰⴱⵏⵉⵔ.
22 ⵉ ⴷⴰⵏ: ⵄⴰⵣⴰⵔⵢⵉⵍ, ⵎⵎⵉⵙ ⵏ ⵢⴰⵔⵓⵃⴰⵎ.
ⵉⵏⴰ ⵜⵓⵖⴰ ⴷ ⵍⵃⵓⴽⴽⴰⵎ ⵏ ⵜⵇⴻⴱⴱⴰⵍ ⵏ ⵉⵙⵔⴰⵉⵍ.
23 ⴷⴰⵡⵓⴷ ⵡⴰⵔ ⵉⴽⵙⵉ ⵛⴰ ⵍⵇⴻⴷⴷ ⵏ ⵢⵉⵏⵏⵉ ⵖⴰⵔ ⵉⴵⴰ ⵄⵉⵛⵔⵉⵏ ⵏ ⵉⵙⴻⴳⴳⵯⵓⵙⴰ ⴷ ⵙⵡⴰⴷⴷⴰⵢ, ⵎⴰⵖⴰⵔ ⵙⵉⴷⵉ ⵜⵓⵖⴰ ⵉⵏⵏⴰ ⴰⵇⴰ ⵏⴻⵜⵜⴰ ⴰⴷ ⵢⴰⵔⵔ ⵉⵙⵔⴰⵉⵍ ⴷⴻⴳ ⵡⴰⵟⵟⴰⵙ ⴰⵎ ⵢⵉⵜⵔⴰⵏ ⵏ ⵓⵊⴻⵏⵏⴰ. 24 ⵢⵓⵡⴰⴱ, ⵎⵎⵉⵙ ⵏ ⵚⴰⵔⵓⵢⴰ, ⵜⵓⵖⴰ ⵉⴱⴷⴰ ⴰⴷ ⵉⵃⵙⴻⴱ ⵍⴳⴻⵏⵙ, ⵎⴰⵛⴰ ⵡⴰⵔ ⵜ ⵉⴽⴻⵎⵎⴻⵍ ⵓⵎⵉ ⴷⴷ-ⵢⵓⵙⴰ ⵓⴷⵓⵇⵇⴻⵣ ⴷ ⴰⵎⴻⵇⵇⵔⴰⵏ ⵏ ⵡⴻⵖⴹⴰⴱ ⵅ ⵉⵙⵔⴰⵉⵍ. ⵙ ⵓⵢⴻⵏⵏⵉ ⵡⴰⵔ ⵉⵜⵜⵡⴰⴳⴳ ⵍⵇⴻⴷⴷ ⴷⴻⴳ ⵡⴻⴷⵍⵉⵙ ⵏ ⵉⵎⴻⵣⵔⵓⵢⴻⵏ ⵏ ⵓⵊⴻⴵⵉⴷ ⴷⴰⵡⵓⴷ.
ⵉⵡⴽⵉⵍⴻⵏ ⵏ ⵓⵊⴻⴵⵉⴷ
25 ⵄⴰⵣⵎⴰⵡⴻⵜ, ⵎⵎⵉⵙ ⵏ ⵄⴰⴷⵉⵢⵉⵍ, ⵜⵓⵖⴰ ⵅ ⵉⵅⵅⴰⵎⴻⵏ ⵏ ⵜⵅⵓⴱⴰⵢ ⵏ ⵓⵊⴻⴵⵉⴷ.
ⵢⵓⵏⴰⵜⴰⵏ, ⵎⵎⵉⵙ ⵏ ⵄⵓⵣⵣⵉⵢⴰ, ⵜⵓⵖⴰ ⵅ ⵉⵅⵅⴰⵎⴻⵏ ⵏ ⵜⵅⵓⴱⴰⵢ ⵏ ⵜⴻⵎⵎⵓⵔⵜ, ⴷⵉ ⵜⵏⴻⴷⴷⴰⵎ, ⴷⵉ ⴷⵛⵓⵔⴰⵜ ⵓ ⴷⵉ ⵍⴱⵓⵔⵊⴰⵜ.
26 ⵄⴰⵣⵔⵉ, ⵎⵎⵉⵙ ⵏ ⴽⴰⵍⵓⴱ, ⵜⵓⵖⴰ ⵉⵟⵟⴻⴼ ⴰⵛⴱⴰⵔ ⵅ ⵎⴰⵎⵎⴻⵛ ⴳⴳⵉⵏ ⵍⵅⴻⴷⵎⴻⵜ ⴷⴻⴳ ⵉⵢⵢⴰⵔ ⵃⵉⵎⴰ ⴰⴷ ⵛⴰⵔⵣⴻⵏ ⴰⵛⴰⵍ.
27 ⵛⵉⵎⵄⵉ, ⴰⵔⴰⵎⴰⵜⵉ, ⵜⵓⵖⴰ ⵉⵟⵟⴻⴼ ⴰⵛⴱⴰⵔ ⵅ ⵉⵎⴰⵔⵊⴰⵄⴻⵏ ⵏ ⵓⴹⵉⵍ.
ⵣⴰⴱⴷⵉ, ⴰⵛⵉⴼⵎⵉ, ⵜⵓⵖⴰ ⵅ ⵣⵣⴰⴷ ⵏ ⴱⵉⵏⵓ ⵏⵏⵉ ⵉⴵⴰⵏ ⴷⴻⴳ ⵉⵎⴰⵔⵊⴰⵄⴻⵏ ⵏ ⵓⴹⵉⵍ.
28 ⴱⴰⵄⵍ-ⵃⴰⵏⴰⵏ, ⴰⵊⴰⴷⵉⵔⵉ, ⵜⵓⵖⴰ ⵉⵟⵟⴻⴼ ⴰⵛⴱⴰⵔ ⵅ ⵉⵃⵡⵉⵛⴻⵏ ⵏ ⵣⵣⵉⵜⵓⵏ ⵓ ⵅ ⵉⵣⴻⵎⵎⵓⵔⴻⵏ ⵏⵏⵉ ⵉⴵⴰⵏ ⴷⵉ ⵜⴻⵎⵎⵓⵔⵜ ⵉⵡⴰⵟⴰⵏ.
ⵢⵓⵡⴰⵛ ⵜⵓⵖⴰ ⵅ ⵣⵣⴰⴷ ⵏ ⵣⵣⴻⵛⵜ.
29 ⵛⵉⵟⵔⴰⵢ, ⴰⵛⴰⵔⵓⵏⵉ, ⵜⵓⵖⴰ ⵉⵟⵟⴻⴼ ⴰⵛⴱⴰⵔ ⵅ ⵉⴼⵓⵏⴰⵙⴻⵏ ⴷ ⵜⴼⵓⵏⴰⵙⵉⵏ, ⵉⵏⵏⵉ ⵉⵀⴻⴷⴷⴰ ⴷⵉ ⵍⴻⵡⴹⴰ ⵏ ⵛⴰⵔⵓⵏ.
ⵛⴰⴼⴰⵜ, ⵎⵎⵉⵙ ⵏ ⵄⴰⵍⴰⵢ, ⵜⵓⵖⴰ ⵅ ⵉⴼⵓⵏⴰⵙⴻⵏ ⴷ ⵜⴼⵓⵏⴰⵙⵉⵏ ⴷⵉ ⵍⴻⵡⴹⴰⵜ ⵏ ⵜⴻⵖⵣⵓⵔⵜ.
30 ⵓⴱⵉⵍ, ⴰⵙⵎⴰⵄⵉⵍⵉ, ⵜⵓⵖⴰ ⵉⵟⵟⴻⴼ ⴰⵛⴱⴰⵔ ⵅ ⵉⵍⴻⵖⵎⴰⵏ.
ⵢⴰⵃⴰⴷⵢⴰ, ⴰⵎⵉⵔⵓⵏⵓⵜⵉ, ⵜⵓⵖⴰ ⵅ ⵜⵉⵖⵢⴰⵍ.
31 ⵢⴰⵣⵉⵣ, ⴰⵀⴰⵊⵔⵉ, ⵜⵓⵖⴰ ⵉⵟⵟⴻⴼ ⴰⵛⴱⴰⵔ ⵅ ⵡⵓⴵⵉ.
ⵏⵉⵜⵏⵉ ⵎⴰⵔⵔⴰ ⵜⵓⵖⴰ ⴰⵜⴻⵏ ⴷ ⵉⵎⴻⵃⴹⴰⵢⴻⵏ ⵅ ⵡⴰⴳⵍⴰ ⵏⵏⵉ ⵉⴵⴰⵏ ⵏ ⵓⵊⴻⴵⵉⴷ ⴷⴰⵡⵓⴷ.
32 ⵢⵓⵏⴰⵜⴰⵏ, ⵄⴻⵎⵎⵉⵙ ⵏ ⴷⴰⵡⵓⴷ, ⵜⵓⵖⴰ ⴷ ⴰⵎⵛⴰⵡⴰⵔ, ⵉⵊⵊ ⵏ ⴱⵏⴰⴷⴻⵎ ⴷ ⴰⵎⵉⵖⵉⵙ. ⵏⴻⵜⵜⴰ ⵜⵓⵖⴰ ⵄⴰⵡⴻⴷ ⴷ ⴰⵎⴰⵔⵉⵔ.
ⵢⴰⵃⵉⵢⵉⵍ, ⵎⵎⵉⵙ ⵏ ⵃⴰⴽⵎⵓⵏⵉ, ⵜⵓⵖⴰ ⵖⴰⵔ ⵡⴰⵔⵔⴰⵡⴻⵏ ⵏ ⵓⵊⴻⴵⵉⴷ, ⵢⴰⵔⴻⴱⴱⴰ ⵉ-ⵜⴻⵏ.
33 ⴰⵅⵉⵜⵓⴼⵉⵍ ⵜⵓⵖⴰ ⴷ ⴰⵎⵛⴰⵡⴰⵔ ⵏ ⵓⵊⴻⴵⵉⴷ,
ⵓ ⵃⵓⵛⴰⵢ, ⴰⵢⴰⵔⴽⵉ, ⵜⵓⵖⴰ ⴷ ⴰⵎⴻⴷⴷⵓⴽⴽⴻⵍ ⵏ ⵓⵊⴻⴵⵉⴷ.
34 ⵢⴰⵀⵓⵢⴰⴷⴰⵄ, ⵎⵎⵉⵙ ⵏ ⴱⴰⵏⴰⵢⴰ, ⴷ ⴰⴱⵢⴰⵜⴰⵔ ⵜⵓⵖⴰ ⴰⵜⴻⵏ ⴰⵡⴰⵔⵏⵉ ⵉ ⴰⵅⵉⵜⵓⴼⵉⵍ.
ⵢⵓ’ⴰⴱ ⵜⵓⵖⴰ-ⵜ ⴷ ⴰⴽⵓⵎⴰⵏⴷⴰⵔ ⵏ ⵍⵄⴻⵙⴽⴰⵔ ⵏ ⵓⵊⴻⴵⵉⴷ.