Asafar n Bulus ɣar Ruma
27
1 Xas uca ikkes Fastus awař, aqa ittxeṣṣa ad ittwassekk ɣar Iṭalya, uca isellem Bulus d ca n imeḥbas nneɣni i yijj n řqebṭan x mya qqaren as Yuliyus, tuɣa-t zeg ubaṭayun n qayṣar. 2 Řami nenwa ad nbeḥḥar, nenya deg ijj n uɣarrabu zi Adramitiyum, tuɣa iggur ad ikk x jjwayeh i iǧan x tma n Asiya, uca nruḥ. Tuɣa akidneɣ Aristarxus, ijj n weryaz zi Tissalunika di Masiduniya. 3 Tiwecca nnes niweḍ ɣar Ṣaydun. Yuliyus wenni tuɣa iǧan mliḥ ak-d Bulus, isamḥ as ad iraḥ ɣar imeddukkař nnes ḥima ad xas sexxaren. ■ 4 Xenni neffeɣ ssenni, nbeḥḥar deg udduři n Qubrus, minzi asemmiḍ tuɣa iccat dayneɣ deg uɣembub. 5 Neẓwa řebḥar n Kilikiya d Pamfiliya, uca niweḍ ɣar Mira, ict n tendint di Likiya. 6 Řqebṭan x mya yufa din ijj n uɣarrabu zi Iskandariyya, ittraḥ ɣar Iṭalya, issenya aneɣ dayes. 7 Umi aṭṭas n wussan war nruḥ ɣar zzat, niweḍ s uɣiř ɣar Knidus, minzi war d aneɣ yejji usemmiḍ ad nraḥ ɣar zzat, xenni nbeḥḥar deg udduři n Krita zzat i Salmuni. 8 Řami tuɣa war nzemmar ad nendeh ɣar zzat, niweḍ řami newta ddura temɣar ɣar ijj n wemcan umi qqaren ‘Řmuyyi Aṣebḥan’, wenni iǧan ṭṭarf i tendint n Lasiyya.
9 Neqqim aṭṭas n řweqt dinni ař dd-iɛdu ass n uẓummi n Wudayen. Umi idweř usafar di řebḥar yewɛar, iɛřem asen Bulus,
10 inna: “A iryazen, ttwařiɣ asafar ad yawi druct d txessart aṭṭas, maci mɣir i sseřɛet d uɣarrabu waha, maca uřa i tudart nneɣ.”
11 Maca řqebṭan x mya tuɣa isřa ktar ɣar umendah n tɣarrabut d řqebṭan x min tuɣa ittesřa ɣar wawařen n Bulus.
12 Umi tuɣa amcan n řmuyyi war iḥři ḥima ad sseɛdun řmecta din, ibedd array n wezyen ameqqran nsen ad ffɣen ssenni, balak ad awḍen ɣar Finiks, ijj n řmuyyi di Krita, iwařan ljanub n řɣarb d ccamal n sennej n řɣarb, ḥima ad din sseɛdun řmecta.
Asafar n Bulus ɣar Ruma (Řex. 27 d 28)
Taḥaryaḍt
13 Umi isaha usemmiḍ n ljanub, tuɣa nitni ssittimen ad awḍen am mammec tt xsen, uca bdan ttcuqqan x ṭṭarf n tma n Krita.
14 Maca cwayt awarni man aya, tekkar ict n tḥaryaḍt, qqaren as ‘ttifun n Uruklidun’. □
15 Aɣarrabu ittwaksi zzayes s jjehd, war izemmar i usemmiḍ. Xenni nestewṭeɛ uca nettwandeh.
16 Am nekka deg udduři n ict n tegzirt d tameẓyant umi qqaren ‘Qawda’, s uɣiř i nemneɛ ḍman n tɣarrabut n usellek i iǧan ɣar ḍeffar n uɣarrabu.
17 Nessgeɛɛed i-tt, u nessejhed aɣarrabu am t nebyes swadday s iḥezzamen. Maɣar tuɣa neggʷed ad nemmenḍar x ict n řgeɛɛdet n ijdi di řebḥar, nessehwa-dd řbacc uca nettwandeh s usemmiḍ u ammu i nřaḥ.
18 Uca umi taḥaryaḍt thaj xaneɣ aṭṭas, xenni tiwecca nnes nenḍar seřɛet nneɣ di řebḥar.
19 Deg wass wiss třata nenḍar řeqcuɛ n uɣarrabu s ifassen nneɣ. 20 Řami taḥaryaḍt teqqim tᵉttṣuḍ aṭṭas n wussan, war tbin tfuct řa d taziri uřa d itran, xenni neqḍeɛ marra řayas ad nenjem.
21 Řami war zemmaren ad ṣbaren ɛad, ibedd Bulus di řwest nsen, inna: “A iryazen, tuɣa ittxeṣṣa awem ad ɣari tesřem, xenni war neffiɣ ca zi Krita u war d aneɣ třeqqef druct-a d řeḥṣaret-a. 22 Maca ɛawed řexxu, ad kenniw cejjɛeɣ, minzi uřa d ijj zzaywem war ittweddari ca tudart nnes, mɣir aɣarrabu waha ad iɣebbař. 23 Minzi ibedd-dd ɣari ǧiřet-a ijj n lmalak n AREBBI wenni necc nnes u wenni umi ɛebbdeɣ. 24 Netta inna ayi: “War tteggʷed ca, a Bulus, minzi ittxeṣṣa ac ad tbedded qibač i qayṣar. Xzar marra inni akidek ittbeḥḥaren, aqa iwca ac ten AREBBI.” 25 S uya ggem taryast, a iryazen, minzi ttiqqeɣ di AREBBI, belli ad teffeɣ ammu, am mammec d ayi inna. 26 Maca s uɣiř ittxeṣṣa ad nennaɣ deg ict n tegzirt.”
27 Awarni řami nettwaɛaren zi ssa ɣar diha u nessiḥeř ixef nneɣ di řebḥar n Adriyana, ittɣiř asen i ibeḥriyyen di řwest n ǧiřet, aqa nqarreb-dd ɣar řbarr. 28 Nitni nḍaren ayřizim di raǧaɣ n řebḥar, ɛebbaren ɛicrin n tiddiwin. Umi ɛdun cwayt, ɛebbaren nitni xemmesṭac n tiddiwin. □ 29 Am neggʷed ad neřqef imucan n sseǧaḥ, nenḍar arebɛa n iyřizam zi ḍeffar n uɣarrabu uca ttaren ad dd-yaweḍ uziř.
30 Řami tuɣa ibeḥriyyen xsen ad arewřen zeg uɣarrabu, ssḍaren taɣarrabut n usellek ɣar řebḥar axmi xsen ad nḍaren iyřizam ɣar zzat n uɣarrabu. 31 Umi iẓra Bulus man aya, inna i řqebṭan x mya u i iɛeskariyyen: “Mařa ina war qqimen deg uɣarrabu, war tzemmarem ad ttwasnejmem.” 32 Xenni qessen iɛeskariyyen iseɣwan n tɣarrabut n usellek uca jjin tt ad truḥ.
33 Ařami dd-iqarreb ad iṣbeḥ řḥař, iziyyar i-ten Bulus marra ḥima ad ccen, inna: “Arbeɛṭac n wussan aqa war teccim walu zi ssibbet n lxaṭar. 34 S uyenni cejjɛeɣ kenniw ad teccem minzi man aya ad kenniw infeɛ i usenjem nwem, minzi war iweṭṭi uřa d ijj n uẓeṭṭu n ucuwwaf n uzeǧif n uřa d ijjen zzaywem.” ■ 35 Awarni řami inna aya, iksi aɣrum, icekkar AREBBI qibač i marra, yarẓa i-t, ibda ad icc. ■ 36 Marra ttwacejjɛen u ksin macca. 37 Tuɣa aneɣ deg uɣarrabu di mitayen u-setta u-sebɛin n yeryazen. 38 Řami jjiwnen s macca, bdan ssefsasen aɣarrabu, nḍaren irden di řebḥar.
39 Ařami iṣbeḥ řḥař, tuɣa ibeḥriyyen war ssinen tammurt nni, maca ẓrin ijj n umesruq n řebḥar ɣar tma nnes uca mcawaren, ma nzemmar ad din nɛarn aɣarrabu. 40 Umi qeḍwen iyřizam, jjin ten di řebḥar, fesyen iceddan n řemqadef, ssgeɛɛden řbacc n zzat i usemmiḍ ittṣuḍen, wejjhen ɣar tma n řbarr. 41 Maca aɣarrabu iwta ijj n uɛarric n yejdi mani iǧa řebḥar ɣar tnayen n iɣezdisen uca nnuɣen s uɣarrabu. Yarsa zzat n uɣarrabu x uɛarric n yejdi, war izemmar ad inhezz, maca ḍeffar n uɣarrabu ittwajbed s jjehd n řemwaj. ■
42 Tuɣa newwan iɛeskariyyen ad nɣen imeḥbas ḥima war ittɛummi ḥed maḥend ad yarweř. 43 Maca řqebṭan x mya wenni tuɣa ixs ad issenjem Bulus, issbedd i-ten, yumur belli inni izemmaren ad ɛummen ad nḍaren ixef nsen d amezwaru maḥend ad awḍen ɣar řbarr. 44 Wi iqqimen, ijja i-ten ad ẓwan x tferwin u x izeynan n ikeccuḍen n uɣarrabu, uca ammu i iwḍen marra ɣar řbarr, ttwassnejmen.