Lmalaʼika akeḏ lkitab amezyan
10
1 Ẓriɣ ij n lmalaʼika nneḍnit ṯejheḏ ṯehwa-d zeg ujenna, inneḍ-as useynu. X uzeǧif nnes ij n ṯesȓiṯ n unẓar, aɣembub nnes amecnaw ṯfuct, iḍaren nnes amecnaw ipilaren n ṯmessi.
2 Ḏeg ufus nnes ij n lkitab ḏ amezyan irzem. Ṯsers ḍar nnes afusi x ȓebḥar, aẓeȓmaḍ x ȓbarr.
3 Ṯesnekkar ṯɣuyyiṯ s jjehḏ amecnaw ṯmijja n ssbaƹ. Wami ṯesnekkar ṯɣuyyiṯ nni, arrin-d xas sebƹa n wajjajen s ṣṣut nsen.
4 Wami d arrin sebƹa nni n wajjajen, xseɣ aḏ ariɣ manayenni maca sȓiɣ ij n ṯmijja zeg ujenna ṯeqqar-ayi: "Min nnan sebƹa n wajjajen nni, ejj-iṯ ɣarek ḏ ssirr, war ṯ tari ca."
5 Ẓriɣ lmalaʼika nni ibedden x ȓebḥar ḏ ȓbarr ṯeysi fus nnes afusi ɣar ujenna.
6 Ṯezzuǧ s wenni iddaren i ȓebda n ȓebdaṯ iƹni wenni ixeȓqen ajenna ḏ min ḏayes ḏ ȓbarr ḏ ȓebḥar ḏ min ḏaysen. Uca ṯenna: "Ṣafi, war ṯeqqim bu ȓweqṯ ktar.
7 Ḏi nhuraṯ xmi ɣa ṯṣuḍ lmalaʼika wis sebƹa ḏi zzammar nnes aḏ ikemmeȓ ssirr n Arebbi mammec ṯ inna i lƹibad nnes iƹni lʼanbiya."
8 Ṯmijja nni umi sȓiɣ zeg ujenna ṯessiweȓ-d ɣari ṯwaȓa wis ṯnayen, ṯenna-ayi: "Ruḥ ysi lkitab nni irezmen ḏeg ufus n lmalaʼika ig ibedden x ȓebḥar ḏ ȓbarr."
9 Ruḥeɣ ɣar lmalaʼika nniɣ-as: "Uc-ayi-d lkitab amezyan!" Ṯenna-ayi: "Ysi-ṯ, ecc-iṯ. Aṯ tafeḏ ḏ amerzag ḏeg uƹeddis nnec, waxxa ḏ miziḍ amecnaw ṯamment ḏeg uqemmum nnec."
10 Ysiɣ lkitab nni amezyan zeg ufus nnes, cciɣ-ṯ. Ufiɣ-ṯ ḏ miziḍ amecnaw ṯamment ḏeg uqemmum inu. Wami ṯ seɣȓiɣ iḏweȓ ḏ amerzag ḏeg uƹeddis inu.
11 Nnan-ayi: "Labud aḏ tessiwȓeḏ ƹaweḏ s min iwḥa Arebbi x waṭṭas n ccuƹub ḏ ȓegnus ḏ luɣaṯ ḏ izeǧiḏen."