Adafeɛ n Bulus x yixef nnes zzat i ujeǧid Aɣribas
26
1 Xas uca inna Aɣribas i Bulus: “Cek ɣarek ttesriḥ ḥima ad tessiwřed x yixef nnek!” Xenni isswiẓẓeḍ Bulus afus nnes uca iwta x yixef nnes, inna: 2 “Di marra min xef d ayi ḍeřmen Wudayen, a ajeǧid Aɣribas, ḥessbeɣ ixef inu d bnadem d amimun, aqa ass-a zemmareɣ ad wteɣ x yixef inu qibač nnek. 3 Deg umezwaru s minzi aqa cek tessned marra ṭṭbayeɛ d izerfan n Wudayen. S uyenni ttareɣ zzayek ad ayi tesřed s ttasiɛ n řxaḍar.
4 Minzi Udayen, iwa, mařa xsen ad cehhden waha, ssnen abrid n tudart inu mliḥ zi temẓi inu, am mammec t tuɣa zeg umezwaru jar řgens inu u di Urcalim. 5 Nitni ssnen ayi mliḥ aṭṭas zeg wami, ssnen aqa tuɣa ddareɣ ɛlaḥsab taɣuri nican n Ifarisiyyen. 6 U řexxu beddeɣ danita, ttwaḥakameɣ di ṭṭweɛ n usitem n lwaɛd i zi iwaɛd AREBBI i řejdud nneɣ. ■ 7 Maɣar wa d asitem nni ttrajant tenɛac n tqebbař nneɣ ad ɣares dd-awḍent, am ssgeɛɛdent tiẓaǧitin yuǧɣen ǧiřet d wass. Di ṭṭweɛ n usitem-a, a ajeǧid Aɣribas, ḍeřmen ayi Wudayen. 8 Mammec tḥekkmem kenniw? Ma war ittxeṣṣa ad namen belli AREBBI issnekkar-dd imettinen?
9 Zic tuɣa zeɛmeɣ nican, aqa ittxeṣṣa ad ggeɣ aṭṭas n tmesřayin ḍidd i Yisem n Yeccu Nnaṣiri. ■
10 Uca aya i ggiɣ ɛawed di Urcalim. Am ṭṭfeɣ tizemmar zi jjihet n imeqqranen n ikehhanen, ḥebbseɣ aṭṭas n imqeddasen. Uca řami ttwanɣen zzaysen, tuɣa carceɣ di man aya ak-d inni xas iḥekmen.
11 Ɛedbeɣ ten di marra timzidawin, ggiɣ xasen uɣiř maḥend ad ceqqfen Isem n Yeccu. Tuɣa tthajeɣ xasen aṭṭas, u tuɣa ttazzřeɣ xasen ɣar tneddam inneɣni.
12 Řami tuɣa ggureɣ ɣar Dimacq zi ssibbet nni s ttesriḥ d řumur zi jjihet n imeqqranen n ikehhanen,
13 xenni, a ajeǧid, umi tuɣa ayi deg webrid ẓriɣ ict n tfawt zeg ujenna ɣar wezyen n wass, tᵉttissiqq ktar zi tfuct, tenneḍ ayi-dd u i yenni akidi imsafaren.
14 Neccin newḍa marra di temmurt, sřiɣ i ict n tmijja tessawař-dd akidi, teqqar s Tɛibranit: ‘Cawul, Cawul, mayemmi xafi tdarrced? Aqa tarenyed tzeyyared x yixef nnek mintra cek teccated di sřek n buykucḍan.’
15 Nniɣ: ‘Min teɛnid Cek, a Sidi?’ Inna Siditneɣ: ‘Necc d Yeccu wenni tmarrted.
16 Xenni inna ayi: ‘Kkar, tbedded x iḍaren nnek, minzi i uya i d ac dd-ḍhareɣ ḥima ad cek arecḥḥeɣ d amsexxar d acehhad aqa umi d ayi teẓrid u aqa ad ayi tẓared ɛawed.
17 Ad fekkeɣ cek zeg weydud-a u zi řegnus i ɣar cek i ɣa ssekkeɣ,
18 ḥima ad tarezmed tiṭṭawin nsen, ḥima ad tuben zi taǧest ɣar tfawt u zi ṣṣulṭa n cciṭan ɣar AREBBI, u ad ṭṭfen aɣfar n ddnub d ict n tesɣart n řwart jar imqeddasen s liman dayi.’ ■
19 S uyenni, a ajeǧid Aɣribas, war ɛekkseɣ ca řewḥiy nni ẓriɣ zeg ujenna, 20 maca ɣar umezwar bdiɣ ad barrḥeɣ s Řexbar Aṣebḥan i yenni iǧan di Dimacq d Urcalim d marra jjwayeh n Yahudiyya u i řegnus ḥima ad tuben ad dewřen ɣar AREBBI, ad ggen řexdayem i ittřiqen i ttubet. ■ 21 S uyenni ṭṭfen ayi Wudayen di Zzawect Tameqqrant uca xsen ad ayi nɣen. ■ 22 Maca AREBBI iwca ayi afus ař ass-a, u xzar, aqa beddeɣ da zzat i umeẓyan d umeqqran, war qqareɣ walu i inni itteffɣen zi Ccariɛa n Musa d inabiyyen, mɣir timesřayin waha nni zi qqaren nitni aqa ad iřint, 23 belli tuɣa ittxeṣṣa i Lmasiḥ ad iweddeb u belli Netta ad yiři d Amenzu n Tnukra zi taddart n imettinen, ad ibarreḥ s Tfawt i řgens-a u i řegnus marra.”
24 Awarni řami idafeɛ Bulus s yixef nnes ammu, inna Fastus s jjehd: “Aqa txeřfed, a Bulus. Aṭṭas n tɣuri tessbuhři i cek.” 25 Maca Bulus inna as: “Necc war ttwaxeřfeɣ ca, a sidi Fastus yuɛřan, aqa qqareɣ awařen n tidett, daysen řaman. 26 Uřa d ajeǧid Aɣribas issen mliḥ x tmesřayin-a. S uyenni ssawařeɣ s teryast minzi ittřiɣ ayi belli uřa d ict n řḥajjet zi tmesřayin-a aqa tennuffar xas, minzi marra man aya war imsar di tnuffra. 27 Ma tumned zeg inabiyyen, a ajeǧid Aɣribas? Necc ssneɣ belli tumned zzaysen.” 28 Maca Aɣribas inna i Bulus: “S drus texsed ad ayi tessqenɛed ḥima ad dewřeɣ d Amasiḥi.” 29 Inna as Bulus: “Ttareɣ AREBBI belli deɣya u i waṭṭas, maci cek waha, maca uřa d marra inni d ayi ittesřan ass-a, ad dewřen am necc, maca břa iceddiyyen-a.” ■ 30 Xenni ikkar ujeǧid d lɛamil d Barniki d marra inni tuɣa akidsen iqqimen. 31 Xenni ruḥen nitni ɣar uɣezdis, ssawařen ak-d wayawya, nnan jar asen: “Aryaz-a war iggi ca min isdaheǧen řmewt uřa d iceddiyyen.” ■ 32 Inna Aɣribas i Fastus: “Maɛlik war tuɣi issgeɛɛed ddeɛwet nnes ɣar qayṣar, iři aqa ittwaḍřeq bnadem-a.”