Irumaniyyen
Tamezwarut
1
1 Bulus, amsexxar n Yeccu Lmasiḥ, d rrasul ittwařaɣan, nni ittwaḥuzen i Řexbar Aṣebḥan n AREBBI, ■ 2 - wenni izzar iwaɛd zzayes zeg umewaru s inabiyyen nnes di Tira Iqeddsen - , ■ 3 x Mmis, wenni dd-ittwaxeřqen zi jjihet n arrimet zi zzariɛet n Dawud, ■ 4 maca zi jjihet n Arruḥ Iqeddsen i dd-issnekkaren Yeccu Lmasiḥ, Siditneɣ, zi taddart n imettinen, aqa ittwassargeb d Mmis n AREBBI. ■ 5 Aqa zzayes i neṭṭef arḍa u zzayes i nettwařaɣa d rrusul jar marra řegnus ḥima ad ṭṭaɛen řegnus s liman deg Yisem nnes, 6 maɣar uřa d kenniw tᵉttwařaɣam zi řegnus s Yeccu Lmasiḥ. 7 Ɣar marra inni iǧan di Ruma, a imɛizzen n AREBBI, inni ittwařaɣan d imqeddasen: arḍa d řehna ad kidwem iřin zi AREBBI Babatneɣ u zi Siditneɣ Yeccu Lmasiḥ. ■ Bulus ittweḥḥec ad yarzef ɣar Ruma
8 Amezwar ttcekkareɣ AREBBI inu s Yeccu Lmasiḥ zi jjihet nwem marra, minzi liman nwem aqa sřin xas di ddunect marra. 9 Maɣar AREBBI, wenni ɛebbdeɣ di Arruḥ di Řexbar Aṣebḥan n Mmis, iched xafi aqa necc ttidareɣ kenniw řebda di tẓaǧitin inu, ■
10 u ttẓaǧiɣ ad ayi tᵉttwarzem zi řexxu d tsawent ict n tewwart s array n AREBBI maḥend ad ɣarwem dd-aseɣ. ■
11 Minzi weḥḥceɣ ad kenniw ẓareɣ ḥima ad awem wceɣ ca n tmewca n Arruḥ, ḥima ad dayes teqqimem. ■
12 Ad nettwassfewwej jmiɛ, s liman nwem d wenni inu.
13 Maca xseɣ, a aytma, ad tessnem belli aṭṭas n imuren ggiɣ ad ɣarwem dd-aseɣ, - maca ař ass-a ttwamenɛeɣ - , ḥima ad ɣari tiři řɣiǧet daywem ɛawed am mammec di řegnus nneɣni, ■
14 maɣar Necc d bu-umarwas maḥend ad barrḥeɣ s Řexbar Aṣebḥan i Iyunaniyyen u i ibarbariyyen, i ayt n tiɣit u i ibuhařiyyen, uřa i marra iwdan. ■
15 Ammu i ttwajebdeɣ maḥend ad barrḥeɣ s Řexbar Aṣebḥan uřa i kenniw i yeǧan di Ruma.
Jjehd n Řexbar Aṣebḥan n Yeccu Lmasiḥ
16 Minzi war ttseḍḥiɣ ca s Řexbar Aṣebḥan, minzi netta d jjehd n AREBBI i Tudart i marra wi yumnen, ma i yenni yumnen zeg Wudayen ɣar umezwar, niɣ i yenni yumen zeg Iramiyyen. ■
17 Minzi tasegda n AREBBI aqa tban dayes di L’Injil zi liman ɣar liman, am mammec tura:
‘Amseggad s liman ad iddar.’ ■
Lɣaḍab n Arebbi
18 Minzi aɣḍab n AREBBI ittban-dd zeg ujenna x marra řmuɛṣiyyet d tuɛeffna n iwdan inni issduřuyen tidett s řmuɛṣiyyet,
19 minzi tussna n AREBBI ittban daysen, minzi AREBBI aqa isscen asen t-i-dd. ■ 20 Minzi min innuffaren n AREBBI, aqa ittwaẓar s řeɛqeř s yenni zzayes dd-ittwaggen zeg wami tᵉttwagg ddunect, am jjehd nnes n řebda, am tifras nnes n Arebbi, ařami nitni war ɣarsen bu smaḥet, ■ 21 minzi, waxxa ssnen AREBBI, war t ssɛuǧen niɣ war t cekkaren am AREBBI, maca dewřen d ibuhařiyyen deg ixariṣṣen nsen uca uř nsen ibarecnen, idweř d afɣuř. ■ 22 Umi ḥessben ixef nsen d imiɣisen, dewřen d ifɣař, 23 beddřen aɛuǧi n AREBBI wenni war ifennin s ṣṣifet n řexyař n bnadem ifennan, s ṣṣifet n ijḍaḍ u n imuddaren s arebɛa n iḍaren uřa n imuddaren nni ittbuɛen x temmurt. □ ■
24 S uyenni isellem i-ten AREBBI ɣar nnecwat ixemjen n wuřawen nsen ḥima ad ssfeḍḥen arrimat nsen jar asen. 25 Aqa nitni beddřen tidett n AREBBI s uxarriq, ɛebden u sexxaren i min dd-ittwaxeřqen sennej i Wenni dd-ixeřqen kuřci wenni umi ɣar teǧa aɛuǧi d lbaraka i řebda n řebdat. Amin. 26 S uyenni isellem i-ten AREBBI ɣar ccehwat infeḍḥen, minzi uřa d timɣarin nsen beddřent abrid n ṭṭbiɛet s min war iǧin d ṭṭbiɛet. ■ 27 Amenni iryazen ɛawed jjin tamunt ɛlaḥsab ṭṭbiɛet ak-d temɣarin, deɛqen s nnecwat ak-d wayawya, iryazen i t itteggen ak-d yeryazen am war ɣarsen ca řeḥya, uca qebbřen deg ixef nsen řmunet i isdaheǧen i uweddar nsen.
28 Minzi war xsen ad kksen awař maḥend ad ssnen AREBBI, isellem i-ten AREBBI ɣar řeɛqeř war isekkwin ḥima ad ggen min war iɛeddřen. 29 Nitni ɛemmaren s ɛřam kuř řmuɛṣiyyet, s farq-ccɣeř d tarzugi d ṭṭmeɛ d tuɛeffna, ccuren s řeḥsed d wenɣay d umenɣi d teḥraymect d inwayen iɛeffnen. 30 Nitni ssawařen s řɣar, ttceqqafen, carrhen AREBBI, nitni d imeɣṣaben d imɛeffaren d ayt n bu-uqemmum d imesuffɣen n tuɛeffna, nitni war ṭṭiɛen i lwalidin nsen. 31 War daysen uř imten, war daysen tayri d weṣřaḥ uřa d arreḥmet, 32 waxxa nitni ssnen řḥukm n AREBBI, - aqa inni itteggen aya sdaheǧen řmewt - , waxxa amenni nitni war tteggen marra man aya waha, maca areṭṭan ɛawed x yenni itteggen amenni. ■