Siḏna Ƹisa irezzem lkitab
5
1 Ẓriɣ ḏeg ufus afusi n wenni iqqimen x lƹarc ij n lkitab yura ɣar barra ḏ ḏaxeȓ, icemmeƹ sebƹa marraṯ.
2 Ẓriɣ ij n lmalaʼika ṯejheḏ tȓaɣa s jjehḏ: "Wi ɣa iǧa ȓḥaqq aḏ irzem lkitab aḏ ikkes icemmaƹen nnes?"
3 Uȓa ḏ ijjen deg ujenna uȓa ḏi ṯmurṯ uȓa swadday i ṯmurṯ war izemmer aḏ irzem lkitab niɣ aḏ ixzar min ḏayes.
4 Truɣ aṭṭas ȓaḥeqqac war ḏinni uȓa ḏ ijjen isḏaheǧ aḏ irzem lkitab aḏayes ixzar.
5 Inna-ayi ijjen zeg imɣaren nni: "War tru ca! Aqa irbeḥ ssbaƹ ig iǧan zi Ayṯ-Yahuḏa, zi lʼaṣel n Dawud. Netta ɣa irezmen lkitab aḏ ikkes icemmaƹen nni s sebƹa."
6 Ẓriɣ ḏinni ḏi ȓwesṭ n lƹarc, ḏi ȓwesṭ n lmexluqaṯ nni s arbeƹa ḏ imɣaren nni, ij n yizmar ibedd. Itban axmi ṯ nɣin. Ɣares sebƹa n waccawena ḏ sebƹa n ṯiṭṭawin. Niṯni ḏ sebƹa n arruḥaṯ n Arebbi ig issekk ɣar marra ddunect.
7 Yusa-d iysi lkitab zeg ufus afusi n wenni iqqimen x lƹarc.
8 Wami iysi lkitab, lmexluqaṯ nni s arbeƹa ḏ imɣaren nni s arbeƹa u ƹicrin sejjḏen-as i yizmar. Mkuȓ ijjen zzaysen ɣares tagembrit ḏ ṯmejmarin ggin-ṯent s dheb ƹemmarent s tbaxur, iƹni ḏ ṯẓaǧiṯ n ȓmuminin ṣaliḥin.
9 Tɣennajen ij n yizȓi ḏ jḏiḏ, qqaren:
"Cek iy isḏaheǧen aḏ teysiḏ lkitab
aḏ terzmeḏ icemmaƹen nnes,
ȓaḥeqqac twaɣarṣeḏ,
u ṯesnejmeḏ iwḏan i Arebbi s iḏammen nnec
zi mkuȓ ȓqum ḏ luɣa ḏ ccaƹb ḏ ȓgens.
10 Ṯeggiḏ zzaysen ij n lmemlaka n ȓfuqha i Arebbi nneɣ,
aḏ ḥekkmen ḏi ṯmurṯ."
11 Xzareɣ, sȓiɣ ṯmijja n waȓef n uȓufat ḏ milyun n milyunaṯ n lmalaʼikaṯ niṯenti nnḍent-as-d i lƹarc ḏ lmexluqaṯ ḏ imɣaren.
12 Qqarent s jjehḏ:
"Izmar itwanɣen isḏaheǧ
ṯizemmar ḏ wagȓa ḏ lḥikma ḏ jjehḏ
ḏ uweqqar ḏ lƹaḍama ḏ lḥamed."
13 Sȓiɣ i mkuȓ lmexluq ḏeg ujenna ḏ ṯmurṯ ḏ swadday i ṯmurṯ ḏ ȓebḥar ḏ marra min ḏaysen qqaren-asen i wenni iqqimen x lƹarc uȓa ḏ yizmar:
"Lḥamed ḏ uweqqar ḏ lƹaḍama ḏ ȓeḥkam i ȓebda n ȓebdaṯ!"
14 Lmexluqaṯ nni s arbeƹa qqaren: "Amin!" Rekƹen imɣaren nni sejjḏen.