Řefḍeř n Ccariɛa i Wudayen
3
1 I xenni, man řefḍeř ɣar Wudayen, niɣ man tizi n wextan? 2 Aṭṭas x kuř iɣezdisen! Xenni ɣar umezwar mmewcen asen wawařen n AREBBI. ■ 3 Maɣar mařa tuɣa ca zzaysen war uminen ca, ma xenni ttwabḍřen nitni řaman n AREBBI, minzi nitni war uminen ca? ■ 4 Ɛemmarṣ, maca ad yiři AREBBI d tidett uca kuř bnadem d bu-ixarriqen, am mammec tura: “Cek ad tbaned d Amsegged s wawařen nnek,
u ad tɣeřbed xmi Cek i ɣa ḥasben.” ■
5 Mařa min war isseggden dayneɣ aqa issbeyyen tasegda n AREBBI, min ɣa nini ɛad xenni? Ma AREBBI war ɣares bu řḥeqq, necc ssawařeɣ am ijj n bnadem d amednub, umi xaneɣ igga aɣḍab nnes? 6 War xas nessiwiř! Mammec i ɣa iḥaseb AREBBI ddunect řexdenni? 7 Mammec mařa tfeyyeḍ tidett n AREBBI ɣar uɛuǧi nnes s uxarriq inu, mayemmi ɛad i ɣa ttwaḥasbeɣ am umednub? 8 Niɣ teǧa tmesřact am mammec t qqaren inni dayneɣ iceqqfen, belli neccin neqqar: “Ejj aneɣ ad negg tuɛeffna, ḥima ad zzayes dd-yekk min icnan!”? Aqa řḥukm xasen ad ittwaxemmeř ař ccreɛ.
Uřa d ijjen ittsegged qibač i Arebbi
9 I xenni mammec? Ma neccin ḥsen? Qbeř aqa nufa aqa Udayen d Iramiyyen marra sadu ddenb, ■
10 am mammec tura:
“Uřa d ijj war iǧi d amsegged, ■
11 uřa d ijj war ifehhem,
uřa d ijj war yarezzu x AREBBI.
12 Marra ffɣen zeg webrid u mmenḍaren,
uřa d ijj war ittegg tcuni,
uřa d ijj. ■
13 Tmijjawin nsen d imeḍřan yarezmen,
s iřsawen nsen cemmten,
ssem n ifiɣran sadu iyencicen nsen, ■
14 aqemmum nsen iccur s nneɛřet d tarzugi, ■
15 s iḍaren nsen ttqeǧiqen ɣar usizzeř n idammen, ■
16 areyyeb d tamara deg ibriden nsen,
17 abrid n řehna war t ssinen ca, ■
18 tiggʷudi n AREBBI war teǧi qibač i tiṭṭawin nsen.”■
19 Neccin nessen belli marra min teqqar Ccariɛa, aqa teqqar i-t i yenni iǧan sadu Ccariɛa, ḥima ad ittwaqqen kuř aqemmum uca ad tedweř marra ddunect dayes řɛib zzat i AREBBI, 20 maɣar zi řexdayem n Ccariɛa war ittwasegged uřa d ijj n bnadem qibač nnes, minzi s Ccariɛa i ttwassen ddnub. ■
Tasegda s liman weḥḥdes
21 Maca řexxu aqa teḍhar-dd tsegda n AREBBI břa Ccariɛa, tcehhed xas Ccariɛa d inabiyyen, ■ 22 aqa tasegda n AREBBI zi liman n Yeccu Lmasiḥ ɣar marra u x marra inni zzayes yumnen, minzi war din bu řfarz. 23 Minzi marra xḍan uca ineqṣ i-ten uɛuǧi n AREBBI, 24 uca ttwaseggden baṭeř s arḍa nnes u s weṣřaḥ i iǧan di Yeccu Lmasiḥ. ■ 25 AREBBI igga i-t d aṣřaḥ qbeř, s liman deg idammen nnes, di ṭṭweɛ n ddnub nneɣ nni tuɣa negga zic, di řweqt nni d aneɣ iwca AREBBI s ttasiɛ n řxaḍar nnes ḥima ad dd-iban tasegda nnes di řweqt-a, ■ 26 ḥima ad yiři Netta d Amsegged u di tsegda ad yarr d amseggad wi iǧan zi liman n Yeccu Lmasiḥ.
27 Mani iǧa xenni usemɣar? War xas nessiwiř. S man Ccariɛa? S man řexdayem? Ɛemmarṣ, maca s Ccariɛa n liman. 28 Xenni neḥseb belli bnadem ad ittwasegged s liman, war iǧi s řexdayem n Ccariɛa. ■ 29 Niɣ AREBBI n Wudayen waha, war iǧi n řegnus ɛawed? Wah, uřa n řegnus! 30 Minzi AREBBI d ijjen wenni i ɣa iseggden inni ittwaxetnen s liman, u ɛawed inni war ittwaxtinen s liman. 31 Ma nbeṭṭeř Ccariɛa s liman? Wayyaw, s řemqřub, neccin ad neḍmen Ccariɛa.