Arebbi iḍebbeƹ miyya u arbeƹa u arbeƹin aȓef n Ayṯ-Israʼil
7
1 Menbaƹd i manaya ẓriɣ arbeƹa n lmalaʼikaṯ beddent x arbeƹa n ṯɣemmura n ṯmurṯ, ṭṭfent arriḥ x arbeƹa n jjihaṯ n ṯmurṯ ḥima war itṣuḍ ḏi ȓbarr uȓa ḏi ȓebḥar uȓa ḏi ȓcejjur.
2 Ẓriɣ ij n lmalaʼika nneḍnit ṯgaƹƹeḏ-d zi ccarq ṯeysi-d ṭṭabaƹ n Arebbi iddaren, ṯȓaɣa s jjehḏ i arbeƹa n lmalaʼikaṯ nni umi mmucent jjehḏ ḥima aḏ ḍeyyƹent ȓbarr ḏ ȓebḥar.
3 Ṯenna-asent: "War tḍeyyaƹent ȓbarr uȓa ḏ ȓebḥar uȓa ḏ ȓcejjur ḥetta a neḍbaƹ ṯanyarṯa n yinni iƹebbḏen Arebbi."
4 Sȓiɣ i mecḥaȓ itwaḍebƹen: Miyya u arbeƹa u arbeƹin aȓef zi marra ṯiqebbaȓ n Ayṯ-Israʼil.
5 Ṯenƹac aȓef zi Ayṯ-Yahuḏa, ṯenƹac aȓef zi Ayṯ-Rabin, ṯenƹac aȓef zi Ayṯ-Jad,
6 ṯenƹac aȓef zi Ayṯ-Ƹacur, ṯenƹac aȓef zi Ayṯ-Naftali, ṯenƹac aȓef zi Ayṯ-Manasi,
7 ṯenƹac aȓef zi Ayṯ-Cimƹun, ṯenƹac aȓef zi Ayṯ-Lawi, ṯenƹac aȓef zi Ayṯ-Cakir,
8 ṯenƹac aȓef zi Ayṯ-Zafulun, ṯenƹac aȓef zi Ayṯ-Yusef, ṯenƹac aȓef zi Ayṯ-Benyamin.
Aṭṭas n ȓɣaci s warruḍ ḏ acemȓaȓ
9 Menbaƹd i manaya xzareɣ, twaȓiɣ aṭṭas n ȓɣaci bȓa ȓeḥsab zi mkuȓ ȓgens ḏ ȓqum ḏ ccaƹb ḏ luɣa, bedden zzaṯ i lƹarc ḏ zzaṯ i yizmar, ggin čammir ḏ acemȓaȓ, ḏeg ifassen nsen ṯaseṭṭa n tmar.
10 Snekkaren ṯɣuyyiṯ s jjehḏ qqaren: "Arebbi nneɣ ig iqqimen x lƹarc ḏ Yizmar ɣarsen ṯizemmar aḏ snejmen."
11 Marra lmalaʼikaṯ beddent nnḍent-id i lƹarc ḏ imɣaren ḏ arbeƹa n lmexluqaṯ. Hwant x uɣembub nsent zzaṯ i lƹarc sejjḏent i Arebbi,
12 qqarent: "Amin! Lḥamed ḏ lƹaḍama ḏ lḥikma ḏ ccuker ḏ uweqqar ḏ ṯizemmar ḏ jjehḏ i Arebbi nneɣ i ȓebda. Amin!"
13 Inna-ayi yijjen zeg imɣaren: "Ma ṯessneḏ min ƹnan yiwḏan-a iy ggin čammir ḏ acemȓaȓ? Ma ṯessneḏ manis d yusin?"
14 Jawbeɣ-ṯ: "Ḏ cek iy issnen, a Siḏi."
Inna-ayi: "Yina ḏ yinni inejmen zi ȓmaḥneṯ ṯameqqrant, ṣebbnen ičammiren nsen, arrin-ṯen ḏ icemȓaȓen s iḏammen n yizmar.
15 S manaya aqa-ṯen zzaṯ i lƹarc n Arebbi, ƹebbḏen-ṯ ǧiȓeṯ ḏ nhar ḏi ṯemziḏa ṯameqqrant nnes. Wenni iqqimen x lƹarc aṯen iḥḍa.
16 War tȓizin war tfiḏin, war ṯen tsecmiḍ ṯfuct uȓa ḏ ȓeḥmu.
17 Ȓaḥeqqac izmar iǧan ḏi ȓwesṭ n lƹarc aṯen irwes, aṯen indeh mani ǧan ȓaƹnaṣer n waman n ṯuḏarṯ. Arebbi aḏ imseḥ kuȓ ameṭṭa zi ṯiṭṭawin nsen."