Ibriḏen n ddunect tƹerraḍen i Arebbi
4
1 Iwa ixarwiḍen ḏ imenɣan iy ǧan jarawem, manis d tekken niṯni? Tasen-d zi ccehweṯ nwem ṯaƹeffant iy itmenɣan ɣar ḏaxeȓ nwem.
2 Xmi war tifem ca x minxef ṯrezzum, kenniw ṯneqqem. Maɣar tmenɣam u temnaqarem jarawem? Liʼanna war ṯzemmarem ca aḏ tawḍem ɣar min ṯƹeccqem. Maɣar war ɣarwem ca? Liʼanna war tettarem ca i Arebbi.
3 Xmi ḏas tettarem, war ḏawem iticc ca. Maɣar? Minzi tɣalaṭem ḏi min tettarem wami ṯexsem aḏ tseƹƹfem ccehweṯ nwem u ṣafi.
4 A yinni ixeddƹen, ma war ṯessinem ca kenniw belli wenni itexsen ddunect wenni ḏ ȓaƹḏu n Arebbi? Wah, wenni ixḍaren dunnect-a wenni nican ḏ ȓƹaḏu n Arebbi.
5 Awaȓ n Lkitab iqqar: “Arruḥ nni iy ḏaneɣ igga Arebbi, wenni iƹizz xas aṭṭas." Ma tɣiȓ-awem awaȓ nni war ɣares bu ȓmaƹna?
6 Walakin netta irni-yaneɣ arḍa zzayes. S manaya iqqar Lkitab: “Arebbi ḍed i yinni isemɣaren ixef nsen, maca yinni isemzayen ixef nsen iticc-asen arḍa nnes.”
7 S manaya ṭaƹeṯ i Arebbi. Ƹarrḍeṯ i Ibȓis, netta azzaywem irweȓ.
8 Aḏseṯ ɣar Arebbi, netta aɣarwem d yaḏes. A yinni ixḍan, sirḏeṯ ifassen nwem. A yinni kuȓ ȓaƹqeȓ min ḏawem iqqar, seṣfaṯ uȓawen nwem.
9 Xeyyqem, ḥeznem, trum. Beddȓem ṯaḍeḥḥact nwem ɣar imeṭṭawen, ȓefraḥeṯ nwem ɣar uxiyyeq.
10 Semzyeṯ ixef nwem zzaṯ i Siḏi Arebbi, netta akenniw isemɣar.
War tƹeyyab ca umac
11 Ay ayṯma, war qqareṯ bu ȓbaṭeȓ x wayawya, minzi wenni iqqaren ȓbaṭeȓ x wumas niɣ itƹeyyab-iṯ, qa netta iqqar ȓbaṭeȓ x Ccariƹa itƹeyyab-it. Xmi tƹeyyabeḏ Ccariƹa ataf cek war zzayes ṯxeddmeḏ ca, cek ḏ ȓqaḍi nnes waha.
12 Ḏinni ijjen ig iggin Ccariƹa ig iǧan ƹaweḏ ḏ ȓqaḍi, netta ḏ Arebbi. Netta waḥḏes ig izemmaren aḏ isenjem niɣ aḏ isefna. Walakin cek min ṯeƹniḏ ḥima aḏ tƹeyybeḏ ajjar nnec?
Ḏeg ufus n Arebbi iy ḏi ṯeǧa ṯuḏarṯ nneɣ
13 Ṣennṭeṯ mliḥ a yinni iqqaren, “Yallah a nraḥ nhara niɣ ṯiwecca ɣar ṯendint-a niɣ ɣar ṯendint-in, ḏinni iy ɣa nseƹḏu lƹam, a negg ttijara a nerbeḥ.”
14 Iwa, ma ṯessnem min ɣa iweqƹen ṯiwecca? Lla, aqa ṯudarṯ nwem am yij n ṯseynut tmeḍhar-d ḏeɣya ṯruḥ.
15 Itxeṣṣa-awem aḏ tinim ammu: "Meȓa ixes Siḏi Arebbi a neddar, wa a negg cɣeȓ-a niɣ cɣeȓ-in.”
16 Maca ȓexxu kenniw teftaxarem, tsemɣarem ixef nwem. Marra ttakebbur-a amecnaw wanita netta ḏ ccerr.
17 Wenni itwaȓen ȓxir aṯ igg walakin netta meȓa war ṯ iggi ca, itwaḥsab igga ȓmuƹṣiyeṯ.