Řḥukm iseggden n Arebbi
2
1 S uyenni aqa cek břa smaḥet, a bnadem, cek d wenni iḥekkmen x umqarreb nnes, minzi di min tḥekkmed x umqarreb nnek, aqa uřa d cek d bu-umarwas di man aya, maɣar cek wenni ittḥasaben inneɣni, řesqent ɣarek uřa d simant n tmesřayin. ■ 2 Neccin nessen belli řḥukm n AREBBI d tidett x yenni ɣar teǧa tesɣart di tmesřayin am tina. 3 Ma ittɣiř ac, a bnadem, wenni iḥekkmen x yenni itteggen timesřayin-a am uřa d cek tᵉttegged tent simant nnek, aqa ma tzemmared ad tarewřed zi řḥukm n AREBBI? 4 Niɣ tesseḥqarad agřa n tcuni nnes d ttasiɛ n uraji nnes d ttasiɛ n řxaḍar nnes uca war tessined ca belli tcuni n AREBBI aqa ineddeh i cek ɣar ttubet? ■ 5 Maca di ssibbet n tɣennant nnek d wuř nnek war ittuben, tyarwed i yixef nnek aɣḍab i wass n weɣḍab, u i usargeb n řḥukm iseggden n AREBBI, ■ 6 wenni i ɣa ixeǧṣen kuř ijjen ɛlaḥsab řexdayem nnes: ■ 7 ... i yenni ittṣebbaren di řexdayem iṣebḥen, arezzun aɛuǧi d ccan d min war ifennin, aqa ad asen ixeǧeṣ s Tudart ittduman,
8 ... maca i yenni yarezzun imcubbecen, inni war itteṭṭiɛen i tidett, maca ḍeffaren i min war iseggden, aqa ad asen ixeǧeṣ s weɣḍab d tefqeḥt, ■
9 ... řmeḥnet d řeḥsaret ad dd-asent x kuř řeɛmar n bnadem i itteggen řɣar, x Wudayen d amezwar, xenni x Iramiyyen,
10 ... maca aɛuǧi d ccan d řehna ad iřin i marra wi itteggen tcuni, i Wudayen d amezwar, xenni i Iramiyyen,
11 minzi AREBBI war ittegg s wudmawen. ■
12 Minzi marra inni i ɣa ixḍan břa Ccariɛa, břa Ccariɛa ad ttwahellken uca marra inni i ɣa ixḍan sadu Ccariɛa, aqa s Ccariɛa ad ttwaḥasben,
13 minzi war iǧi inni ittesřan i Ccariɛa nitni d imseggaden ɣar AREBBI, maca inni iḍeffaren Ccariɛa aqa nitni ad ttwaseggden. ■
14 Mařa řegnus inni war ɣar iǧi bu Ccariɛa, tteggen s ṭṭbiɛet min dayes di Ccariɛa, aqa yina d Ccariɛa i yixef nsen, waxxa nitni war ɣarsen bu Ccariɛa.
15 Aqa nitni sscanen belli řxedmet n Ccariɛa tura deg wuřawen nsen, am teched ɛawed tnefsect nsen uca ixarriṣen nsen deǧen uřa ttdafaɛen x ixef nsen jar asen
16 deg wass min di i ɣa iḥaseb AREBBI x min innufaren deg iwdan s Yeccu Lmasiḥ ɛlaḥsab Řexbar Aṣebḥan inu. ■
Uday d Ccariɛa
17 Maca mařa řaɣan ac Uday, tsennaded x Ccariɛa u tessemɣared di AREBBI, ■
18 aqa tessned min ixs Netta, tfarrzed min iṣebḥen, minzi tᵉttwasřemded zi Ccariɛa,
19 u tḥasbed ixef nnek d amgewwed n idarɣařen d tfawt i yenni iǧan di taǧest, 20 uřa d amseggem yarreban ibuhařiyyen d amseřmad n iqubbaniyyen, aqa ɣarek ṣṣifet n tussna d tidett di Ccariɛa, 21 iwa cek wenni isseřmaden inneɣni, ma war tesseřmided ca ixef nnek? Cek wenni ittbarrḥen ‘War tticar!’, ma tᵉttacared? 22 Cek wenni iqqaren ‘War zenni!’, ma tzennid? Cek d wenni icarrhen l’aṣnam, ma tacared zzawect nsen iqeddsen? 23 Cek wenni issemɣaran di Ccariɛa, ma tfeḍḥed AREBBI umi texḍid di Ccariɛa? 24 Minzi x ssibbet nwem ittᵉttwaceqqef deg Yisem n AREBBI jar řegnus am mammec tura. ■
25 Aqa axtan ineffeɛ mařa tḍeffared Ccariɛa nican, maca mařa tᵉttɛeddid x Ccariɛa, aqa axtan nnek ittwaḥseb břa axtan. 26 Mařa wenni břa axtan ittᵉṭṭef di řumar iseggden n Ccariɛa, xzar, ma xenni war iḥesseb břa axtan nnes d axtan? 27 Wenni iḍeffaren Ccariɛa nican s ṭṭbiɛet am iǧa břa axtan, ad cek iḥaseb, cek wenni ittɛeddan x Ccariɛa s Tira d wextan! 28 Minzi Uday war iǧi d Uday s wudem, u axtan war iǧi min ittbanen deg weysum, ■ 29 maca netta d Uday wenni ittiřin d Uday di tnufra, u netta s wextan wenni t ittiřin deg wuř s Arruḥ, war iǧi s Tira n Ccariɛa. Xenni aqa asemɣar nnes war dd-ittis ca zeg iwdan maca zi AREBBI. ■