Ṯamɣarṯ u ḏ ij n ȓwaḥc am ddaynaṣur
12
1 Ṯeḍhar-d ij n lƹalama ḏ ṯameqqrant ḏeg ujenna, iƹni ṯamɣarṯ ṯenneḍ-as ṯfuct, ṯaziri swadday iḍaren nnes, x uzeǧif nnes ij n ttaj ḏayes ṯenƹac n yiṯran.
2 Ṯeysi aƹeddis, ṯesɣuyiw s ȓeḥriq n ṯarwa, tƹeddab u nettaṯ tarew.
3 Ṯeḍhar-d ḏeg ujenna ij n lƹalama nneɣnit am ddaynaṣur ḏ ameqqran ḏ azeggwaɣ ɣares sebƹa izeǧifen ḏ ƹecra waccawen,a x izeǧifen nnes sebƹa n ttajaṯ.
4 Ijarr s uƹennab nnes tuluṯ n yiṯran ujenna, inḍer-iṯen ɣar ṯmurṯ. Ibedd bu-sebƹa-izeǧifen nni zzaṯ i ṯemɣarṯ u nettaṯ tarew ḥima aḏ icc mmis xmi ṯ-iḏ ɣa ṯarew.
5 Ṯurew-d aḥenjir ḏ awṯem, ḏ netta iy ɣa irewsen marra ȓegnus s uƹekkaz n ȓeḥḏiḏ. Mmis itwarfaƹ ɣar Arebbi ɣar lƹarc nnes.
6 Ṯerweȓ ṯemɣarṯ ɣar ȓexȓa mani ḏas isewjeḏ Arebbi amcan at seccen ḏeg waȓef u miyyatayen u settin yum.
7 Ikkar ȓḥarb ḏeg ujenna. Mikaʼil ḏ lmalaʼikaṯ nnes ḥarben bu-sebƹa-izeǧifen. Bu-sebƹa-izeǧifen ḏ ccayaṭin nnes ḥarben uȓa ḏ niṯni.
8 War ḏasent zemmren i lmalaʼikaṯ nni, bu-sebƹa-izeǧifen-a ḏ ccayaṭin nnes ḍeyyƹen amcan nsen ḏeg ujenna.
9 Imenḍar zeg ujenna bu-sebƹa-izeǧifen nni ameqqran, iƹni fiɣer nni ḏi zman umi qqaren Ibȓis niɣ Cciṭan ig ixeddƹen marra ddunect. Imenḍar-d ɣar ṯmurṯ, menḍaren-d akiḏes ccayaṭin nnes.
10 Sȓiɣ ij n ṯmijja ṯeqqar s jjehḏ ḏeg ujenna:
"Ȓexxu Arebbi nneɣ isenjam,
iḍhar-d jjehḏ ḏ ȓmulk nnes,
ḏ ssulṭa n Lmasiḥ nnes.
Ȓaḥeqqac wenni iceṯcan zeg ayṯmaṯneɣ
imenḍar ɣar ṯmurṯ,
ḏ netta ig iceṯcan zzaysen ǧiȓeṯ ḏ nhar
ɣar Arebbi nneɣ.
11 Ɣeȓben-ṯ ayṯmaṯneɣ s iḏammen n yizmar
ḏ chadeṯ nsen.
Ṯuḏarṯ nsen war xasen ṯƹizz ca,
wejḏen aḏ mmṯen.
12 X manaya, fareḥ ay Ajenna,
farḥeṯ a yinni ḏayes izeddɣen!
Maca ya tamara i imezḏaɣ n ȓbarr ḏ ȓebḥar!
Ibȓis ihwa-d ɣarwem iɣḍeb aṭṭas,
ȓaḥeqqac issen iqqim-as ḏrus n ȓweqṯ."
13 Wami bu-sebƹa-izeǧifen yufa ixef nnes imenḍar ɣar ṯmurṯ, ibḏa iḏeffar ṯamɣarṯ nni iy d ijjin awṯem.
14 Immuc-as i ṯemɣarṯ nni ṯnayen n wafriwen n nser ameqqran ḥima azzaysen ṯḍew ɣar ȓexȓa, ɣar umcan nnes, mani ɣa ṯetwaƹṯeq ṯeȓt snin ḏ uzyen ḏi ȓaman zeg ufiɣer nni.
15 Isufeɣ-d ufiɣer zeg uqemmum nnes aman amecnaw iɣzar tazzȓen x ṯemɣarṯ ḥima at awin waman nni.
16 Maca ṯamurṯ ṯsenjem ṯamɣarṯ nni, ṯerzem aqemmum nnes, ṯseɣȓi iɣzar iy d isufeɣ bu-sebƹa-izeǧifen zeg uqemmum nnes.
17 Iɣḍeb bu-sebƹa-izeǧifen x ṯemɣarṯ nni, iruḥ aḏ iḥareb min iqqimen zi ddurriṯ nnes, iƹni yinni iteggen array s ȓuṣiyaṯ n Arebbi, ƹaweḏ s min xef icheḏ Ƹisa.
18 Uca ibedd x yijḏi n ȓebḥar.