Izmar ḏ yinni ṯ iteḏfaren
14
1 Wami xzareɣ, twaȓiɣ izmar ibedd x uḏrar n Lquds akiḏes miyya u arbeƹa u arbeƹin aȓef. Yura x ṯenyarṯa nsen isem n yizmar ḏ yisem n Babas.
2 Sȓiɣ ij n ṯmijja ḏeg ujenna amecnaw ṣṣut n waṭṭas n waman niɣ am wajjaj ijehḏen. Ƹaweḏ ṯmijja nni umi sȓiɣ amecnaw ṣṣut n yinni iccaṯen tagembrit.
3 Tɣennajen ij n yizȓi ḏ jḏiḏ zzaṯ i lƹarc ḏ arebƹa nni n lmexluqaṯ ḏ imɣaren. Uȓa ḏ ijjen war izemmer aḏ iȓmeḏ izȓi nni illa miyya u arbeƹa u arbeƹin aȓef nni iy itwasnejmen zi ddunect.
4 Yina ḏ yinni war issinen ƹemmarṣ ṯimɣarin, qqimen ḏ iƹzriyen. Yina ḏ yinni iḏeffaren izmar mani ma iruḥ. Twasnejmen zi ȓwesṭ n yiwḏan ḥima aḏ twaqeddmen ḏ imezwura i Arebbi ḏ yizmar.
5 Ƹemmarṣ war sxerrqen, niṯni bȓa ȓƹib.
Ȓexbar aṣebḥan n ṯȓaṯa n lmalaʼikaṯ
6 Ẓriɣ ij n lmalaʼika nneɣnit ṯeṭṭaw ḏi ȓwesṭ n ujenna. Ɣares Lʼinjil n ȓebda aḏ tbeccar zzayes imezḏaɣ n ṯmurṯ zi mkuȓ ȓgens ḏ ȓqum ḏ luɣa ḏ ccaƹb.
7 Ṯeqqar s jjehḏ: "Ggwḏem Arebbi, semɣarem-ṯ, aqa ṯuweḍ-d ṯsaƹat n lḥisab ḏ lƹiqab nnes. Sejjḏeṯ i wenni ixeȓqen ajenna ḏ ṯmurṯ ḏ ȓebḥar ḏ ȓaƹnaṣer."
8 Ṯekkar ṯeḏfar-it ij n lmalaʼika nneɣnit wis ṯnayen ṯeqqar: "Ṯewḍa, ṯewḍa ṯendint n Babil ṯameqqrant ig isesswen marra ȓegnus s waman n uḍiȓ nnes, iƹni lfasad nnes ameqqran."
9 Ṯekkar ṯeḏfar-iṯent ij n lmalaʼika nneɣnit wis ṯȓaṯa ṯeqqar s jjehḏ: "Meȓa can yijjen isejjeḏ i ȓwaḥc ḏ lʼaṣnam nnes, iqbeȓ lƹalama x ṯenyarṯ nnes niɣ x ufus nnes,
10 labud aḏ isew zeg waman n uḍiȓ iqesḥen ig iǧan ḏ aɣḍab n Arebbi, iƹni ȓkas n lƹiqab nnes. Aḏ itwaƹeddeb s ṯmessi ḏ ȓekbriyeṯ zzaṯ i lmalaʼikaṯ iṣfan ḏ yizmar.
11 Ddexxan n ȓaƹḏab nsen itgaƹƹaḏ i ȓebda n ȓebdaṯ. Yinni isejjḏen i ȓwaḥc ḏ lʼaṣnam nnes, ƹaweḏ qebȓen lƹalama n yisem nnes war ɣarsen bu arraḥeṯ ǧiȓeṯ ḏ nhar."
12 Ḏi lḥala nni ixeṣṣa ȓmuminin ṣaliḥin aḏ ṣbaren, aḏ ggen array s ȓuṣiyaṯ n Arebbi, aḏ amnen s Ƹisa.
13 Sȓiɣ ij n ṯmijja zeg ujenna ṯeqqar: "Ari manaya: Ssaƹḏ n imettinen iy ɣa immṯen zi ssa aȓ ṯsawent u niṯni zi Siḏiṯneɣ." Arruḥ n Arebbi iqqar: "Wah, ḥima aḏ reyyḥen zi tamara nsen, ȓaḥeqqac teḏfarent-ṯen lḥasanaṯ nsen."
Ȓweqṯ n umjar n ṯmurṯ
14 Wami xzareɣ, twaȓiɣ ij n useynu ḏ acemȓaȓ, wenni xas iqqimen itcabbah ḏi mmis n bnaḏem, x uzeǧif nnes ttaj n dheb, ḏeg ufus nnes amjar iqḍeƹ.
15 Ṯekkar ṯeffeɣ-d ij n lmalaʼika nneɣnit zi ṯemziḏa ṯameqqrant, ṯeqqar-as s jjehḏ i wenni iqqimen x useynu: "Ysi amjar nnec, mjar. Ṯuweḍ-d ṯsaƹat n umjar, ṯafeǧaḥṯ n ṯmurṯ qa ṯewjeḏ."
16 Wenni iqqimen x useynu yuwṯa s umjar x ṯmurṯ, ṯemjar ṯfeǧaḥṯ nnes.
17 Ṯekkar ṯeffeɣ-d ij n lmalaʼika nneɣnit zi ṯemziḏa ṯameqqrant iǧan ḏeg ujenna, uȓa ḏ nettaṯ ɣares amjar iqḍeƹ.
18 Ṯekkar ṯeffeɣ-d ij n lmalaʼika nneḍnit zi ȓmeḏbaḥ n ṯemziḏa ṯameqqrant ɣares ssulṭa x ṯmessi, ṯȓaɣa s jjehḏ i lmalaʼika nni iy ɣa iǧa umjar iqḍeƹ, ṯenna-as: "Ysi amjar nnem, qess izekkunen n ṯzayarṯ n ṯmurṯ ȓaḥeqqac aḍiȓ yuweḍ-d ȓweqṯ nnes."
19 Lmalaʼika nni ṯuwṯa x ṯmurṯ s umjar nnes, ṯqess izekkunen n uḍiȓ n ṯmurṯ, ṯenḍer-iṯen ḏi ṯsirṯ ṯameqqrant n uɣḍab n Arebbi.
20 Ƹeffsentb ḏi ṯsirṯ uḍiȓ barra i ṯendint. Ḥemȓen-d zzayes iḏammen aȓ wami uwḍen ɣar sȓimeṯ n uyis, tazzȓen can ṯeȓt-miyya kilumiter.