Ṯabrat i jmaƹṯ n ȓmuminin ḏi ṯendint n Ufasus
2
1 "Ari i lmalaʼika n jmaƹṯ n ȓmuminin ḏi ṯendint n Ufasus, ini-yas: Wenni iṭṭfen sebƹa n yiṯran ḏeg ufus nnes afusi, ig igguren ḏi ȓwesṭ n sebƹa n ȓeqnadeȓ n dheb, iqqar-ac:
2 Nec ssneɣ ȓexḏayem nnec, ḏ tamara nnec, ḏ ṣbar nnec. Ssneɣ cek war ṯqebbȓeḏ yinni iǧan ḏ iƹeffanan, ṯjarrbeḏ yinni iqqaren neccin ḏ arrusul, maca lla, ṯufiḏ-ṯen sxerriqen.
3 Ṯeṣbareḏ, ṯeysiḏ tamara x ȓesbab n yisem inu bȓa ma taḥȓeḏ.
4 Maca ƹeyybeɣ xak wami ṯsemḥeḏ ḏi ȓemḥibbeṯ nnec ṯamezwarut.
5 Fekkar cḥaȓ ṯɣelṭeḏ, tub, egg ȓexḏayem nnec ṯimezwura. Meȓa ṯugiḏ aḏ tubeḏ, aḏ d aseɣ ɣarek aḏ ysiɣ ȓqendiȓ nnec zeg umcan nnes.
6 Maca ṯeggiḏ mliḥ wami ṯƹiffeḏ ȓexḏayem n inikulaṯen iy ƹiffeɣ uȓa ḏ nec.
7 Ṣenneṭ mliḥ, a wenni itsȓan i min iqqar Arruḥ n Arebbi i ṯjumaƹ n ȓmuminin. Wen ɣa irebḥen, aḏas uceɣ aḏ icc zi ṯcejjarṯ n ṯuḏarṯ iǧan ḏi jjenneṯ n Arebbi.
Ṯabrat i jmaƹṯ n ȓmuminin ḏi ṯendint n Smirna
8 Ari i lmalaʼika n jmaƹṯ n ȓmuminin ḏi ṯendint n Smirna, ini-yas: Wenni iǧan ḏ amezwaru uȓa ḏ aneggaru,a immuṯ uca ikkar-d zi ȓmewṯ, iqqar-ac:
9 Nec ssneɣ ȓemḥayen nnec, cek ḏ ȓmeskin, waxxa cek ḏ ttajar. Ssneɣ ȓbaṭeȓ iy xawem qqaren yinni iḥessben ixef nsen zi Ayṯ-Israʼil. Lla, war ǧin bu zi Ayṯ-Israʼil; niṯni ḏ jmaƹṯ ig iƹebbḏen Cciṭan.
10 War teggweḏ ca mammec ɣa ṯƹeddbeḏ. Aqa Ibȓis aḏ isiḏef ȓebƹaḍ zzaywem ḏi ȓeḥbes ḥima aḏ twajarrbem. Aḏ tseƹḏum ȓemḥayen ḏi ƹecra iyyam. Siɣi ḏi lʼiman nnec waxxa ac nɣen, aḏac uceɣ ttaj n ṯuḏarṯ.
11 Ṣenneṭ mliḥ, a wenni itsȓan i min iqqar Arruḥ n Arebbi i ṯjumaƹ n ȓmuminin. Wen ɣa irebḥen, war ṯ itḍarri ca ȓmewṯ wis ṯnayen.
Ṯabrat i jmaƹṯ n ȓmuminin ḏi ṯendint n Barɣamus
12 Ari i lmalaʼika n jmaƹṯ n ȓmuminin ḏi ṯendint n Barɣamus, ini-yas: Wenni ɣar iǧa ssif iqḍeƹ x ṯnayen n jjihaṯ, iqqar-ac:
13 Nec ssneɣ mani ṯzeddɣeḏ, ḏinni lƹarc n Cciṭan. Cek ṯeṭṭfeḏ ḏeg yisem inu. War ṯenkareḏ ca l'iman inu, waxxa ḏeg wussan iy ḏi nɣin ij n ccaheḏ inu ḏayes ȓaman qqaren-as Antipas. Nɣin-ṯ zzaṯwem mani izeddeɣ Cciṭan.
14 Maca ƹeyybeɣ xak x can ṯmesȓayin wami akiḏec iwḏan iy tbaƹen aseȓmaḏ n Balƹam. Netta tuɣa iseȓmaḏ-as i Barak mammec ɣa igg ṯaxcebṯ i Ayṯ-Israʼil bac aḏ ccen dbiḥeṯ itqeddamen i lʼaṣnam, aḏ fesḏen.
15 Ƹaweḏ akiḏec can yiwḏan iy tbaƹen aseȓmaḏ n inikulaṯen.
16 Tub, meȓa lla, aḏ d aseɣ ɣarek war tƹeṭṭȓeɣ ca, aḏ ḥarbeɣ iwḏan-a s ssif iy d iteffɣen zeg uqemmum inu.
17 Ṣenneṭ mliḥ, a wenni itsȓan i min iqqar Arruḥ n Arebbi i ṯjumaƹ n ȓmuminin. Wen ɣa irebḥen, aḏas uceɣ aḏ icc aɣrum n lmanna itwasnuffren. Aḏas uceɣ azru ḏ acemȓaȓ yura ḏayes ij n yisem ḏ jḏiḏ war ṯ issin uȓa ḏ ijjen illa wenni iy ṯ iysin.
Ṯabrat i jmaƹṯ n ȓmuminin ḏi ṯendint n Ṯiyatra
18 Ari i lmalaʼika n jmaƹṯ n ȓmuminin ḏi ṯendint n Ṯiyatra, ini-yas: Wenni iǧan ḏ Mmis n Arebbi, ṯiṭṭawin nnes amecnaw ḥaḏuq n ṯmessi, iḍaren nnes amecnaw nneḥḥas iṣfan, iqqar-ac:
19 Nec ssneɣ ȓexḏayem nnec, ḏ ȓemḥibbeṯ nnec, ḏ lʼiman nnec, ḏ ṣbar nnec, ȓexḏayem nnec ṯineggura ktar zi ṯinni ṯimezwura.
20 Maca ƹeyybeɣ xak wami ṯejjiḏ Izabil ṯamɣarṯ ig itarren ixef nnes nnabiya. Ṯxeddeƹ lƹibad inu, ṯseȓmaḏ-asen aḏ fesḏen, aḏ ccen zi dbiḥeṯ itqeddamen i l'aṣnam.
21 Uciɣ-as ȓweqṯ ḥima aḏ ttub zi lfasad, maca ṯugi aḏ ttub.
22 X manayenni at neḍreɣ ḏi ṯassuṯ n ȓeḥȓiq, yinni akis iznan aḏ iȓin ḏi ȓemḥayen meȓa war tuben zi ȓefƹayeȓ nsen.
23 Aḏ nɣeɣ ṯarwa nnes. Aḏ ssnen marra ṯijumaƹ n ȓmuminin belli nec ig itwaȓan min ḏayes ḏi ȓaƹqeȓ ḏ wuȓ. I kuȓ ijjen zzaywem aḏas uceɣ ƹlaḥsab ȓexḏayem nnes.
24 Amma kenniw nneḍnit ḏi Ṯiyatra war ṯeqbiȓem ca aseȓmaḏ-a, war ṯessinem ca umi qqaren niṯni "lʼasrar yuǧɣen n Cciṭan". Qqareɣ-awem nec war xawem teggeɣ bu can dqeȓ nneḍnit.
25 Innama, lʼiman nwem ṭṭfem ḏayes mliḥ aȓ ɣa d aseɣ.
26-27 Wen ɣa irebḥen ḏ wenni ɣa iṣbaren ḏi ȓxeḏmeṯ inu ḥetta aȓ uneggar aḏas uceɣ ssulṭa x ȓegnus, amec ḏayi immucen nec zi Baba: Aṯen irwes s uƹekkaz n ȓeḥḏiḏ, aṯen irez am iqnucen ucaȓ.
28 Aḏas uceɣ iṯri n ȓefjar.
29 Ṣenneṭ mliḥ, a wenni itsȓan i min iqqar Arruḥ n Arebbi i ṯjumaƹ n ȓmuminin."