حَابَاقُّوقْ
أَشثْشِي ن حَابَاقُّوقْ
1
1 ڒْحُوكْمْ إِسَّاڭّْوَاذنْ نِّي إِژْرَا ؤُنَابِي حَابَاقُّوقْ. 2 ”أَ سِيذِي، أَڒْ مڒْمِي إِ غَا قِّيمغْ تّْڒَاغِيغْ
ؤُ شكْ وَارْ ذ أَيِي ثتّسْڒِيذْ،
أَڒْ مڒْمِي إِ غَا قِّيمغْ تّْڒَاغِيغْ ’لْعُونْفْ!‘،
ؤُ شكْ وَارْ ذ أَيِي ثسّنْجَامذْ!
3 مَايمِّي إِ ذ أَيِي ثسّشْنذْ ڒْمُوعْصِييّثْ
ؤُ ثتّْغِيمِيذْ ثْخزَّارذْ غَارْ ڒغْبنْ؟
مَاغَارْ أَردّدْجْ ذ لْعُونْفْ أَقَا أَثنْ أَرنْذَاذْ إِنُو،
ؤُ إِمْسَارْ ؤُمْشُوبّشْ، إِكَّارْ-د ؤُرُودّزْ.
4 س ؤُينِّي إِ ثذْوڒْ شَّارِيعَا بْڒَا جّهْذْ،
ؤُ وَارْ د-إِتّفّغْ عمَّارْصْ ڒْحقّْ،
مَاغَارْ أَعفَّانْ إِتّنّضْ إِ ؤُمْسڭّذْ.
س ؤُينِّي إِ د-إِتّفّغْ ڒْحقّْ إِفَارْغْ.
ثْوَارِّيثْ ن سِيذِي خْ ثْژَادْجِيثْ
5 خْزَارمْ جَارْ ڒڭْنُوسْ، خْزَارمْ،
إِنُّورْزمْ ؤُقمُّومْ س ؤُثبْهثْ،
مَاغَارْ نشّْ أَذْ ڭّغْ إِشْثْ ن ڒْخذْمثْ ذڭْ وُوسَّانْ نْومْ
إِ وَارْ ثتِّيمْنمْ مَاڒَا ثسْڒِيمْ خَاسْ. ▪
6 مَاغَارْ خْزَارمْ، نشّْ سّكَّارغْ إِكَالْذَانِييّنْ،
ڒْڭنْسْ إِقسْحنْ ؤُ إِمْقدْجْقنْ،
ونِّي إِڭُّورنْ ذِي ڒوْسعْ ن ثمُّورْثْ،
حِيمَا أَذْ إِطّفْ ثِيزذِّيغِينْ نِّي وَارْ إِدْجِينْ نّسْ.
7 إِسَّاڭّْوَاذنْ ؤُ إِسّْنخْڒَاعنْ إِدْجَانْ!
ڒْحقّْ نّسْ ذ ؤُعُودْجِي نّسْ تّفّْغنْ-د زَّايسْ.
8 إِيْسَانْ نّسْ فْسُوسنْ خْ ؤُغِيڒَاسْ،
نِيثْنِي مُّوزَّارنْ مَاهُو ؤُشَّاننْ ن دْجِيڒثْ،
إِمْنَاينْ نّسْ تّْرَابَاعنْ.
إِمْنَاينْ نّسْ تَّاسنْ-د زِي ڒَاڭّْوَاجْ،
نِيثْنِي طَّاونْ أَمْ ؤُڭِيذرْ نِّي إِتّْقدْجْقنْ مَاحنْذْ أَذْ يشّْ.
9 أَقَا نتَّا إِتَّاسْ-د، أَمنْ إِكْمڒْ، إِ لْعُونْفْ،
إِغمْبَابْ نْسنْ خزَّارنْ غَارْ زَّاثْ،
ؤُ نتَّا أَذْ إِسّْمُونْ إِمحْبَاسْ أَمْ يجْذِي.
10 نتَّا أَذْ إِقصَّارْ خْ إِجدْجِيذنْ
ؤُ إِنِّي إِ غَارْ ثدْجْ صُّولْطَا أَذْ ثنْ يڭّْ ذ ثَاضحَّاشْثْ.
وَاهْ، نتَّا أَذْ إِضْحشْ خْ مَارَّا لْپُورْجَاثْ،
مِينْزِي نتَّا أَذْ إِسّْعُورّشْ ؤُشَاڒْ ؤُشَا أَذْ ثنْثْ إِطّفْ.
11 خنِّي أَذْ إِنّعْثَارْ أَمْ ؤُصمِّيضْ، ؤُ نتَّا أَذْ إِعْذُو
ؤُ أَذْ إِذْوڒْ ذ أَمذْنُوبْ، مَاغَارْ جّهْذْ نّسْ وَانِيثَا أَذْ يِيڒِي ذ أَربِّي نّسْ.
أَشثْشِي وِيسّْ ثْنَاينْ ن حَابَاقُّوقْ
12 زِي مشْحَاڒْ ؤُيَا مَا شكْ وَارْ ثدْجِيذْ ذ سِيذِي، أَربِّي إِنُو، أَمْقدَّاسْ إِنُو؟
نشِّينْ وَارْ نتّْمتِّي شَا!
أَ سِيذِي، شكْ ثَارِّيذْ إِ-ث إِ ڒْحُوكْمْ،
أَ ثَاصْضَارْثْ، شكْ ثْفَارْزذْ ث مَاحنْذْ أَذْ يِيڒِي إِ لْعِيقَابْ.
13 شكْ ذ أَمزْذَاڭْ أَطَّاسْ ن ثِيطَّاوِينْ حِيمَا أَذْ ثْوَاڒَانْثْ ڒْغَارْ.
شكْ وَارْ ثْزمَّارذْ أَذْ ثْصوْضذْ ذِي ثُوعفّْنَا ثبْضڒْ.
مَايمِّي إِ غَا ثْصوْضذْ ذڭْ ينِّي إِتّڭّنْ س ڒغْذَارثْ؟
مَايمِّي إِ غَا ثسّغْضذْ خْمِي إِصَارّضْ ؤُعفَّانْ
إِ ونِّي إِ خَاسْ إِسڭّْذنْ؟
14 مَايمِّي إِ ثڭِّيذْ إِوْذَانْ أَمْ إِسڒْمَانْ ن ڒبْحَارْ،
أَمْ إِمُّوذَارْ نِّي إِتّْپُوعنْ خْ ثمُّورْثْ إِ وَارْ غَارْ إِدْجِي ڒْحَاكمْ؟.
15 س ثْسنَّارْثْ إِسّْڭعَّاذْ إِ-ثنْ-د مَارَّا،
إِيَارُّو إِ-ثنْ س ثْرَاشَّا نّسْ،
ؤُشَا إِسّْمُونْ إِ-ثنْ ذِي ثْرَاشَّا نّسْ ن ؤُذلَّاعْ.
س ؤُينِّي إِفَارّحْ ؤُ إِتّْفَاجَا.
16 س ؤُينِّي إِوهّبْ ثِيغَارْصَا إِ ثْرَاشَّا نّسْ،
ؤُشَا إِبخَّارْ ثِيوْهِيبِينْ ن ڒبْخُورْ إِ ثْرَاشَّا ن ؤُذلَّاعْ نّسْ.
مِينْزِي زَّايْسنْثْ إِ ثذْوڒْ ثسْغَارْثْ نّسْ ثمْغَارْ،
ؤُڒَا ذ مَاشَّا نّسْ أَقَا ثْڒدّْ.
17 مَا خْ مَانَايَا إِ غَا إِقِّيمْ إِسّكّْوَا ثْرَاشَّا نّسْ،
ؤُشَا أَذْ إِقِّيمْ ڒبْذَا إِنقّْ ڒڭْنُوسْ بْڒَا مَا أَذْ يجّْ حذْ؟