Sebƹa n icemmaƹen
6
1 Ẓriɣ izmar nni irzem ijjen zi sebƹa n icemmaƹen nni, sȓiɣ ijjen zi arbeƹa nni n lmexluqaṯ ṯeqqar s jjehḏ amecnaw ajjaj: "Araḥ-d!"
2 Wami xzareɣ, twaȓiɣ ij n uyis ḏ acemȓaȓ, wenni xas inyin ɣares ij n neccab n fȓiča. Ucin-as ij n ttaj, iffeɣ irebbeḥ ḏi ȓḥarb u ƹaḏ aḏ irbeḥ.
3 Wami irzem yizmar acemmaƹ wis ṯnayen, sȓiɣ i lmexluq nni wis ṯnayen iqqar: "Araḥ-d!"
4 Iffeɣ-d ij n uyis ḏ azeggwaɣ, wenni xas inyin ucin-as aḏ ikkes ȓehna zi ṯmurṯ, aḏ nɣen yiwḏan ayawya. Ƹaweḏ ucin-as ij n ssif ḏ ameqqran.
5 Wami irzem yizmar acemmaƹ wis ṯȓaṯa, sȓiɣ lmexluq nni wis ṯȓaṯa iqqar: "Araḥ-d!" Wami xzareɣ, twaȓiɣ ij n uyis ḏ abercan, wenni xas inyin ɣares ȓmizan ḏeg ufus nnes.
6 Sȓiɣ amecnaw ij n ṯmijja ṯusa-d zi jjihet n arbeƹa n lmexluqaṯ nni, ṯeqqar: "Kilu n yirḏan iseggwa nhar ufeǧaḥ. Ṯȓaṯa kilu n imendi iseggwa nhar ufeǧaḥ. Maca zzect ḏ waman uḍiȓ war ṯen tḍeyyaƹ ca."
7 Wami irzem yizmar acemmaƹ wis arbeƹa, sȓiɣ lmexluq nni wis arbeƹa iqqar: "Araḥ-d!"
8 Wami xzareɣ, twaȓiɣ ij n uyis izeyzu, wenni xas inyin semman-as ȓmewṯ, iḏfar-iṯ Lʼaxira. Immuc-asen ssulṭa aḏ nɣen arbaƹ n imezḏaɣ n ṯmurṯ s ssif ḏ jjuƹ ḏ ȓehȓac ḏ ȓuḥuc n ṯmurṯ.
9 Wami irzem yizmar acemmaƹ wis xemsa, ẓriɣ swadday i ȓmeḏbaḥ buḥbeȓ n yinni itwanɣen x ȓesbab n wawaȓ n Arebbi ḏ chaḏeṯ iy cehḏen.
10 Snekkaren ṯɣuyyiṯ s jjehḏ, nnan: "Ya Mawlana, a wenni iṣfan iǧan ḏ ȓḥaqq, mečḥar ɣa ṯekkeḏ war ṯḥisibeḏ imezḏaɣ n ddunect, aṯen ṯƹeqqbeḏ x iḏammen nneɣ?"
11 Ȓxeddnnit immuc-asen marra, ij ij, čammir ḏ acemȓaȓ, itwanna-yasen aḏ teṣbarem ƹaḏ cwayt aȓ ɣa ikemmeȓ lƹadad nican n ayṯmaṯwem iy ɣa itwanɣen amecnaw kenniw, iƹni yinni iy iƹebbḏen am kenniw.
12 Ẓriɣ izmar irzem acemmaƹ wis setta, iwqeƹ ij n zzinzal ḏ ameqqran. Ṯfuct ṯeḏweȓ ḏ ṯabercant amecnaw ȓefḥam, ṯaziri ṯeḏweȓ amecnaw iḏammen.
13 Iṯran n ujenna wḍan-d ɣar ṯmurṯ amecnaw ṯazarṯ ṯweṭṭa zi ṯcejjarṯ xmi t isenhezza arriḥ ijehḏen.
14 Ajenna itwanejmeƹ amecnaw ij n ȓkitab itwabelleƹ. Iḏurar ḏ ṯeyzirin nhezzent marra zeg umcan nsent.
15 Izeǧiḏen n ṯmurṯ ḏ imeqqranen nsen ḏ arruyas n ȓƹaskar ḏ twajar ḏ yinni ijehḏen ḏ yinni ɣarsen bab nsen ḏ yinni ɣarsen lḥurriya nsen, marra tnuffaren ḏeg yifran ḏ jar yizra n iḏurar.
16 Niṯni qqaren i iḏurar ḏ yizra: "Wḍam xaneɣ, snuffarem-aneɣ zeg uɣembub n wenni iqqimen x lƹarc ḏ lƹiqab iy ɣa igg yizmar.
17 Aqa yiweḍ-d nhar ameqqran n lƹiqab nsen, ug izemmren aḏ ibedd?"