Sebƹa n lmalaʼikaṯ ɣarsent sebƹa n lmuṣibaṯ
15
1 Ẓriɣ ḏeg ujenna ij n lƹalama nneɣnit ḏ ṯameqqrant isḏehhcen, iƹni sebƹa n lmalaʼikaṯ ɣarsent sebƹa n lmuṣibaṯ ṯineggura, zzaysent iy ɣa itwakemmeȓ uɣḍab n Arebbi.
2 Ẓriɣ ƹaweḏ amecnaw ȓebḥar n jjaj ixelleṭ akeḏ ṯmessi, bedden xas yinni iɣeȓben ȓwaḥc ḏ lʼaṣnam nnes ḏ rraqem n yisem nnes. Kuȓ ijjen zzaysen ikessi tagembrit zi Arebbi.
3 Tɣennajen izȓi n Musa ȓƹabḏ n Arebbi ḏ yizȓi n yizmar qqaren:
"Ȓexḏayem nnec ḏ ṯimeqqranin isḏehhcen,
A Siḏi Arebbi nneɣ ig izemmren i kuȓci.
Ibriḏen nnec ǧan nican ḏ ȓḥaqq,
Ay azeǧiḏ n ȓegnus.
4 Min iƹna wenni war c iteggwḏen, a Siḏi?
Min iƹna wenni war isemɣaren isem nnec?
Aqa cek waḥḏec ig iṣfan.
Marra ȓegnus aḏ d asen aḏac sejjḏen,
ȓaḥeqqac iḍhar-d belli ȓexḏayem nnec aqa-ṯent nican."
5 Menbaƹd i manaya ẓriɣ ṯamziḏa ṯameqqrant, iƹni aqiḍun n chaḏeṯ, ṯnurzem ḏeg ujenna.
6 Ffɣent-id zi ṯemziḏa ṯameqqrant sebƹa n lmalaʼikaṯ nni, akiḏsent lmuṣibaṯ nni s sebƹa. Ggint arruḍ n ȓkettan n lulan inqan iȓeqqen, ɣarsent kuȓ icten aḥezzam n dheb iqḍeƹ-d zeg uɣiȓ ɣar nneṣṣ.
7 Ijjen zi arbeƹa n lmexluqaṯ nni yuca i sebƹa n lmalaʼikaṯ nni sebƹa n ṯmejmarin ggin-ṯent s dheb, ƹemmarent s uɣḍab n Arebbi ig iddaren i ȓebda n ȓebdaṯ.
8 Uca ṯamziḏa ṯameqqrant ṯƹemmar s ddexxan n lƹaḍama n Arebbi ḏ jjehḏ nnes. War izemmer ḥadd aḏ yaḏef ɣar ṯemziḏa ṯameqqrant ḥetta aȓ ɣa kemmȓent sebƹa n lmuṣibaṯ nni iy d ɣa sehwant sebƹa n lmalaʼikaṯ nni.