Arebbi itɣima x Lƹarc nnes ḏeg ujenna
4
1 Menbaƹd i manaya ẓriɣ ij n ṯewwarṯ ṯnurzem ḏeg ujenna, sȓiɣ i ṯmijja iy ɣari d issiwȓen qbeȓ amecnaw zzammar, ṯenna-ayi: "Gaƹƹeḏ-d ḏanita aḏac seḍhareɣ min labud aḏ iwqeƹ menbaƹd i manaya."
2 Ȓxeddnni iḥwa-d xafi Arruḥ n Arebbi, imeḍhar-d ḏinni ij n lƹarc ḏeg ujenna iqqim xas ijjen.
3 Wenni xas iqqimen itwaḍhar-d amecnaw ṯazrut n lyaceb ḏ lƹaqiq azeggwaɣ. Ij n ṯesȓiṯ n unẓar ṯenneḍ i lƹarc, twaḍhar-d amecnaw ṯazrut ṯazeyza n zzumurrud.
4 Nnḍen-as-d i lƹarc arbeƹa u ƹicrin n lƹarcaṯ, xasen arbeƹa u ƹicrin n imɣaren, ggin arruḍ ḏ acemȓaȓ, x uzeǧif nsen ttaj n dheb.
5 Iteffeɣ-d zi lƹarc wassama ḏ iɣuyan ḏ wajjaj. Zzaṯ i lƹarc sebƹa n isfeḍawen n ṯmessi ceƹƹȓen. Yina ḏ sebƹa n arruḥaṯ n Arebbi.
6 Zzaṯ i lƹarc ḏinni amecnaw ȓebḥar n jjaj iṣfa aṭṭas. Ḏin arbeƹa n lmexluqaṯ iddaren ḏi ȓwesṭ, nnḍen i lƹarc ɣarsen ṯiṭṭawin ɣar zzaṯ ḏ ḏeffar.
7 Lmexluq wis waḥit itcabbah ḏi ssbaƹ.b Lmexluq wis ṯnayen itcabbah ḏeg uyenduz. Lmexluq wis ṯȓaṯa ɣares aɣembub amecnaw bnaḏem. Lmexluq wis arbeƹa itcabbah ḏi nser iṭṭawen.
8 Kuȓ ijjen zi lmexluqaṯ nni ɣares setta n wafriwen, kuȓ afriw iccur s ṯiṭṭawin x jjihetayen. Qqaren ǧiȓeṯ ḏ nhar bȓa ma aḏ bedden:
"Iṣfa, iṣfa, iṣfa, Siḏi Arebbi izemmren i kuȓci.
Netta ḏ wenni iy tuɣa iǧan, ḏ wenni iy iǧan,
ḏ wenni iy d ɣa yasen."
9 Lmexluqaṯ nni, kuȓ ṯwaȓa semɣaren, tweqqaren, ḥemmḏen wenni iqqimen x lƹarc ig iddaren i ȓebda n ȓebdaṯ,
10 uca arbeƹa u ƹicrin n imɣaren nni trekkaƹen-as i wenni iqqimen x lƹarc, tsejjaḏen i wenni iddaren i ȓebda n ȓebdaṯ, ineṭṭer kuȓ ijjen zzaysen ttaj nnes zzaṯ i lƹarc, qqaren:
11 "A Mawlana, a Siḏi Arebbi nneɣ,
ḏ cek iy isḏaheǧen lƹaḍama ḏ uweqqar ḏ jjehḏ,
ȓaḥeqqac ṯxeȓqeḏ kuȓci,
s ȓxaḍar nnec twaxeȓqen-d, aqa ǧan."