Sebƹa n ṯmejmarin n uɣḍab n Arebbi
16
1 Sȓiɣ ij n ṯmijja ṯendeq-d zi ṯemziḏa ṯameqqrant ṯeqqar s jjehḏ i sebƹa n lmalaʼikaṯ nni: "Ruḥent zeǧƹent x ṯmurṯ sebƹa n ṯmejmarin n uɣḍab n Arebbi."
2 Ṯekkar ṯeffeɣ-d lmalaʼika ṯamezwarut ṯzeǧeƹ ṯimejmarṯ nnes x ṯmurṯ uca weqƹent ṯḥebba ḏ ṯiƹeffanin iy teggen ȓeḥriq ȓeqfent iwḏan nni iy ḏi ṯeǧa lƹalama n ȓwaḥc, isejjḏen i lʼaṣnam nnes.
3 Ṯekkar lmalaʼika wis ṯnayen ṯzeǧeƹ ṯimejmarṯ nnes x ȓebḥar uca iḏweȓ ḏ iḏammen am iḏammen n wenni immuṯen, mmuṯen marra min iddaren ḏi ȓebḥar.
4 Ṯekkar lmalaʼika wis tȓaṯa ṯzeǧeƹ ṯimejmarṯ nnes x iɣzaren ḏ ȓaƹnaṣer n waman uca ḏewȓen ḏ iḏammen.
5 Sȓiɣ lmalaʼika n waman ṯeqqar: "Cek aqa-c nican ḏi ȓeḥkam nnec, cek ig iṣfan, cek iy tuɣa iǧan, ḏ cek ig iǧan.
6 Wami sizzȓen iḏammen n ȓmuminin ṣaliḥin ḏ lʼanbiya, ṯuciḏ-asen uȓa ḏ niṯni aḏ swen iḏammen liʼanna sḏaheǧen manayenni."
7 Sȓiɣ ij n ṣṣut zi ȓmeḏbaḥ iqqar:
"Wah, a Siḏi Arebbi nneɣ ig izemmren i kuȓci,
ȓeḥkam nnec ḏ ȓḥaqq, aqa-ṯ nican."
8 Ṯekkar lmalaʼika wis arbeƹa ṯzeǧeƹ ṯimejmarṯ nnes x ṯfucṯ uca itwasmeḥ-as aḏ tsecmeḍ iwḏan s ṯmessi.
9 Cemḍen yiwḏan s lḥarara ijehḏen. Waxxa amenni qqaren awaȓ war iḥȓin ḏeg yisem n Arebbi ɣar iǧa ssulṭa x lmuṣibaṯ-a. War tuben ca, war ṯ semɣaren ca.
10 Ṯekkar lmalaʼika wis xemsa ṯzeǧeƹ ṯimejmarṯ nnes x lƹarc n ȓwaḥc uca ṯehwa-d ṯaǧesṯ x lmemlaka nnes. Iwḏan tfeẓẓan iȓesawen nsen s ȓeḥriq.
11 Qqaren awaȓ war iḥȓin x Arebbi iǧan ḏeg ujenna ƹlaḥsab ȓeḥriq ḏ ṯḥebba iy ḏaysen, war tuben ca zi ȓexḏayem nsen.
12 Ṯekkar lmalaʼika wis setta ṯzeǧeƹ ṯimejmarṯ nnes x yiɣzar n Lfurat ameqqran uca uzɣen waman iy ḏayes ḥima aḏ itwasewjeḏ ubriḏ i izeǧiḏen n ccarq.
13 Ẓriɣ ṯȓaṯa n jnun iƹeffanen am ijerwan:a ijjen iteffeɣ-d zeg uqemmum n wenni am ddaynaṣur, ijjen zeg uqemmum n ȓwaḥc, ijjen zeg uqemmum n wenni itarran ixef nnes ḏ nnabi.
14 Yina ḏ ȓarwaḥ n ccayaṭin teggen lmuƹjizaṯ. Traḥen ɣar izeǧiḏen n ṯmurṯ marra, aṯen smunen i ȓḥarb ḏi nhar nni ameqqran n Arebbi ig izemmren i kuȓci.
15 "Aqa aḏ d aseɣ am uceffar. Ssaƹḏ n wenni iǧan ƹlabal, iwjeḏ x warruḍ nnes ḥima war iggur ḏ aƹeryan aḏ ẓren yiwḏan ṯuƹaryant nnes."
16 Smunen-ṯen ɣar ij n umcan qqaren-as s wawaȓ n Ayṯ-Israʼil "Harmagidun."
17 Ṯekkar lmalaʼika wis sebƹa ṯzeǧeƹ ṯimejmarṯ nnes x lhawa uca sȓiɣ ij n ṯmijja zi ṯemziḏa ṯameqqrant iy d ikkin zi lƹarc, ṯeqqar s jjehḏ: "Ṣafi, itwakemmeȓ!"
18 Iwqeƹ wassam ḏ iɣuyan ḏ wajjaj ḏ zzinzal ijheḏ. Ƹemmarṣ war iwqiƹ amecnaw zzinzal-a ijehḏen zeg wami iǧa bnaḏem x ṯmurṯ.
19 Ṯerceq ṯendint ṯameqqrant x tȓaṯa, nheḏment ṯneddam n ȓegnus. War ittu ca Arebbi ṯandint n Babil ṯameqqrant, fa innama yuc-as aḏ tsew zi ȓkas n waman uḍiȓ, iƹni lƹiqab nnes ameqqran.
20 Kuȓ ṯayzirṯ ṯenhezz, fsin iḏurar.
21 Iwḍa-d zeg ujenna x yiwḏan icarrab ḏ ameqqran, kuȓ abquq iwezzen azyen uqenḍar. Iwḏan qqaren awaȓ war iḥȓin x Arebbi ḏi ssabab n lmuṣiba n icarra, ȓaḥeqqac lmuṣiba-ya ḏ ṯameqqrant aṭṭas.