ثَاژَادْجِيثْ ن حَابَاقُّوقْ
3
1 ثَاژَادْجِيثْ ن حَابَاقُّوقْ، أَنَابِي، ذڭْ وَاطَّاسْ ن ثْمِيجِّيوِينْ. 2 أَ سِيذِي، ؤُمِي سْڒِيغْ ڒخْبَارْ نّكْ، ثُوغَا تّڭّْوذغْ.
أَ سِيذِي، سْندَّارْ ڒْخذْمثْ نّكْ عَاوذْ ذِي ڒْوسْثْ ن إِسڭّْوُوسَا،
سشّنْ إِ-ت ذِي ڒْوسْثْ ن إِسڭّْوُوسَا،
ذڭْ وغْضَابْ عْقڒْ خْ ڒحْنُونشْثْ نّكْ.
3 أَربِّي يُوسَا-د زِي ثَايْمَانْ ؤُ أَمْقدَّاسْ زڭْ وذْرَارْ ن فَارَانْ. سِيلَاهْ.
لْعَاضَامَا نّسْ ثذْڒَا إِجنْوَانْ
ؤُ أَصبّحْ نّسْ إِشُّورْ ثَامُّورْثْ.
4 ثُوغَا ذِينْ أَمشْنَاوْ ثِيسِّيقْثْ ن ثْفَاوْثْ،
ثُوغَا غَارسْ فْڒِيثْشَاثْ ن وَاسَّامْ ذڭْ ؤُفُوسْ نّسْ،
ؤُ ذَايسْ ثْنُوفَّارْ ثْزمَّارْ نّسْ.
5 طَّاعُونْ إِتِّيزْوَارْ إِ وُوذمْ نّسْ،
ڒْحَاذُوقْ ن ثْمسِّي إِفّغْ-د زڭْ إِضَارنْ نّسْ.
6 نتَّا إِكَّارْ ؤُشَا يَارَّا ثَامُّورْثْ ثتّنْهزَّا،
نتَّا إِژْرَا ؤُ إِڭَّا أَذْ أَرْجِيجنْ ڒڭْنُوسْ،
إِذُورَارْ ن زِيشْ تّْوَاڒبْزنْ أَڒَامِي ذوْڒنْ ذ ثَاعجَّاجْثْ،
ثِيوْرِيرِينْ زِي مشْحَاڒْ ؤُيَا غنْسنْثْ!
إِبْرِيذنْ إِتّْذُومَانْ إِ ڒبْذَا أَقَا أَثنْ نّسْ.
7 نشّْ ژْرِيغْ إِقِيضَانْ ن كُوشَانْ تّْوَاحْصَارنْ،
ثِيجَارْثِيڒِينْ ن إِقِيضَانْ ن ثمُّورْثْ ن مِيذْيَانْ إِتَّاوِي ثنْثْ ؤُسمِّيضْ س جّهْذْ.
8 مَا يَارْغَا وغْضَابْ ن سِيذِي خْ إِغزْرَانْ؟
مَا ثُوغَا أَغْضَابْ نّكْ ضِيدّْ إِ إِغزْرَانْ؟
مَا ثُوغَا ثدُّوقّْزذْ س ؤُفُوڭمْ ضِيدّْ إِ ڒبْحَارْ،
ڒَامِي ثْنذْهذْ خْ ييْسَانْ نّكْ،
خْ إِكَارُّوثنْ نّكْ ن ؤُسنْجمْ؟
9 ڒْقوْسْ نّكْ إِتّْوَاعَارَّا مَارَّا،
ثِيجَادْجِيثِينْ إِ ثسِّيوْڒذْ أَقَا-ثنْ ذ إِعُومَاذْ إِ ؤُسقْسَاحْ. سِيلَاهْ.
ثْفدْجْقذْ ثَامُّورْثْ س إِغزْرَانْ.
10 ڒَامِي شكْ ژْرِينْ إِذُورَارْ، إِڒْقفْ إِ-ثنْ ڒوْجعْ،
ڒْحمْڒثْ ن وَامَانْ ثُوغَا ثْعدُّو،
أَمَانْ يُودْجْغنْ أَرِّينْ ثْمِيجَّا نْسنْ ثتّْوَاسڒْ،
ڭعّْذنْ إِفَاسّنْ نْسنْ غَارْ ؤُجنَّا.
11 ثَافُوشْثْ، ؤُڒَا ذ ؤُيُورْ، قِّيمنْ بدّنْ ذِي ثْزذِّيغْثْ نْسنْ.
أَقَا رُوحنْ زِي سِّيبّثْ ن ثْفَاوْثْ ن فْڒِيثْشَاثْ ن ڒْقوْسْ نّكْ،
زِي سِّيبّثْ ن ثِيسِّيقْثْ ن لَانْسَا نّكْ إِتّحْذُوذُوقنْ.
12 س وسْخضْ ثصُّورُوفذْ ثِيوَا إِ ثمُّورْثْ،
س وغْضَابْ نّكْ ثْعفْسذْ خْ ڒڭْنُوسْ.
13 شكْ ثفّْغذْ إِ ؤُسنْجمْ ن ڒْڭنْسْ نّكْ،
إِ ؤُسنْجمْ ن ؤُمذْهُونْ نّكْ.
أَقَا شكْ ثْقدْجْعذْ ثَازقَّا ن ثَادَّارْثْ ن ؤُعفَّانْ،
ثْعَارِّيذْ ذْسَاسْ أَڒْ إِرِي. سِيلَاهْ.
14 شكْ ثسّْنُوقّْبذْ أَزدْجِيفْ ن أَرَّايْسْ نّسْ س إِعُومَاذْ نّسْ.
نِيثْنِي ؤُسِينْ-د عڒْفنْ-د مَاحنْذْ أَذْ أَيِي زدْجْعنْ.
أَقَا ذ مژْرِي نْسنْ
مَاڒَا زمَّارنْ أَذْ شّنْ ڒْمسْكِينْ س ثْنُوفّْرَا.
15 أَكْ-ذ إِيْسَانْ نّكْ ثطّْفذْ أَبْرِيذْ ذِي ڒبْحَارْ،
أَكُوفُّو ن وَامَانْ إِمقّْرَاننْ.
16 ڒَامِي سْڒِيغْ، يَارْجِيجْ ؤُعذِّيسْ إِنُو.
ؤُمِي سْڒِيغْ ڒْحسّْ نِّي، أَرْجِيجنْ إِينْشِيشنْ إِنُو،
أَخسَّارْ يُوذفْ غَارْ إِخْسَانْ إِنُو،
ؤُ نشّْ أَرْجِيجغْ ذڭْ ومْشَانْ إِنُو.
إِڒِي أَذْ رَاجِيغْ ذِي ڒْخَاضَارْ خْ وَاسّْ ن ڒحْصَارثْ،
خْمِي إِ غَا إِسّْڭعّذْ خْ ڒْڭنْسْ،
ؤُ أَذْ أَنغْ إِحْصَارْ.
ڒفْرَاحثْ ن حَابَاقُّوقْ ذِي سِيذِي
17 وَاخَّا وَارْ إِتّْنُووَّارْ وَارْثُو،
ؤُ وَارْ ذِينْ ثتِّيڒِي عَاذْ ڒْغِيدْجثْ غَارْ ثْزَايَارْثْ،
وَاخَّا ڒْغِيدْجثْ ن زِّيثُونْ أَذْ ثفْشڒْ
ؤُڒَا ذ إِيَّارنْ وَارْ تّْغِيمِينْ تِّيشنْ ڒْمَاشُوڒْ،
ؤُ أَذْ تّْوَاقضْعنْ وُودْجِي زِي ڒْكُوڒِي
ؤُ وَارْ تِّيڒِينْ عَاذْ إِفُونَاسنْ ذ ثْفُونَاسِينْ ذِي ڒْكُورِيثْ،
18 عَاذْ أَمنِّي نشّْ أَذْ سْڒِيوڒْوغْ إِ سِيذِي،
أَذْ فَارْحغْ زِي أَربِّي ن ؤُسنْجمْ إِنُو.
19 سِيذِي، سِيذِي إِنُو، نتَّا ذ جّْهذْ إِنُو.
نتَّا إِتّڭّْ إِضَارنْ إِنُو فْسُوسنْ أَمْ إِضَارنْ ن ثُوذَاذِينْ،
ؤُ نتَّا إِتّجَّا أَيِي صُّورُوفغْ خْ ڒڭْعُوذِي.
إِ ؤُمقّْرَانْ ن إِمغْنَاجنْ. أَكْ-ذ ؤُزنْزُونْ.