Awař n Stifanus zzat i Řmeḥkamet Tameqqrant
“A kenniw, a iryazen, aytma d ibabaten, sřem! AREBBI n uɛuǧi iḍhar i jedditneɣ Ibrahim am tuɣa ɛad di Misuputamiya, qbeř ma ad izdeɣ di Ḥaran. 3 Netta inna as: ‘Ffeɣ zi temmurt nnek u zi řaǧ nnek, ruḥ ɣar temmurt tenni d ac i ɣa ssecneɣ.’ ■ 4 Řexdenni iffeɣ Ibrahim zi temmurt n Ikaldaniyyen uca izdeɣ di Haran. Awarni řami immut babas, issmuṭṭiy i-t-i-dd AREBBI ɣar temmurt-a i di tzeddɣem ass-a. 5 Netta war d as iwci ca dayes řwart uřa d ijj n uṣurif n uḍar, maca iwaɛd ad as tt iwc d řwart, i netta u i zzariɛet nnes awarni as, am war tuɣi ɣares ɛad mmis. ■ 6 Issiweř AREBBI akides, inna as: ‘Ad tiři zzariɛet nnek d inewjiwen deg ict n temmurt teɣribt, uca nitni ad ten arren d isemɣan, ad daysen ɣezzan arebɛa mya n iseggʷusa. ■ 7 Uca řgens i d as ɣa ɛebden am isemɣan, ad t ḥasbeɣ, ammu i iqqar AREBBI, uca awarni man aya ad ffɣen, ad ayi ɛebden deg wemcan-a.’ ■ 8 Netta iwca as řɛahd n wextan. Xas uca ijja-dd Isḥaq uca ixten i-t deg wass wiss tmenya uca Isḥaq ijja-dd Yaɛqub, Yaɛqub ijja-dd tenɛac n řejdud imezwura. ■
9 Řejdud imezwura ɣarren zi Yusuf uca zzenzen t ɣar Miṣra. Maca AREBBI tuɣa-t akides, ■
10 issenjem i-t zi marra řemḥayem nnes, iwca as arḍa d tiɣit qibač i Firɛun, ajeǧid n Miṣra, uca wanita igga i-t d řḥakem x Miṣra u x marra taddart nnes. ■
11 Maca yusa-dd řaẓ d ict n řeḥṣaret temɣar di marra tammurt n Miṣra u di temmurt n Kenɛan, war ufin řejdud nneɣ min zi ɣa jjiwnen. ■
12 Maca umi isřa Yaɛqub belli aqa din řḥebb n irden di Miṣra, issekk řejdud nneɣ dinni i umur amezwaru. ■
13 Řami din ruḥen i umur wiss tnayen isseḍhar Yusuf ixef nnes i yaytmas uca yargeb Firɛun x řaǧ n Yusuf. ■
14 Issekk Yusuf, yumur maḥend ad dd-yas babas Yaɛqub d marra řaǧ nnes: xemsa u-sebɛin n řeɛmur.
15 Ihwa-dd Yaɛqub ɣar Miṣra, immut netta d řejdud nneɣ. ■
16 Iwyen t ɣar Cakim, ssarsen t deg wenḍeř wenni isɣa Ibrahim s yijj n ttaman n nnuqart zeg ayt n Ḥamur, babas n Cakim. ■
17 Maca ařami dd-tiweḍ řweqt i tuɣa iwaɛd zzayes AREBBI i Ibrahim s ict n tjaǧit, tuɣa igam řgens, idweř ijhed di Miṣra, ■
18 ařami dd-ikkar ijj n ujeǧid nneɣni x Miṣra i tuɣa war issinen Yusuf. ■
19 Wanita tuɣa ittegg s řeɣdar ak-d řgens nneɣ uca iɣezza x řejdud nneɣ. Yumur i-ten maḥend ad nḍaren iseyman nsen ḥima war ttɣimin ad ddaren.
20 Di řweqt nni ixřeq-dd Musa, yusa as-dd x řxaḍar i AREBBI. Sseymen t di taddart n babas třata n iyuren. ■ 21 Řami ittwammenḍar zeg yemmas, tufa i-t yeǧis n Firɛun, tesseyem i-t amecnaw mammec iǧa d mmis n yixef nnes. 22 Ittwassɣar Musa di marra tiɣit n Imiṣriyyen uca tuɣa ittqedda x wawař u x min tuɣa ittegg.
23 Ařami ɣares arebɛin n iseggʷusa, iḍar-dd xas deg wuř nnes maḥend ad yarzef aytmas, ayt n Israil. ■ 24 Umi iẓra aqa iḍeǧ ijjen zeg aytmas zi teqbič nnes, ixřef zzayes di ṭṭweɛ nnes, igga ixef nnes d řqaḍi di ssibbet nnes uca inɣa Amiṣri nni t iḍeǧen. 25 Tuɣa ittraja belli tawmat nnes, ayt n Israil, ad fehmen aqa AREBBI ad asen issiwiḍ afekki s ufus nnes, maca nitni war fhimen.
26 Deg wass awarni as iḍhar asen-dd ɛawed řami tuɣa ttmenɣan. Iɛřem asen maḥend ad messeṣřaḥen, iqqar: ‘A iryazen, kenniw d awmaten, mayemmi tɛeddam ijjen x wenneɣni?’ 27 Wenni tuɣa ittɛeddan x umqarreb nnes, iɛarren i-t, iqqar: ‘Wi cek iggin xaneɣ d azeǧif d řqaḍi? ■ 28 Ma ad taɣ ad texsed ad ayi tenɣed am mammec tenɣid iḍennaḍ Amiṣri?’ ■ 29 Řexdenni yarweř Musa di ssibbet n wawař-a uca idweř d anewjiw di temmurt n Midyan mani dd-yejja tnayen iḥenjiren.
30 Awarni řami ɛdun i netta arebɛin n iseggʷusa, iban as-dd Lmalak n SIDI di řexřa n wedrar n Sina di tmessi itteḥduduqen di cbarq ak-d isennanen. ■ 31 Umi iẓra Musa man aya, itebhet s tmeẓriwt i iẓra, uca umi dd-iqarreb ḥima ad iẓar, inna as SIDI s ict n tmijja: 32 ‘Aqa d NECC, AREBBI n řejdud nwem, AREBBI n Ibrahim, n Isḥaq u n Yaɛqub!’ Ibda Musa ittarjiji aṭṭas, war izɛim ad ixzar ɣar tmeẓriwt. ■ 33 Inna as SIDI: ‘Kkes sandaliyat nnek zeg iḍaren nnek, minzi tammurt mixef tbedded tqeddes i teǧa.’ ■ 34 Aqa ẓriɣ řmeḥnet n řgens inu di Miṣra uca sřiɣ i uzehhar nsen, hwiɣ-dd ḥima ad ten ssnejmeɣ. Uca řexxu, as-dd da, ad dd cek ssekkeɣ ɣar Miṣra.’ ■
35 Musa wanita, wenni inḍaren nitni umi nnan: ‘Wi cek iggin xaneɣ d azeǧif d řqaḍi?’, wanita issekk i-t i-dd AREBBI ɣarsen d azeǧif d umsellek s ufus n Lmalak nni d as dd-iḍharen di cbarq ak-d isennanen. 36 Wanita issuffeɣ i-ten zi Miṣra am igga řeɛřamat d řeɛjayeb d tmegga timeqqranin di temmurt n Miṣra u di Řebḥar n Uɣanim u di řexřa řmijař n arebɛin n iseggʷusa. ■ 37 Wa d Musa wenni innan i ayt n Israil: ‘SIDI, AREBBI nwem, ad awem dd-yejj ijj n Unabi am necc zi tawmat nwem. I Netta umi ittxeṣṣa ad tesřam!’ ■ 38 Wanita tuɣa-t di tmesmunt n řgens di řexřa ak-d lmalak wenni tuɣa akides issawařen x wedrar n Sina uřa ak-d řejdud nneɣ. Aqa netta tuɣa itteṭṭef awařen n Tudart ḥima ad aneɣ ten yewc. ■ 39 Maca řejdud nneɣ war xsen ad as ṭṭaɛen maca sstewwjen t xasen uca ɛeqben ɣar Miṣra deg wuřawen nsen. 40 Maɣar nnan i Harun: ‘Egg aneɣ irebbiten inni d aneɣ i ɣa izwaren minzi Musa wanita wenni d aneɣ igewwden zi temmurt n Miṣra, war nessin min d as imsaren.’ ■ 41 Ggin ijj n uyenduz deg wussan nni uca ssgeɛɛden tiɣarṣa i řexyař, farḥen s min ggin ifassen nsen. 42 AREBBI iwca asen s weɛrur uca yarra i-ten ad ɛebden řɛeskar n ujenna amecnaw mammec tuɣa tura deg wedlis n inabiyyen:
‘Mayemmi tiwyem ayi-dd zeɛma immudaren d tiɣarṣa,
arebɛin n iseggʷusa di řexřa, a ayt n Israil? ■
43 Iwa aqa tiwyem-dd aqiḍun n Mulak,
d itri n arebbi Rimfan,
nni zi i teggim řexyařat ḥima ad tent tɛebdem.
Necc ad kenniw ssbeɛɛdeɣ aɣirin qaɛ i Babilun.’ ■
44 Tazeddiɣt n Cchadet n řejdud nneɣ tuɣa-tt di řexřa am mammec tuɣa yumur Netta wenni tuɣa issawař ak-d Musa maḥend ad tt igg x umedya i d as isscen. ■ 45 Řejdud nneɣ ak-d Yacuwa ssidfen Tazeddiɣt-a ɣar temmurt nni d asen iwca AREBBI d řwart n řegnus, řegnus nni issuffeɣ i-ten AREBBI qibač i uɣembub n řejdud nneɣ, u nitni arbun tt ař wussan n Dawud. ■ 46 Wanita yufa arḍa ɣar AREBBI uca ittar as ad yaf ict n Tzeddiɣt i AREBBI n Yaɛqub. ■ 47 Maca Suliman ibna as Taddart. ■ 48 Maca Amɛuǧi x kuřci war izeddeɣ deg ict n tzeddiɣt i ittwaggen s ifassen n iwdan am mammec iqqar unabi: ■
49 ‘Ajenna d řɛarc inu
u temmurt d tanebdat sadu iḍaren inu.
Mani taddart i d ayi ɣa tebnam,
iqqar SIDI,
niɣ mani amcan n arraḥet inu? ■
50 Ma war iggi ufus inu man aya marra?’ ■
51 A kenniw inni ittɣennan d yenni war ittwaxetnen n wuř d imezzuɣen, řebda tᵉttemɛařam x Arruḥ Iqeddsen. Am mammec ggin řejdud nwem, ammu i tᵉtteggem uřa d kenniw. ■ 52 Man wen zeg inabiyyen war ten marrtem u war ten nɣin řejdud nwem, aqa inni izwaren barrḥen x twasit n Umseggad, wenni tsellmem, tenɣim t kenniw, 53 kenniw inni iksin Ccariɛa s řumur n lmalakat maca war dayes tᵉṭṭifem.” ■
Řmewt n Stifanus
54 Umi sřin aya, dduqqzen nitni s uxeyyeq, ɣeẓẓen tiɣmas nsen ɣares. 55 Maca am tuɣa iccur s l’iman d Arruḥ Iqeddsen, ikessi netta tiṭṭawin nnes ɣar ujenna, iẓra aɛuǧi n AREBBI d Yeccu ibedd ɣar yeffus n AREBBI, 56 inna: “Xzar, ttwařiɣ ijenwan arzmen u Mmis n bnadem ibedd ɣar yeffus n AREBBI.” 57 Maca nitni, am sɣuyyun s ict n tmijja d tameqqrant, qqnen imejjan nsen uca hejmen xas marra. 58 Tṭfen t, ssuffɣen t barra i tendint, bdan ttḥejjaren t u řechud ssarsen arruḍ nsen ɣar iḍaren n ijj n ubřiɣ qqaren as Cawul. ■ 59 Tuɣa ttḥejjaren Stifanus am ittřaɣa, iqqar: “A Siditneɣ Yeccu, ṭṭef arruḥ inu.” ■ 60 Xenni iwḍa x ifadden nnes, isɣuyy s ict n tmijja tejhed, inna: “A Siditneɣ, war d asen ttḥasab ddnub-a!” Awarni řami inna aya, iṭṭeṣ s yiḍes n řmewt. ■