Ȓwaḥc iy d iteffɣen zi ȓebḥar
13
1 Ẓriɣ ij n ȓwaḥc iffeɣ-d zi ȓebḥar, ɣares sebƹa n iqeyyuƹen ḏ ƹecra n waccawen,a x waccawen nnes ɣares ƹecra n ttajaṯ. Yura x iqeyyuƹen nnes isemawen war iḥȓin x Arebbi.
2 Ȓwaḥc-a iy ẓriɣ itawi-d ḏeg uɣiȓas,b ɣares iḍaren am iḍaren n ddub, aqemmum nnes amecnaw aqemmum n ssbaƹ. Wenni am ddaynaṣur yuca-as i ȓwaḥc nni jjehḏ nnes ḏ lƹarc nnes ḏ ssulṭa imɣaren.
3 Iḍhar-d ijjen zeg iqeyyuƹen nnes ijareḥ, axmi immuṯ, maca igenfa zeg ujarriḥ nni n ȓmewṯ. U marra imezḏaɣ n ṯmurṯ tƹejjben, ḏeffaren ȓwaḥc.
4 Sejjḏen-as yiwḏan i wenni am ddaynaṣur ȓaḥeqqac yuca-as i ȓwaḥc ssulṭa nnes. Ƹaweḏ sejjḏen-as i ȓwaḥc nnan: "Ug iǧan amecnaw ȓwaḥc? Ug izemmaren aṯ iḥareb?"
5 Immuc-as i ȓwaḥc uqemmum aḏ issiweȓ s ttakebbur ḏ wawaȓ war iḥȓin x Arebbi. Immuc-as ssulṭa iy zi ɣa ixḏem ṯnayen u arbeƹin chur.
6 Ibḏa issawaȓ s wawaȓ war iḥȓin x Arebbi. Issawaȓ s wawaȓ war iḥȓin x yisem nnes, ḏi ṯzeddiɣṯ nnes, ḏeg imezḏaɣ ujenna.
7 Itwasmeḥ-as aḏ iḥareb ȓmuminin ṣaliḥin, aṯen iɣȓeb. Immuc-as ssulṭa x mkuȓ ṯaqbiȓṯ ḏ ccaƹb ḏ luɣa ḏ ȓgens.
8 Marra imezḏaɣ n ṯmurṯ aḏ sejjḏen i ȓwaḥc nni, iƹni kuȓ ijjen isem nnes war izemmem ca ḏi Lkitab n Ṯuḏarṯ zeg wami ṯeǧa ddunect, iƹni ḏi lkitab n yizmar itwanɣen.
9 Ṣenneṭ mliḥ, a wenni itsȓan.
10 Wenni mixef yura aḏ itwaḥebbes, aqa aḏ itwaḥebbes.
Wenni mixef yura aḏ itwaneɣ s ssif, aqa aḏ itwaneɣ s ssif.
Ḏi lḥala nni ixeṣṣa ȓmuminin ṣaliḥin aḏ ṣbaren aḏ amnen.
Ȓwaḥc iy d itgaƹƹaḏen zi ṯmurṯ
11 Ẓriɣ ij n ȓwaḥc nneɣnit iffeɣ-d zi ṯmurṯ, ɣares ṯnayen waccawen amecnaw accawen n yizmar maca issaweȓ am ddaynaṣur.
12 Isexḏem marra ssulṭa n ȓwaḥc amezwaru u netta aqa-ṯ zzaṯes. Yarra marra ṯamurṯ ḏ imezḏaɣ nnes aḏas sejjḏen i ȓwaḥc nni amezwaru ig igenfan zeg ujarriḥ nni n ȓmewṯ.
13 Igga lmuƹjizaṯ ḏ ṯimeqqranin, isehwa-d ṯimessi zeg ujenna ɣar ṯmurṯ zzaṯ i yiwḏan.
14 Ixḏeƹ imezḏaɣ n ṯmurṯ s lmuƹjizaṯ nni iy ḏas itwasmeḥ aṯent igg zzaṯ i ȓwaḥc amezwaru.
Yumar imezḏaɣ n ṯmurṯ aḏ ṣenƹen ij n lʼaṣnam am ȓwaḥc iy ḏi iǧa ujarriḥ n ssif, waxxa amenni iddar.
15 Itwasmeḥ-as aḏ igg buḥbeȓ ḏi lʼaṣnam-a iy ṣenƹen x ṣṣifeṯ n ȓwaḥc nni amezwaru ḥima aḏ issiweȓ, aḏ ineɣ marra yinni war isejjḏen ca i lʼaṣnam-a am ȓwaḥc nni.
16 Igga bezzez x marra iwḏan s imeqqranen ḏ imezyanen, twajer ḏ imesƹan, yinni ɣarsen bab nsen ḏ yinni ɣarsen lḥurriya nsen aḏ ggen ij n lƹalama x ufus afusi nsen niɣ x ṯenyarṯc nsen.
17 Uȓa ḏ ijjen war izemmer aḏ iseɣ niɣ aḏ izzenz meȓa war ḏayes lƹalama nni, iƹni isem n ȓwaḥc niɣ rraqem n yisem nnes.
18 Ḏi manaya ixeṣṣa ȓefhameṯ. Wenni ɣar iǧa ȓaƹqeȓ aḏ irzu x ȓmaƹna n rraqem n ȓwaḥc, ȓaḥeqqac netta ḏ rraqem n yij n bnaḏem. Rraqem-a netta sett-miyya u setta u settin.