Liman n Ibrahim
4
1 Min i ɣa nini x Ibrahim, azeǧif n ibabaten nneɣ, min yufa di ddat nnes? ■ 2 Minzi mařa jedditneɣ Ibrahim tuɣa ittwasegged s řexdayem, aqa ɣares ccan, maca war iǧi ca ɣar AREBBI. 3 Minzi min iqqar wedlis? “Yumen Ibrahim di AREBBI uca ittwaḥseb as-dd man aya d tasegda.” ■ 4 Wenni ixeddmen war d as tᵉttwaḥesseb ca řmunet x řeḥsab n arḍa maca x řeḥsab n umarwas minzi ttursen as-dd. 5 Maca wenni war ixeddmen, maca yumen deg Wenni ittseggaden imednab, aqa liman nnes ad as dd-ittwaḥseb d tasegda. 6 Am mammec inna Dawud ɛawed x sseɛd n bnadem wenni umi dd as iḥseb AREBBI tasegda břa řexdayem, umi inna: 7 “Sseɛd n yinni umi ittwaɣfar uxeṭṭu nsen,
inni umi issduři Arebbi ddnub nsen. ■
8 sseɛd n bnadem umi war dd as iḥesseb ca AREBBI ddnub nnes.” ■
9 Ma sseɛd-a x yenni ittwaxetnen waha niɣ ɛawed x yenni war ittwaxetnen? S minzi neqqar: “Liman n Ibrahim ittwaḥseb as-dd d tasegda!” ■
10 Mammec d as t-i-dd ittwaḥseb? Ma řami tuɣa s wextan niɣ mařa tuɣa břa axtan? War tuɣi s wextan, maca tuɣa břa axtan.
11 Minzi iksi axtan d řeɛřamet, u acemmiɛ n tsegda iksi t s liman umi t tuɣa břa axtan, ḥima ad yiři d tababat i marra inni yumnen waxxa nitni břa axtan, ḥima ad asen dd-ittwaḥseb liman d tasegda ɛawed. ■
12 Netta d tababat i yenni s wextan, war iǧi i yenni iǧan s wextan waha, maca ɛawed i yenni igguren deg iṣuraf n l’iman n jedditneɣ Ibrahim umi tuɣa břa axtan.
13 Minzi lwaɛd i Ibrahim u i zzariɛet nnes belli ad yiři d awrit n ddunect, war t iksi ca zi Ccariɛa, maca zi tsegda n l’iman nnes.
14 Minzi mařa inni zi Ccariɛa d iwriten, aqa l’iman ixessaren uřa d lwaɛd ibeḍřen. ■
15 Maɣar Ccariɛa tᵉttaru aɣḍab, minzi mani war teǧi Ccariɛa, war din iǧi uřa d aɛeddi n Ccariɛa. ■
16 S uyenni nettwasegged s l’iman, ixs ad yini s arḍa, maḥend ad yiři lwaɛd nican i qaɛ zzariɛet, war iǧi i yenni iǧan zi Ccariɛa waha, maca ɛawed i yenni iǧan zi l’iman n Ibrahim, wenni d tababat n marra idneɣ, ■
17 am mammec tura: “Aqa ggiɣ cek d tababat i yijj n ubarru zi řegnus!”, zzat i AREBBI wenni zi tuɣa yumen netta, wenni itticen Tudart i imettinen d wenni ittřaɣan inni war iǧin axmi ǧan. ■
18 Waxxa iqḍeɛ as řayas, aqa yumen s usitem ad idweř d tababat i waṭṭas n řegnus am mammec tura: “Ammu i ɣa tiři zzariɛet nnek.” ■
19 Liman nnes war tuɣi iḍɛef, umi dd-iḥseb arrimet nnes temmut am tuɣa ɣares mya n iseggʷusa, u umi iɣri uɛeddis n Sara. 20 Netta war icekk ca di lwaɛd n AREBBI axmi s nneqs n l’iman, maca imḥeḍ di l’iman nnes, iwca aɛuǧi i AREBBI. ■ 21 Tuɣa issen nican belli min zzayes tuɣa iwaɛd AREBBI, izemmar ad t igg tanya. ■ 22 S uyenni ittwaḥseb as-dd liman d tasegda. ■
23 Maca war turi di ssibbet nnes waha, aqa ittwaḥseb as-dd l’iman nnes d tasegda, ■ 24 maca ɛawed di ssibbet nneɣ, minzi Netta ad aneɣ t-i-dd-iḥseb d tasegda, i neccin inni ittamnen deg Wenni i dd-issnekkaren Yeccu Lmasiḥ, Siditneɣ, zi taddart n imettinen, 25 aqa d Netta ittwasellmen di ssibbet n ddnub nneɣ uca ikkar-dd ḥima ad aneɣ isegged.