Acemmaƹ wis sebƹa
8
1 Wami irzem yizmar acemmaƹ wis sebƹa, ineqḍeƹ ȓḥess ḏeg ujenna can uzyen ṯsaƹat.
2 Ẓriɣ sebƹa n lmalaʼikaṯ iy itbeddan zzaṯ i Arebbi, immuc-asent sebƹa n zwammar.
3 Ṯusa-d ij n lmalaʼika nneḍnit ṯbedd ɣar ȓmeḏbaḥ, ṯeysi-d ṯimejmarṯ itwaṣenƹen s dheb. Immuc-as aṭṭas n tbaxur ḥima aḏ tqeddem tbaxur nni ak ṯẓaǧiṯ n ȓmuminin ṣaliḥin x ȓmeḏbaḥ n dheb zzaṯ i lƹarc.
4 Igaƹƹeḏ zeg ufus n lmalaʼika ddexxan n tbaxur ak ṯẓaǧiṯ n ȓmuminin ṣaliḥin ɣar zzaṯ i Arebbi.
5 Ṯeysi lmalaʼika ṯimejmarṯ n tbaxur, ṯƹemmar-it s ṯmessi n ȓmeḏbaḥ, ṯzeǧeƹ-it ɣar ṯmurṯ. Iwqeƹ wajjaj ḏ iɣuyan ḏ wassam ḏ zzinzal.
Sebƹa n zwammar
6 Sebƹa n lmalaʼikaṯ nni iy ɣar ǧant sebƹa n zwammar sewjḏent ixef nsent ḥima aḏaysen ṣuḍent.
7 Ṯekkar ṯṣuḍ lmalaʼika ṯamezwarut ḏi zzammar nnes uca imxelleṭ icarraa ḏ ṯmessi ak iḏammen menḍaren ɣar ṯmurṯ. Ṯecmeḍ tuluṯ n ṯmurṯ ḏ tuluṯ n ȓcejjur ḏ marra arbiƹ azeyza.
8 Ṯekkar ṯṣuḍ lmalaʼika wis ṯnayen ḏi zzammar nnes uca imenḍar ḏi ȓebḥar amecnaw can uḏrar ḏ ameqqran itceƹƹaȓ s ṯmessi. Tuluṯ n ȓebḥar iḏweȓ ḏ iḏammen.
9 Mmuṯen tuluṯ n lmexluqaṯ ig itƹican ḏi ȓebḥar, twarzen tuluṯ n iɣarruba.
10 Ṯekkar ṯṣuḍ lmalaʼika wis tȓaṯa ḏi zzammar nnes uca iwḍa-d zeg ujenna ij n yiṯri ḏ ameqqran itceƹƹaȓ amecnaw asfeḍ. Iwḍa-d x tuluṯ n yiɣzran ḏ ȓaƹnaṣer n waman.
11 Iṯri nni qqaren-as Cciḥ. Ḏewȓen tuluṯ n waman nni ḏ imerzagen. Mmuṯen aṭṭas zeg yinni iswin zeg waman nni s ṯarzugi nsen.
12 Ṯekkar ṯṣuḍ lmalaʼika wis arbeƹa ḏi zzammar nnes uca tuluṯ n ṯfucṯ ḏ ṯziri ḏ yiṯran nhezzen ḥima tuluṯ nni aḏ tiȓi ḏ ṯaǧesṯ, aḏ tenqes ij n tuluṯ n ṯfawṯ ḏi nhar uȓa ḏ ǧiȓeṯ.
13 Xzareɣ, sȓiɣ ij n nser iṭṭaw ḏi ȓwesṭ ujenna, iqqar s jjehḏ: "Ya tamara, ya tamara, ya tamara x imezḏaɣ n ṯmurṯ ƹlaḥsab ṯȓaṯa n lmalaʼikaṯ nni ig iqqimen ƹaḏ war ṣuḍent ḏi zzammar nsent."