Yahuḏa
Ṯabrat ɣar ȓmuminin zi Yahuḏa umas n Ƹisa zeg yemmas
Lmuqaddima
1
1 Nec ḏ Yahuḏa ḏ axeddam n Ƹisa Lmasiḥ, nec ḏ umas n Yaƹqub. Tariɣ ṯabrat-a i yinni iy d itwaȓaɣan, itḥibb-iṯen Arebbi Babaṯneɣ, iḥeṭṭa-ṯen Ƹisa Lmasiḥ.
2 Aḏaywem ṯmerni arraḥmeṯ ḏ ȓehna ḏ ȓemḥibbeṯ s waṭṭas.
Lƹiqab x yinni itarran ixef nsen ḏ imseȓmaḏen
3 Ay imƹizzen inu, tuɣa rzuɣ aḏawem ariɣ x ubriḏ nni iy zi nnejjem neccin iy ḏi ncarrec marra, walakin ufiɣ u labud aḏawem ariɣ ṭṭalab-a ḥima aḏ tmenɣem x lʼiman-a iy zi twakellfen ṣṣaliḥin ḏeg yijjen n ṯwaȓa i ȓebda.
4 Aqa ca iṯarrasen uḏfen-d jarawem war ḏasen d ṯarrim bu ȓexbar, qa lƹiqab nsen yura xas mecḥaȓ zeg wami. Yina ƹeṣṣan Arebbi, sƹewwajen arḍa nnes bac aɣarsen yiȓi am can n ttesriḥ n ccehweṯ. Nekkaren Ƹisa Lmasiḥ iy iǧan ḏ Mawlana nneɣ qa netta ḏ Siḏiṯneɣ waḥḏes.
5 Waxxa ssneɣ belli ṯessnem manaya, xseɣ akenniw sfekkareɣ mliḥ belli Siḏiṯneɣ ifekk ccaƹb nnes zi Miṣra, walakin menbaƹd yinni war yuminen ca imḥa-ṯen qaƹ.
6 Ammu ƹaweḏ iweqƹen i lmalaʼikaṯ nni iy yugin aḏ qqiment ḏi lmarṭaba nsent n ssulṭa semḥent ƹaweḏ ḏi ṯzeddiɣṯ nsent. Min ḏasent igga? Iqqen-iṯent s snaseȓ nni war ifennin ca ƹemmarṣ, ibelleƹ xasent ḏeg yijjen n ṯaǧest ḏ ṯabercant aȓ Lƹiqab n Nhar nni Ameqqran.
7 Ammu ƹaweḏ iy ggin imezḏag ḏi ṯendint nni n Sadum ḏ ṯendint nni n Ƹamura ḏ ibilajen nni iy ḏasent-id innḍen. Sellmen ixef nsen i lfasad ḏ ccehweṯ nni maci ṭṭabiƹi. Iƹni niṯni aqaṯen ḏinni ḏ lƹibra, twaƹaqben s yijjen n lƹiqab n ṯmessi war ifennin ca ƹemmarṣ.
8 Ammu ƹaweḏ iṯarrasen-a. Ƹlaḥsab ṯirja nsen sexnazen ddat nsen, nekkaren ssulṭa, qqaren awaȓen war iḥȓin x lmexluqaṯ n ujenna.
9 Walakin min igga lmalak ameqqran Mikaʼil wami imneɣ ak Ibȓis imnaqar akiḏes x ddat immuṯen n Musa? Waxxa ḏ Mikaʼil-a war izƹim ca aḏ yini ca n wawaȓ war iḥȓin x Ibȓis, yenna-as cek ac inha Siḏi Arebbi!
10 Walakin iṯarrasen-a yina ssawaȓen s wawaȓ war iḥȓin x marra min war fehhmen ca. Ṯimesȓayin-a umi fehhmen iwa fehhmen-ṯent s ṭṭabiƹa nsen waha, niṯni ggin am ȓuḥuc iqefȓen. Ṯimesȓayin-a ḏ niṯenti iy ṯen ɣa imḥan!
11 Ya ȓefḍiḥeṯ nsen! Tebƹen abriḏ nni n Qabil. Semḥen ḏeg yixef nsen ḍemƹen ḏi tmenyaṯ gguren ḏi lɣaleṭ n Balƹam. Fnan ḏi lḥirak nni n Quraḥ wami iƹarreḍ i Musa.
12 Iṯarrasen-a yina twessaxen imensiwen nwem n ṯemƹacarṯ. Tetten akiḏwem bȓa ma aḏ seḏḥan, niṯni ggin am ca n imeksawen iy ƹettqen ixef nsen waha. Niṯni ḏ iseynuṯen bȓa yanzar ɣir itawi-ṯen arriḥ itarra-ṯen. Niṯni ggin am ṯcejjura ḏi ȓexȓif war itarwen ca, tneqȓaƹent-id zeg izewran nsent; iƹni ibriḏen nsent mmuṯen s ṯnayen.
13 Niṯni ggin am ȓemwaj n ȓebḥar ccaṯent s ȓefḍiḥeṯ n ukuffu nsent. Niṯni ggin am can iṯȓan iffɣen zeg umcan nsen gguren ɣar yijjen n ṯaǧest ḏ ṯabercant ig itwaswejḏen i ȓebda n ȓebdaṯ.
14 Fa Axnux wenni ig iǧan ḏ ayyaw n Adam zi jeddiṯwem wis sebƹaa netta iƹȓem ijjen n wawaȓ zi Arebbi inna-ṯ x iṯarrasen-a: "Xzareṯ, aqa yusa-d Siḏiṯneɣ s waȓaf n uȓufaṯ n imqeddsen nnes
15 aḏ iḥaseb marra iwḏan. Marra yinni iƹeṣṣan aḏasen d ismeḍhar kulci ȓefƹayeȓ nsen ṯiƹeffanin iy ggin ḏeg ubriḏ nsen aƹeffan, aḏ ssnen ƹaweḏ marra awaȓen nni war iḥȓin iy xas nnan yinni iƹeṣṣan war tdeffiren ca Arebbi."
16 Cuf, iṯarrasen-a tceṯcan waha, tentaqaḏen x midden, niṯni ḏeffaren ccehawaṯ nsen ṯiƹeffanin; Semɣaren ixef nsen s uqemmum nsen, tsȓehhan iwḏan bac aḏ neffƹen ixef nsen.
17 Fa kenniw ay imƹizzen inu, fekkareṯ min nnan zi qbeȓ arrusul n Siḏiṯneɣ Ƹisa Lmasiḥ.
18 Nnan-awem: "Ḏi ȓiyyamaṯ nni ineggura aḏ iȓin mujudin yinni iḏeḥḥcen x yiwḏan, ḏeffaren ccehawaṯ nsen ṯiƹeffanin waha."
19 Iwa niṯni ḏ yina iy kenniw ifarrqen, ḏaysen arruḥ n ddunect-a waha war ḏaysen ca Arruḥ iqeddsen.
20 Kenniw ay imƹizzen inu, bnaṯ ixef nwem ḏi dsas n lʼiman yuƹȓan iy iǧan ḏaywem, ẓaǧem s Arruḥ iqeddsen.
21 Itxeṣṣa aḏ teqqimem ḏi ȓemḥibbeṯ n Arebbi aḏ trajam arraḥmeṯ nni n Siḏiṯneɣ Ƹisa Lmasiḥ ṯenni iy kenniw itawin ɣar ṯuḏarṯ nni war ifennin ca ƹemmarṣ.
22 Sxeḏmeṯ lḥanana ak yinni itcekkan.
23 Fekkeṯ inneɣni, jebḏem-ṯen-d zi ṯmessi. Inneɣni sbiyynem-asen-d arraḥmeṯ ṯemxelleṭ ak ṯiggwḏi iƹni aḏ tƹiffem uȓa ḏ arruḍ nsen ig ixenzen s ṭṭabiƹa nsen ṯaƹeffant.
Lxitam n ṯebrat-a
24 Fa wenni izemmaren akenniw iḥḍa bac war tneḏȓifem ca, izemmar ƹaweḏ akenniw iqeddem ɣar zzaṯ nnes lƹaḍim aḏ tiȓim bȓa ȓƹib aɣarwem ṯiȓi ijjen n ȓefraḥeṯ ḏ ṯameqqrant,
25 iƹni Arebbi wenni iǧan waḥḏes isenjam-aneɣ. Aɣares ṯiȓi lƹaḍama ḏ ṯuƹȓat ḏ lquwwa ḏ ssulṭa s Ƹisa Lmasiḥ Siḏiṯneɣ iƹni qbeȓ i marra zmanaṯ iy iƹḏun u ḏ ȓexxu u ḏ ȓebda n ȓebdaṯ. Amin.