صَافَانْيَا
1
1 أَوَاڒْ نْ سِيذِي إِ د-يُوسِينْ إِ صَافَانْيَا، مِّيسْ ن كُوشِي، مِّيسْ ن جَاذَالْيَا، مِّيسْ ن أَمَارْيَا، مِّيسْ ن حِيزْقِييَا، ذڭْ وُوسَّانْ ن يُوشِييَا، مِّيسْ ن أَمُونْ، أَجدْجِيذْ ن يَاهُوذَا. ▫ ڒْحُوكْمْ نِّي د غَا يَاسنْ خْ يَاهُوذَا
2 نشّْ أَذْ كّْسغْ قَاعْ مَارَّا مِينْ إِدْجَانْ زڭْ وُوذمْ ن ثمُّورْثْ،
أَمُّو إِ إِقَّارْ سِيذِي.
3 أَذْ كّْسغْ بْنَاذمْ ذ ڒْمَاڒْ،
أَذْ كّْسغْ إِجْضَاضْ ن ؤُجنَّا
ذ إِسڒْمَانْ ن ڒبْحَارْ
ذ ثْعنْكْرِيفِينْ أَكْ-ذ إِعفَّاننْ،
وَاهْ نشّْ أَذْ قْضِيغْ بْنَاذمْ خْ وُوذمْ ن ثمُّورْثْ، أَمُّو إِ إِقَّارْ سِيذِي. ▪
4 نشّْ أَذْ سّْوِيژّْضغْ س ؤُفُوسْ إِنُو ضِيدّْ إِ يَاهُوذَا
ؤُ ضِيدّْ إِ مَارَّا إِمزْذَاغْ ن ؤُرْشَالِيمْ،
نشّْ أَذْ ثحِّيغْ مِينْ إِقِّيمنْ زِي بَاعْلْ زڭْ ومْشَانْ-أَ
أَكْ-ذ يِيسمْ ن إِكهَّاننْ ن صَّانَامْ ▫
5 ذ ينِّي يُوضَارنْ خْ ثْزغْوِينْ زَّاثْ إِ ڒْعسْكَارْ ن إِجنْوَانْ،
ؤُ ينِّي، أَمْ ؤُضَارنْ، جُّودْجنْ غَارْ سِيذِي،
ؤُ أَقَا جُّودْجنْ غَارْ مَالْكَامْ،
6 ؤُڒَا ذ ينِّي د-إِتّْعَاقَّابنْ زِي ضفَّارْ ن سِيذِي،
ؤُ ينِّي وَارْ أَرزُّونْ خْ سِيذِي ؤُ وَارْ خَاسْ تّْسّقْسِينْ. ▪
أَسّْ أَمقّْرَانْ ن سِيذِي
7 سغْذْ زَّاثْ إِ وُوذمْ ن سِيذِي إِنُو، سِيذِي،
مَاغَارْ أَسّْ ن سِيذِي يُوذسْ.
سِيذِي أَقَا إِسّوْجذْ إِشْثْ ن ثْغَارْصْثْ،
نتَّا إِسّْقدّسْ إِمعْرَاضنْ نّسْ.
8 أَذْ إِمْسَارْ ذڭْ وَاسّْ ن ثْغَارْصْثْ ن سِيذِي،
أَقَا نشّْ أَذْ عَاقْبغْ ڒْحُوكَّامْ ذ إِحنْجِيرنْ ن ؤُجدْجِيذْ
ذ مَارَّا إِنِّي يَارّْضنْ أَرُّوضْ أَغْرِيبْ.
9 ذڭْ وَاسّْ نِّي أَذْ عَاقْبغْ
مَارَّا إِنِّي إِنڭّْزنْ ثَانبْذَاثْ،
إِنِّي إِتّْعمَّارنْ ثَادَّارْثْ ن سِيذِيثْسنْ
س لْعُونْفْ ذ ڒْغشّْ.
10 ذڭْ وَاسّْ نِّي، إِقَّارْ سِيذِي،
أَذْ ذِينْ يِيڒِي إِجّْ ن ڒْحسّْ ن إِغُويَّانْ زِي ثوَّارْثْ ن إِسڒْمَانْ،
ؤُڒَا ذ ڒْحسّْ ن ينِّي إِتّْرُونْ زِي ثنْذِينْثْ ن جْذِيذْ
ذ إِشْثْ ن ثَارژِّيثْ ثمْغَارْ زِي ثوْرِيرِينْ.
11 رُومْ، إِمزْذَاغْ ن جِّيهثْ ن ؤُمهْرَازْ،
مِينْزِي مَارَّا إِسبَّابّنْ تّْوَاسغْضنْ،
مَارَّا إِنِّي إِوزّْننْ ثْمنْيَاثْ تّْوَاقضْعنْ.
12 ذِي ڒْوقْثْ نِّي أَذْ بقّْشغْ ذِي ؤُرْشَالِيمْ س ڒقْنَاذڒْ،
ؤُ نشّْ أَذْ عَاقْبغْ إِرْيَازنْ
إِنِّي إِتّْوَاڭْذَارنْ زِي ڒَاثَارْ نِّي إِقِّيمنْ ن بِينُو،
إِنِّي إِقَّارنْ ذڭْ وُوڒْ نْسنْ
’سِيذِي وَارْ إِتّڭّْ ڒْخَارْ ؤُ وَارْ إِتّڭّْ ڒْغَارْ!‘
13 أَڭْڒَا نْسنْ أَذْ يِيڒِي إِ ثْكشَّاضْثْ
ذ ثُوذْرِينْ نْسنْ أَذْ ذوْڒنْثْ ذ ڒْخَارْبثْ.
نِيثْنِي أَذْ بْنَانْ ثُوذْرِينْ إِ يِيخفْ نْسنْ،
مَاشَا وَارْ ذَايْسنْثْ زدّْغنْ شَا،
نِيثْنِي أَذْ ژُّونْ ثِيزَايَارِينْ،
مَاشَا وَارْ سسّنْ زِي بِينُو نّسْ.
14 أَسّْ أَمقّْرَانْ ن سِيذِي يُوذسْ،
أَقَا-ث يُوذسْ، ذغْيَا يُوسَا-د.
ڒْحسّْ ن وَاسّْ ن سِيذِي!
أَذْ إِسْغُويّْ بُو-ثغْرُوضْثْ ذِينْ س يِيشْثْ ن ثْغُويِّيثْ ثَارْزڭْ.
15 أَسّْ نِّي أَذْ يِيڒِي ذ أَسّْ ن ؤُذُوقّزْ ن ؤُفُوڭمْ،
ذ أَسّْ ن ڒحْصَارثْ ذ ضِّيقَا،
ذ أَسّْ ن ؤُخَارّبْ ذ وَاردّدْجْ،
ذ أَسّْ ن طّْڒَامْ ذ ثَادْجسْثْ،
ذ أَسّْ ن إِسيْنُوثنْ ذ ؤُسيْنُو إِبُّومْبسْ،
16 إِجّْ ن وَاسّْ ن ؤُصُوضِي ذڭْ ؤُيِيشّْ ن إِشَارِّي ؤُ ن ؤُصُوضِي س وسْرُودّحْ
ضِيدّْ إِ ثْندَّامْ إِفَارْينْ
ؤُ ضِيدّْ إِ صُّومْعَاثْ نِّي إِدْجَانْ غَارْ ثْغمُّورَا.
17 نشّْ أَذْ حْصَارغْ إِوْذَانْ
ؤُ نِيثْنِي أَذْ ؤُيُورنْ أَمْ إِذَارْغَاڒنْ،
مِينْزِي نِيثْنِي ڭِّينْ دّنْبْ خْ سِيذِي.
إِذَامّنْ نْسنْ أَذْ تّْوَازدْجْعنْ أَمْ ثْعجَّاجْثْ،
ذ ويْسُومْ نْسنْ أَمْ إِخَّانْ.
18 ؤُڒَا ذ نُّوقَارْثْ نْسنْ ذ وُورغْ نْسنْ
وَارْ زمَّارنْ أَذْ ثنْ سّْنجْمنْ
ذڭْ وَاسّْ ن ؤُذُوقّزْ ن ؤُفُوڭمْ ن سِيذِي.
ثِيمسِّي ن وَاسَّامْ نّسْ أَذْ ثشّْ مَارَّا ثَامُّورْثْ،
مَاغَارْ ذغْيَا نتَّا أَذْ إِقْضَا مَارَّا إِمزْذَاغْ ن ثمُّورْثْ. ▪