Ij ujenna ḏ ṯmurṯ ḏ jḏiḏ
21
1 Ẓriɣ ij n ujenna ḏ jḏiḏ ḏ ij n ṯmurṯ ḏ jḏiḏ, ȓaḥeqqac ajenna amezwaru ḏ ṯmurṯ ṯamezwarut twakksen, ȓebḥar war iqqim ca.
2 Ẓriɣ ṯandint iqeddsen, nettaṯ ḏ Lquds ḏ jḏiḏ. Ṯehwa-d zeg ujenna zi Arebbi amecnaw ṯasȓiṯ ṯeƹḏeȓ ixef nnes aḏ teȓqa muȓay.
3 Sȓiɣ ij n ṯmijja zi lƹarc ṯeqqar s jjehḏ: "Aqa ṯazeddiɣṯ n Arebbi akeḏ yiwḏan, aḏ izḏeɣ akiḏsen, aḏ iȓin ḏ ccaƹb nnes. Arebbi s yixef nnes akiḏsen yiȓi, ƹaweḏ aḏ yiȓi ḏ Arebbi nsen.
4 Aḏ imseḥ kuȓ ameṭṭa zi ṯiṭṭawin nsen. War ṯeqqim aḏ tiȓi ȓmewṯ uȓa ḏ uḥzan uȓa ḏ imeṭṭawen uȓa ḏ ȓeḥriq. Aqa ṯimesȓayin ṯimezwura twakksent."
5 Inna-ayi wenni iqqimen x lƹarc: "Aqa-ayi aḏ ggeɣ kuȓci ḏ jḏiḏ!" Inna: "Ari manaya: Awaȓen-a ḏaysen ȓaman niṯni ḏ ȓḥaqq."
6 Inna-ayi: "Ṣafi, itwakemmeȓ. Nec ḏ lʼalif nec ḏ lya. Kuȓci zzayi ig ibḏa, kuȓci zzayi iy ɣa ikemmeȓ. Aḏ uceɣ i wenni iffuḏen zi ȓƹunṣar n waman n ṯuḏarṯ baṭeȓ.
7 Wen ɣa irebḥen aḏ iwarṯ ḏi ṯmesȓayin-a. Aḏ iȓiɣ ḏ Arebbi nnes, netta aḏ yiȓi ḏ memmi.
8 Maca cmayeṯ ḏ yinni war yuminen ḏ yinni iǧan ḏ iƹeffanen ḏ yinni ineqqen iwḏan ḏ yinni ifessden ḏ iseḥḥaren ḏ yinni iƹebbḏen lʼaṣnam ḏ marra yinni isxerriqen aḏ iȓin ḏeg uyeȓmam ireqqen s ṯmessi ḏ ȓekbriyeṯ. Ṯenni ḏ ȓmewṯ wis ṯnayen."
Ṯandinṯ n Lquds ḏ jḏiḏ
9 Ṯusa-d ɣari icten zi sebƹa n lmalaʼikaṯ nni iy ɣar ǧant sebƹa n ṯmejmarin ig iƹemmaren s sebƹa n lmuṣibaṯ ṯineggura, ṯenna-ayi: "Araḥ-d, aḏac seḍhareɣ ṯasȓiṯ, iƹni ṯenni ɣa imeȓcen akeḏ yizmar."
10 Ṯeysi-ayi arruḥ ɣar ij n uḏrar ḏ ameqqran yuƹȓa, ṯseḍhar-ayi ṯandint iqeddsen, iƹni Lquds, ṯehwa-d zeg ujenna zi Arebbi.
11 Ḏayes lƹaḍama n Arebbi, nnur nnes amecnaw ṯazrut ṯaṣebḥant, amecnaw ṯazrut n lyaceb ṯeṣfa aṭṭas.
12 Ɣares ȓḥiḍ ḏ ameqqran yuƹȓa ḏayes ṯenƹac n ṯewwura. Ṯiwwura nni xasent ṯenƹac n lmalaʼikaṯ. Yura x ṯewwura nni isemawen n ṯenƹac n ṯqebbaȓ n Ayṯ-Israʼil.
13 Ḏi ccarq ṯȓaṯa n ṯewwura, ḏi ccamal ṯȓaṯa n ṯewwura, ḏi ljanub ṯȓaṯa n ṯewwura, ḏi ȓɣarb ṯȓaṯa n ṯewwura.
14 Ȓḥiḍ n ṯendint ibedd x ṯenƹac n dsasaṯ, yura xasen isemawen n ṯenƹac n arrusul n yizmar.
15 Lmalaʼika nni ɣari issiwȓen ɣares ḏeg ufus nnes can ȓaƹbar, iƹni ij n uɣanim n dheb azzayes ṯeƹbar ṯandint ḏ ṯewwura nnes ḏ ȓḥiḍ nnes.
16 Ṯandint murebbaƹ, am ṯuzeggarṯ am ṯiriwṯ. Ṯeƹbar ṯandinṯ s uɣanim nni, ṯufa ḏayes aȓefayen u arbeƹ-miyya kilumeter, am ṯuzeggarṯ am ṯiriwṯ am ṯuƹȓat.
17 Ṯeƹbar ȓḥiḍ nnes, ṯufa ḏayes miyya u arbeƹa u arbeƹin ḏerraƹ,a iƹni ȓaƹbar n lmalaʼika nni amecnaw ȓaƹbar n bnaḏem.
18 Ȓḥiḍ nnes ibna s ṯezra n lyaceb, ṯandint ṯebna s dheb iṣfan amecnaw jjaj iṣfan.
19 Dsasaṯ n ȓḥiḍ n ṯendint zewwqen s mkuȓ nnuƹ n ṯezra ṯiṣebḥanin. Dsas amezwaru netta ḏ ṯazrut n lyaceb, dsas wis ṯnayen ḏ lyaqut azeyza, dsas wis ṯȓaṯa ḏ lƹaqiq acemȓaȓ, dsas wis arebƹa ḏ ṯazrut ṯazeyza n zzumurrud,
20 dsas wis xemsa ḏ jjazeƹ azeggwaɣ, dsas wis setta ḏ lƹaqiq azeggwaɣ, dsas wis sebƹa ḏ ṯazrut n zzabarjad, dsas wis ṯmenya ḏ ṯazrut n biril, dsas wis tesƹa ḏ lyaqut awraɣ, dsas wis ƹecra ḏ lƹaqiq amerbiƹa, dsas wis ḥiṭac ḏ ṯazrut n fayruz, dsas wis ṯenƹac ḏ ṯazrut n jjamact.
21 Ṯenƹac nni n ṯewwura niṯenti ḏ ṯenƹac n jjuharaṯ, kuȓ ṯawwarṯ nettaṯ ḏ ij n jjuhar. Ccariƹ n ṯendint netta ḏ dheb iṣfan amecnaw jjaj iṣfan.
22 War ẓriɣ ca ṯamziḏa ṯameqqrant ḏi ṯendint nni. Liʼanna Siḏ Arebbi ig izemmren i kuȓci akeḏ yizmar niṯni s yixef nsen ḏ ṯamziḏa ṯameqqrant.
23 Ṯandint war ṯeḥḏij ca ṯfawṯ n ṯfucṯ uȓa ḏ ṯaziri ȓaḥeqqac lƹaḍama n Arebbi iy ḏas iteggen ṯfawṯ, izmar netta ḏ ȓefnar nnes.
24 Aḏ uyuren ȓegnus ḏi ṯfawṯ nnes, aḏ siḏfen ḏinni izeǧiḏen n ṯmurṯ lhimma nsen.
25 Ṯiwwura nnes war tbelliƹent nhar ikmeȓ ȓaḥeqqac war ḏinni bu ǧiȓeṯ.
26 Ḏinni aḏ siḏfen lhimma ḏ uweqqar n ȓegnus.
27 War ɣares tiḏef uȓa ḏ ij n ṯmesȓayṯ ṯwessex niɣ ḏ ikrucaren niɣ ḏ yinni qqaren ixerriqen. Aḏ aḏfen ɣir yinni isemawen nsen zemmen ḏi Lkitab n Ṯuḏarṯ n yizmar.