Řixḍaret n sebɛa imsexxaren n řmuminin
6
1 Deg wussan nni, řami tuɣa ktaren imeḥḍaren aṭṭas, aqa imeḥḍaren inni ɣarsen řhard n Iyunaniyyen ɛeksen Iɛibraniyyen minzi tijjař nsen farrḍen daysent di tsexxart n zzad n kuř ass. 2 S uya řaɣan tenɛac n rrusul x marra agraw n imeḥḍaren maḥend ad munen, nnan asen: “War iɛeddeř ad nsexxar ṭṭwabeř i macca am nettejja deg Wawař n AREBBI. □ ■ 3 Arzum xenni, a aytma, u xḍarem sebɛa n yeryazen zzaywem inni ɣar teǧa cchadet tecna, ccuren s Arruḥ n SIDI d tiɣit, uca neccin ad ten nkellef xenni s tmesřact-a. ■ 4 Maca neccin ad neṣbar di tẓaǧit u di tsexxart n Wawař.” 5 Iɛjeb wawař-a i marra řɣaci uca nitni ixḍaren Stifanus, ijj n weryaz iccuren s l’iman d Arruḥ Iqeddsen, xenni Filippus d Pruxurus d Nikanur d Timun d Parminas d Nikulas, ijj n umɛacar n Wudayen zi Antiyuxiya. ■ 6 Ssbedden ten qibač i rrusul uca awarni řami ẓẓuǧen, ssarsen xasen ifassen nsen. ■ 7 Tuɣa Awař n AREBBI iggam d řqedd n imeḥḍaren di Urcalim tuɣa imeqqar aṭṭas. Ijj n ubarru d ameqqran n Wudayen iṭaɛ i l’iman. ■
Uḍuf n Stifanus
8 Stifanus, iccur s arḍa d jjehd, tuɣa ittegg řeɛřamat d řeɛjayeb mɣarent jar řgens. 9 Kkaren maca yeryazen zi temzida umi qqaren ‘Talibertinit’. Aqa-ten d iwdan zi Qayrawan d Iskandariyya, uřa zi Kilikiya d Asiya, tuɣa ttqacaḥen Stifanus.
10 Maca war zemmaren ad ɛeksen tiɣit d Arruḥ i zzayes tuɣa issawař. ■
11 Řexdenni ssekken iryazen, ɛarrnen ten maḥend ad inin: “Aqa nesřa asen, ssawařen s wawařen iceqqfen di Musa u di AREBBI!” ■
12 Aqa ssɣewwɣen řgens d imɣaren n řgens d imseřmaden n idlisen uca umi xas-dd dduqqzen, ṭṭfen t, nedhen t ɣar Lmeḥkama Tameqqrant.
13 Ggin řechud n ẓur, inni innan: “Bnadem-a war issbeddi ad iceqqef di Ccariɛa u deg wemcan-a iqeddsen,
14 minzi nesřa as iqqar belli Yeccu Nnaṣiri wanita ad yareddeǧ amcan-a, ad ibeddeř ṭṭbayeɛ i d aneɣ iwca Musa.”
15 Marra inni tuɣa ɣar iǧa řkursi di Lmeḥkama Tameqqrant n Wudayen, ḥekkaren dayes u ẓrin aɣembub nnes amecnaw aɣembub n ijj n lmalak.