Ṯandint n Babil ṯweṭṭa
18
1 Menbaƹd i manaya ẓriɣ ij n lmalaʼika nneɣnit ṯehwa-d zeg ujenna, ɣares ssulṭa ḏ ṯameqqrant. Ṯceƹceƹ ṯmurṯ s nnur n lƹaḍama n lmalaʼika nni.
2 Ṯesnekkar ṯɣuyyiṯ s jjehḏ, ṯenna:
"Ṯewḍa, ṯewḍa Babil ṯameqqrant!
Ṯeḏweȓ ḏ ṯazeddiɣṯ n ccayaṭin,
ḏ ṯanwaȓṯ i mkuȓ jjen aƹeffan,
ḏ axbuc i mkuȓ ajḍiḍ iǧan ḥram ig iƹiffen.
3 Ȓaḥeqqac marra ȓegnus swin zeg waman n uḍiȓ
n lfasad nnes war iḥȓi,
fesḏen akis izeǧiḏen n ṯmurṯ.
Isebbaben n ṯmurṯ uwin-d aṭṭas n wagȓa
zeg ufelles nnes ḏ ameqqran."
4 Sȓiɣ ij n ṯmijja nneɣnit zeg ujenna ṯeqqar: "Ffɣem zi ṯendint nni ya ccaƹb inu, ḥima war tcarcem ḏi ȓmuƹṣiyaṯ nnes, ḥima war kenniw teȓqifent lmuṣibaṯ nnes.
5 Ȓmuƹṣiyaṯ nnes rnint ḥetta aȓ wami uwḍent ɣar ujenna, Arebbi war ittu ca ccerr nnes.
6 Arreṯ-as min ḏawem ṯegga nettaṯ, dublaṯ-as ṯnayen ṯwaȓaṯin ȓefƹayeȓ nnes. Ȓkas nni iy ṯsessew i yiwḏan, sesswem-as-ṯ marṯayen.
7 Cḥaȓ ma ṯsemɣer ixef nnes, cḥaȓ ma ṯƹic ḏi ccehweṯ nnes, anectu nni iy t ɣa ṯƹeddbem, anectu nni iy t ɣa ṯesxeyyqem. Liʼanna ṯeqqar ḏeg wuȓ nnes: Aqa qqimeɣ ḏa am lmalika, nec war ǧiɣ ca ḏ ṯajjaȓṯ, ƹemmarṣ aḏ ḥezneɣ.
8 X manaya axas munent ȓmuṣibaṯ ḏeg yij n nhar, iƹni ȓmewṯ ḏ uḥzan ḏ buheyyuf. Aḏ teḥreq s ṯmessi. Ȓaḥeqqac Siḏi Arebbi iy xas ɣa iḥekmen, netta ijḥeḏ.
9 Izeǧiḏen n ṯmurṯ iy kis ifesḏen iy kides iƹicen ḏi ccehweṯ, axas run aḏ ḥeznen xmi ɣa ẓren ddexxan n ṯmessi nnes.
10 Aḏ bedden ɣar ȓeggwaj s ṯiggwḏi n ȓaƹḏab nnes, niṯni qqaren: Ya Laṭif, ya Laṭif! A ṯandint ṯameqqrant, ya Babil ṯandint ijehḏen! Ḏeg yij n ṯsaƹat ihwa-d xam lḥisab ḏ lƹiqab!
11 Isebbaben n ṯmurṯ, axas run aḏ ḥeznen ȓaḥeqqac sseȓƹaṯ nsen war tifen wi t ɣa isɣen.
12 Sseȓƹaṯ nni n dheb, ḏ nnuqarṯ, ḏ lwiz, ḏ jjuhar, ḏ ȓkettan n lulan aṣebḥan, ḏ ȓkettan gruna, ḏ ȓeḥrir, ḏ ȓkettan azeggwaɣ iḥḏeq, ḏ marra min itwaṣennƹen s ukeccuḍ n umeḍzi,a ḏ marra min itwaṣennƹen s iffeɣmusen n lfil, ḏ marra min itwaṣennƹen zeg ukeccuḍ iɣran, ḏ nneḥḥas, ḏ ȓeḥḏiḏ, ḏ marmu,
13 ḏ ȓqarfa, ḏ lƹiṭar, ḏ tbaxur, ḏ murr,b ḏ tbaxur lluban, ḏ waman n uḍiȓ, ḏ zzect, ḏ waren lfurs, ḏ yirḏan, ḏ ifunasen, ḏ iḥuȓiyen, ḏ yiysan, ḏ ikarruṯen, ḏ isemɣan iƹni yiwḏan.
14 Aḏ inin isebbaben: Min ṯƹecceq ccehweṯ nnem war ṯ tifeḏ ca. Marra agȓa ḏ ȓxir nnem aḏ iqḍa, ƹemmarṣ aḏ d iḏweȓ.
15 Isebbaben nni ig iggin agȓa s tijara akiḏes aḏ bedden ɣar ȓeggwaj s ṯiggwḏi zi ȓaƹḏab nni, aḏ run aḏ ḥeznen.
16 Aḏ inin: Ya Laṭif, ya Laṭif! Ṯandint-a ṯameqqrant, tuɣa xas ȓkettan n lulan aṣebḥan ḏ ȓkettan gruna ḏ ȓkettan azeggwaɣ iḥḏeq, ṯzewweq ixef nnes s dheb ṯegga lwiz ḏ jjuhar!
17 Ḏeg yij n ṯsaƹat iruḥ marra manayenni!
Arruyas n iɣarruba ḏ yinni itsafaren ḏeg uɣarrabu ḏ ibeḥriyen ḏ marra yinni itƹicen zi ȓebḥar bedden ɣar ȓeggwaj,
18 xzaren ɣar ddexxan n uḥraq nnes. Qqaren s jjehḏ: Man ṯandint iǧan amecnaw ṯandint-a ṯameqqrent?
19 Neṭṭren caȓ x izeǧifen nsen, sɣuyiwen, trun, ḥezznen, qqaren: Ya ȓefḍiḥeṯ, ya ȓefḍiḥeṯ n ṯendint ṯameqqrant! Ayṯbab n iɣarruba ḏi ȓebḥar ḏewȓen ḏ twajar liʼanna ṯandint ḏayes agȓa aṭṭas! Ḏeg yij n ṯsaƹat kuȓci iruḥ!
20 Fareḥ ay ajenna x uhḏam nnes. Farḥeṯ a ȓmuminin ṣaliḥin ḏ arrusul ḏ lʼanbiya! Arebbi iḥaseb-it x min ḏawem ṯegga."
21 Ij n lmalaʼika ṯejheḏ ṯeysi ij n uzru amecnaw azru n ṯsirṯ ṯameqqrant, ṯenḍer-iṯ ḏi ȓebḥar, ṯenna: "Ammu s jjehḏ iy ɣa ṯmenḍar Babil ṯandint ṯameqqrant, war tiȓi ca umbaƹd ƹemmarṣ.
22 Zi ssa aȓ ṯsawent ƹemmarṣ aḏayem sȓen ṣṣut n imeḏyazen ḏ yinni iccaṯen tagembrit ḏ yinni itṣuḍen ḏi zzammar ḏ ṯemja.c Ƹemmarṣ aḏayem yiȓin yinni itṣenaƹen mammec ma ṯegga ṣṣenƹaṯ nsen. Ƹemmarṣ aḏayem sȓen ṣṣut n ṯsirṯ.
23 Ƹemmarṣ aḏayem ṯceƹƹeȓ ṯfawṯ n ȓqendiȓ. Ƹemmarṣ aḏayem sȓen ṣṣut n muȓay ḏ ṯsȓiṯ. Aqa isebbaben nnem tuɣa ǧan ḏ imeqqranen n ṯmurṯ, aqa s sḥur nnem ṯxeḏƹeḏ marra ȓegnus.
24 Dayes ig ufin iḏammen n lʼanbiya ḏ ȓmuminin ṣaliḥin, ḏ marra yinni itwanɣen ḏi ṯmurṯ."