Ṯabrat i jmaƹṯ n ȓmuminin ḏi ṯendint n Sardis
3
1 "Ari i lmalaʼika n jmaƹṯ n ȓmuminin ḏi ṯendint n Sardis, ini-yas: Wenni ɣar iǧan sebƹa n arruḥaṯ n Arebbi ḏ sebƹa n yiṯran, iqqar-ac: Nec ssneɣ ȓexḏayem nnec. Qqaren qa ṯeddareḏ, maca cek ṯemmuṯeḏ.
2 Iȓi ƹlabal, egg jjehḏ ḏi min ḏayec iqqimen qbeȓ ma aḏ immeṯ. Nec ufiɣ ȓexḏayem nnec war kemmȓent ca zzaṯ i Arebbi inu.
3 Ƹqeȓ x useȓmaḏ iy ṯqebȓeḏ wami ḏas ṯesȓiḏ. Xḏem zzayes, tub. Meȓa war ṯeǧiḏ ƹlabal aɣarek d aseɣ amecnaw aceffar, war ṯessineḏ man ṯsaƹat iy ɣa d aseɣ.
4 Ɣarek akiḏec ȓebƹaḍ n yiwḏan ḏi Sardis war wesxen ca arruḍ nsen, akiḏi uyuren s warruḍ ḏ acemȓaȓ minzi sḏaheǧen.
5 Wenni ɣa irebḥen aḏas ggen arruḍ ḏ acemȓaȓ. Ƹemmarṣ aḏ mesḥeɣ isem nnes zi Lkitab n Ṯuḏarṯ, axas cehḏeɣ zzaṯ i Baba ḏ lmalaʼikaṯ nnes.
6 Ṣenneṭ mliḥ, a wenni itsȓan i min iqqar Arruḥ n Arebbi i ṯjumaƹ n ȓmuminin.
Ṯabrat i jmaƹṯ n ȓmuminin ḏi ṯendint n Filadalfya
7 Ari i lmalaʼika n jmaƹṯ n ȓmuminin ḏi ṯendint n Filadalfya, ini-yas: Wenni iṣfan, netta ḏ ȓḥaqq, ɣares ȓmeftaḥ n Dawud, meȓa irzem netta war itbelliƹ ḥadd, meȓa ibelleƹ netta war irezzem ḥadd, iqqar-ac:
8 Nec ssneɣ ȓexḏayem nnec. Aqa ggiɣ ij n ṯewwarṯ zzaṯec twarzem war izemmer ḥadd at ibelleƹ. Waxxa jjehḏ nnec ḏ uqlil ṯeggiḏ array i wawaȓ inu war ṯenkareḏ ca isem inu.
9 Aqa yinni zi jmaƹṯ iy iƹebbḏen Cciṭan, iḥessben ixef nsen zi Ayṯ-Israʼil, maca war ǧin bu zi Ayṯ-Israʼil, sxerriqen. Aṯen arreɣ aḏ d asen aḏ sejjḏen ɣar iḍaren nnec s bezzez aḏ ssnen nec ḥibbeɣ-cek.
10 Ṯeṣbareḏ mamc cek weṣṣiɣ, x manaya ac ḥemmiɣ zi ṯsaƹat n ȓemḥayen iy ɣa d ihwan x marra ddunect ḥima imezḏaɣ n ṯmurṯ aḏ twajarrben s ȓemḥayen.
11 Aqa usiɣ-d, war tƹeṭṭȓeɣ ca. Ṭṭef ḏi lʼiman nnec ḥima war d itis ḥadd aḏac iysi ttaj nnec.
12 Aḏ sbeddeɣ wenni irebḥen am upilar ḏi ṯemziḏa ṯameqqrant n Arebbi inu, aḏ iqqim i ȓebda. Axas ariɣ isem n Arebbi inu ḏ yisem n ṯendint n Arebbi inu, iƹni Lquds n jḏiḏ iy d ɣa ihwan zeg ujenna zi Arebbi inu. Axas ariɣ isem inu n jḏiḏ.
13 Ṣenneṭ mliḥ, a wenni itsȓan i min iqqar Arruḥ n Arebbi i ṯjumaƹ n ȓmuminin.
Ṯabrat i jmaƹṯ n ȓmuminin ḏi ṯendint n Lawdikya
14 Ari i lmalaʼika n jmaƹṯ n ȓmuminin ḏi ṯendint n Lawdikya, ini-yas: Wenni umi qqaren Amin, ḏ ccaheḏ ḏayes ȓaman ḏ ȓḥaqq, zzayes ixȓeq Arebbi marra, iqqar-ac:
15 Nec ssneɣ ȓexḏayem nnec. Ssneɣ belli cek war ṯsemḍeḏ war ṯeḥmiḏ, tmenniɣ aḏ tiȓiḏ ṯsemḍeḏ niɣ ṯeḥmiḏ!
16 Acek d ƹuqqeɣ zeg uqemmum inu ȓaḥeqqac ṯemȓuḏiḏ war ṯeḥmiḏ war ṯsemḍeḏ.
17 Cek ṯeqqareḏ nec ḏ ttajar, ggiɣ aṭṭas n wagȓa, war ḥḏijeɣ walu. War ṯessineḏ cek ḏ amqeṭṭaƹ ḏ ameɣbun, ḏ imesƹi, ḏ aḏarɣaȓ, ḏ aƹeryan.
18 Neṣḥeɣ-cek axafi ṯesɣeḏ dheb itwaṣfan s ṯmessi ḥima aḏ tdewȓeḏ ḏ ttajar. Seɣ ƹaweḏ arruḍ ḏ acemȓaȓ ḥima aḏ tesreḍ ixef nnec zi ṯuƹaryant, ḏ can dwa ḥima aḏ tesgenfiḏ ṯiṭṭawin nnec aḏ tdewȓeḏ twaȓiḏ.
19 Nec trebbiɣ nehhiɣ kulci wen tḥibbiɣ. Sejheḏ lʼiman nnec, tub.
20 Ha nec beddeɣ zzaṯ i ṯewwarṯ sqerqubeɣ. Meȓa isȓa can ijjen i ṯmijja inu irzem ṯawwarṯ, aɣares aḏfeɣ akiḏes cceɣ, akiḏi icc.
21 Wenni ɣa irebḥen aṯ jjeɣ aḏ iqqim akiḏi x lƹarc inu, am rebḥeɣ uȓa ḏ nec, qqimeɣ ak Baba x lƹarc nnes.
22 Ṣenneṭ mliḥ, a wenni itsȓan i min iqqar Arruḥ n Arebbi i ṯjumaƹ n ȓmuminin.