ڒْحُوكْمْ خْ ڒْعذْيَانْ ن يَاهُوذَا
2
1 سْذوْڒمْ-د إِخفْ نْومْ غَارْ ڒعْقڒْ، ذوْڒمْ-د غَارْ ڒعْقڒْ، أَ ڒْڭنْسْ بْڒَا ؤُسضْحِي،
2 قْبڒْ إِ غَا إِفّغْ ڒْحُوكْمْ،
- أَسّْ أَمْ ؤُڒُومْ إِعدُّو - ،
قْبڒْ إِ خَاومْ د غَا يَاسْ ڒْحَاذُوقْ ن وغْضَابْ ن سِيذِي،
قْبڒْ إِ خَاومْ د غَا يَاسْ وَاسّْ ن وغْضَابْ ن سِيذِي.
3 أَرْزُومْ خْ سِيذِي، مَارَّا إِمْوَاضْعنْ ن ثمُّورْثْ،
إِنِّي إِتّڭّنْ ڒْحقّْ نّسْ!
أَرْزُومْ ثَاسڭْذَا، أَرْزُومْ أَوَاضعْ،
أَذْ ثَاغْ أَذْ ثنُّوفَّارمْ كنِّيوْ
ذڭْ وَاسّْ ن وغْضَابْ ن سِيذِي. ▪
4 مَاغَارْ غَازَّا أَذْ ثتّْوَاجّْ،
أَشْقَالُونْ أَذْ ثذْوڒْ ذ ڒْخَارْبثْ،
أَشْذُوذْ أَذْ خَاسْ أَزّْڒنْ غَارْ وزْينْ ن وَاسّْ،
ؤُشَا عَاقْرُونْ أَذْ ثتّْوَاقْڒعْ.
5 ؤُشْثْ خْ إِمزْذَاغْ ن ثْمَا ن ڒبْحَارْ،
ڒْڭنْسْ ن إِكْرِيثِييّنْ.
أَوَاڒْ ن سِيذِي أَذْ خَاومْ يِيڒِي،
أَ كنْعَانْ، ثَامُّورْثْ ن إِفِيلِيسْطِينِييّنْ!
نشّْ أَذْ كنِّيوْ هلّْكغْ، وَارْ إِتِّيڒِي ؤُمزْذُوغْ عَاذْ.
6 ثَامُّورْثْ نِّي خْ ثْمَا ن ڒبْحَارْ أَذْ ثِيڒِي ذ دّْمَانِي ن ثَاروْسَا،
ؤُڒَا ذ وَانُوثنْ إِ إِمكْسَاونْ ذ ڒْكُورِيثْ إِ وُودْجِي.
7 أَذْ ثِيڒِي ثمُّورْثْ إِ مِينْ إِقِّيمنْ ن ثَادَّارْثْ ن يَاهُوذَا،
حِيمَا أَذْ ذَايسْ أَروْسنْ ثِيحِيمْرِيوِينْ نْسنْ.
ذِي ثُوذْرِينْ ن أَشْقَالُونْ أَذْ ذِينْ أَرْسنْ غَارْ ثْمذِّيثْ،
مَاغَارْ سِيذِي، أَربِّي نْسنْ، أَذْ غَارْسنْ يَارْزفْ،
ؤُ نتَّا إِسّْنقْڒبْ ثَامحْبَاسْثْ نْسنْ.
8 نشّْ سْڒِيغْ إِ ؤُسحْقَارْ ن مُوآبَ
ذ ؤُشقّفْ ن أَيْثْ ن عَامُّونْ،
إِ زِي سّْحقَارنْ نِيثْنِي ڒْڭنْسْ إِنُو،
ؤُ سّْڭعّْذنْ إِخفْ نْسنْ أَطَّاسْ ضِيدّْ إِ ثمُّورْثْ نْسنْ.
9 خْ ؤُيَا، س ثِيذتّْ أَمْ دَّارغْ نشّْ،
إِقَّارْ سِيذِي ن ڒْعسْكَارَاثْ، أَربِّي ن إِسْرَائِيل:
مُوآبَ أَذْ ثذْوڒْ أَمْ سَاذُومْ،
ؤُ أَيْثْ ن مُوآبَ أَمْ عَامُورَّا،
زِي سِّيبّثْ ن ثْزڭّْوَارْثْ ذ وَانُوثنْ ن ثْمدْجَاحْثْ،
إِشْثْ نْ ڒْخَارْبثْ إِ ڒبْذَا.
مِينْ إِقِّيمنْ ن ڒْڭنْسْ إِنُو ڭُّورْ أَذْ ثنْ إِكشّضْ
ؤُ مِينْ إِقِّيمنْ ن ڒْڭنْسْ إِنُو ڭُّورْ أَذْ إِطّفْ ثَاسْغَارْثْ نْسنْ ذ ڒْوَارْثْ.
10 أَيَا أَذْ ثنْ إِڒْقفْ زِي سِّيبّثْ ن نّْفَاخثْ نْسنْ،
مَاغَارْ نِيثْنِي ثُوغَا سّحْقَارنْ ؤُ أَرْزْمنْ أَقمُّومْ نْسنْ
خْ ڒْڭنْسْ ن سِيذِي ن ڒْعسْكَارَاثْ.
11 إِسَّاڭّْوَاذْ أَذْ غَارْسنْ إِفّغْ سِيذِي،
مَاغَارْ نتَّا أَذْ إِقْضَا خْ مَارَّا إِربِّيثنْ زِي ثمُّورْثْ،
ؤُ نِيثْنِي أَذْ أَسْ سجْذنْ،
كُوڒْ إِجّْ زڭْ ومْشَانْ نّسْ،
مَارَّا ثِيڭْزِيرِينْ ن ڒڭْنُوسْ.
12 كنِّيوْ عَاوذْ، أَ أَيْثْ ن كُوشْ،
تّْوَاسْنُوقّْبنْ نِيثْنِي زِي سِّيفْ إِنُو.
13 نتَّا أَذْ إِسّْوِيژّضْ س ؤُفُوسْ نّسْ غَارْ شَّامَالْ،
نتَّا أَذْ يَاردّدْجْ أَشُّورْ،
ؤُ أَذْ يَارّْ نِينْوَا ذ إِشْثْ ن ڒْخَارْبثْ،
ثُوژغْ أَمْ ڒخْڒَا.
14 ذِي ڒْوسْثْ نّسْ أَذْ ڭيّْرنْثْ ثْحِيمْرِيوِينْ،
مَارَّا ڒْمَاڒْ نّسْ، أَقَا تّڭّنْ ذڭْ إِجّْ ؤُبَارُّو ن ن ڒْڭنْسْ.
ؤُڒَا ذ بُو-إِعُوقَّانْ، وَاهْ ؤُڒَا ذ ثْوُوشْثْ ن دْجِيڒثْ
أَذْ سّنْسنْ خْ إِزدْجِيفنْ ن إِبِيلَارنْ نّسْ.
ثْمِيجَّا نْسنْ أَذْ ت ثْغنّجْ زِي ڒْكَازِي،
أَردّدْجْ أَذْ يِيڒِي خْ ثْنبْذَاثْ نّسْ،
مَاغَارْ ثَافْروْثْ ن ثنْڭلْثْ ثتّْوَاعَارَّا.
15 ذ ثَا ذ ثَانْذِينْثْ إِسْڒِيوْڒِيونْ،
ثنِّي إِقِّيمنْ ذِي ڒَامَانْ،
ثنِّي إِنَّانْ ذڭْ وُوڒْ نّسْ:
’نشّْ ذ ثنِّي، وَارْ ثدْجِي ذ ثنّغْنِي!‘
مَامّشْ ثذْوڒْ ذ ڒْخَارْبثْ،
إِشْثْ ن ومْشَانْ ن أَرَّاحثْ إِ ڒْمَاڒْ ن ڒخْڒَا!
مَارَّا إِنِّي خَاسْ غَا إِكّنْ،
أَذْ خَاسنْ إِصفَّارْؤُ س ؤُسحْقَارْ أَذْ إِسّنْهزّْ أَفُوسْ نّسْ.