Ṯnayen n ȓechuḏ
11
1 Immuc-ayi ij n uɣanim ḏ ȓaƹbar, inna-ayi yijjen: "Kkar, ƹbar ṯamziḏa ṯameqqrant n Arebbi ḏ ȓmeḏbaḥ, ḥseb cḥaȓ iƹebbḏen ḏayes.
2 Maca ȓemraḥ iǧan ɣar barra i ṯemziḏa ejj-iṯ waḥḏes, war ṯ teƹbar ca ȓaḥeqqac immuc i ȓegnus. Aḏ ƹeffsena ṯandint iqeddsen ḏi ṯnayen u arbeƹin chur.
3 Aḏ ssekkeɣ ṯnayen n ȓechuḏ inu aḏ ggen arruḍ n uḥzan aḏ xbaren iwḏan s min ƹeȓmen zi Arebbi aȓef u miyyatayen u settin yum."
4 Ȓechuḏ nni niṯni ḏ ṯnayen n ȓcejjur n zzitun, ƹaweḏ niṯni ḏ ṯnayen n ȓeqnadeȓ ig ibedden zzaṯ i Siḏ Arebbi n ddunect.
5 Meȓa can yijjen irzu aḏ iḍarr ȓechuḏ nni, aḏ teffeɣ zeg uqemmum nsen ṯmessi aḏ tecc ȓƹaḏyan nsen. Meȓa can yijjen irzu aṯen iḍarr, amenni iy ɣa immeṯ.
6 Ȓechuḏ nni ɣarsen ssulṭa aḏ bellƹen ajenna war d icciṯ bu unẓar ḏi ȓyamaṯ nni iy ḏi ɣa xbaren s min ƹeȓmen zi Arebbi. Ɣarsen ssulṭa ƹaweḏ aḏ arren aman ḏ iḏammen, aḏ ḍeȓqen i marra lmuṣibaṯ x ṯmurṯ meȓmi ma xsen.
7 Xmi ɣa kemmȓen ȓexbar nsen iy zi cehḏen, aḏ igaƹƹeḏ ȓwaḥc zi ȓaǧeɣ bȓa ȓaḥedd aṯen iḥareb, aṯen iɣȓeb, aḏ ineɣ ȓechuḏ nni.
8 Aḏ teqqim ddat nsen ḏi ccariƹ n ṯendint ṯameqqrant umi qqaren s ȓmaƹna Sadum niɣ Miṣra iƹni mani itwaṣelleb Siḏiṯsen.
9 Iwḏan zi kuȓ luɣa ḏ ȓqum ḏ ȓegnus aḏaysen xzaren ḏi ddat nsen ṯȓet-iyyam ḏ uzyen, war tijjin ḥadd aḏ inḍeȓ ȓechuḏ nni.
10 Imezḏaɣ n ṯmurṯ aḏ farḥen aḏ zhun s ȓmewṯ nsen. Aḏ ucen ikaduṯen i wayawya ȓaḥeqqac lʼanbiya nni s ṯnayen, iƹni ȓechuḏ nni, ƹeddben aṭṭas imezḏaɣ nni n ṯmurṯ.
11 Wami ṯeƹḏu tȓet-iyyam ḏ uzyen nni, yuḏef ḏaysen ḏi ȓechuḏ nni buḥbeȓ zi Arebbi, kkaren bedden x iḍaren nsen. Yinni ḏaysen ixzaren ṯuḏef ḏaysen ṯiggwḏi ḏ ṯameqqrant.
12 Sȓin ij n ṯmijja ṯejheḏ tȓaɣa-d xasen zeg ujenna, ṯeqqar-asen: "Gaƹƹḏem-d ḏanita!" Ȓechuḏ nni gaƹƹḏen ɣar ujenna ḏeg useynu, ȓƹaḏyan nsen xzaren ḏaysen.
13 Ḏi ȓweqṯ nni iwqeƹ ij n zzinzal ḏ ameqqran, ṯnehḏem ƹecra ḏi miyya n ṯendint. Mmuṯen ḏi zzinzal-a sebƹa aȓef n yiwḏan. Yinni iqqimen ggwḏen, bedden semɣaren Arebbi ig iǧan ḏeg ujenna.
14 Ṯeƹḏu tamara wis ṯnayen. Aqa tamara wis ṯȓaṯa ƹȓayen aḏ d tas.
Zzammar wis sebƹa
15 Ṯekkar ṯṣuḍ lmalaʼika wis sebƹa ḏi zzammar nnes, uca ṯimijjawin ḏeg ujenna qqarent s jjehḏ: "Iḏweȓ ȓeḥkam n ddunect g ifassen n Siḏi Arebbi nneɣ ḏ Lmasiḥ nnes, aḏ iḥkem i ȓebda n ȓebdaṯ."
16 Arbeƹa u ƹicrin nni imɣaren ig iqqimen x lƹarc nsen zzaṯ i Arebbi, hwan x uɣembub nsen sejjḏen i Arebbi,
17 qqaren:
"Ncekkar-icek, a Siḏi Arebbi ig izemmren i kuȓci,
cek ig iǧan, cek iy tuɣa iǧan,
ȓaḥeqqac ṯesxeḏmeḏ jjehḏ nnec, ṯḥekmeḏ.
18 Ȓegnus ɣeḍben, yuweḍ-d uɣḍab nnec.
Yuweḍ-d Nhar n Lḥisab ḏ Lƹiqab n yinni immuṯen.
Aḏ tjaziḏ yinni ḏac ixeddmen iƹni lʼanbiya ḏ ȓmuminin nnec ṣaliḥin,
ḏ yinni itweqqaren isem nnec s imezyanen ḏ imeqqranen.
Aḏ teqḍiḏ x yinni isefsaḏen ṯamurṯ."
19 Ṯnurzem ṯemziḏa ṯameqqrant n Arebbi ḏeg ujenna, iḍhar-d tabutb n ȓƹaheḏ n Arebbi ḏi ṯemziḏa nni. Iwqeƹ wassam ḏ iɣuyan ḏ wajjaj ḏ zzinzal ḏ icarrac aṭṭas.