Bulus zzat i Fastus
25
1 Ařami dd-yiweḍ Fastus ɣar Qayṣariya, iruḥ ɣar Urcalim awarni řami ɛdun třata n wussan. 2 Arrays n ikehhanen d imcennɛen n Wudayen ssaregben t dinni x min xef ḍeřmen Bulus uca qeddmen as ict n tutra. 3 Ttaren zzayes maḥend ad asen igg s řxaḍar ḥima ad indeh Bulus ɣar Urcalim, am ggin nitni ad sswejden ict n texceft deg webrid maḥend ad t nɣen. 4 Maca Fastus yarra-dd: “Bulus ittwaḥḍa di Qayṣariya u necc simant inu ad din raḥeɣ deɣya. 5 Ejj inni zzaywem izemmaren ad afen tawwart ad raḥen akidi, uca ejj i-ten ad t ḍeřmen x man wen iǧa uxeṭṭu nni igga weryaz-a.” 6 Awarni řami iqqim din tmenya niɣ ɛecra n wussan ihwa ɣar Qayṣariya u tiwecca nnes iqqim x řkursi n ccreɛ uca yumur ad dd-awyen Bulus. 7 Umi dd-yiweḍ, nnḍen xas Wudayen inni tuɣa dd-ihwan zi Urcalim, uca aṭṭas n arruyas nsen ggin xas aṭṭas n icetciten iḍeqřen, war zemmaren ad ten ssbeyynen. 8 Umi iwta Bulus x yixef nnes, war ixḍi netta di walu, war teǧi di Ccariɛa n Wudayen niɣ di Zzawect Tameqqrant uřa di qayṣar, ■ 9 inna Fastus i Bulus, am tuɣa ixs ad igg řxaḍar i Wudayen: “Ma texsed ad tgeɛɛded ɣar Urcalim, ḥima ad din tᵉttwaḥakmed zzati?”
10 Yarra-dd Bulus inna: “Necc aqa beddeɣ zzat i řkursi n ccreɛ n qayṣar mani ittxeṣṣa ad xafi ittwaḥkem. War xḍiɣ deg Wudayen s walu am mammec cek tessned mliḥ.
11 Mařa xḍiɣ niɣ mařa ggiɣ min isdaheǧen řmewt, war ttrikkʷiřeɣ zi řmewt. Maca mařa war din bu tidett nican i zi d ayi ḍeřmen, xenni war izemmar uřa d ijjen ad ayi isellem ɣarsen i arḍa nsen. Necc uriɣ ddeɛwet inu ɣar qayṣar.” ■
12 Awarni řami tuɣa imcawar ak-d wegraw, yarra-dd Fastus: “Aqa tessgeɛɛded ddeɛwet nnek ɣar qayṣar, xenni ɣar qayṣar i ɣa traḥed!”
Tawasit n ujeǧid Aɣribas ɣar Qayṣariya
13 Awarni ɛdun ca n wussan yusa-dd ujeǧid Aɣribas d Barniki ɣar Qayṣariya ḥima ad seǧmen x Fastus.
14 Umi nitni sseɛdun din aṭṭas n wussan iɛawed Fastus i ujeǧid tamesřact n Bulus, inna: “Aqa da ijj n weryaz wenni da ijja Filiks d ameḥbus. ■
15 Řami d ayi tuɣa di Urcalim, ssaregben ayi xas imeqqranen n ikehhanen d imɣaren n Wudayen, arezzun zzayi ad ittwaḥakem zzatsen.
16 Necc arriɣ-dd xasen belli Irumaniyyen war nnumin ad sellmen ijj n bnadem ḥima ad ittwaneɣ maḥend ad ggen řxaḍar i iwdan. Ittxeṣṣa ad ḥḍaren zzates inni t iḍeřmen uca ad ɣares yiři ttasiɛ i bnadem nni maḥend ad idafeɛ x yixef nnes zi jjihet n ttuhmet.
17 Umi da dd-iwḍeɣ, war ɛgizeɣ uca tiwecca nnes qqimeɣ x řkursi n ccreɛ uca umureɣ ad dd-awyen aryaz nni ɣari.
18 Inni t iḍeřmen nnḍen as-dd, maca war zemmaren ad dd-awyen uřa d ict n ttuhmet i tuɣa zemmaren ad ssbeyynen am mammec tuɣa ttrajiɣ.
19 Maca tuɣa ɣarsen xas ca n tmesřayin zi jjihet n ddin nsen u zi jjihet n ijj n bnadem qqaren as Yeccu wenni aqa immut, maca wenni xef tuɣa Bulus iqqar belli aqa iddar. 20 Am tuɣa cekkeɣ di tmesřayin-a i di tuɣa arzuɣ, nniɣ i Bulus: ‘Ma zeɛma texsed ad traḥed ɣar Urcalim ḥima ad tᵉttwaḥakmed din x tmesřayin-a?’ 21 Maca umi tuɣa yarezzu ad ittwaḥḍa ař xas i ɣa iḥkem qayṣar, umureɣ ad t ḥḍan ař t ɣa ssekkeɣ ɣar qayṣar.” 22 Inna Aɣribas i Fastus: “Uřa d necc xseɣ ad sřeɣ i bnadem-a!” Inna as: “Tiwecca ad as tesřed!”
23 Tiwecca nnes yusa-dd Aɣribas d Barniki s marra ccan uca udfen ɣar taddart n ccreɛ ak-d ikumandaren n řɛeskar d yeryazen icenɛen n tendint. Xenni yumur Fastus, uca yudef-dd Bulus. 24 Inna Fastus: “A ajeǧid Aɣribas u kenniw marra iryazen i da iḥḍaren akidneɣ: Aqa x weryaz-a nni teẓrim danita, aqa cetcan xas ɣari marra řɣaci n Wudayen di Urcalim uřa danita, sɣuyyun maḥend war ittɣimi weryaz-a ad iddar ɛad. 25 Maca ufiɣ netta war iggi walu min isdaheǧen řmewt, maca umi issgeɛɛed ddeɛwet nnes ɣar qayṣar, ggiɣ ad t ssekkeɣ din. ■ 26 Maca war ɣari bu tmesřact nican ssneɣ tt zi jjihet nnes ḥima ad tt ariɣ i qayṣar. S uyenni sseḥḍareɣ t-i-dd i kenniw, d amezwaru i cek, a ajeǧid Aɣribas, ḥima, awarni řami i ɣa nkemmeř tarezzut, ad ɣari yiři min ɣa ariɣ i qayṣar, 27 minzi war icuwwar xmi dd ɣa ssekkeɣ ijj n umeḥbus břa ma ad ariɣ ixeṭṭan nnes.”