Ssaƹḏ n yinni itwaƹarḍen ɣar umensi n ȓfarḥ n yizmar
19
1 Menbaƹd i manaya sȓiɣ ij n ṯmijja amecnaw ṣṣut n waṭṭas n ȓɣaci ḏeg ujenna, ṯeqqar s jjehḏ: "Ḥemḏeṯ Arebbi!a Asenjem ḏ lƹaḍama ḏ jjehḏ i Arebbi nneɣ.
2 Ȓeḥkam nnes ḏ ȓḥaqq, iǧa nican. Iḥaseb lfasda ṯameqqrant ig isefsaḏen ṯamurṯ s lfasad nnes, iƹeqqeb-it ƹlaḥsab iḏammen n yinni iy ṯ iƹebbḏen."
3 Nnan ṯwara wis ṯnayen: "Ḥemḏeṯ Arebbi! Ddexxan nnes itgaƹƹaḏ i ȓebda n ȓebdaṯ."
4 Arbeƹa u ƹecrin n imɣaren ḏ arbeƹa n lmexluqaṯ sejjḏen i Arebbi iqqimen x lƹarc, qqaren: "Amin! Ḥemḏeṯ Arebbi!"
5 Ṯusa-d ij n ṯmijja zi lƹarc ṯeqqar: "Ḥemḏeṯ Arebbi, ya lƹibad nnes marra, a yinni ṯ iteggwḏen s imezyanen ḏ imeqqranen!"
6 Sȓiɣ ij n ṣṣut amecnaw ṣṣut n waṭṭas n ȓɣaci, niɣ am ṣṣut n waṭṭas n waman, niɣ am ṣṣut n wajjaj ijehḏen, iqqar: "Ḥemḏeṯ Arebbi! Siḏi Arebbi nneɣ ig izemmren i kuȓci iḥekkem.
7 Yellaham a nfarḥeṯ, a nezhuṯ, aṯ nsemɣareṯ! Ȓfarḥ n yizmar aqa yiweḍ-d, ṯasȓiṯ nnes ṯsewjeḏ ixef nnes.
8 Immuc-as axas ṯegg ȓkettan n lulan aṣebḥan, ireqq, iṣfa."
(Ȓkettan n lulan aṣebḥan iƹni netta ḏ ȓexḏayem iǧan nican n ȓmuminin ṣaliḥin.)
9 Ṯenna-ayi lmalaʼika: "Ari manaya: Ssaƹḏ n yinni itwaƹarḍen ɣar umensi n ȓfarḥ n yizmar!" Ṯenna-ayi ƹaweḏ: "Awaȓen-a ǧan ḏ ṣṣaḥ zi Arebbi."
10 Uḍiɣ-as ɣar iḍaren nnes aḏas sejjḏeɣ, ṯenna-ayi: "Lla! Nec ḏ ȓƹabḏ amecnaw cek amecnaw ayṯmac iy ṭṭfen x min xef icheḏ Ƹisa. Sejjeḏ-as i Arebbi! Ȓaḥeqqac minxef icheḏ Ƹisa netta ḏ arruḥ n l'anbiya."b
Wenni inyin x uyis ḏ acemȓaȓ
11 Ẓriɣ ajenna inurzem, ḏin ij n uyis ḏ acemȓaȓ, wenni xas inyin qqaren-as ȓaman ḏ ȓḥaqq. Itḥasab, itḥarab s ȓḥaqq.
12 Ṯiṭṭawin nnes amecnaw ḥaḏuq n ṯmessi, x uzeǧif nnes aṭṭas n ttajaṯ. Yura xas ij n yisem war ṯ issin ḥadd illa netta.
13 Igga xas čammir iɣeḍsen ḏeg iḏammen, isem nnes tȓaɣan-as Awaȓ n Arebbi.
14 Ȓƹaskar n ujenna teḏfaren-ṯ, nyin x yiysan ḏ icemȓaȓen, ggin arruḍ n ȓkettan n lulan aṣebḥan ḏ acemȓaȓ inqa.
15 Iteffeɣ-d zeg uqemmum nnes ssif iqḍeƹ, azzayes yuweṯ ȓegnus. Netta aṯen irwes s uƹekkaz n ȓeḥḏiḏ, axasen iƹeffesc ḏi ṯsirṯ n waman n uḍiȓ, iƹni lƹiqab ameqqran n Arebbi ig izemmren i kuȓci.
16 Yura x učammir nnes ḏ umeṣṣaḍ nnes ij n yisem: Azeǧiḏ n izeǧiḏen ḏ Mawlana n mawlanaṯ.
17 Ẓriɣ ij n lmalaʼika ṯbedd ḏi ṯfucṯ, ṯesɣuy s jjehḏ, ṯeqqar-asen i marra ijḍaḍ iṭṭawen ḏi ȓwesṭ n ujenna: "Araḥem-d, muneṯ ɣar umensi ameqqran n Arebbi
18 ḥima aḏ teccem aysum n izeǧiḏen ḏ uysum n arruyas n ȓƹaskar ḏ uysum n yinni ijehḏen ḏ uysum n yiysan ḏ yinni xasen inyin ḏ uysum n marra iwḏan, yinni ɣar iǧa bab nsen ḏ yinni ɣar iǧa lḥurriya nsen, s imezyanen ḏ imeqqranen."
19 Ẓriɣ ȓwaḥc ḏ izeǧiḏen n ṯmurṯ ḏ ȓƹaskar nsen njemƹen ḥima aḏ ḥarben wenni inyin x uyis ḏ ȓƹaskar nnes.
20 Itwaṭṭef ȓwaḥc ḏ ameḥbus, akiḏes wenni itarran ixef nnes ḏ nnabi iy tuɣa iteggen lmuƹjizaṯ zzaṯ i ȓwaḥc. S lmuƹjizaṯ nni ixḏeƹ yinni ḏi ṯeǧa lƹalama n ȓwaḥc tsejjaḏen i lʼaṣnam nnes. Ȓwaḥc ḏ wenni itarran ixef nnes ḏ nnabi menḍaren s ṯnayen iḏsen ḏeg uyeȓmam n ṯmessi ireqqen s ȓekbriyeṯ u niṯni s buḥbeȓ.
21 Ssif nni iy d iffɣen zeg uqemmum n wenni inyin x uyis inɣa marra yinni iqqimen, jjiwnen marra ijḍaḍ s uysum nsen.