9
1 Ṯekkar ṯṣuḍ lmalaʼika wis xemsa ḏi zzammar nnes uca ẓriɣ ij n yiṯri tuɣa iwḍa-d zeg ujenna x ṯmurṯ. Immuc-as i yiṯri nni ȓmeftaḥ n wanu itawin ɣar ȓaǧeɣ bȓa ȓaḥedd.
2 Irzem anu nni itawin ɣar ȓaǧeɣ bȓa ȓaḥedd, yuȓi-d zzayes ddexxan amecnaw ddexxan n yij n ȓkuceṯ ṯameqqrant. Ddexxan n ȓaǧeɣ nni iɣeṭṭa x ṯfucṯ ḏ ljuw.
3 Ṯeffeɣ-d ṯmurɣi zi ddexxan nni ɣar ṯmurṯ, immuc-asent jjehḏ amecnaw ṯiɣirḏemawin n ṯmurṯ.
4 Nnan-asent war tḍeyyaƹent arbiƹ n ṯmurṯ uȓa ḏ min iǧan ḏ azeyza uȓa ḏ ȓcejjur, ɣir iwḏan iy ɣar war iǧi x ṯenyarṯa nsen ṭṭabaƹ n Arebbi.
5 Maci mesmuḥ aṯen nɣent, walakin aṯen ƹeddbent xems chur. Ȓaƹḏab iy teggent amecnaw ṯiɣirḏemawin xmi teqqsent i bnaḏem.
6 Ḏi ȓweqṯ nni aḏ rzun yiwḏan x ȓmewṯ war t tifen ca, aḏ ttaren ȓmewṯ azzaysen ṯerweȓ.
7 Ṯmeḍhar-d ṯmurɣi nni amecnaw iysan wejḏen aḏ ḥarben. X izeǧifen nsent amecnaw ttaj n dheb. Aɣembub nsent amecnaw aɣembub n bnaḏem.
8 Ɣarsent acewwaf amecnaw acewwaf n ṯemɣarin. Ṯiɣmas nsent amecnaw ṯiɣmas n ssbaƹ.
9 Ɣarsent ṯijiliṯin amecnaw ṯijiliṯin n ȓeḥḏiḏ. Sdaƹ n wafriwen nsent am sdaƹ n waṭṭas n ikarruṯen n yiysan tazzȓen ɣar ȓḥarb.
10 Ɣarsent ṯicceṭ am ṯɣirḏent teqqsent zzayes. Ɣarsent jjehḏ aḏ ḍarrent iwḏan xems chur s ṯicceṭ nni.
11 Azeǧiḏ nsent netta ḏ lmalaʼika n ȓaǧeɣ bȓa ȓaḥedd, isem nnes s wawaȓ n Ayṯ-Israʼil Abaddun, s ṯyunaniṯ Abulyun.
12 Ṯeƹḏu tamara ṯamezwarut, aḏ d asent ƹaḏ ṯnayen nneɣnit.
13 Ṯekkar ṯṣuḍ lmalaʼika wis setta ḏi zzammar nnes uca sȓiɣ ij n ṯmijja ṯendeq-d zi arbeƹa nni n waccawenb n ȓmeḏbaḥ n dheb ig iǧan zzaṯ i Arebbi.
14 Ṯenna-as ṯmijja nni i lmalaʼika wis setta iy ɣar ṯeǧa zzammar: "Ḍȓeq i arbeƹa n lmalaʼikaṯ itwacedden ḏeg yiɣzar n Lfurat ameqqran."
15 Twaḍeȓqent arbeƹa n lmalaʼikaṯ nni iy tuɣa twasewjḏent i ṯsaƹat-a ḏ nhar-a ḏ char-a ḏ useggwas-a ḥima aḏ nɣent tuluṯ n yiwḏan.
16 Sȓiɣ x lƹadad n ȓƹaskar iy inyin x yiysan: lƹadad nsen miyyatayen milyun.
17 Ẓriɣ ḏi lwaḥi-ya inu iysan ḏ yinni xasen inyin, ɣarsen ṯijiliṯin n ȓeḥḏiḏ ḏ izeggwaɣen amecnaw ṯimessi, ḏ izeyzawen amecnaw lyaqut, ḏ iwraɣen amecnaw ȓekbriyeṯ. Izeǧifen n yiysan amecnaw izeǧifen n ssbaƹ, teffeɣ-d zeg uqemmum nsen ṯmessi ḏ ddexxan ḏ ȓekbriyeṯ.
18 Mmuṯen tuluṯ n yiwḏan s ṯraṯa-ya n lmuṣibaṯ: s ṯmessi ḏ ddexxan ḏ ȓekbriyeṯ iy d iteffɣen zeg uqemmum nsen.
19 Jjehḏ n yiysan nni aqa-ṯ ḏeg uqemmum nsen ḏ iƹennaben nsen. Iƹennaben nsen tcabbahen ḏeg ifiɣeran, tḍarran s izeǧifen nsen.