Lwaḥi
Lwaḥi n Arrasul Yuḥanna
Lwaḥi iy d iwḥa Siḏna Ƹisa Lmasiḥ
1
1 Wa ḏ lwaḥi n Ƹisa Lmasiḥ. Yuca-as-ṯ Arebbi ḥima aṯ iseḍhar i yinni iy ṯ iƹebbḏen. Manaya labud ƹȓayen aḏ iwqeƹ. Lmasiḥ issekk lmalaʼika nnes ḥima aḏ ixbar manaya i ȓƹabḏ nnes Yuḥanna.
2 U netta ḏ ccaheḏ x marra min iẓra, iƹni x wawaȓ n Arebbi ḏ min xef icheḏ Ƹisa Lmasiḥ.
3 Ssaƹḏ n wenni itṭalaƹen awaȓen n lwaḥi-ya. Ssaƹḏ n yinni itsȓan iteggen array s min yurin ḏi lkitab-a, ȓaḥeqqac ȓweqṯ ṯqarreb-d.
Yuḥanna itseǧam x sebƹa n ṯjumaƹ n ȓmuminin
4 Zi Yuḥanna ɣar sebƹa n ṯjumaƹ n ȓmuminin ḏi Asya. Akiḏwem yiȓi arḍa ḏ ȓehna zi wenni iǧan, tuɣa iǧa, aḏ d yas, u zi sebƹa n arruḥaṯ ig iǧan zzaṯ i lƹarc nnes,
5 u zi Ƹisa Lmasiḥ, netta ḏ ccaheḏ ḏayes ȓaman. Netta iy d ixeȓqen ḏ amezwaru n yinni d ikkaren zi ȓmewṯ, iḥekkem x izeǧiḏen n ṯmurṯ. Iḥibb-aneɣ, ifekk-aneɣ zi ȓmuƹṣiyaṯ nneɣ s iḏammena nnes.
6 Igga zzayneɣ ij n lmemlaka, ḏ ȓfuqha i Arebbi Babas. Lƹaḍama ḏ ȓeḥkam i netta i ȓebda, amin.
7 Aqa yusa-d ak useynu,
aṯ ẓrent marra ṯiṭṭawin,
ḏ yiwḏan iy ṯ icukken.
Axas ḥeznen marra ȓqum n ṯmurṯ.
Wah, amin.
8 Iqqar Siḏi Arebbi: "Nec ḏ lʼalif nec ḏ lya." Netta ig iǧan, netta tuɣa iǧan, netta iy d ɣa yasen, iy izemmren i kuȓci.
Arrasul Yuḥanna iẓerr Siḏna Ƹisa ḏi lwaḥi
9 Nec ḏ Yuḥanna ḏ umaṯwem. Nec ḏ acric nwem ḏi ȓemḥayen ḏ ȓmulk n Arebbi ḏ ṣbar iǧan ḏi Ƹisa. Tuɣa ǧiɣ ḏi ṯeyzirṯ umi qqaren Baṭmus, ƹlaḥsab awaȓ n Arebbi ḏ min xef icheḏ Ƹisa.
10 Ḏi nhar n Siḏiṯneɣ iḥwa-d xafi Arruḥ n Arebbi, sȓiɣ ɣar ḏeffar inu ij n ṯmijja s jjehḏ amecnaw ṣṣut n zzammar.
11 Ṯeqqar-ayi: "Ari ḏi lkitab min twaȓiḏ, sekk-iṯ ɣar sebƹa n ṯjumaƹ n ȓmuminin ḏi ṯendint n Ufasus, ḏ Smirna, ḏ Barɣamus, ḏ Ṯiyatra, ḏ Sardis, ḏ Filadalfya, ḏ Lawdikya."
12 Nqeȓbeɣ aḏ xzareɣ ɣar ṯmijja nni iy kiḏi issawaȓen. Wami nqeȓbeɣ ẓriɣ sebƹa n ȓeqnadeȓ n dheb.
13 Ḏi ȓwesṭ n ȓeqnadeȓ nni ḏinni ijjen itcabbah ḏi mmis n bnaḏem, ɣares čammir ḏ azeyraȓ ḥetta aȓ iḍaren. Ɣares ij n uḥezzamb n dheb iqḍeƹ-d zeg uɣiȓ ɣar nneṣṣ.
14 Acewwaf n uzeǧif nnes ḏ acemȓaȓ am ṯaḍufṯ niɣ am uḏfeȓ. Ṯiṭṭawin nnes amecnaw ḥaḏuq n ṯmessi.
15 Iḍaren nnes tceƹciƹen amecnaw nneḥḥas iṣfan iy d iffɣen zi ȓkuceṯ, ṯmijja nnes amecnaw ṣṣut n waṭṭas n waman.
16 Ɣares ḏeg ufus nnes afusi sebƹa n yiṯran. Aqemmum nnes iteffeɣ-d zzayes ij n ssif iqḍeƹ x ṯnayen n jjihaṯ. Aɣembub nnes amecnaw nnur n ṯfuct iy itceƹciƹen aṭṭas.
17 Wami ṯ ẓriɣ uḍiɣ-as ɣar iḍaren nnes axmi mmuṯeɣ. Isers xafi fus nnes afusi inna-ayi: "War teggweḏ ca! Nec ḏ amezwaru ḏ aneggaru.
18 Nec ḏ wenni iddaren. Tuɣa mmuṯeɣ, aqa nec ddareɣ i ȓebda n ȓebdaṯ. Ɣari ȓemfataḥ n ȓmewṯ ḏ Lʼaxira.
19 Ari min ṯeẓriḏ ḏ min itewqiƹen ȓexxu, ḏ min ɣa iweqƹen ssa aȓ ṯsawent.
20 Ḏ wa ḏ ȓmaƹna inuffren n sebƹa n yiṯran nni iy ṯeẓriḏ ḏeg ufus inu afusi, ḏ sebƹa nni n ȓeqnadeȓ. Iƹni, sebƹa n yiṯran nni, niṯni ḏ sebƹa n lmalaʼikaṯ n ṯjumaƹ n ȓmuminin. Iƹni, sebƹa n ȓeqnadeȓ nni, niṯni ḏ sebƹa n ṯjumaƹ n ȓmuminin".