Řḥukm x Ananiyas d Saffira
5
1 Ijj n weryaz qqaren as Ananiyas, ak-d temɣart nnes Saffira, izzenz iyyar nnes. 2 Netta iksi ijj n wezyen n tmenyat n ttaman n yeyyar, am tessen temɣart nnes man aya, uca issnufar i-t. Xas uca yiwi-dd ca n ttmenyat n nnuqart zzayes, issars i-tt ɣar iḍaren n rrusul. □ 3 Inna as Cimɛun: “A Ananiyas, mayemmi iccur cciṭan uř nnek ḥima ad tessxarqed x Arruḥ Iqeddsen u ḥima ad tnuffared ca n tmenyat deg iyyar? 4 Ma war iǧi yiyyar nnek ař ittwammenz? U řami ittwammenz, tuɣa ttaman nnes ɛad deg ufus nnek! Min cek ideɛwen tᵉttegged deg wuř nnek man aya? Aqa cek war tessxarqed ca x iwdan maca x AREBBI.” 5 Umi isřa Ananiyas awařen-a, iwḍa ɣar temmurt, immut, uca tedweř tiggʷudi temɣar x marra inni isřin aya. 6 Kkaren ibřiɣen, cefnen t, arbun t ɣar barra, neḍřen t. 7 Awarni řami ɛdunt ɛřaḥař třata n tsaɛɛetin, tudef-dd temɣart nnes, war tessin min imsaren. 8 Inna as Cimɛun: “Ini ayi, ma aqa tezzenzem iyyar s wanect uya?” Tenna as: “Wah, s wanect uya!” 9 Inna as Cimɛun: “Min kenniw ideɛwen tᵉttafqem jar awem maḥend ad tjarrbem Arruḥ n SIDI? Xzar, iḍaren n yinni ineḍřen aryaz nnem aqa aten ɣar tewwart, ad cem ksin barra ɛawed.”
10 Řexdenni tewḍa ɣar iḍaren nnes uca temmut. Udfen-dd ibřiɣen nni, ufin tt temmut, ksin tt ɣar barra uca neḍřen tt zzat i weryaz nnes,
11 uca tedweř tiggʷudi temɣar ɣar marra tamesmunt u ɣar marra inni isřin man aya.
Řeɛřamat d lmuɛjizat
12 Msarent waṭṭas n řeɛřamat d řeɛjayeb jar iwdan s ifassen n rrusul uca marra nitni tuɣa munen s wuř d ijjen deg useqqif ak-d ukulwar d ipilaren n Suliman. ■
13 Maca zeg iwdan inneɣni war izɛim ḥed ad kisen igg azeǧif, maca řgens iweqqar ten aṭṭas.
14 Mmarenyen-dd ktar ɛad ɣar yenni yumnen di SIDI, ibarruten n yeryazen d temɣarin,
15 ařami tuɣa kessin imehřac barra ɣar zznaqi, ssrusan ten x qamat ḥima, xmi dd ɣa yas Cimɛun, balak ad tekk mɣir tiři nnes xasen.
16 Usin-dd uřa d aṭṭas zi tneddam i d as dd-innḍen i Urcalim, iwyen-dd imehřac nsen d yenni daysen řaryaḥ imengas, uca marra ggenfan. ■
Afekki n Buṭrus d Yuḥanna zi řeḥbes
17 Arrays n ikehhanen d marra inni iǧan akides, inni iǧan zi tebridt n Iṣaduqiyyen, dewřen ccuren s řeḥsed,
18 Nitni ssarsen ifassen x rrusul, ṭṭfen ten uca arrin ten di řeqyud di řeḥbes.
19 Maca Lmalak n SIDI yarzem tiwwura n řeḥbes s ǧiřet, issuffeɣ i-ten ɣar barra, inna asen: ■ 20 “Ruḥem, xenni tbeddem di Zzawect Tameqqrant, siwřem i řgens s marra awařen-a n Tudart!”
21 Ffɣen-dd nitni ɣar wenqar n tfuct, udfen ɣar Zzawect Tameqqrant, bdan sseřmaden.
Maca ikkar-dd arrays n ikehhanen d yenni akides iǧan, uca řaɣan x yenni ibedden akidsen u x imɣaren n ayt n Israil, uca ssekken imsexxaren nsen ɣar řeḥbes ḥima ad ten dd-awyen. 22 Umi dd-ffɣen inni zzaysen dd-ittwassekken, war ten ufin ca di řeḥbes, uca ɛeqben, nnan: 23 “Aqa nufa řeḥbes ibelleɛ mliḥ u iɛessasen bedden barra ɣar tewwura, maca umi narzem tawwart, war din nufi ḥed daxeř.”
24 Řami sřin imeqqranen n ikehhanen d imeqqranen n Zzawect Tameqqrant awařen-a, tbehten aṭṭas, iweddar asen min ɣa ggen. 25 Uca yusa-dd ijj n weryaz ixebbar i-ten, iqqar: “Xzar, iryazen inni teggim di řeḥbes, aqa bedden di Zzawect Tameqqrant, sseřmaden iwdan!”
Aḥeqqeq n rrusul
26 Řexdenni ruḥen din řquyad ak-d imxazniyyen, iwyen ten-dd, maci s uɣiř minzi tuɣa ggʷeden aqa řgens ad ten iḥejjar. ■ 27 Umi ten dd-iwyen, ssbedden ten zzat i Lmeḥkama Tameqqrant n Wudayen, qqaren as Sunhidrin’. Isseqsa ten arrays n ikehhanen, iqqar: 28 “Ma war kenniw numur s jjehd maḥend war tessɣaram uřa d ijjen s Yisem-a? U xzar, aqa kenniw teccurem Urcalim s tɣuri nwem, kenniw texsem ad xaneɣ tarrem idammen n Bnadem-a!” ■
29 Cimɛun d rrusul arrin-d, nnan: “Ittxeṣṣa ṭṭaɛet i AREBBI ktar zi tenni n iwdan. ■ 30 AREBBI n řejdud nneɣ issnekkar-dd Yeccu wenni tenɣim kenniw, tuyřem t x tefrewt. ■ 31 AREBBI igga i-t d Azeǧif d Řɛunṣar n Tudart uca issgeɛɛed i-t ɣar ufus nnes yeffusi maḥend ad iwc ttubet d weɣfar n ddnub i Israil. ■ 32 Neccin d řechud x man aya uca uřa d Arruḥ Iqeddsen i yewca AREBBI i yenni dayes yumnen.” ■ 33 Řami sřin aya, hajen aṭṭas uca ttemcawaren ḥima ad ten nɣen.
34 Maca ikkar ijjen zeg Ifarisiyyen, qqaren as Gamaliyal. Netta d amseřmad n Ccariɛa u marra řgens ittweqqar i-t. Yumur netta ḥima ad nedhen rrusul ɣar barra i cwayt n řweqt. 35 Inna asen: “A iryazen, ayt n Israil, ḥḍam ixef nwem, xzarem mliḥ aqa marra min ɣa teggem s iwdan-a, ad yiři s řḥeqq. 36 Minzi qbeř ussan-a tuɣa ikkar Tuddas, inna aqa netta d ca, řeṣqen dayes ɛřaḥař ca n arebɛa mya n yeryazen. Aqa nɣin t u marra inni tuɣa t iḍeffaren, dewřen ttwazuzzaren, ikemmeř array nsen. ■ 37 Awarni man aya ikkar Yahuda Ajalili deg wussan n uzemmem i uxeǧeṣ n ḍḍariba i kuř uzeǧif i Zzawect Tameqqrant, uca isseɣwa aṭṭas n iwdan di řgens maḥend ad t ḍfaren. Netta immut uca marra inni i-t-i-dd iḍfaren, dewřen ttwazeǧɛen. 38 Řexxu ad awem iniɣ: “Sbeɛɛḍem ixef nwem x iwdan-a, jjem ten ad raḥen, minzi mařa axarreṣ-a niɣ řxedmet-a zeg iwdan i teǧa, xenni ad iqḍa. ■ 39 Maca mařa tuɣa-t zi AREBBI, war tzemmarem ad t tbeṭṭřem, ḥima ad taɣ kenniw war tᵉttwifim d inni ittmenɣan ak-d AREBBI.” ■ 40 Ggin ad ttwassqenɛen zzayes uca awarni řami d řaɣan x rrusul, jjin ad ten hettken s urekkuḍ, ɛeřmen asen ḥima war ssiwiřen ɛad s Yisem n Yeccu, xenni arxun asen.
41 Nitni ruḥen zzaysen, farḥen řami ufin belli nitni ttwaḥesben ad sdaheǧen abehdeř di ṭṭweɛ n Yisem nnes. ■ 42 War ssbedden ca zeg useřmad di mkuř ass di Zzawect Tameqqrant u di tudrin u zeg ubarreḥ s Siditneɣ Yeccu Lmasiḥ.