Cciṭan itwaqqen aȓef iseggwusa
20
1 Ẓriɣ ij n lmalaʼika ṯehwa-d zeg ujenna ɣares ḏeg ufus nnes ȓmeftaḥ n ȓaǧeɣ bȓa ȓaḥedd ḏ yij n ssensȓeṯ ṯameqqrant.
2 Ṯeṭṭef wenni am ddaynaṣur netta ḏ fiɣer nni ḏi zman, iƹni Ibȓis niɣ Cciṭan, ṯeqqen-iṯ aṯ teḥbes aȓef iseggwusa.
3 Ṯenḍer-iṯ ḏi ȓaǧeɣ bȓa ȓaḥedd, ṯbelleƹ xas ṯawwarṯ, ṯcemmeƹ-it ḥima zi ssin aȓ ṯsawent war ixeddeƹ ȓegnus, aȓ ɣa kemmȓen aȓef iseggwusa nni. Menbaƹd i manaya labud aḏ itwaḍȓeq cwayt n ȓweqṯ.
4 Ẓriɣ lƹarcaṯ, yinni xasen iqqimen ṯemmuc-asen ssulṭa aḏ ḥekmen. Ẓriɣ buḥbeȓ n yinni umi tuɣa itwaqessen izeǧifen nsen liʼanna ḏeffaren min xef icheḏ Ƹisa ḏ wawaȓ n Arebbi. Niṯni tuɣa war sejjḏen bu i ȓwaḥc uȓa i lʼaṣnam nnes, war qbiȓen ca lƹalama nnes ȓa x ṯenyarṯa nsen uȓa x ufus nsen. Kkaren-d zi ȓmewṯ ḥekmen ak Ƹisa aȓef iseggwusa.
5 Manayenni ḏ lqiyama ṯamezwarut. Imettinen nneɣnit war tnekkiren ca zi ȓmewṯ ḥetta aȓ ɣa kemmȓen aȓef iseggwusa.
6 Yinni d ɣa ikkaren ḏi lqiyama ṯamezwarut, ssaƹḏ nsen, aqa-ṯen ṣfan. Ȓmewṯ wis ṯnayen war ɣares tiȓi bu ssulṭa xasen. Aḏ iȓin ḏ ȓfuqha n Arebbi ḏ Lmasiḥ, akis ḥekmen aȓef iseggwusa.
Cciṭan itwanḍer ḏeg uyeȓmam n ṯmessi
7 Xmi ɣa kemmȓen aȓef iseggwusa, aḏ itwaḍȓeq Cciṭan zi ȓeḥbes nnes.
8 Aḏ d iffeɣ aḏ ixḏeƹ ȓegnus ḏi arbeƹa n jjihaṯ n ṯmurṯ, iƹni Hajuj u Majuj. Aṯen ismun aḏ ḥarben, lƹadad nsen amecnaw ijḏi n ȓebḥar.
9 Sfin-d niṯni x ṯmurṯ amen ṯekmeȓ, nnḍen mani ƹezzben ȓmuminin ṣaliḥin iƹni ṯandint nni iƹizzen. Ṯehwa-d xasen ṯmessi zeg ujenna, ṯecc-iṯen.
10 Imenḍar Ibȓis iy ṯen ixeḏƹen ḏeg uyeȓmam n ṯmessi ḏ ȓekbriyeṯ mani iǧa ȓwaḥc ḏ wenni itarran ixef nnes ḏ nnabi. Aḏ twaƹeddben ǧiȓeṯ ḏ nhar i ȓebda n ȓebdaṯ.
Yewm Lḥisab ḏ Lƹiqab
11 Ẓriɣ ij n lƹarc ḏ acemȓaȓ ḏ ameqqran. Wenni xas iqqimen ṯerweȓ zzayes ṯmurṯ ḏ ujenna war ḏasen iqqim umcan.
12 Ẓriɣ imettinen, imeqqranen ḏ imezyanen, bedden zzaṯ i lƹarc. Nurzmen lkutub, inurzem ij n lkitab nneɣnit netta ḏ Lkitab n Ṯuḏarṯ. Twaḥasben imettinen s min yurin ḏi lkutub ƹlaḥsab ȓexḏayem nsen.
13 Ȓebḥar isellem imettinen ig icca. Ȓmewṯ ḏ Lʼaxira sellmen imettinen iy ḏaysen. Twaḥasben, kuȓ ijjen ƹlaḥsab ȓexḏayem nnes.
14 Ṯmenḍar ȓmewṯ ḏ Lʼaxira ḏeg uyeȓmam n ṯmessi. Ayeȓmam nni n ṯmessi netta ig iǧan ḏ ȓmewṯ wis ṯnayen.
15 Wen ufin war izemmem ḏi Lkitab n Ṯuḏarṯ imenḍar ḏeg uyeȓmam n ṯmessi.