Lfasda ṯameqqrant ḏ ȓwaḥc
17
1 Ṯusa-d ɣari icten zi sebƹa n lmalaʼikaṯ nni iy ɣar ǧant sebƹa n ṯmejmarin, ṯenna-ayi: "Araḥ-d, aḏac seḍhareɣ lḥisab ḏ lƹiqab n lfasda ṯameqqrant ig iqqimen x waṭṭas n waman.
2 Fesḏen akis izeǧiḏen n ṯmurṯ, imezḏaɣ n ṯmurṯ skaren s waman uḍiȓ iƹni lfasad nnes."
3 Lmalaʼika ṯeysi-ayi arruḥ ɣar ȓexȓa, ẓriɣ ij n ṯemɣarṯ ṯenya x yij n ȓwaḥc ḏ azeggwaɣ iḥḏeq, iƹemmar s yisemawen war iḥȓin x Arebbi. Ɣares sebƹa iqeyyuƹen ḏ ƹecra waccawen.a
4 Ṯamɣarṯ ṯegga arruḍ gruna ḏ uzeggwaɣ iḥḏeq. Ṯzewweq s dheb ṯegga ṯiƹeqqayin iy iɣȓan ḏ jjuhar. Ḏeg ufus nnes ȓkas n dheb iƹemmar s ṯuƹuffna ḏ min iǧan ḥram n lfasad nnes.
5 X ṯenyarṯb nnes yura ij n yisem: Babil Ṯameqqrant, ḏ yemmaṯsent n lfasdaṯ ḏ ṯuƹuffna n ṯmurṯ. Walakin ȓmaƹna nnes war ṯ issin ḥadd.
6 Ẓriɣ ṯamɣarṯ nni ṯeswa ṯɣella s iḏammen n ȓmuminin ṣaliḥin ḏ iḏammen n yinni icehhḏen x Ƹisa. Wami t ẓriɣ ḏehceɣ aṭṭas.
7 Ṯenna-ayi lmalaʼika nni: "Mayemmi ṯḏehhceḏ? Aḏac cerrḥeɣ ȓmaƹna inuffaren n ṯemɣarṯ nni ḏ ȓwaḥc nni wenni ɣar iǧa sebƹa iqeyyuƹen ḏ ƹecra waccawen iy xef ṯenya.
8 Ȓwaḥc nni iy ṯeẓriḏ tuɣa iǧa, ȓexxu war iǧi ca, ƹȓayen aḏ igaƹƹeḏ zi ȓaǧeɣ bȓa ȓaḥedd aḏ itwahḏem. Xmi ɣa ẓren ȓwaḥc nni, aḏ ḏehcen imezḏaɣ n ṯmurṯ, iƹni kuȓ ijjen isem nnes war izemmem ca zeg wami ṯeǧa ddunect ḏi Lkitab n Ṯuḏarṯ. Ȓaḥeqqac ȓwaḥc tuɣa iǧa, ȓexxu war iǧi ca, aqa aḏ d yas.
9 Ḏi manaya u labud ȓefhameṯ: Sebƹa iqeyyuƹen-a niṯni ḏ sebƹa iḏurar iy xef ṯeqqim ṯemɣarṯ. Niṯni ƹaweḏ ḏ sebƹa izeǧiḏen.
10 Xemsa zzaysen wḍan, ijjen zzaysen iǧa, unneɣnit ƹaḏ war d yusi. Xmi d ɣa yas, aḏ iqqim ɣir cwayt n ȓweqṯ.
11 Ȓwaḥc nni iy tuɣa iǧan u war iǧi ca ȓexxu, netta ḏ wis ṯmenya ḏ ijjen zi sebƹa nni. Iggur aḏ itwahḏem.
12 Ƹecra waccawen nni iy ṯeẓriḏ niṯni ḏ ƹecra izeǧiḏen ƹaḏ war ḏasen ucin ca ssulṭa aḏ ḥekmen. Aḏasen ṯemmuc ssulṭa aḏ ḥekmen ij n ȓweqṯ ak ȓwaḥc.
13 Yina tafqen aḏas ucen i ȓwaḥc jjehḏ nsen ḏ ssulṭa nsen.
14 Niṯni aḏ ḥarben izmar maca aṯen iɣȓeb ȓaḥeqqac netta ḏ Mawlana n mawlanaṯ ḏ Azeǧiḏ n izeǧiḏen. Yinni kiḏes iȓaɣa-yasen-d Arebbi ixḍar-iṯen, ḏaysen ȓaman."
15 Ṯenna-ayi lmalaʼika: "Aman nni iy ṯeẓriḏ mani ṯeqqim lfasda niṯni ḏ iwḏan zi mkuȓ ccaƹb ḏ ȓɣaci ḏ ȓgens ḏ luɣa.
16 Ƹecra waccawen nni iy ṯeẓriḏ u ḏ ȓwaḥc nni aḏ ƹiffen lfasda, aḏas kksen marra min ɣares, at jjen ḏ ṯaƹeryant. Aḏ ccen aysum nnes, at sḥerqen ḏi ṯmessi.
17 Ȓaḥeqqac ḏ Arebbi ig ismunen uȓ nsen hima aḏ ggen ȓxaḍar i Arebbi, iƹni aḏ tafqen aḏas ucen i ȓwaḥc ȓeḥkam nsen ḥetta aȓ ɣa ikemmeȓ wawaȓ n Arebbi.
18 Ṯamɣarṯ nni iy ṯeẓriḏ nettaṯ ḏ ṯandint ṯameqqrant ig iteḥkamen x izeǧiḏen n ṯmurṯ."