22
1 Ṯseḍhar-ayi-d lmalaʼika nni iɣzar n waman n ṯuḏarṯ ṣfan am jjaj, iteffeɣ-d zi lƹarc n Arebbi ḏ yizmar,
2 itazzeȓ ḏi ȓwesṭ n ccariƹ n ṯendint. X ṯnayen iɣezḏisen n yiɣzar nni ḏinni ṯacejjarṯ n ṯuḏarṯ. Tarew ṯenƹac n ṯwaȓaṯin, kuȓ char ij n ṯwaȓa. Afar nnes isgenfa ȓegnus.
3 Zi ssin aȓ ṯsawent war ḏin tiȓi bu can nnaƹȓeṯ. Lƹarc n Arebbi ḏ yizmar aḏ yiȓi ḏi ṯendint, aṯ ƹebḏen lƹibad nnes.
4 Aḏ ẓren aɣembub nnes, isem nnes aqa-ṯ x ṯenyarṯa nsen.
5 Zi ssin aȓ ṯsawent war ḏin tiȓi bu ǧiȓeṯ, war teḥḏijin ṯfawṯ n ȓefnar niɣ ṯfawṯ n ṯfucṯ ȓaḥeqqac Siḏ Arebbi axasen igg ṯfawṯ. Aḏ ḥekmen i ȓebda n ȓebdaṯ.
Siḏna Ƹisa itas-d
6 Ṯenna-ayi lmalaʼika: "Awaȓen-a ḏaysen ȓaman niṯni ḏ ȓḥaqq. Arebbi netta ḏ Mawlana iy d isehwan lwaḥi x lʼanbiya, issekk-d lmalaʼika nnes ḥima aḏ tseḍhar i yinni iy ṯ iƹebbḏen min labud ƹȓayen aḏ iwqeƹ.
7 Aqa usiɣ-d, war tƹeṭṭȓeɣ ca! Ssaƹḏ n yinni iteggen array i wawaȓen-a n lwaḥi ḏi lkitab-a."
8 Ḏ nec Yuḥanna, sȓiɣ ẓriɣ ṯimesȓayin-a. Wami sȓiɣ ẓriɣ, wḍiɣ ɣar iḍaren n lmalaʼika iy ḏayi iseḍharen ṯimesȓayin-a aḏas sejjḏeɣ.
9 Ṯenna-ayi: "Lla! Nec ḏ ȓƹabḏ amecnaw cek, amecnaw ayṯmac lʼanbiya ḏ marra yinni teggen array i wawaȓen n lkitab-a. Sejjeḏ-as i Arebbi."
10 Ṯenna-ayi: "War snuffar ca awaȓen-a n lwaḥi ḏi lkitab-a, ȓaḥeqqac ȓweqṯ ṯuḏes-d.
11 Wenni war iǧin bu nican aḏ iqqim maci nican. Wenni iǧan ḏ aƹeffan aḏ iqqim ḏ aƹeffan. Wenni iǧan nican aḏ iqqim nican. Wenni iǧan iṣfa aḏ iqqim iṣfa."
12 Inna Ƹisa : "Aqa usiɣ-d, war tƹeṭṭȓeɣ ca! Aḏ d awiɣ texȓiseṯ, aḏ jaziɣ kuȓ ijjen ƹlaḥsab ȓexḏayem nnes.
13 Nec ḏ lʼalif nec ḏ lya, ḏ amezwaru ḏ aneggaru. Kuȓci zzayi ig ibḏa, kuȓci zzayi iy ɣa ikemmeȓ.
14 Ssaƹḏ n yinni itṣebbanen ičammiren nsen, aɣarsen yiȓi ȓḥaqq ḏi ṯcejjarṯ n ṯuḏarṯ aḏ aḏfen ṯandint zi ṯewwura nnes.
15 Ɣar barra n ṯendint tiȓin ḏinni iqzinen ḏ iseḥḥaren ḏ yinni ifessden ḏ yinni ineqqen iwḏan ḏ yinni iƹebbḏen lʼaṣnam ḏ marra yinni isxerriqen texsen ixarriqen.
16 Ḏ nec Ƹisa ssekkeɣ-d lmalaʼika inu ḥima aḏawem ṯḥeddeṯ s ṯmesȓayin-a ḏi ṯjumaƹ n ȓmuminin. Nec ḏ lʼaṣel n Dawud u zi ddurriṯ nnes. Nec ḏ iṯri n ȓefjar itcƹeciƹen."
17 Arruḥ ḏ ṯsȓiṯ qqaren: "Araḥ-d!" Wenni itsȓan aḏ yini: "Araḥ-d!" Wenni ifuḏen aḏ d yas, wenni irezzun aman n ṯuḏarṯ aḏ isew baṭeȓ!
18 Cehhḏeɣ nec x marra yinni itsȓan i wawaȓen-a n lwaḥi ḏi lkitab-a: Wenni xasen ɣa irnin, aḏas irni Arebbi ḏi lmuṣibaṯ iy d yusin ḏi lkitab-a.
19 Wenni ɣa ikksen zeg wawaȓen-a n lwaḥi ḏi lkitab-a, aḏas ikkes Arebbi ȓḥaqq nnes zi ṯmesȓayin ig yurin ḏi lkitab-a, iƹni ȓḥaqq nnes zi ṯcejjarṯ n ṯuḏarṯ ḏ ȓḥaqq nnes zi ṯendint iqeddsen.
20 Iqqar Ƹisa, iƹni wenni ixebbaren x ṯmesȓayin-a: "Wah, aqa usiɣ-d, war tƹeṭṭȓeɣ ca!"
Amin, araḥ-d a Siḏna Ƹisa.
21 Aḏ yiȓi arḍa n Siḏna Ƹisa akeḏ kuȓ ijjen.